Wednesday, December 3, 2008

رسالة الي..الساحرة الشريرة

عزيزتي .....0
ولا بلاش عزيزتي..عشان انتي مش عزيزتي اصلا

نفسي اصحي الصبح..الاقي يوم الاربعاء ده اتلغي من الاسبوع..الاسبوع يبقي يجي كدة اتنين تلات خميس..ويكمل مع اسقاط الاربعاء..وانتي متعرفيش ان انتي محبوسة في يوم الاربعاء اللي تم اسقاطه..وتضيعي في ورقة النتيجة المقطوعة ومحدش ينقذك

نفسي بطني تبطل تكركب كل يوم اربعاء قبل ما اشوفك... و ان نفسي ما تغمش كل ما اعرف انك جيتي.. وان وشي ما يتقلبش علي سيرتك واني خلاص ماشية رايحة اقابلك فعلا!0

نفسي تفهمي اني مش باستريحلك..وانك واقعة من نظري اصلا..و اني مش باحب نفاقك ولا طريقتك في الكلام ..وانتي فاكرة انك بتفهمي..وانتي اصلا $#@%^#$ه

نفسي تعرفي برضه اني مش باحب نطقك..ولا اوضة المكتب الكئيبة اللي انتي بتقعدي فيها..مع انها كانت حلوة اوي ايام ما (...) كان بيقعد فيها! ولا انك فاكرة انك بتوريني طريق النور..وانتي بتعرفي في البتنجان بس

نفسي تعرفي اني مش باحب تصورك انك بتعلمينا التايهة..انتي نفسك تايهة! ولو ده علم..يبقي بناقصه! ه

نفسي تعرفي ان لو ربنا اداكي..وانك كبيرة..فالكبير كبير العقل والاخلاق والعلم والثقافة والتحضر..وانتي ملكيش ف كل دول! وان يا ستي ربنا اكبر...وان فوق ذي علم عليم!0

لازم تعرفي ان صوتك بالنسبة ليا مزعج..وان نظرتك مش بحبها..وان وجودك قرفني في الحياة..وان منايا السنة دي تخلص و ربنا يكفينا شرك!0

ولازم تعرفي اني ما اعرفش يعني ايه اكره حد.. واني مش باكرهك..بس الاكيد اني مش باحبك..انا مش باحبك! انا مش ح اخلي الكره يحرق طاقاتي ومشاعري..عشان انتي متستهليش اصلا حرقة دمي..بس بجد انا قلبي بينقبض كل مرة انتي فيها! مش ح يجري حاجة صدقيني لو اعتذرتي عننا!ح تبقي حتي عتقتينا لوجه الله في الايام المفترجة دي!0


زائد انتي بالنسبة ليا عبارة عن كتلة من الطاقة السلبية الشريرة اللي لازم تفضل بعيد في صحرا ..عشان ما تكئبش الناس..ازاي بقي يقعدوني معاكي ومابينا مسافة اقل من متر؟!0

كل يوم ثلاثاء بالليل بقيت اصاب بحالة من الاكتئاب..عشان الاربعاء جي! يا رب الصبر من عندك.. واكفينا الشر..وهونها علينا..وعديها علي خير!عشان انا بجد تعبت..والله تعبت..لو تعرفي انا قد ايه تعبت! بس مش عيزاكي تعرفي..ربنا هو اللي عالم بقي


اه ومن فضلك كمان..لما تشوفيني مش تبوسيني..عشان انا باحس ان الحية ذات الجرس هي اللي بتبوسني! انتي مش بتبوسي بحب.. وانا مش عيزاكي تبوسيني..ولا تحبيني.. انا باحس ان كلك اقنعة ومش بتعملي حاجة بحب, او صدق

انا مش باحب النفاق.. ابعدي بقي!ه


روحي يا شيخة...و ماترجعيش!0


امضاء
الغلبانة

15 comments:

Kenia said...

I want Death Toll!!!!!

عـلا - من غـزة said...

يا ساتر يارب

لهالدرجة يوم الاربعا عاملك مشكلة

هي اسلاحرة الشريرة ساكنة في يوم الاربعا يعني ؟؟
طب سؤال خبيث .. هو كل الاربعات بيكونو سيئين عليكي ؟ ولا عشان يوم اربعا معين بقيتي تكرهي كل الاربعات :D

وارد جدا لو انا نفسي قرأت هادا السؤال مرة تانية اني ما افهمه

ههههههه

الله يعدي كل الاربعات عليكي على خير .. ويحميكي من الساحرة الشريرة

يَحيى المِصري said...

أول مرة أسوفك مخنوقة من حد للدرجة دي يا هاجر

Evaluna said...

lool
3arfa 2e7sasek walahy!
wel post de fakaretny b ma3t (mona) msh 3arfa leh! :D

w bas mat2oolesh sa7era shereera, el sa7erat el shereeerat 7elween, laken de bayen 3aleha we7sha awyyy awyyy!

ahmed said...

LOL

حنين said...

يا ساتر يارب ! ايه أمنا الغولة الوحشة دي ! دي جنان بصحيح
اللهم ارحم جوجو برحمتك يارب .. واكفها شر أذى الساحرة الشريرة الوحشة خالص .. آمين!

ما كنتش أتصور إنها كده .. جوزيلا !
ربنا معاك يا عمو جوج :)

Om HAGAR said...

يا سااااااااااااااتر كل دا

دي باين عليها وحشة قوي يا رب يبعدها عنك و يكفيكي شرها.

بصي كل يوم مش بس يوم الأربعاء و انتي نازلة من البيت إدعي قولي "بسم الله توكلت على الله و لا حول و لا قوة إلا بالله العلي العظيم. اللهم إني أعوذ بك أن أذِل أو أُذَل أو أضِل أو أُضَل أو أظلِم أو أُظلَم أو أجهَل أو يُجهَل عليَّ. اللهم إني أعوذ بك من شر هذا اليوم اللهم أكفني شر هذا اليوم و أرزقني خيره و باعد بيني و بين شياطين الإنس و الجن"

و ربنا يكفيكي شر أولاد و بنات الحرام يا حبيبتي

موجة فى بحر الحياة said...

و الله انتى سككككككككككر

انا دلوقتى عرفت اهم سبب ان يكون عندك مدونة

انك تطلع اللى جواك اوى و ترميه ادامك و تفضل تضرب فيه لغاية ما تهدى و تفش غلك

bluestone said...

Thou shall not hate thy teacher /boss :)

Epitaph1987 said...

Kenia,
welcome :) do you mean the visitors' counter under the name of Death Toll?

علا
ههههههه لا فهمت سؤالك
بصي لا
كل الاربعات عشان بس هي موجودة فيه
هي من سنة كانت ساكنة يوم الثلاثاء
السنة دي الاربعاء
بصي هي لو سكنت ايه..ح تكرهني فيه
ربنا يعدي كل ايامنا علي خير
:)


يحيي
شفت؟ جبت اخري
:(

evaluna
loool mahy shreera ya H a3mel eh! :( btdy2ny! adeeha poisoned apples?? LOL

Ahmed
اضحك اضحك
:( يا رب جيجسو يطلع لك
:P

حنين
عاااااااا
اميييييين يا نونة
بس اسكتي انا ضحكت اوي علي جودزيلا دي
صح هي كدة
ههههههه سامحني يا رب
بس زيحها عني :(

Om Hagar,
امين
والله باقول الدعاء
انتي تفتكري ايه اللي بيعدي الايام دي
ربنا اصلا بيقف مع الغلابة بجد
والله ربنا كبير..عارف بحالي..فبيهون
ربنا يخليكي..دعواتك بقي
:)

موجة في بحر الحياة
هههههه اه يا بنتي
ما انا طلعت كل اللي جوايا
عشان استريح شوية
وادخل علي يوم الاربعاء وانا مش خايفة كدة ومجمدة قلبي
:)

bluestone,
:( if you only knew!
I love them all...but her! laanaaaa honaaaaaaaa waqfa! LOL! tab a3mel eh tyb! :S my cells refuse her! lol

Anonymous said...

معلش فاتني الاربعا ده..

الاربع الجاي.. اطلع على الكلية، اسال على دكتورة (ه ) واقولها عندك بنت ف تمهيدي ودي مدونتها وانتي بتديها يوم الاربعا.. فحاولي تحلي عنها شوية

وبعد كده هتبقوا تمام مع بعض إن شاء الله


فاعل خير

تسـنيم said...

والله انتي غلبانه ...هههههههه

انتي فاكرة لو الأربع اتلغى محاضرتها هتتلغي؟؟

لأ أبدااااااااان دي هتطبق على نفسك في أي يوم تاني واحتمال كبير تخلص الأسبوع يوم يوم وميبقاش فيه حاجة في التقويم اسمها اسبوع وهيا برضه لسه على قلبك


يا بنتي متخليهاش تمتص طاقتك ومتظلميش يوم الأربع معاكي

:)

No Fear said...

السلام عليكم
ربنا يوفقك
و يعديها علي خير

Epitaph1987 said...

anonymous,
فاعل خير ايه بقي
كدة دي تهدئة نفوس
بس مين بقي صحيح؟؟؟
:)

تسنيم
ايوة ح تتلغي
لانها مش ح تعرف ان الاربعاء اتلغي اصلا
ف ح تفضل جوا
وتضيييييييييع

No Fear
وعليكم السلام ورحمة الله
امين
يوفقنا كلنا يا رب
:)

كلمات said...

Well.. I'm definitely speechless!!

I'm all ready to sign this "manifesto" :)

This shot of "creativity" has really hit the ceiling :))

A.P.P.L.A.U.S.E