النهاردة انا صحيت..واكتشفت اني مش عارفة اطير.. بمعني اصح مش فاكرة كنت باطير لبعيد ازاي! فضلت نايمة علي ضهري, باصة للسما..ومش باطير برضه! اتأكدت ان الشباك مفتوح..وان الدنيا مش مغيمة.. وان الشمس طالعة.. بس منفعش..فضلت مكاني ..تماماً! ممدة بلا حركة..وكل الجوايا سكون! حاولت افتكر ان كان فيه تعويذة معينة بأقولها..ولا نقطة معينة للانطلاق.. مافتكرتش! انا بس صحيت واكتشفت اني مش عارفة اطير..وبصيت ع الايام اللي فاتت ولقيتها نفس الحالة.. انا في مكاني.. كل اللي جوايا سكون..فضا من غير الوان..ولا حتي اللون الاسود..فضا ساكن من غير مرجحة!ه
كان هاري بوتر لما يحارب الديمنتور (سالبي الروح السعيدة) كان بيستدعي الذكريات الكبيرة اوي الحلوة في حياته, ولما كان بيتر بان بيجي يطير فوق الارض..كان بييستخدم البودرة السحرية بتاعة الجنيات..طب وانا؟؟ انا في حالة سكون..لا باحارب تنين اخضر كبير.. ولا ساحرة شريرة من الارض البعيدة... انا باحارب السكون اللي جوايا!! طب اروح علي اقرب جنينة..واقعد علي مرجيحة يمكن ساعتها رجلي مش تلمس الارض؟... ولا انزل اجري ..اجري اوي.. لغاية ما اسمعش غير صوت الهوا..وكل حاجة احس اني سبقتها وبعدت عنها..؟ باحاول استدعي احساس الطيران ده..من غير مسبباته..مش لقياه!ه
سكون.. سكون بيمنعني اني استمتع بالحاجات اللي باحبها... اني امسك كتاب واهرب في العالم بتاعه.. ! سكون بنسيني فايدة الكلام.. بيخليني اتفرج علي التليفون وهو بينور ويطفي قدامي..وجرس طويل..وانا مش بارفع السماعة حتي! سكون بيخلي كل حاجة في الحياة بقي طعمها عادي... وان حتي الالوان مابقتش ملونة..ولا حتي باللون الغامق.. هي كدة مابقتش ملونة..بقت.... عادي!ه
نسيت تعويذة الطيران بتاعتي..نسيت احساس المرجحة..نسيت شكل نسمة الهوا اللي بتطيرني..نسيت الاغاني اللي كانت بتخليني فوق السحاب..وبقيت خايفة لا الناس اللي علموني الطيران لو لجأت ليهم دلوقتي..يكونوا نسيوا الطيران هما كمان..ومحتاجين زقة بعيدة عن الارض!!ه
