Monday, December 29, 2008

صمت..

ككمان توقف عن العزف...0

Saturday, December 27, 2008

وشوشة

(حوار ما بين الفراشة والوردة)
.
.
ممكن أقولك سر....؟
.
.

Friday, December 19, 2008

كرسي هزاز


يجلس بركن الغرفة, يتصفح بعض أوراق العمل, منشغلاً هو, بالكاد يلحظ وجودي, يطفئ سيجارته الثالثة.. يرتشف قليلاً من القهوة..وتلك العوينات تحجب عيناه عني!! "عايزة اتعلم بيانو" , اعلنها له من علي كرسيي الهزاز, .يضحك, فنحن لا نمتلك البيانو اصلاً! انظر الي تلك المساحة في الغرفة, اتخيل ...بيانو, جو كلاسيكي, استمر بالعزف وهو بين أوراقه يستمتع بتلك النغمات الرقيقة التي حتماً ستحدثه عن حبي له. سيترك كل شئ, ويجلس بجواري وأنا أعزف, أصابعه ستشترك في عزف أعذب لحن يأسر القلوب! "خيالك واسع"...فاضحك! اسحب كرسياً واجلس الي جواره, اضع رأسي الصغير علي المنضده..بمحاذاة الورق, وعيناي لا تفارق وجهه, ينظر اليّ بين الفينة والاخري, "مجنونة انتي".. ارد بكل هدوء وانا ابتسم وعيناي لا تفارق وجهه الحاني "مجنونة انا"!... تمتص وجنتي برودة زجاج المنضدة, و تتحول الي بقعة دافئة كلما اطلت النظر اليه! يترك أوراقه قليلاً, يمرر أصابعه بين خصلات شعري الأسود القصير, يداعب وجنتي , "كدة راسك ح توجعك"... "مش مهم" اجيبه بنبرة هادئة سريعة دون أن أحيل نظري عنه! كان ينتابني شعور غريب منذ الصباح بالقلق والخوف..وكعادتي منذ الطفولة..كلما داهمني هذا الشعور بعدم الأمان بغتة, أجلس بجوار من أحبهم, اختبئ بين أحضانهم, استمتع بهذا الدفء, حتي أغمض عيناي! "مش ح تخلص بقي؟".."شوية كدة"! صرت أعتاد علي إجابته المقتضبة تلك, لكنها بدأت تزعجني في الأونة الأخيرة.. كأنه ليس معي! تعبث فيروز بعقلي "شو بخاف حتي الخطب ما يلاقيك"! أعود إلي الكرسي الهزاز..وكسيدة عجوز تخطت الستين، أمسك بإبر التريكو المعدنية الباردة.. لأستمر بغزل كوفية صوفية , يتضفر فيها اللونين "الازرق" و "الوردي"..فأنغمس في حديث صامت بيني وبين تلك الغرز الدقيقة! في أول سطر حدثتهم عن حبي له, وأني افتقد وجوده معي. في السطر الثاني, أسب عمله الذي يسلبه مني, وحينما وصلت للسطر الخامس, كنت قد انتهيت من وصفة "صينية البطاطس بالزعتر واللحمة" التي تعلمتها من أجله ! واستمر.. أحيك الغرز بعصبية وأنا اشكو لها منه... ولدي السطر العاشر..أتوقف لأني أبكي سراً بلا أي داعي! أُلقي بالتريكو جانباً, اترك منفعلة الكرسي الهزاز يتحرك هو الاخر بعصبية في مكانه, اذهب إاليه.. التفت من خلفه, أميل بجسدي الضئيل علي ظهره المنحني علي الطاولة,ذراعاي تلتف من حوله, ولا تفلته من بين أحضاني الان, وصدري يعلو ويهبط مع أنفاسه. "انا متضايقة اوي...انت وحشتني اوي"! يربت علي يدي و يلثمها.."وانا باحبك اوي" ! وأسمع أنا من حيث لا أعلم أعذب لحن..من بين دقات قلبي وقلبه!ه
_____
تمت

Tuesday, December 16, 2008

اريد حلاً..

يمكن بالمقلوب..الدنيا تتعدل؟!ه

Thursday, December 11, 2008

تقوم عن جد...تنساني!؟

وهديتني وردة
فرجيتها لصحابي
خبيتها بكتابي
زرعتها ع لمخدة
...

هديتك مزهرية
لكن كنت تتداريها
لا تعتني فيها
تا ضاعت لهدية
.
.
.

___
فيروز: باكتب اسمك
والعنوان : أنا فزعانة

Tuesday, December 9, 2008

كشف حساب





انا عارفة اني بدات تدوين في اواخر ابريل..بس ماكنتش اعرف انه عدا كدة بسرعة واني بدات فعلا يوم 21 ابريل في مدونتي الاولي اللي لازلت اعتز بيها..واللي اضطررت اني اسيبها واجي هنا في اوائل يونيو..يعني فعلا مرت سنة..بامتحاناتها و نتيجتها و رحلاتها و اجازتها, بذكرياتها,
بألمها و سعادتها


.


.
Lonely was I in my cursed previous life.


Stronger am I now beneath this lovely tomb.


Life's but a play rehearsed once in the womb,


Replayed again till stabbed by a knife


And here lies my spirit to the day of doom.


May here know I the truest rest, not in the former gloom


(by my Algerian Friend dedicated to me :Walid Boureghda)


.


.
فتحت مقبرة الذاكرة.. و قررت انها انورها و انعشها كدة و اعرضها لاشعة الشمس ..عشان ما تبقاش عتمة و اعرف ادخل فيها و اعيد اكتشاف ما قد نسيت..و من هنا كانت اول مرة امسك ورقة و قلم عشان اكتب خواطري..او ما اسميته مذكرات ع الهوا..قررت ان عند انتهاء كل حدث اكتب له شاهد قبر يشهد عليه و يتحفر في ذاكرتي عشان مش يضيع مني زي الباقي

.


.

ما من احد غيري


يفزعني


يتحداني


يغريني ان ادخل كل مغامرة


عليّ ألقاني


احمد تيمور
.


.
بدات الموضوع كله لما كتبت عرض لفيلم ميونيخ
و عرضته علي اصدقاء...شجعني البعض اني احاول اني استمر بكتابة افكاري في المجال ده و مناقشاتي عن الافلام..بروفيسور امريكي له موقعه الالكتروني عرفني لاول مرة كلمة مدونة..وليه مش يبقي ليا انا كمان مساحتي اني اكتب حتي و اجرب.. و بعدين تلعب الصدفة لعبتها و اتعرف علي مدونة الزميل و الصديق و المكافح و المناضل مختار العزيزي..ومحاولاته ضد غسيل المخ..وانبهرت فعلا بمدونته ماشاء الله...وكانت كلمة مدونة تساوي في عقلي مدونة مختار العزيزي... فجمعت ورقي و رحت مقلداه و هووب ادي البلوجسبيريت..وبعدين نور و حنين اصدقاء الكلية الاعزاء عثرت عليهم و عثروا علي في العالم التدويني,,, لسة فاكرة اول تعليق لاحمد شقير , بعدك علي بالي, اياكش تولع, بلو, ايف, معت, جدو اسكندر, السدغ , و يتوالي الاصدقاء من مطرقع و صاحب البوابة,
az
مكسوفة, يحيي سالم, هشام, فيلم, غيبوبة انسان و غيرهم , حتي مختار العزيزي قبل ان يـتأكد اعتقد اني عندي مدونة
.


.



وتتوالي الزيارات, و المقبرة اتسعت,و نقلت من ترب الغفير لترب الامام, وفتحت المدونة هنا, و بما ان العشرة ماتصعبش الا ع الكافر, لم اجرؤ علي اصدار امر بازالة المدونة القديمة التي لازلت اعتز بيها.. بمرور الوقت ..اكتشفت ان المدونة هي رحلة اسكتشاف لذاتي واني لما باحب افضفض الشئ اللي حرمت منه في الحقيقة, باقعد اتكلم معايا , فبقيت انا والمدونة اصدقاء..اكتب ما يحلو لي كيفما يحلو لي ..لاني باتكلم معاها, عشان بعد ما باكتب اخر كلمة باكون حطيت ايدي علي حاجة فيا جديدة او بافهمها عني او عن اللي حوليا
.


.
سألني عز في حواره : البيت و الاصدقاء عارفين بامر مدونتي؟ ..ح اجاوب باستفاضة اكتر المرادي و ح اقول ان مش حد اهتم...او اهتموا مرة اتنين و نسيوا..فاكرة ازاي عنايتي الفائقة اني اوصل لينك مدونتي الي الاعزاء منهم فقط..زي ماكون باديهم هدية خاصة مني...عشان يشاركوني..عشان يتواصلوا معايا..لفشلي في التواصل معهم بطريقتهم..ظننت اني باعطائهم لينك المدونة اني باطلعهم علي احد اسراري لا بل امد لهم جسرا الي قلبي و دواخل نفسي.. مددت لهم يدي ليتعرفوا علي , وان يطلعوا علي ما لم استطع ان ابوح به بالكلام ليسمعوه..فدعوتهم لقرائته... كتير كنت باتخيل انه فلان قرا تدوينة النهاردة , فلانة هي الانونيموس اللي سابت التعليق,,لكن الايام اثبتت ليا ان مفيش حد منهم كان بيقرا,,وبما اني قررت تخطي خيبة الامل اللي اصابتني منهم, فاجأني سؤال احدهم من يومين كدة : "صحيح اخبار البلوج ايه؟" ..كويس الحمد لله...لسة بتكتبي ...ايوة!!...طب ابقي اديني اللينك تاني عشان ضاع مني لما...ماسمعتش الباقي...المرادي ترددت اني ادي اللينك ..الجسر اللي كان ممدود قفلته من تاني
.


.


اعتز بكل اصدقائي الجداد من عالم التدوين واللي مش ح اقدر اذكر اسماء المرادي (علي عكس اللي حصل مع مدونتي الاولي) لانهم كتير الحمد لله دول عايزين سلسلة تدوينات مش تدوينة واحدة :)..اعتز بمشاركتهم ومناقشاتهم..حتي وان اختلفنا,,فلازال الود والاحترام موجود..احب مدوناتي الاخري سلامترو كافيه مع المعلمين الجامدين جدا اللي ربنا يرجعهم من الامتحانات بالسلامة..حجاز كار
حيث الموسيقي ..كلنا ليلي
اللي اسمتعت جدا بكواليس العمل ما احلي بنانيت عرفتهم بجد و عملنا اجدعها شغل.. بنسكافيه وكابتشينو
مع احلي ماج و اخيرا انضمامي لفريق عمل زمش...وفعلا مرت سنة


.


.
اما عن تدويناتي القريبة لي...زي بتوع الافلام كلهم ابنائي..:))ببساطة هي حالات و ردود افعال متعددة... مهما اشتد بي الضيق او مهما كنت طايرة من السعادة
احب ارجع لهم لاني باتذكر تفاصيل الحدث اللي تسببت في كتابة شاهد القبر ده..وان كنت اقول سر اني باحب تدوينة بعدك علي بالي لانها صراحة قصة واقعية بتصرف..ولانها نبؤة وتحققت بعديها


.


.
اطرف حاجة بجد هي تدوينة عن فيلم اوقات فراغ...اللي الي الان بيجيلي عليها تعليقات مش من مدونين.انما من شباب اعتقد انه صغير..فاكرين اني اعرف ابطال الفيلم وو النبي هاتولي نمرة احمد حاتم وعشان خاطري قولوله اني باحبه..لدرجة اني شكيت ان لينك التدوينة ديه اكيد في احد المنتديات من النوعية ديه:))
.


.


This Life is weary


A Tear - A Sigh


A love that changes


and then- Good Bye


.


.


هي ديه الكلمات اللي اخترتها انها تكون في البروفايل واول شاهد قبر


هذه الحياة مرهقة


دمع و تنهيدة


حب -يغير و- يتغير


ثم, وداعا


.


.


شكرا لكل من قرأ و علق و شارك ودفن معي الاحزان


شكرا لكل من فضل الصمت و تركني اهلوس في الظلام


.


.


يا نجاتي...انفخ البلالين



Sunday, December 7, 2008

هو بجد بجد..مش العيد فرحة!؟

انا كبرت اه..بس برضه لسة باخد عيدية
.
.
ح اشتري بمب وصواريخ, بس مش ح العب بيهم..باخاف منهم
.
.
العيد مش عيد من غير الصلاة ف جامع مصطفي محمود
.
.
وحشتني الوقفة ف البلكونة عند نينة..عشان اتفرج ع الدبح من بعد
.
.
ريحة الفتة اللي مش باحبها ولا باكلها
.
.
صفاء ابو السعود..و "سعد نبيهة" بتاعها ده اللي مطلهش سعد نبيهة (سعدنا بيها)0
.
.
البالونة الكبيرة اللي جواها رز..اللي بتعمل دوشة
.
.
لبس العيد..الجديد
.
.
يا رب ...خلي العيد بجد.."فرحة" علينا كلنا

Thursday, December 4, 2008

C'est Moi...

(a graffiti drawn by Azza )

What's wrong with the simple name "Hagar" ? hehee nothing in fact..I always loved it…as long as you write it as "Hagar" and pronounce it as such..not as "HagEr"

Reasons why I always hated "Hager"..
Howa hager ra7 fein he3 he3 he3 (sa7'eeefa) lol
And there was that old nurse at Dr. Fayyad's (my pediatrician) who used to call my name as Hager…and since I hated hospitals, clinics, and doctors, I hated the way she called my name!
My name is h a g a r..don't you dare write it with an E! :@ lol

Nicknames:
*Hagoora: a nickname my mum used to call me with, but some years ago..she stopped calling me that…dunno why! However, it's my nickname for both my grandparents! :D the name was again re-invented by my school friend, Dina..with Hagoor for her..it's that mingle of mind and childish soul! :D

*Gogo:…ah! The very common nickname ! lol..so cliché.. but I like it ! it's a shortcut to my name, lighter, bears the marks of childishness, "sha2wa" at times for some people.sisterly at times....and many like calling me that..and nothing else! It was also the very first name Heba , my sis, learnt and wrote with her very little hands! Also my very friend, Heba T. used to quote from 7'ali balak mn zozo, saying: 7'ali balak mn gogo, or me writing that question" MN Anta? Emda2 GoGo…and such "hatal"..lol or Gogo that Israeli girl with Adel Imam in Gom3a el shawan!

*Gogi… ! Heba's nickname for me..! it was later on adopted by many of my foreign friends! So it always bore that "dala3" "childishness" " English" aspect in me! Looool love Battou when she calls me so! Heba ,when she decides to pamper me..or let's say..enha tedla3 3alya ..she calls me Gogi! :D

*El Gog! LOL..Azza's creation…of course I'm in love with the name, and it best describes how Azza sees me and our friendship! I mean it was never one of the girly, sentimental friendships..like that of desperate housewives..lol..it's one of "na2er w n2eer" , intellectual discussions, "hatal" lol, childishness, craziness… all! It's a nickname that bears that..with some characteristics of strength and power ..lol msh dala3 mer2! It was all the time exclusive for Azza..whom I later on called El ZoZ lol

*GoG: A reinvention occurred..and now many,so many call me GOG..lol! it feels like anyone can –likes- calling me that! Shorter than Hagar, more friendly, breaks ice may be loool, of some masculinity may be..i dunno! Loool..brotherly, sisterly…?! Could be! It rhymes with "el m3lem gog or so" like Razan calls me lol some may see it standing for some aspects of my own personality! However, when Mona calls me "Gog" it's always different... :)

*Gooooog:… is another variation of GoG… Nouran's first creation! Love it as well..some use it along! More proceeds, as Gogz, Googziee..lol..and so on and so forth

*Google! A sole creative name by Nagla! I like!

*Hag & 7ag! Lol both are Azza's,,,despite Hag's definition (as an old lady) lol..but it was a simple abbreviation..done innocently lol..and the English version of el 7ag! :D as the motherly, powerful figure..the one in charge..the handling one..etc lol it's not so often used! But she once signed a chart she done for me..by Hag's presentation lol! Loved it! :D Also, she saved my name on her mobile as such!

*Hajar! Ok , I have to confess that I did not like that at first..but then..i started really to like it! Yes..Hajar..lovely indeed! Dr. Karma ..calls me that..and Mahitab, a colleague of mine from college! scarcely anyone else does that! Few of my friends may occasionally happen to call me so..and some even go around teasing me about that name..but well..I like it! :D related to university then...

*Hagarism! This you can find on most of the mobiles of my friends..as my saved name! lol the story behind that..was in my first year…we did not understand many of the schools of drama whatever that ended with ..ism..so in order to cheer ourselves up..i suggested that I'd create that school of Hagarism..and it'll have a year of speciality ,5th grade, and the graduation research will be on Hagarism! :D some do like calling me that name! let's say that I have a Hagarism way of life lool..p.s. wanted to name my blog as such! :D

*N'gugu…that's a very very special name…! derived from Ngugi Wa Thiong'o ( a Kinyean writer)! The story behind it.. is really nice..I worked on some presentation on this writer.. Dr. Karma coined my nickname Gogo and Ngugi..so I'm N'gugu! I simply love it..and won't allow anyone else to call me that LOL! Sharanya awy ana!

*Epi :D very common nickname..even before blogging…due to using this "epitaph" as a username and display name in other things..among friends..and they got this Epi thingie! It's nice one..! what's more interesting..when someone of my blogger friends..though knowing me in real life..goes on calling me Epi..:D not Hagar or any other name..as if I'm still Epi for some! Overall, a nice one! :) away from all letters as "g" and "h" lool!

*GawGaw..Neveen's nickname! She does that to tease me..and I also like it! It's so dear to me from her…:D along with, Prof. that was first mentioned by Monsieur Samir..not of any genius thing..but rather a prediction of the academic life I'll lead..and it was taken up by one of my very dearest person in my life…with a quite different intonation…hmm an intonantion that bears the meaning of " el m3lem el kbeer", " gogo","hagar herself"…that bond, brotherly, sisterly, and even..chidlishly…! it's different anyway..and I don't hear it but from that person..and no one else can adopt it by that meaning..because they'll eventually fail to grasp it's personal connotation! Lol few other call me that..but with the academic prediction..

*There are other nicknames as "el m3lem", Jojo, Hamees ( due to a past story that I was to be called so when i was born..and also my mania about Pharoahs), also Meshmesh el asly (that's 7'alo's nickname for me..since I was a little girl..and I was named so after a little puppet I had ) :D HagEr, is the teasing nickname Evaluna uses for me..lol and this is the only case I accept it from her.. because I name her so as well! :p hmm.. for dad I'm "Zebla so3'yra" then "Zebla kbeera"…lol what a paradox..how "zebla" (which already means something small ) be "Kbeera"..! lol There are also " el m3lem shar," 3agar(Niveen's creations), goga, gogty ( one of childishness and possession lol) , and also googish
.
*If someone I'm used from using a constant nickname, once that one uses my real name "Hagar"..I get to worry..lol this means something is wrong, really wrong! LOL it really freaks me out at times..especially if I know the way that person calls me!
>
* So, does the simple name "Hagar" bear all such derivations?! :D and I'll leave it to my friends to pick the name they like calling me with...Overall, I love them all :)!
.
.
.
*P.s. this post was inspired by Batoot's post of her hilarious nicknames :D

Wednesday, December 3, 2008

رسالة الي..الساحرة الشريرة

عزيزتي .....0
ولا بلاش عزيزتي..عشان انتي مش عزيزتي اصلا

نفسي اصحي الصبح..الاقي يوم الاربعاء ده اتلغي من الاسبوع..الاسبوع يبقي يجي كدة اتنين تلات خميس..ويكمل مع اسقاط الاربعاء..وانتي متعرفيش ان انتي محبوسة في يوم الاربعاء اللي تم اسقاطه..وتضيعي في ورقة النتيجة المقطوعة ومحدش ينقذك

نفسي بطني تبطل تكركب كل يوم اربعاء قبل ما اشوفك... و ان نفسي ما تغمش كل ما اعرف انك جيتي.. وان وشي ما يتقلبش علي سيرتك واني خلاص ماشية رايحة اقابلك فعلا!0

نفسي تفهمي اني مش باستريحلك..وانك واقعة من نظري اصلا..و اني مش باحب نفاقك ولا طريقتك في الكلام ..وانتي فاكرة انك بتفهمي..وانتي اصلا $#@%^#$ه

نفسي تعرفي برضه اني مش باحب نطقك..ولا اوضة المكتب الكئيبة اللي انتي بتقعدي فيها..مع انها كانت حلوة اوي ايام ما (...) كان بيقعد فيها! ولا انك فاكرة انك بتوريني طريق النور..وانتي بتعرفي في البتنجان بس

نفسي تعرفي اني مش باحب تصورك انك بتعلمينا التايهة..انتي نفسك تايهة! ولو ده علم..يبقي بناقصه! ه

نفسي تعرفي ان لو ربنا اداكي..وانك كبيرة..فالكبير كبير العقل والاخلاق والعلم والثقافة والتحضر..وانتي ملكيش ف كل دول! وان يا ستي ربنا اكبر...وان فوق ذي علم عليم!0

لازم تعرفي ان صوتك بالنسبة ليا مزعج..وان نظرتك مش بحبها..وان وجودك قرفني في الحياة..وان منايا السنة دي تخلص و ربنا يكفينا شرك!0

ولازم تعرفي اني ما اعرفش يعني ايه اكره حد.. واني مش باكرهك..بس الاكيد اني مش باحبك..انا مش باحبك! انا مش ح اخلي الكره يحرق طاقاتي ومشاعري..عشان انتي متستهليش اصلا حرقة دمي..بس بجد انا قلبي بينقبض كل مرة انتي فيها! مش ح يجري حاجة صدقيني لو اعتذرتي عننا!ح تبقي حتي عتقتينا لوجه الله في الايام المفترجة دي!0


زائد انتي بالنسبة ليا عبارة عن كتلة من الطاقة السلبية الشريرة اللي لازم تفضل بعيد في صحرا ..عشان ما تكئبش الناس..ازاي بقي يقعدوني معاكي ومابينا مسافة اقل من متر؟!0

كل يوم ثلاثاء بالليل بقيت اصاب بحالة من الاكتئاب..عشان الاربعاء جي! يا رب الصبر من عندك.. واكفينا الشر..وهونها علينا..وعديها علي خير!عشان انا بجد تعبت..والله تعبت..لو تعرفي انا قد ايه تعبت! بس مش عيزاكي تعرفي..ربنا هو اللي عالم بقي


اه ومن فضلك كمان..لما تشوفيني مش تبوسيني..عشان انا باحس ان الحية ذات الجرس هي اللي بتبوسني! انتي مش بتبوسي بحب.. وانا مش عيزاكي تبوسيني..ولا تحبيني.. انا باحس ان كلك اقنعة ومش بتعملي حاجة بحب, او صدق

انا مش باحب النفاق.. ابعدي بقي!ه


روحي يا شيخة...و ماترجعيش!0


امضاء
الغلبانة

Sunday, November 30, 2008

Defying All...


حالاً بالاً..سأصارع
أسد انما ايه..متوحش
وح اخلي وجهه شوارع
تصقيفة يا ناس..ميصحش
اهو جه
اهو جه
تصقيفة بقي
.
.
.

Saturday, November 29, 2008

A Sin...it will be!

شباك موارب
خايفة اطل منه
!

Tuesday, November 25, 2008

Bucket List...


Tagged by my dearest friend, Frustrated :)

Bucket List..
write whatever goals you wanna achieve in the next 8-10 years, any number of goals, and however big or small they are...they're still your goals enlisted! After putting your list...just TAG other ones, to dream along, and pinpoint their goals!

let's see..

1- dye my hair :D (it needs much daring to have a reddish colour or highlight lol)
2-being a professional driver and having a nice cute little car (needs some daring also)
3-finish my MA. and PhD insha Allah ya Rab ..ya Rab!
4- publish a book ( an intro to some book, a fictional one, an autobiographical one in English lol , and one in my speciality..) all of these or couple of them then go on with the rest for the next ten years lol.
5- travel to the UK, especially London.. study there may be! (Ok with the US. as well)
6- ab2a Auntie GooG :D (3yal Azza, Mona..and Hadeer)- bs di bta3t Rabna ya3ni hehehe
7- to have a reunion with my very first classes I taught!! (weird goal lol)
8- Do Hajj , and couple of Ummrahs (it's been such a long long time)
9- establishing a cultural venue, for scholars, students, a library and hold seminars ..etc(or at least being ready to have that for the next ten years..and ready with a serious plan, mafeesh 7aga b3eed 3an Rabna)
10- have a very big bookcase of my own, with all specialised and non-specialised books! :D (working on that )
11- travelling all over Egypt, especially to Sinaii, & another visit to Aswan and Luxor may be
12- do some translation project with Mona , and may be having a translation office, with her..she'd do the translation..I'd count the money LOL..kidding...:D (this can be a paving way or part of the Cultural Venue I'd found)
13- attend a concert for Fayrouz wherever it will be!
14- Travelling to Palestine, whatever the case is!! ( may be then it would have gained its independence ya Rab)
15- visting Algeria, and UAE, India and France.
16- Getting some magical spell that would improve my French language and make me speak that fluently :D
17- having met Bahaa Taher and thanked him for his (Abna2 Refa3a), attending something live for Tameem Al Barghouthi in Cairo..for many times just as I did for Mourid keda!
18- attending a concert by Mounir! bs matkonsh za7ma..aw tekon with seats :D
19- To have a land to be reclaimed..! (yep one of my goals) and have a house away from this Cairene life..!
20- el satr, wel se7a, wel 7elm...even if all of these above-mentioned goals were not accomplished in the first 10 years ya3ni... I wanna preserve the simple gift of dreaming!

....done so far with Hallucinating my bucket list.. you can mention less or more than those ones..just make sure that you've got a goal :)

let's see whom we'd tag along:

Ahmed- Mobarmeg 7or
Beautiful Mind
Ma 3alina
Hurricane
Lasto Adri
Yahya
Kalemat
7aneen

whoever is interested..please be my guest! :)


p.s. This records my first tag on this blog!


هدوء نسبي

اشتاقُ
للحظة
ج
ن
و
ن
!
______
اذكّر نفسي ليس إلا: "هدوء نسبي" ..كلاكيت ثالث مرة

Tuesday, November 11, 2008

خيط دخان



أخرجت من حقيبتي علبة السجائر, فضضت عنها الورق الشفاف, دسست انفي به لأستمتع برائحة التبغ غير المحترق, ألقيت "السوليفان" بعيداً وضحكت..فأنا أعرف كم كنت تنزعج من علبة سجائرك دون تلك الورقة الشفافة السخيفة! أعرف الطقوس التي سأجريها هذه الليلة جيداً..(ال ام زرقاء) سجائرك المفضلة! الساعة الثانية إلا دقائق قليلة بعد منتصف الليل ..لم أنم..كنت قد ارتشفت فنجاناً من القهوة (المحوجة) كفيلة بإبقائي متسيقظة لأعوام قادمة! أخرجت دفتري وفتحت صفحة اليوم (12 ديسمبر) ! اقرأ قليلا منها: "..السابعة صباحاً..يوم جديد..ح اشوفك! الثالثة عصرا: قابلت (..) رغينا شوية واتغدينا سوا..وفكرتني ان النهاردة 12 ديسمبر...وانا مكنتش ناسية! السابعة مساءا: ..اشتريت السجاير من كشك عم صبحي..الراجل استغرب معرفش ليه..اشتريت شيكولاتة ومشيت! العاشرة مساءا: وحشتني اوي ..ح اقابلك الليلة ..ح تيجي انا عارفة..وانا ح استناك ! منتصف الليل: "هج الحمام منه وبقيت الي حالي الي حالي"*.. باكرهك يا فيروز!" ..ابتسم لما خطته يداي علي مدار اليوم..والان انها الثانية بعد منتصف الليل: بداية الطقوس...سنتلقي! ارتديت "السويتشيرت" الكحلي الذي كلما رأيته كنت تسخر من منظري وانا اعقص شعري الي الخلف, كأني استعد الي الركض في مارثون اوليمبي, كنت اضحك علي التشبيه , وأنا مرتمية كعصفور صغير بين احضانك الدافئة! لكني تركت هذه المرة شعري مسدلاً كما كنت تحبه..ووضعت الكثير من عطرك المفضل..لا ينقصه الان سوى أن يمتزج برائحة سجائرك..لأتدثر بوجودك! أشعلت "سيجارة" وحيدة..وأسندتها علي حافة "الطفاية" ...جلست بجوارها علي الأرض ..لا لأشاهدها تحترق, انما لتستدعي تلك الاطياف في صمت..! كان الدخان يتموج في أشكال عدة.. أولهم, كانت ضحكة جميلة جداً..ثم وجهك الهادئ..فكانت عيناك الحانية.. ثم يد تعلق بها اصبع طفلة صغيرة! تموج خيط الدخان الرمادي اكثر فأكثر..فأحدث دوائر صغيرة كتلك التي كنت تصنعها بهدوء حينما تدخن..!كنت تضم شفتيك..وتنفث الدخان بهدوء, و اطاردهم أنا بأصابعي الصغيرة كمن تعزف البيانو علي الهواء..فأسمع ضحكاتك وأنا أتراقص من حولك أطارد خيط الدخان! توشك السيجارة علي الانتهاء, استنشق اكبر قدر من النيكوتين ليحتل رئتاي.. لم أعد اسعل كما في السابق..صارت تلك الرائحة مألوفة جداً ..بل وجميلة جداً ..مدمرة جداً .. واشتاق اليها ..جداً, جداً! كان خيط الدخان الان يأخذ اشكالاً مرعبة تطارد رماد الذكريات العذبة! رأيت وجهاً مخيفاً, ليس بوجهك, انما وجه بلا ملامح..نظرة شاردة.. وجوه تبكي.. كانت أشباحاً الان! أشباح كتلك التي تزورني منذ ثلاثة اعوام الان في كل ليلة موحشة كتلك... تلك الاشباح الأليفة التي حدثتك عنها في مذكراتي.. تمنعني عن النوم قليلاً.. تحثني علي البكاء كثيراً, تجعلني ارتجف دائماً, ثم يبزغ الفجر..فاهدأ..أتلو بعض من الايات وأنام! كانت السيجارة قد احترقت عن اخرها..ونثرت الرماد من حولها ..فاتخذت انا هذا الوضع الجنيني المعتاد ..اسندت رأسي المتعب علي ركبتاي..وبعينين زائغتين, اشاهد الأشباح التي ظلت تحتفل صاخبة بعيد ميلادك هذه الليلة..اما انا فكنت اتمتم بالفاتحة.....لك!ه


(تمت)


_____


من أغنية "وحدن بيبقوا" لفيروز*



Monday, November 10, 2008

هلاوس


عارف لما تدور علي الحتة اللي بتوجعك جواك عشان تدوس عليها وتطلع كل الألم وتصرخ وتعيط..لغاية ما تبطل توجع...بس المشكلة انك مش بتلاقيها؟!!ه
.
.

طب عارف الكلام لما مرة واحدة كدة يقع يتكسر؟! كلام بيبقي من جواه فاضي..مع ان من شوية بس كان ليه معني؟
.
.

عارف لما تدور ع المعني؟ جوا الكلام؟ جوا العيون؟ جوا الحياة؟ وتسأل نفسك ان كان من الاول ليه معني فعلا؟
.
.
عارف لما تسمع حد بيعيط...بس المشكلة انك مش عارف تحضنه؟ عارف ده بيموت من جوا قد ايه؟!ه
.
.
ولما تحس انه كله بيتعاد..عارف بالظبط كل اللي بيحصل..وح يحصل.. بس الفرق ان المرادي مش بتتوجع؟
.
.
عارف لما يترمي كلام زي الدبش..والمفروض انك تبتسم..لان من جواك بقي فاضي مش بتتعور خلاص؟
.
.
ولما تصحي وتقول صح هو ده اللي المفروض انه يحصل..طب نزعل ليه؟
.
.
عارف لما تبطل تصدق..وكمان تبطل تتفاجئ؟
.
.
عارف لما بتبقي ساكت..بتتفرج..وكل حاجة تانية بتجبرك علي الانسحاب؟
.
.
عارف لما حد بينسي؟ بينسي الوعد؟ بينسي الكلام؟ بينسي المعني؟ بينســ...اك؟
.
.
عارف لما حد يفتكر انه فاهمك اوي..ويعرف نقاط ضعفك..بس برضه بيدوس ع الزراير الغلط؟
.
.
الأهم بس...عارف لما السخونية والبرد يخلوك تهلوس؟

Saturday, November 8, 2008

ورقة من النص








من مذكرات (س)ه




الخميس, 2 اغسطس


احبك...هكذا قالها، وانا.. كانت قدماي تلامس السحاب




الاربعاء، 14 اكتوبر


افترقنا..!ه




الاثنين، 20 اكتوبر


نتحدث ..كأن شيئاً لم يكن! ألم شديد..كل أوصالي تنكسر!ه




الخميس, 1 نوفمبر


لا يهم..أنت هنا..حتي لو ادعينا أننا اصدقاء! حتي لو توقفنا عن تبادل كلمات الحب! تكفيني عيناك ومكالماتنا الطويلة! ونبرة صوتك حين تحدثني!ه




السبت ،12 نوفمبر


الساعة السابعة والنصف صباحاً! أول ماج نسكافيه.. وقراري لليوم: سأتوقف عن حبك! من اليوم سأتوقف عن حبك! مهما يكن!ه




الخميس، 20 نوفمبر


قال أنه لا زال يحبني!!! أي عبث هذا؟! لقد توقفت عن حبك..توقفت..! أتحبني حقاً؟ أنا بقايا قلب تفتت..!ه




الأحد، 1 ديسمبر


اصدقاء نحن! تقابلنا اليوم كالعادة- نتحدث.. ونضحك.. وأنا توقفت عن حبك! نعم, نحن نمضي قدماً! حلٌ سليم! لا خسارة الان! لم أعد اتألم كثيراً




الاثنين, 2 ديسمبر


حالة لا مبالاة! جيد...! سأذهب اليوم الي التسوق مع....ه




الثلاثاء، 3 ديسمبر


يحدثني عنها..يتحدث عنها بنبرة عادية.. لكنها لم تكن ابداً عادية! سألته إن أحبها.. نظر إليّ.. وأصر أنها ليست هي من يحب..! لكني أعرف عينيك حين تحب! أنت تحبها ... ستحبها! وأنا.. توقفت عن حبك!ه




السبت، 8 ديسمبر


هاتفته.. قال مجدداً أنه يحبني..! عبث عبث عبث! أو كذب هو! لقد توقفت عن حبك! لا كرهاً ولا حباً! لا تقلها مجدداً أنت تدمر ما تبقي مني! تحرقني...لأني لا اشعر بها! لقد توقفت..توقفت عن حبك!ه




الاحد، 9 ديسمبر


الساعة الحادية عشر صباحاً: مستلقية .. لم أقو علي الذهاب الي العمل اليوم! ارحل بعيداً بعيداً جدا! فقط ارحل!ه


الساعة الثامنة مساءاً: لا ترحل! ارجوك! فقط توقف عن حبي! أو دعني ارحل! ولكني لن ارحل!ه




الاثنين، 10 ديسمبر


صمت!ه




الثلاثاء، 11 ديسمبر


تباً! اصدقاء مجدداً.. ابتسمنا.. ارتشفنا سويا القهوة.. ضحكنا.. تعاهدنا علي الصداقة! تبدأ الان في التوقف عن حبي! تباً!ه




الجمعة ، 20 ديسمبر


لقد توقفت عن حبي! هاتفتني اليوم, تحدثنا.. ضحكنا.. لكنك توقفت عن حبي! هناك اختلاف, ناديتني باسم تدليل جديد لم تنادني به من قبل..لكن الجميع ينادينني به! وانا اكرهه, لأنه عادياً! كنت عادياً جداُ.. كنت مهتماُ جداً، لكن.. كصديق! كنت صديقاً حقاً! حسناً, وأنا ايضاً قد توقفت عن حبك!ه




الخميس، 25 ديسمبر


لقد تنبئت لك انك ستحبها! وها انت تعترف لي انا بذلك اليوم! لقد توقفت حقا ًعن حبي! لقد توقفت أنت عن حبي!.....وانا سأتوقف الان!! ولكني اخشى ان.. اكرهك!ه


(تمت)

Thursday, November 6, 2008

Sunday, November 2, 2008

أنا فزعانة

كانت تمرر أصابعها الرقيقة بين خصلات شعرها الناعمة المبعثرة.. تتنهد، فتطلق زفرة دافئة أخشي أن تفتت قلبها، وتجعل قلوب من حولها تنصهر! كانت عيوننا لا تلتقي..لكني كنت أعرف معني صمتها! هي تفكر..هي تفكر به! تعبث بخصلاتها قليلاً، تمسك بتلك الخصلة القصيرة التي تدغدغ جبهتها ..تلفها بحركة تلقائية رتيبة حول طرف سبابتها..تتركها لتتموج قليلاً، ثم تعيد لفها من جديد! اذن فهي تستغرق في السؤال..ماذا الان؟! اذا ابتسمت فجأة..ابدأ بالقلق، فهي لتوها قد تذكرت حوار ما دار بينهما أضحكها فيما مضي! فتكتم ضحكتها الان عني حتي لا أظن أنها جنت! تباغتها عبرة تعتقد اني لا أراها، عبرة دافئة تلامس وجنتها الممتلئة قليلاً والشاحبة كثيراً.. فأعلم انها تفتقده وتدرك مجدداً غيابه عنها! اذا أطاحت برأسها الي الوراء، فهي اذن تأخذ نفساً عميقاً وتغمض عينيها لتنسي ..وتنسي!كأن رأسها الصغير مثقل بالهموم..أوشك ان ينفصل عن جسدها الضئيل ! أما حين تنظر اليّ نظره خالية من أي معني، بعينين توقفت منذ أمد عن اللمعان.. فهي تستجديني أن أجعل هذا الألم يرحل عنها, أو أنها تبحث في عيناي عن اجابة لسؤال لم تسأله..وأنا لن أجد له اجابة! وحين تحكم بقبضتها القوية علي فنجان النسكافيه البارد ، وتمسكه بكلتا يديها، فهي تشعر بالبرد..وتحتاج الي حضن دافئ ..حضن لن تطلبه بالتأكيد! وانا فقط سأضغط بيدي القوية علي كفها الرقيق، لأُشعرها بوجودي..فتبتسم بزاوية ثغرها، وخصلات شعرها قد أخفت عينيها عني- فهي اذن ستبدأ في البكاء الصامت! وعندما تطيل النظر في تلك النقطة غير الموجودة ..فهي تهرب من بين ايدينا بعيداً ..بعيداً جداً.. في رحاب السماء الواسعة لتكن أكثر رحمة بها منا !ه
____
العنوان: أغنية لفيروز

رقصة شهية هي الحياة

ح اضحك
واحلم
يمكن أطـــيـــر
______
الصورة العبقرية لأحمد محمود

Friday, October 31, 2008

سنة اولي ..شغل


مفردات جديدة في حياتي

......

السرعة


ريتم حياة سريع جدا جدا.. بيفرض دايرته عليا..وقليل وبالعافية اصلا اما باعرف اكسره عشان اخد نفس عميق واغطس تاني في دوامة الحياة, حاسة ان كل حاجة عاملة زي الدومينو المرصوصة ورا بعضها دي..لو واحدة وقعت..كل اللي بعدها ح يكر بقي

العلاج: خروجة, صحاب, اغنية, حاجة مجنونة, تسريحة شعر جديدة, ايشارب او لبس جديد, بعزقة ما في الجيب, شيكولاتة, واحيانا البكاء


القلم الاحمر

باصحح, واحضر, واطرد برة(مش دايما يعني مش شر هو برضه :) ), واكتب ع السبورة, اشتري ماركر وبشاورة (هي لسة اسمها بشاروة رغم اننا مش بنكتب بطباشير), وورقة حضور وغياب, والعدد الكبير..والامتحان شكله ايه

العلاج: هي في حد ذاتها علاج :)


الاستاذ وحيد

المرتب والخزينة..وعم نصر..والزيادة..والتدابير اللوزعية في انه يكفي كتب وتفاريح :)

العلاج: مالوش علاج..ربنا يبارك فيه ومايطرش بس ولو انه بيطير

:D


الامضاء

حضور وانصراف..وشريهان اللي بتعاملنا بقرف ساعات..والدفتر..حاجة روتين يعني :D

العلاج: برضه مالهاش علاج ..خنيقة بس مضحكة


الشنطة

شنطة كل ما بشيلها باحس اني متقمصة شخصية رجال الاعمال..ونظرة جد كدة بترتسم علي وشي غصب عني, باحس اني شايلة الهم معاها والله

العلاج: اني ارميها واشيل شنطة عليها باربي

:D


المكتب

وهو المكان اللي لو حصل ولقيت فرصة اني اقعد فيه بعد طول لف ودوران ..المكان اللي باحس فيه اني جوا كواليس حياة اشخاص متخيلتش اني ح اقرب لهم كدة, وهو مكان كل كلمة لازم تاخد بالك بتقولها لمين و عن مين..وبتعرف اللي بيحبك فعلا واللي بيتظاهر بكدة..واللي بيستعبط واللي مش تأمن له

العلاج: مش باقعد فيه كتير اصلا :D


____

وفي مقابل الحاجات دي كلها..بافتقد الهدوء..والقعدة مع صحابي..والتحكم في الامور مش العكس.. وراحة البال..والضغط اللي اقل شوية..بافتقد شنطة باربي..واللعب في المراجيح..والميس..واوضة الرسم ..وحصة الالعاب..ولعب زي الاولة..وفتحي يا وردة..وبلاك شوز.. وبريلة بريللية..وعم يحيي اللي كان بيوصلني المدرسة :)


اه ياني...دنيا ماشية بالشقلوب فعلا

:)





Thursday, October 30, 2008

Whitish Dream..

رغبة شديدة اني ابص اوي للسحابة الكبيرة دي اللي في السما..وانط اغوص جواها! حاجة جدا زي ما تكون في قلب غزل بنات عملاق! رجليك بتكون لامسة حاجة ناعمة زي الريش..! كل حاجة بيضا..بيضا اوي زي الملايكة..بيضا لدرجة الهدوء..كل ما ح افتح عيني ح الاقي كل حاجة لونها ابيض هادي.. ابيض ناعم..ابيض بيشيل السواد بينسي الواحد شكل السواد كان ازاي ! سحابة كبيرة بيضا..ساقعة! مش ساقعة برد..لا انما منتعشة..بتزغزغ كدة! عايزة ادخل واغوص جواها..جواها اوي..وتمشي بيا بــعـــيــــد في السما الزرقا الواسعة !ه

____

الصورة من الاسكندرية لغفاري


Tuesday, October 28, 2008

Reflecting...


Weird that feeling.. that you're being driven off the cliff..and then people wonder why did she fall and why is she screaming now!


You know when you're triggered to explode..and then they denyingly look at you..how come you say what you're say now..and just flip the table the other way round at you! and they simply -innocently- take that judgemental seat..and blame you now!


Was it wrong to be tolerant.. was it wrong to be silent all the time?


Was it wrong to lose the innocence...and let scars find their way..by the very closest to you?


Should I have remained silent...?


Or am I really that tired... I can't take it anymore: the moods, the attacks, the peace pact, the closeness, the whole lot of fluctuations?!

You know when someone gets you close..then throws you back..and draws you again..and then leave you in a mediocre situation..then forcefully draws you near..and coldly leave aside?! You know this positive-negative magnet situation...? will it leave you sane and whole..? will it burn each time bits and bits of me from the inside? will you see the cracks deepening and..you know you'll crash down?

I am really tired..and still..I do not regret any of that was said to either of them, Or may be I do.. but can I be blamed for crashing?..for not taking in anymore?..for the one time I cannot be silent at? ..for surrendering? for being tired?
All yesterday's drama is forgotten.. just a teary eye..and a sad heart is so hurt by what they uttered ..when they meant it the least.. (or may be meant it the most..I no longer know)..Though the situations..were quite distinct..and just one happened after the other.. and losing communication one after the other..But all happened at once..culminating to the lost case I've become! How the two situations..melted into one..!


But if they knew what they were saying really, really hurts.. if they knew that this will trigger quite the harsh side of me.. if they knew it would to my total surrendering..and not fighting anymore.. if they knew I was so exhausted, wounded and hurt... not wanting them to add to the overall agony...would they still say and act the way they did..and drive me to the edge..and watch me fall.. and collapse..and innocently watch me coldly collecting the pieces..and walk away?!


Will they...?!

Saturday, October 25, 2008

سر صغير


كنت أدفع حساب تلك الأشياء التي ابتعتها, فألقيت نظرة اخيرة عليهم: نعم صحيح, تلك الدمية الصغيرة ذات الشعر المجعد وأجنحة فراشة هي لصديقة لي, تلك القلادة ذات القلوب الصغيرة الفضية لي, أما "ميدالية المفاتيح" ذات الوجه الكوميدي المبتسم..... له!! دفعت الحساب وأخفيتهم سريعاً في حقيبتي قبل أن تراها صديقتي... أو ربما انها لاحظت اني ابتعت شيئاً اضافياً غير المتفق عليه, لكنها لم تكترث لتسأل.. لعلها ظنت انها احدي نوبات الجنون التي اصرف فيها ما معي من مال فقط لتدليل نفسي من حين لاخر..وغالبا للخروج من حالة اكتئاب ! ربما هي لم تلحظ اطلاقاً اني ابتعت تلك الميدالية.. وانا كذلك لم أحاول أن أخطرها!! لم؟ هل يجب ان تعلم بكل خطواتي ؟! حسنا..هذا ما أفعله دوماً معها.. هي تعلم تصرفاتي, ماذا ابتعت, لمن.. مخططاتي وما الي ذلك مما يشاركه الاصدقاء المقربون..لكن هذه المرة لم أفعل! لا, بل حاولت.. بالفعل حاولت أن أخبرها اني ابتعت "ميدالية مفاتيح" له..لكني لم أصارحها بذلك علي اية حال! هل كنت أخشي انتقادها لي؟! ربما! فماذا كنت سأقول لها؟! ابتعتها له؟! لما.. سيكون السؤال! فقط كذلك... رأيتها.. تذكرته.. ابتعتها..ببساطة! سيكون رد فعلها لفعلتي الخرقاء تلك شيئين لا ثالث لهما.. اما ستثنيني عن ذلك بشدة.. و تتهمني بالجنون..وان ليس هناك أي داعي لذلك.. فما المناسبة! أو الخيار الاخر- والأرجح- انها ستصمت.. ستنظر الي و تصمت! علي اي حال أنا لم أعلمها..وكنت أنا الوحيدة التي تعلم ان بحوذتي الان شيئاً له... فأبتسم لسري الصغير المحبب هذا! سأهديه اياه في أول فرصة أراه فيها! ما المناسبة..ربما سيسألني.. لا أعلم..سأجيبه بطفولية : رأيتها, وكانت لك ...بكل بساطة! أنا حقاً لا أشغل بالي بتلك الشكليات المقيتة حين تهدي أحدهم بشئ ما.. وأن الفتاة يجب أن تفكر ألف مرة قبل ان تهدي رجلا ً تذكاراً ما..وما سيعني ذلك..الخ الخ.. تلك الأشياء التي نضخمها ونحملها أكثر من معناها البسيط! أنا لم افكر بذلك كله..لا أهتم..أنا فقط اؤمن أن الأشياء تحدثني بأصحابها! فحينما رأيت الدمية ذات أجنحة الفراشة, تذكرت علي الفورصديقتي وها قد ابتعتها لها..مؤكد ستفرح بها وتحدثها بما أكنه لها, صديقتي ذات القلب الأبيض الملائكي! كذلك كانت "ميدالية المفاتيح" من اجله.. كانت ذات رسم كرتوني جميل.. لوجه كوميدي مبتسم, يرتدي قبعة مضحكة, وكلمة مصاحبة..كنت اناديه بها! وهو فقط يعرف ذلك الاسم ... فماذا في ذلك اذن؟ أتعلمون؟ لن أغلفها حتي في تلك الأوراق اللامعة.. لن أعقد شريطة وردية, ولن ابتاع حقيبة هدايا ملونة صغيرة حتي بتلك العبارات المكررة السخيفة عن اعياد الميلاد.. والفالانتين.. والزواج والمناسبات السعيدة.. كل ذلك متكلف ومصطنع! أنا فقط سأضعها في كفه بكل تلقائية وطفولية.. وربما حينها تلامس أناملي الباردة.. يده الحنون! لحظة قصيرة جداً.. ستمر سريعا جداً.. قد يغلفها الصمت.. الارتباك.. الضحكات! لكنها ستكون كالحلم..مؤكد ستكون كذلك! أما الأرجح هو اني سأراه..ولا اهديه اياه ابداً... نعم قد أفعلها! سأتردد كثيراً..واخيراً أقرر اني لن اعطيها له! يبدو هذا أوقع..! فقط سأكتفي بأن احتفظ بها في حقيبتي ... وانساها احيانا.. و احكم قبضتي حولها احيانا اخري.. سألقيها بعيدا في مرات.. و ابحث عنها في كل مكان.. ولن اعطيها له ابدا..! لكني سأبتسم كلما رأيته..لسبب ما لا أعلمه!ه


____

تمت

Friday, October 24, 2008

مطر وبرق ورعد..في سما القلب


يا رب

تمطر

فراشات

وألوان


ودفا

ودموع

.

.

Tuesday, October 21, 2008

تَوْقُ



قالت العتبة:ه
ليتني أدخل إلى الصالون
قال الصالون:ه
ليتني أخرج إلى الشرفة
قالت الشرفة:ه
ليتني ...ه
أطــــيــــــــر



____
مريد البرغوثي من منطق الكائنات

Thursday, October 16, 2008

هلاوس..لا أكثر




حاسة اني عايزة اتفرج علي فيلم رومانسي عبيط كدة من اللي بيخلوني اعيط..ح اعيط اوي..واحضن المخدة شوية.. واتنهد جامد..ومحدش ح يسأل سبب العياط ايه.. اصل اكيد السبب الفيلم الرومانسي العبيط اللي شفته!ه

Wednesday, October 8, 2008

بداية



معرفش ليه قررت النهاردة بالذات اني اعمل مدونة جديدة.. غير اللي ضاعت بكل بساطة! يمكن عشان النهاردة كان بيعلن بدايات جديدة لحاجات كتير في حياتي! وبالتالي..استحقيت فرصة تانية للتواصل معايا..بدل معاقبتها بالصمت والزعل!ه


طبعا..تاريخ المدونة التاني الطويل...واللحظات الكتيرة اللي كانت بتقاوم ذاكرتي الضعيفة عشان مش تتنسي..فكنت بسجل تفاصيلها المستخبية اللي محدش كان بيعرفها غيري..مهما حد حاول التفسير..ومهما حاولت انا التعتيم..كنت انا بس اللي عارفة حتي تفاصيل الصورة بتعني ليا ايه..يمكن كان مقدر للحظات دي انها تتنفك من سلسلتها وتضيع شوية..عشان البداية الجديدة بتخبط علي باب الحياة


طبعا انا ما بحبش التغيير..معرفتش اغير العنوان ولا اللون ولا يمكن التفاصيل التانية اللي رابطة المدونة "ابيتاف" القديمة..بدي..يمكن لانهم كلهم في الاخر واحد..بس كلهم ليهم فترتهم الزمنية..اللي لازم تنتهي..عشان تانية تبتدي


عارفين مدونتي لما اتمسحت فكرتني بايه؟ لما باجيب موبايل جديد..واقعد اقرا كل كل الرسايل اللي عندي واللي انا بعتهم..عشان افتكرهم مرة اخيرة قبل ما ادوس علي زرار "مسح جميع الرسايل"! بس في الاخر بيكون عندي موبايل جديد..وبيبقي عليه رسايل جديدة..وبافضل شيلاهم بكل تفاصيلهم دي..لغاية ما يجي وقت ويكون "مسح جميع الرسايل"...يمكن بيفضل اللي بيبعتلي هو هو يمكن يزيدوا يمكن ينقصوا... بس انا بافضل انا برضه


يمكن لما زعلت علي مدونتي القديمة..لان فرصة اني اقرا - او بمعني اصح اعيش لحظة- كل تدوينة تاني..واستدعي لحظات وتواريخ خاصة جدا حتي لو كانت مجرد تدونية باقول فيها "صباح الخير"...زعلت يمكن لاني مش لحقت اقراهم مرة اخيرة وافتكرهم..ولاخر مرة..وده معناه نسيان ابدي بالنسبة لي للحظات دي..لان مفيش مادي ملموس عليها..حتي ولو كان تاريخ وعنوان!ه


ممكن كتير مش ح يلاقوا مدونتي القديمة..فيه افتكر اني مسحتها..يمكن فيه اللي اهتم بيها وافتقد هناك ولو للحظة وفيه اللي عادي معاه كانت مدونة واختفت زي كل حاجة ما بتختفي..وفيه يمكن اللي ميعرفش عنوان المدونة الجديدة..وفيه يمكن اللي مش يحب هنا وحيفتقد تفاصيل هناك..وفيه اللي مش ح يعرفني غير هنا..وميعرفش ان كان ليا في يوم مدونة بقالها اكتر من السنتين, وجوجل مسحها بكل بساطة من غير اي حسبان!..مش عارفة بقي..اللي عارفاه بس ان فيه لحظات جديدة مش عيزاها تتنسي..ومش عايزة كمان انسي الرغي معايا


فمرحباً بمزيد من الهلاوس :)

Thursday, October 2, 2008

تفاريح



:D

Tuesday, September 30, 2008

مرحب بالعيد





كنا اخر ليلة رمضان نفطر هناك..ونسهر نشوف التلفزيون وسهرة يا ليلة العيد..وصوت ام كلثوم في جميع الفقرات..والممثلين يتجمعوا ع القناة الاولي ويهنوا الناس ويهزروا مع بعض..نتسحب نروح بلكونة الصالون المقفولة ونلاقي الكحك والبتيفور متغطي..نبتدي ندوق عمايل نينة واقعد معاها نلزق البتيفور بالمربي..الصبح جدو بيحاول يصحيني عشان نلحق الصلاة في مصطفي محمود.. والتكبيرات في الشارع بتخليني اقشعر ..بس بانبساط..نرجع نفطر كلنا سوا..واقعد انفخ البلالين..ونحط جواها رز..عشان تعمل دوشة.. اتفرج علي صفاء ابو السعود.. بتخليني ازقطط وهي بتقول اهلا اهلا بالعيد مرحب مرحب بالعيد...ونختلف ان كنا ح نخرج اول يوم ولا نخلينا عشان الدنيا زحمة.نتفرج علي مسرحية الاولي..ونشوف فيلم العيد بتاع السهرة ايه


.


بقالي كام سنة..مفضلش من ده حاجة.. البيتفور والكحك بنشتريه..ومابقاش حد يبات ليلة العيد غيري عن جدو ونينة ..عشان الحق مصطفي محمود هناك... مع جدو!! بس كنت لسة باحس ان العيد هو العيد بتاعي بتاع زمان ..بتاع فرحة لبس العيد والبلالين وتلزيق البتيفور بالمربي


.


السنة دي..لاول مرة اكتشف اني مش لسة صغيرة بانفخ البلالين, والعب بالبمب ..واقف في البلكونة اتفرج ع الناس راجعة من الصلاة, احط مونيكير بينك و اسرح شعري والبس التوكة الجديدة..واحضر لبس العيد من بدري..واقعد منبهرة قصاد التلفزيون..واقعد ازن علي فسحة اول يوم العيد..... لان ببساطة كلنا السنة دي متجمعين ايوة..بس مش في بيت جدو ونينة..حتي مصطفي محمود مش السنة دي! ه


.


هو ليه انا حاسة ان تغيير المكان ..بيغير حاجات كتير معاها..رغم ان نفس اللمة موجودة الحمد لله؟


.


بس برضه...يا ليلة العيد انستينا..مادام حبايبي بخير ومتجمعين

Sunday, September 28, 2008

من غير عنوان... ولا ألوان






النهاردة انا صحيت..واكتشفت اني مش عارفة اطير.. بمعني اصح مش فاكرة كنت باطير لبعيد ازاي! فضلت نايمة علي ضهري, باصة للسما..ومش باطير برضه! اتأكدت ان الشباك مفتوح..وان الدنيا مش مغيمة.. وان الشمس طالعة.. بس منفعش..فضلت مكاني ..تماماً! ممدة بلا حركة..وكل الجوايا سكون! حاولت افتكر ان كان فيه تعويذة معينة بأقولها..ولا نقطة معينة للانطلاق.. مافتكرتش! انا بس صحيت واكتشفت اني مش عارفة اطير..وبصيت ع الايام اللي فاتت ولقيتها نفس الحالة.. انا في مكاني.. كل اللي جوايا سكون..فضا من غير الوان..ولا حتي اللون الاسود..فضا ساكن من غير مرجحة!ه


كان هاري بوتر لما يحارب الديمنتور (سالبي الروح السعيدة) كان بيستدعي الذكريات الكبيرة اوي الحلوة في حياته, ولما كان بيتر بان بيجي يطير فوق الارض..كان بييستخدم البودرة السحرية بتاعة الجنيات..طب وانا؟؟ انا في حالة سكون..لا باحارب تنين اخضر كبير.. ولا ساحرة شريرة من الارض البعيدة... انا باحارب السكون اللي جوايا!! طب اروح علي اقرب جنينة..واقعد علي مرجيحة يمكن ساعتها رجلي مش تلمس الارض؟... ولا انزل اجري ..اجري اوي.. لغاية ما اسمعش غير صوت الهوا..وكل حاجة احس اني سبقتها وبعدت عنها..؟ باحاول استدعي احساس الطيران ده..من غير مسبباته..مش لقياه!ه




سكون.. سكون بيمنعني اني استمتع بالحاجات اللي باحبها... اني امسك كتاب واهرب في العالم بتاعه.. ! سكون بنسيني فايدة الكلام.. بيخليني اتفرج علي التليفون وهو بينور ويطفي قدامي..وجرس طويل..وانا مش بارفع السماعة حتي! سكون بيخلي كل حاجة في الحياة بقي طعمها عادي... وان حتي الالوان مابقتش ملونة..ولا حتي باللون الغامق.. هي كدة مابقتش ملونة..بقت.... عادي!ه


نسيت تعويذة الطيران بتاعتي..نسيت احساس المرجحة..نسيت شكل نسمة الهوا اللي بتطيرني..نسيت الاغاني اللي كانت بتخليني فوق السحاب..وبقيت خايفة لا الناس اللي علموني الطيران لو لجأت ليهم دلوقتي..يكونوا نسيوا الطيران هما كمان..ومحتاجين زقة بعيدة عن الارض!!ه

Tuesday, September 16, 2008

تخاريف قلة نوم




من الساعة ستة الا شوية وانا عندي رغبة ملحة اني انزل دلوقتي!! عايزة انزل اشم اول نسيم هوا واشوف اول اشعة شمس!! حاسة اني لو فتحت شباك الاوضة.. ح لاقي الدنيا الشتا..عارفين صبح الشتا؟..لما بيكون ساقع شوية كدة..او بلاش..صبح المدرسة حتي لو في عز الصيف..ليه رعشة الصبح كدة..من الصحيان المفاجئ..و قلق يوم الدراسة..والفرحة العجيبة بتاعة الصبح !! حاسة اني لو نزلت في الشارع دلوقتي ح الاقيه شتا.. ح احتاج جاكيت وكوفيه...ح احط ايديا في جيوبي كدة عشان ادفيهم..واقفل الجاكيت عليا كويس.. واتمشي..عايزة اتمشي!! عايزة احس بهوا جديد نضيف.. يغسلني من جوايا!




الساعة سبعة الصبح دلوقتي.. كارهة جدا الشيش المقفول...والناس اللي نايمة...سامعة صوت الاتوبيس والعربيات..فيه حياة في الشارع..عايزة انزل واحس بالحياة دي..! مبحبش لما اكون قاعدة العصر او الصبح و حد تاني معايا يكون نايم..باتجنن..بابقي ح اموت واصحي اللي في البيت..!لا حد واحد بس يصحي..ويقعد معايا..وسط هدوء العالم دي كلها.. باكره اكون صاحيه في الوقت ده بدري كدة ومحدش يكون قاعد معايا..بيونسني..يحسسني بالحياة..!! ما نمتش من امبارح...عادي..هو اصلا بقي ايه فايدة النوم اللي يخلينا نفوت الصبح.. نفوت الحياة؟!ه


عندي مشوار عايزة اعمله النهاردة..ومستعدة اني اتلكك وانزل دلوقتي.. ! ( بس ازاي اصلا !!) ايه يعني اما انزل...وامسك طيارتي الورق ونطير!؟ عايزة افضل اقعد اكتب هنا لغاية ميعاد النزول... لا, لغاية ما اشوف الصبح بنفسي ويكون ميعاد الانطلاق! عايزة اقوم اطبخ طيب...! الحقيقة انا باقاوم النوم بكل الطرق! عارفين احساس انك عايز تلحق اليوم من اوله؟! حرفياً ده شعوري دلوقتي! لو كنا في غير رمضان كان زماني حضرت الفطار دلوقتي..وقعدت فطرت مع بابا قبل ما ينزل الشغل..وبعدين ح الاقي نفسي قاعدة لوحدي..فاصحي ماما !! لو دلوقتي.. يبقي عايزة اقعد في جنينة.. ع الارض..والهوا بيزغزغ الشجر.. ريحة العشب اللي لسة شارب مياه وانتعش! عايزة اتنهد اوي وابتسم.. وامدد وابص للشمس واضحك اوي... واسمع اغاني مفرحة تخليني انشكح..!! غالباً ح اسمع الراديو.. لما احب احس بالحياة وان الناس صاحية زيي من بدري (او مانمتش اساسا).. يبقي افتح الراديو! تعرفوا اني مش باسمع نجوم افم ام (مع اني مش باحبها) غير الصبح بدري اوي كدة؟! مش حبا فيها.. بس باحس بريحة قهوة الصبح..وهما بيشغلوا فيروز ولا عمرو دياب بيغني "من كام سنة وانا ميال ميال"!! الصبح والذكريات ..توليفة غريبة ومفرحة!ه


الساعة مش بتمشي... 7 وتلت..!! نفسي تكون عشرة ..حداشر..! نفسي انزل اجري الحق اتوبيس الكلية... واسمع "صباح الخير يا ست الكل" من عم سيد! حتي عم سيد طلع معاش! ومابقتش اركب باص الكلية! انا اعترف اني باحب لهوجة الصبح!جنان رسمي!!ه




باحب
الندي اللي بيبقي علي العربية الصبح بدري! لو اتمنيت اكون في مكان دلوقتي... اكون في اسكندرية..ع البحر, رجلي بتلعب في الرمل وخوف طفولي من كابوريا شاردة تطلع من حيث لا اعلم (معرفش ايه العلاقة بس حصلت لي زمان فاتعقدت)!!ه


صباح الخير....!! لما حد يقولها وهو مبتسم, تحس ان الابواب كلها بتتفتح وان الخير جي النهاردة بس انت ابتسم! صباح النور...! تعبير بيجنني ..باحس ان كل حرف فيه بيضوي وكله فرح!ه






تمانية الا ربع! المدرسة والشتا..فستان المدرسة، الزمزمية، المصروف قبل ما انسي ، رحلة البحث عن شراب، تحضير الشنطة في اخر لحظة، خلفية صوتية لاغنية يا حلو صبح يا حلو طل, اخر نفس علي باب الشقة انه كله تمام..والانطلاق بقي للمدرسة! يعني الطابور والاصحاب.. الاذاعة المدرسية (ويا سلام لو انا كنت فيها بقي يبقي اكون من النجمة هناك)! تحية العلم...القلب اللي اكسجين الصبح بيخليه يحضن الدنيا ده!ه






انا حرفياً صاحية من النجمة!! لو اتمنيت حاجة..اكون قاعدة في بلكونة ..ومش ح اقرا الجرنال..مش ناقصة هي حوادث وكوارث ووفيات ع الصبح! ح اقعد استمتع بهدوء اللحظة..وفقط ح اصبح ع الشمس..وح اقول لنفسي "صباح الخير" وح استني اول صوت يصبح عليا..انشالله في مكالمة تليفون!ه






انا باكتب هنا لسة..عشان اقاوم النوم! (عشان باقاوم حاجات كتيرة اصلا)! عشان اتخيل الصبح اللي ورا الشباك المقفول!ه






بس اكيد لو فتحت الشباك دلوقتي ولبست ونزلت ح احس بدفا الصبح..ح احس اني عايزة ابتسم... انطلق.. اجري.. اطير حتي! بس حالياً مش عارفة..عشان الشيش مقفول!ه






ومع ذلك..صباح الخير! :)ه