من الساعة ستة الا شوية وانا عندي رغبة ملحة اني انزل دلوقتي!! عايزة انزل اشم اول نسيم هوا واشوف اول اشعة شمس!! حاسة اني لو فتحت شباك الاوضة.. ح لاقي الدنيا الشتا..عارفين صبح الشتا؟..لما بيكون ساقع شوية كدة..او بلاش..صبح المدرسة حتي لو في عز الصيف..ليه رعشة الصبح كدة..من الصحيان المفاجئ..و قلق يوم الدراسة..والفرحة العجيبة بتاعة الصبح !! حاسة اني لو نزلت في الشارع دلوقتي ح الاقيه شتا.. ح احتاج جاكيت وكوفيه...ح احط ايديا في جيوبي كدة عشان ادفيهم..واقفل الجاكيت عليا كويس.. واتمشي..عايزة اتمشي!! عايزة احس بهوا جديد نضيف.. يغسلني من جوايا!
الساعة سبعة الصبح دلوقتي.. كارهة جدا الشيش المقفول...والناس اللي نايمة...سامعة صوت الاتوبيس والعربيات..فيه حياة في الشارع..عايزة انزل واحس بالحياة دي..! مبحبش لما اكون قاعدة العصر او الصبح و حد تاني معايا يكون نايم..باتجنن..بابقي ح اموت واصحي اللي في البيت..!لا حد واحد بس يصحي..ويقعد معايا..وسط هدوء العالم دي كلها.. باكره اكون صاحيه في الوقت ده بدري كدة ومحدش يكون قاعد معايا..بيونسني..يحسسني بالحياة..!! ما نمتش من امبارح...عادي..هو اصلا بقي ايه فايدة النوم اللي يخلينا نفوت الصبح.. نفوت الحياة؟!ه
عندي مشوار عايزة اعمله النهاردة..ومستعدة اني اتلكك وانزل دلوقتي.. ! ( بس ازاي اصلا !!) ايه يعني اما انزل...وامسك طيارتي الورق ونطير!؟ عايزة افضل اقعد اكتب هنا لغاية ميعاد النزول... لا, لغاية ما اشوف الصبح بنفسي ويكون ميعاد الانطلاق! عايزة اقوم اطبخ طيب...! الحقيقة انا باقاوم النوم بكل الطرق! عارفين احساس انك عايز تلحق اليوم من اوله؟! حرفياً ده شعوري دلوقتي! لو كنا في غير رمضان كان زماني حضرت الفطار دلوقتي..وقعدت فطرت مع بابا قبل ما ينزل الشغل..وبعدين ح الاقي نفسي قاعدة لوحدي..فاصحي ماما !! لو دلوقتي.. يبقي عايزة اقعد في جنينة.. ع الارض..والهوا بيزغزغ الشجر.. ريحة العشب اللي لسة شارب مياه وانتعش! عايزة اتنهد اوي وابتسم.. وامدد وابص للشمس واضحك اوي... واسمع اغاني مفرحة تخليني انشكح..!! غالباً ح اسمع الراديو.. لما احب احس بالحياة وان الناس صاحية زيي من بدري (او مانمتش اساسا).. يبقي افتح الراديو! تعرفوا اني مش باسمع نجوم افم ام (مع اني مش باحبها) غير الصبح بدري اوي كدة؟! مش حبا فيها.. بس باحس بريحة قهوة الصبح..وهما بيشغلوا فيروز ولا عمرو دياب بيغني "من كام سنة وانا ميال ميال"!! الصبح والذكريات ..توليفة غريبة ومفرحة!ه
الساعة مش بتمشي... 7 وتلت..!! نفسي تكون عشرة ..حداشر..! نفسي انزل اجري الحق اتوبيس الكلية... واسمع "صباح الخير يا ست الكل" من عم سيد! حتي عم سيد طلع معاش! ومابقتش اركب باص الكلية! انا اعترف اني باحب لهوجة الصبح!جنان رسمي!!ه
باحب
الندي اللي بيبقي علي العربية الصبح بدري! لو اتمنيت اكون في مكان دلوقتي... اكون في اسكندرية..ع البحر, رجلي بتلعب في الرمل وخوف طفولي من كابوريا شاردة تطلع من حيث لا اعلم (معرفش ايه العلاقة بس حصلت لي زمان فاتعقدت)!!ه
صباح الخير....!! لما حد يقولها وهو مبتسم, تحس ان الابواب كلها بتتفتح وان الخير جي النهاردة بس انت ابتسم! صباح النور...! تعبير بيجنني ..باحس ان كل حرف فيه بيضوي وكله فرح!ه
تمانية الا ربع! المدرسة والشتا..فستان المدرسة، الزمزمية، المصروف قبل ما انسي ، رحلة البحث عن شراب، تحضير الشنطة في اخر لحظة، خلفية صوتية لاغنية يا حلو صبح يا حلو طل, اخر نفس علي باب الشقة انه كله تمام..والانطلاق بقي للمدرسة! يعني الطابور والاصحاب.. الاذاعة المدرسية (ويا سلام لو انا كنت فيها بقي يبقي اكون من النجمة هناك)! تحية العلم...القلب اللي اكسجين الصبح بيخليه يحضن الدنيا ده!ه
انا حرفياً صاحية من النجمة!! لو اتمنيت حاجة..اكون قاعدة في بلكونة ..ومش ح اقرا الجرنال..مش ناقصة هي حوادث وكوارث ووفيات ع الصبح! ح اقعد استمتع بهدوء اللحظة..وفقط ح اصبح ع الشمس..وح اقول لنفسي "صباح الخير" وح استني اول صوت يصبح عليا..انشالله في مكالمة تليفون!ه
انا باكتب هنا لسة..عشان اقاوم النوم! (عشان باقاوم حاجات كتيرة اصلا)! عشان اتخيل الصبح اللي ورا الشباك المقفول!ه
بس اكيد لو فتحت الشباك دلوقتي ولبست ونزلت ح احس بدفا الصبح..ح احس اني عايزة ابتسم... انطلق.. اجري.. اطير حتي! بس حالياً مش عارفة..عشان الشيش مقفول!ه
ومع ذلك..صباح الخير! :)ه
