Saturday, December 30, 2006

وهو لسة العيد فرحة؟



كل سنة و كل الناس الحلوة بخير و سعادة


عيد الاضحي اهو جه يا ولاد اهو جه يا ولاد


والعيد فرحة وسط الامتحانات


طبعا انتم دلوقتي عارفين مناسك العيد بالنسبة لي


بيت جدتي و جدو... خالي و ولاده القطاقيط الصغيرين


الكتاكيت اخواتي... جامع مصطفي محمود


لبيك اللهم لبيك


التليفونات المشغولة


المسجات ع الموبايل ليل نهار


ودمتم


...


ولسة بقي الفرجة عل الدبح و الاضاحي ان شاء الله


دايما كنت اروح مع بابا و خالي و جدو عشان اتفرج


و اقف في البلكونة عند جدتي


عشان اتفرج ع البلونات و الدبح و عيال كتيييييير عاملة هيصة في الشارع


...


اغرب موقف كان من سنين كتير


كنت مع خالي و اختي الصغيرة ساعتها


و كانت اللي ح تتدبح واحدة ست


وانا صعقت طبعا


اول مرة اشوف ساعتها جزارة


و لقيتها بتشاور لاختي


وتقولها
قربي هنا


اقولها تقرب فين


دي الارض كلها دم


الله...مش عشان تجمد كدة و قلبها يبقي ميت


اختي ساعتها ماكنتش كملت ست سنين حتي


وجريت استخبت في حضني


ده طبعا غير بقي متعة الفرجة ع الخروف اللي جري من الجزار


او البقرة بعد ما دبحوها قامت هاجت عليهم


و تصقيف الناس وقت الدبح بقي


ودي فرحة العيد


...


و نوصل بقي لفقرة الفتاوي اللي لازم تسمعها


هي الزكاة اطلعها قبل الصلاة و لا بعدها؟


و هل يجوز اني اتصدق بالاضحية كلها و لا لازم اكل منها؟


وحتة منه و لا كله و كله و لا حتة منه؟


...


صفاء ابو السعود هريانا العيد الفرحة


بلالين و الوان و لبس العيد و العيدية


ح نقضي العيد فين؟


جزيرة القطن طبعا


طب يللا قوموا عشان تذاكروا


والعيد فرحة


...


الرئيس ادي صلاة العيد


وطبعا زمااااااان كنت اشوفه بيصلي في اول صف في جوامع القاهرة و الجيزة


دلوقتي الصلاة في شرم الشيخ.. في ااااخر صف ووراه الحيطة علي طول و الحرس يا باشا


دي صلاة يا جدعان في بيت ربنا


نفسي اشوفه بيصلي زينا في مصطفي محمود في الشارع


والعيد فرحة


...


اتفرج ع الحجاج نقلا عن قناة السعودية


واقعد متنحة وانا صغيرة علي امل اني ح اوشف بابا في التلفزيون و اعمله باي باي


الله مش هو في الحج؟ يبقي اكيد معاهم


بس يا رب ما ينساش الشيكولاتة وباربي اللي طلبتها منه


مش بقولكوا العيد فرحة


...


نيجي بقي لفقرة الحوادث


و نبتديها من السعودية


اكيد الحجاج ليهم كارثة


و ربك يستر ع المصريين هناك


يا سور يا كوبري يا اوتوبيس


الو ..ايوة يا بابا..خد بالك من نفسك


و برضه العيد فرحة


...


بقولكوا ايه
كل سنة و انت طيب


يا ليبتون يا طيب


:)

Tuesday, December 26, 2006

Till we meet again...



Know when you feel that all your dreams are fleeting away? what is to come?!Afraid of the sun of the 'morrow !! Memories haunt you ! Fear is to control now and you're just watching! Surrendering! You're tormented, but won't utter a word! Today, I watched her tears, and I stood before her helpless as ever, could not even hug her- damn she needed that!( I should smash that mirror by the way- facing me with those stupid facts I already know !) O Lord!! I need a break!!!
.
.
.
wish everyone a Happy New Year and Happy Eid as well!
.
.
.
Fare thee well!

Sunday, December 24, 2006

بعدك علي بالي





تزينت و تعطرت و ارتدت افضل حلة لديها.. فاليوم عيد ميلادها الخامس و الاربعون . اضاءت شمعة وحيدة لتؤنسها , و جلست في ركن الغرفة البعيد بجوار المدفأة علي كرسيها الهزاز, و مثلما خرج الملايين في هذه الليلة للاحتفال, قررت هي ان تشاركها فيروز مناسبتها الخاصة طالما ان احدا لن يشاركها اياها ,فلا زوج و لا حبيب و لا صديق , وضعت الشريط الذي كان قد اهداها اياه منذ اعوام بعيدة. حلقت مع سحر صوت فيروز بعيدا, لتتذكر طفلة صغيرة تكرمها معلمتها بالمدرسة, قبلة ام حانية تطبعها علي وجنتها الناعمة, ضحكات خجولة بالجامعة, ايادي متشابكة و احلام لم تكتمل, بكاء لفراق الاحبة... ذكريات تتدثر بها من برد الليالي
***

بكرة بتشتي الدني
ع القصص المجرحة
يبقي اسمك يا حبيبي
و اسمي بينمحي

***

ترتجف, فها هو ديسمبر يودع العام منذرا بنسيم بارد, عيناها لا تفارق الهاتف الصامت طوال اليوم , تمني نفسها انه لربما احدهم يتذكر انها لازالت علي قيد الحياة تحتفل بمرور عام جديد لن يزيدها الا الما و وحدة, لكن صديقاتها تحججن ببيوتهن و ازواجهن, و هي رفضت دعوة احدي قريباتها لحفل ساهر بمناسبة رأس السنة, لكن احدا لم يتذكر ان هي الاخري تحتفل بعيد ميلادها , فقد تناسوا وجودها. تأبي ذاكرتها ان تنسي كيف كان يوم عيد ميلادها هو حفل تتويجها ,و هو يفاجأها باحد افكاره المجنونة.لا تنسي هذا الحفل و المطرب يهدي لها اغنية و شاركها الالاف حينها عيد ميلادها,و الاهم انه كان بجوارها ,يهمس لها "معا للابد" , تعلم انه لو كان هنا الان لكان فاجأها بكل اصدقاء الطفولة و الدراسة و احبائها ..و لكن هيهات فها هي الاعوام مرت و لا تعلم عن اخباره شيئا
***
كيفك
قام عم بيقولوا
صار عندك اولاد
انا والله كنت مفكرتك
برة البلاد

***
تنصت الي دقات الساعة , انها الثانية عشرة, الالعاب النارية بالخارج تشتعل, تمني نفسها ان العالم الان بأسره يحتفل بها, الجميع سعداء بالسنة الجديدة.. و هي في غرفتها تتأمل الماضي , تنظر الي مرآتها , الشعيرات البيضاء تسللت الي رأسها, و المزيد من التجاعيد خطت علي جبهتها البيضاء العريضة.. تتمتم : "كل سنة و انت طيبة" و ابتسامة حزينة تزيد ملامحها كآبة .. الاضواء الخارجية و صراخ الشباب يتحدوا صوت فيروز المسترسل عبر المذياع , :"لم يبق غير انت و انا يا فيروز",, لتعود الا كرسيها مرة اخري
***
طل و سألني
اذا نيسان
دق الباب
خبيت وجهي
وطار البيت فيّ و غاب

***
يدق جرس الباب لتفيق من بحور الذكريات, لعله احد الصغار قرر ازعاجها كالمعتاد, لا تجد احد بالخارج,, لكنها لم "تتوهم, فهناك باقة ورود حمراء,و علبة حلوي المفضلة لديها تركها احدهم مع ورقة صغيرة : "معا للابد


***
حبيت افتح له
ع الحب اشرح له
طليت
ما لقيت
غير الورد عند الباب


***
"همهمت, و الدمع يتلألأ بعينيها: "بعدك علي بالي

Friday, December 22, 2006

ميلاد رفات



احرق ذكرياتي


و انثر رفاتها اعلي الوادي


نسيم البراءة يحملها


لتذوب بنبع الطهر


يرتوي منها العشاق


فتحيي القلوب


وتولد ذكري جديدة


قد لا تموت

Tuesday, December 19, 2006

Colours of Life..

Close your eyes

Breathe!









Dream!






Relax!






Fly!





isn't
it just
beautiful?!


Sunday, December 17, 2006

كلام نواعم- كلاكيت تاني مرة



في الحلقة السابقة من كلام نواعم اتكلمت البنات عن الحجاب و الالتزام


و النهاردة كانت مواقفهن من الزواج و خاصة جواز الصالونات


اليكم بث حي من جلسات النميمة و قعدات الانسات في الشغل و تلقين الامهات و زميلات الكلية و احاديث التليفونات و عند الكوافير و في الكافيه و النادي


كلام نواعم


...


الو.. ازيك يا عروسة؟ مين العروسة؟ انتي يا جميلةطبعا.. ايه رأيك في عريس حليوة و ابن ناس..و عنده 26 سنة و بيشتغل محاسب..و عنده شقة و عربيةو نفسه في واحدة حلوة زيك تعرف ربنا و بنت ناس محترمين..هه ايه رأيك؟ هو يبقي ابن بنت عمتي..زي ابني بالظبط..قولتي ايه يا عروسة؟
...



بصي تعالي نعمل قعدة و شوفيه.. يمكن يعجبك.. فيها ايه يعني..و بعديها ابقي قولي رأيك اهو تشوفيه..ح تقولي لا من قبل ما تشوفيه؟
...
يعني ايه عايز واحدة متربية و ملتزمة و محجبة؟ لو خبط علي باب الجيران غلط ح يلاقي واحدة متربية و ملتزمة و محجبة!!
...
بصي.. ما هو يا بنتي الكلية ده سوقكم.. لو ماطلعتيش من الكلية و انتي الدبلة في ايدك فرصك ح تقل بعد التخرج و الشغل..و مين بقي ح يرضي يتجوز بواحدة عندها خمسة و عشرين و هو قصادة بنت تسعتاشر اللي في الجامعة لسة
...
اهي البت رحاب اهيه قعدت ترفض ده وده و تقول الدراسة و الشغل و الدراسات و البتنجان و اهي قاعدة بطولها و عندها تلاتين سنة.. عايزة تبقي زيها كدة؟؟
...
عارفة انا كنت عاملة زيك كدة... ماما قعدت تقول لي العرسان دول زي النعمة اللي بترفسيها لما ترفضي المبدأ من الاول.. حد يرفض النعمة؟؟ بتتبطري؟ ده حتي يبقي اسمه حرام
...
طيب..ح خليني معاكي.. انتي مش عايزة واحد يجي من الباب.و بتسميه جواز صالونات فاشل..و في نفس الوقت مش عايزة واحد ييجي من الشباك و يقولك بحبك اعبدك اموت في هواكي و مقطع السمكة وديلها..مش ده كلامك؟ طيب عايزة تتجوزي ازاي بقي..؟
...
معندوش مانع انك تشتغلي و لا اي حاجة... اهو شايف اخواته البنات قصاده..قعدي معاه في قعدة عائلية وخدي اسألي عنه..و لو ارتحتي يبقي اتوكلي علي الله..و في الخطوبة يا ستي ابقي اعرفي طباعه اكتر
...
هو مينفعش اللي جي يتنيل يتقدم ده يكون عارفني..و عايزني؟..مش لازم يعني اكون ساحراه و مدوباه يعني من اول نظرة.. بس يحسسني انه جي عشاني... مخصوص ليا.. و لا ايه؟ فرق ايه عن غيره..و فرقت ايه عن بنات غيري بالنسبة ليه؟
...
بصي.. هو بيشتغل في السعودية...و مش نازل اجازة الا بعد شهرين.. اهو اسألي عنه..و فكري و ادي نمرته اتكلمي معاه..لو حصل في الامور امور.. يبقي في فبراير الجاي اعملوا الخطوبة.. انتي مش شفتي صورته؟ خلاص..عايزة ايه بقي؟
...
شوفتي يختي كميلة عليه...ابني اسم النبي حارسه لسة قصادة سنة جيش.. تكون هي خلصت..و ابوه مجهزه من مجاميعه..احنا بانيين و الحال ميسور الحمد لله..وربنا يوفق..هه نيجي نشوف العروسة امتي؟ و بعدين انتي امها برضه وعيها ..و لا هي من بتوع اليومين دول مش عاوزة اتجوز يا ماما!؟
...
لا ماكنش ينعز... بيقولك عايز واحدة ما تشتغلش.. وعارف اني لسة في الكلية في سنة تانية.. ومعندوش مانع..يبقي من الاخر عايز واحدة يشكلها علي كيفه.. تقعد له جارية في البيت..من بيت ابوها لبيته..ودمتم
...
ياختي بنت خالي اللي قدنا اتخطبت ماشاء الله..و بنت عمتي اللي اصغر مننا اتخطبت راخرة..واحنا اهو ح نتخرج و لا شفنا قراية فاتحة حتي!! كدة خطر علي عقلي الباطن
...
يا ماما هي لسة نصيبها ماجاش.. ليه كلكوا عملينها ازمة و معقدينها.. ح تم 28 الشهر الجاي؟ وايه يعني؟ هي كويسة و بنت حلال و تستاهل كل خير.. بس كفاية ضغط عليها كدة..مش بايدها
...
جايبين لي واحد مطلق و معاه عيال عشان انا عندي 32 و لسة متجوزتش؟؟؟؟ يبقي قلته احسن..و ايوة اعيش بطولي من غير راجل و من غير ظل الحيطة كمان
...
اديكي شايفة طنط سعاد.. اهي عدت الخمسة و اربعين..و ماتجوزتش..و والله كانت احلي بنات دفعتنا..و مؤدبة و محترمة..و كانت متجهزة من الابرة للصاروخ..لكن ربنا ماارضش..و جهازها اهو يا وزعته يا باعته يا استعملته.. ربنا ما يكتب علي حد
...
يا بنتي متكونيش عبيطة...عايزة تبقي زيي تتجوزي وعندك اربعين سنة.. و تخلفي و حياتك في خطر و مش عارفة ح تعيشي ليعيالك دي قد ايه..ماهو اللي فات مش قد اللي رايح..انا قعدت في وش امي وهي تندب حظها و تتحسر عليا...وكاني عملت جريمة... بس اهو ربنا كرمني في الاخر
...
شعرك طويل و لا قصير؟؟ وده من ضمن الشروط اللي نازلة في لايحة جنابه في العروسة المطلوبة؟؟ انا اعرف يسأل محجبة؟ مش محجبة؟ بتعرف تطبخ؟ بتشتغل؟ مش شعرها
...
يا جماعة هو ايه بيعة و شروة يييجي يتفرج عليا لو عجبته يقوم مكمل اللعبة لو لا.. يبقي مخسرناش غير علبة الجاتوه..انتو بتفكروا ازاي؟؟ واحساسي و كرامتي؟
...
طيب..ماشي.. انا بقي عايزة عريس يتحدث الانجليزية بطلاقة فشر توني بلير.. و عريض المنكبين طويل القامة مشرئب الفلنكات...شلولخ.. و عايزاه عين خضرا و عين زرقا..و بيلعب رياضة.. و بيحب يقرا كتب غير ميكي جيب.. و اهلاوي.. و عنده ميكروباص..و بيحب الممبار..اه و لما ييجي اعجبه و اهوسه..و هوة بعد كل ده ميعجبنيش و انا قوله مع السلامة السكة اللي تودي...جتكم القرف هو احنا كمان مش من نفسنا ننقي و نتشرط و نختار؟
...
مينفعش..يعني ايه بنت تسافر تتدرس..هو انتي ولد؟ لما تبقي تتجوزي ابقي سافري مع جوزك و اعملي اللي انتي عايزاهّ!! اه و عشان برضه متحلميش.. مفيش راجل ح يسافر ورا طموح و احلام مراته.. يعني موضوع الدراسة برة ده انسيه تماما
....
بصي جيبالك عريس عنده 23 سنة و تاني 33 سنة..متقوليش علي حد لا..شوفي ده و ده و اقعدي معاهم و صلي صلاة استخارة..و شوفي اللي ترتاحي له اكتر


...


يا عبيطة.. اديكي شايفة انا و عمك اهو متجوزين اتناشر سنة و قعدت اقول عايزاه يا بابا و باحبه يا بابا و عايزة من ده يا حوزونبل و اديني اهو متنيلة علي عيني قصادك.. قطع الحب و سنينه.. لا من نفس مستوانا و لا تربيتنا و لا اي حاجة..و بيطلع عقده عليا.. و في الاخر طلع لايف علي واحدة اصلا...لكن اللي ماما جايباهولك ده عارفين اصله و فصله.... عملنا ايه بالحب بلا وكسة


....


ماما في الرايحة و الجاية تقولي بلا نيلة انا و انا قدك كنت فاتحة بيت..ده انا اتشبكت و انا بنت تسعتاشر.. وانا اهو ح اتم 23 و حاسة اني بتخنق..و اختي الاصغر مني اتجوزت..هو بايدي؟؟؟


..


.


.


.
ده اللي بعض من اللي بيدور في جلسات النواعم من مختلف الاعمار... ده واقع بنعيشه قايمين نايمين عليه
اكييد في حاجة غلط.. فيه موروثات..فيه تطبيق خاطئ للدين.. عادات..و تقاليد..


.


.



طب ده مش بيؤدي الي الخطوبة المتسرعة و قرارات الارتباط السريعة؟


مش ده بيؤدي الي شعور البنت انها عنست بدري رغم انها ما رتكبتش جريمة ؟


.


.


ولا انتوا ايه رأيكوا

Friday, December 15, 2006

من مذكرات عتريس وفؤادة




سارة بنت جميلة و ظريفة.. ادبا و خلقا. متدينة باعتدال و ملتزمة..مرحة...مسئولة جدا و يعتمد عليها.. لها شخصية مستقلة و عقل راجح..من اصل و عيلة طيبين.. يعني من الاخر..تتحب.. واعرفها من اول يوم دخلت فيه الكلية..و اتوطدت صداقتنا.. يوم ما اتخطبت.. فرحت لها اوي.. لانها فعلا تستاهل كل خير.. و من كلامها عن خطيبها كان باين عليه ( عشرين خط تحت باين دي واخدين بالكو) شاب كويس: علي.. بيشتغل شغلانة محترمة.. عنده بعض المشاكل العائلية.. الا انه اتخطي المشاكل دي و استقل بحياته و نجح..و جه الوقت انه يتجوز..و عن طريق المعارف...و ان سارة تعرف ابن عم بنت اخت ابن خالة العريس.... فتم التعارف.. فاللقاء.. فالقبول.. فكيوبيد.. فقراءة الفاتحة... فكيوبيد مرة اخري باسهم زيادة... فالخطوبة...و لولولولييييي


بعد شهر من الخطوبة...سارة جت في يوم مكلضمة و وشها شراب مقلوب... مالك.. مفيش.. حصل حاجة؟ في البيت كويسين؟ انتي و علي ؟
انفصلنا
ايه؟ ليه؟ في ايه؟

علي طلع شاب غيور... بيغيير عليا من كل حاجة و اي حاجة... رايحة هنا و لا هنا كلميني قبلها... ( ليه هو كتب عليا؟)... هاتي جدولك.. عشان ابقي عارف مواعييدك بالظبط و بترجعي امتي... انت بتشك فيا؟ لا مش باشك فيكي لا سمح الله بس احب اعرف تحركاتك ( تحركات ايه هو احنا في المخابرات؟).. مش ح تلبسي النقاب ان شاء الله بعد ما نتجوز؟.. لا.. نقاب ليه؟ ما انا محتشمة و محجبة و راضية ربنا.. ح تفرض عليا النقاب ليه؟.عشان ماحبش حد تاني يشوفك غيري..باحس جوايا بنار لما حد بيبصلك .(!!!!!)..ما نكتب كتابنا في نص السنة؟ لا..متفقناش علي كدة .. ليه؟مش بتحبيني؟ ليه نستني؟ .. عشان احنا لسة بنعرف بعض ..الخطوبة معمولة عشان كدة..هو احنا لسة معرفناش بعض ؟( لا لسة..انت بتهرج و لا ايه).. متروحيش عند عمك.. ليه ان شاء الله..؟ عنده ولد؟ اه محمد ماله؟ ده ولد و لا مش ولد ؟و مش محرم كمان؟ (نععععععععععععععم)... دول اهلي ح اقاطع اهلي كمان..و بعدين ده اصغر مني باربع سنين..غير ان كلنا قاعدين بحدود و و احنا اهل في بعضينا .و متربيين سوا انا و لاد عمامي و ولاد عماتي و ولاد خالي ..و بعدين اهلي ربوني كويس.. معلهش انا باحب اطبق الشرع و الدين و انا ماحبش ان اللي ح تبقي مراتي تقعد مع رجاله غريبة.. مش كفاية يوم حفلة الخطوبة مسك ايدك قصاادي!!!! (مسك ايدي فين و نيلة ايه.. هو انت فاكر اكلت ايه امبارح؟؟) يا هانم مسك ايدك و رقص معانا لما كنا عاملين دايرةكبيرة في القاعة..!! انت بتتكلم جد و لا بتهزر ( علي فكرة هو هزأ محمد ابن عمي ع الحركة دي اللي هي انه مسك ايدي. شوفتيش الخيبة اللي انا فيها ..قاعد ع السقطة و اللقطة)و بعدين يا ريت لما تكوني عندنا تاني مع اهلك مش تقعدي تتكلمي مع اخويا الصغير كدة..كدة اللي هو ايه؟ علي.. جرالك ايه؟. ده اخوك اللي اصغر مني بسنيين..و اعرفه من قبل ما اعرفك..و انت و اهلك و اهلي قاعدين.. انت شارب حاجة؟ الدين مافيهوش الكلام ده.. انا باطبق حدود الشرع..و علي فكرة مترديش ع التليفون..و انا ايش عرفني اللي ع الخط ده راجل و لا ست؟؟ ما هو بصي بقي .. عجبك علي كدة عجبك..مش عجبك

علي



ايوة؟
دبلتك اهيه

اموت و اعرف انهي دين و انهي شرع اجاز له انه يحلل و يحرم علي مزاجه... و كأن انا اللي معرفش الدين و لا اهلي ربوني....طب اللي جي يتكلم ع الدين ده مفكرش مثلا ان لما بنقعد لوحدنا في الصالون من غير "محرم" انه لا يجوز.. و انه بقي ما دام بيقول الدين و حرام و حلال..اننا منخرجش مع بعض من غير محرم ان شاء الله حتي اخوه الصغير..و لا بلاش حكاية اخوه الصغير دي لا يقول باخرجه معانا عشان اسبّل لاخوه و لاحاجة... يا شيخة بلا هم





___



وده من ايه لا مؤاخذة ؟حساسية يعني و لا زعل؟؟



جواز صالونات؟



و لا احنا فاهمين الدين غلط؟



و لا هما اللي غلط؟



و لا تربيتنا؟



حد فاهم حاجة

Monday, December 11, 2006

يا واش يا واااش يا مرجيحة



نفسي في مرجيحة.. العب عليها وقت مغربية , زي العيال امسك السلسلة كويس, واتمرجح بشويش.. يعدي من بعيد.." كابتن كابتن...ممكن زقة؟ " ..هووووب..(امسكي كويس)...هووووب ( افردي رجليكي و اتمرجحي يلاا)هووووب... صوته بيجيي من بعيييد..حاسة بالهوا بيمرجحني معاه..ارجع لورا ..... بانسي ..و استعد للانطلااااق..وهووووب.. بطيييير لفووووق..بعيد.. بعيد لحد السحاب..زقة كمان و ح اوصل للسما.. شعري طاير مع الهوا.. باغمض عينيا واحلم.. حاسة اني بعدت اوي عن ارض.. من بعيد بيناديني ( سيبي ايدك متخفيش) فتحت دراعاتي كأني ح احضن الدنيا.. شعري طاير ورا مني ..و معاها سيبت الخوف .. بضم رجلي و افردهم..فاردة ضهري.. سامعة زقزقة عصافير..هوا بارد بينعشني..بطلت ازق نفسي.. سبت نفسي ليها.. تمرجحني ..و تطيرني...و الهوا بيلمس وشي.. بتهدي..و سايباها بتهدي..كأني عصفورة فاردة جناحاتها..رجلي لمست الارض.. وقفت المرجيحة.. فتحت عينيا..و بصيت له ... : كابتن..ممكن زقة كمان؟

Saturday, December 9, 2006

قصاقيص



لما الشتا يدق الببان"


"لما تناديني الذكريات


علي الحجار


....


اعشق فصل الشتاء.. و حجرتي الدافئة ..صوت منير يمتزج بقطرات المطر خارج الغرفة.. يتساقط علي زجاج


الشرفة..ووجه نضر في الصباح متشح بحمرة الزهور بفعل الدفء الساحر
....
الاسكندرية متعة الشتاء..مع صوت فيروز المتألق يتغني بشط اسكندرية.. لتكن الامواج الكورال المصاحب.. اتدثر جيدا.. يداي باردتان..لكن القلب دافئ بفعل الحنين..امنيتي
....
انا بخير.. اتنفس.. احيا.. اتعايش.. لم استسلم بعد... و لا اعلم من اين اتي بهذه القوة
....


برة الشبابيك غيوم"


برة الشبابيك مطر


"وانا خايف وحاسس بالخطر


منير


....
اصبت مرة اخري.. لقد سئمت من هذا الجسد العليل.. البرد و الانفلونزا احتلا جسدي... و ليبدأ الانهيار
....


اخشي المستقبل المبهم..اهابه
....
نعم... افتقدك
....


اشتقت اليك فعلمني الا اشتاق"


"علمني كيف اقص جذور هواك من الاعماق


عبد الحليم


....
الملل بدأ يتسلل الي.. لا.. بل قد استوطن بالفعل.. ابحث عن الجديد.. عن الاشياء الصغيرة التي تصنع المعجزات..ام تراني ابحث عني؟
....
هذه الموسيقي هادئة.. اسبح معها بعيدا حيث اللا عودة
....


تيه عظيم...لا اجدني


....
ازهاري الرقيقة لم تذبل بعد.. انها تقاوم مثلي.. و ستنتهي بين صفحات كتابي الصفراء
....


ها الوردة"


"دبلت بكير


جوليا بطرس


....


مقصرة...مذنبة...تائبة


....
اه من الوقت.. غاضب و قاس و سريع.. و انا لا اقو علي تحدي الزمان.. لكن لابد لنا من وقفة لنسـتأنف الجولة
....
اشتاق لأحاديثنا المطولة..نرسم بالدقائق قصور السعادة
....


لو شي مرة صبحية"


"تفكر تتصل فيا


فيروز


....
لا.. لست بحزينة... ولم يتملك مني الاكتئاب بعد.. فقط لنتجاهله لبعض الوقت
....


ارتجف


....
تتقاذفني الحياة الي حيث تشاء.. و انا اشاهد في صمت
....


اصرخي...اغضبي...فالسكون سيقتلك


....


ستتبدد الغيوم...وسيشرق فجر الأمل.. فالليل يعقبه النهار... انها قوانين الطبيعة


....
كما وعدتك.. سأكون بخير


....


"تا اقدر نام"


فيروز


....


لا لست بخير... انها كذبة اتنفسها


....


اشتاق لجدي و جدتي..و بيتهما الدافئ.. لاغتسل بعطر الذكريات...منذ قليل كنت اتصفح البوم صور عيد ميلادي الاول في بيتهما .. عيون جدتي الضاحكة... ضميني الي صدرك .. انه الامان المفتقد
....
"لكنني لم انس قط"


..
"و لا انا"
....


لا داعي للقلق...انها الحمي
....


انتصف الليل
و غدا...قصاصات ورق جديدة

____


_____


مقتطفات الاغاني


علي الحجار: لما الشتا


منير: برة الشبابيك


حليم: رسالة من تحت الماء


جوليا بطرس: دبلت بكير


فيروز:عندي ثقة فيك


فيروز: شو بخاف

Thursday, December 7, 2006

أحلام



سيموت الخوف و تجمعنا كل الأشياء


ذراتك تعبر أوطانا


وتدور و تبحث عن قلبي في كل مكان


و يعود رمادك لرمادي


يشعل حريقا يحملنا خلف الأزمان


أطوي أيامي بين يديك


هموم الرحلة و الأحزان


...


..


.


__________


شعر لفاروق جويدة

Wednesday, November 29, 2006

ونبحر تاني...



بحلم معاك
بسفينة
و جنينة
ترسينا
و نبّحر تاني

.
.
تحدثا طويلا عن المال و الاعمال , عن مشاغل الحياة القاسية ... باختصار كانا يتحدثان عن طواحين الحياة المادية التي تسرقهما من عوالم الشعر و الموسيقي
.
.
الريح تعاند
والاقيك
في عينيك
وايديك
شطي و أماني

.
.
تصمت.. تنصت الي صوته الدافئ.. تحلم...فتعزف عيناها انشودة القلب الحبيس ... ثم تتحدث.. تثرثر... تحدث صخبا.. ولكن الكلمات تتوه بين انغام العيون
.
.
.
يصمت: كنتي بتقولي ايه؟

عايش ويايا
عايش جوايا



تضحك: تصدق؟!..مش فاكرة..لسة كنت باقولك حاجة مهمة دلوقتي

طول ما انت
في الرحلة معايا



يضحك: وانا كمان سرحت..نسيت كنا بنقول ايه
.
.
.
ضحكات خجولة..عيون تتلاقي لتهرب من جديد خوفا من ان تبوح بسرها الاعظم..لكن يتحرر القلب محلقا بجناحيه ليغرد من جديد.. ليدفئ عالمهما و يذيب صمت الكلمات
.
.
اسمك و اسمي
يا حبيبي
مدينتي
و حكايتي
سكني و ترحالي


_________


بحلم معاك: نجاة الصغيرة

Tuesday, November 28, 2006

خمسة فرفشة



و دي بتفكرني بالانسان المعاصر لما اخد علي افاه


هههههههههههه


..


ومعكم اعزائي المشاهدين


ح اطير لكل البلاد و القارات


و اطوف و اشوف


واجيبلكم اغرب الطرائف و اعجب العجائب


في برنامجكم مواقف و طرائف


و الحلقة الخمسية بعد الالف الاولي


للسنة الخامسة عشر علي التوالي


ح نشوف النهاردة البطريق الغلبان


اللي اتاخد علي خوانة


وغني اه يا قفا


في سابقة لم و لن تحدث


في صراع الجبابرة


:D


..


راح فين البرنامج ده صحيح؟


كان بيجي يوم الجمعة دايما


:)

Sunday, November 26, 2006

What a Wonderful World!



لحظات قليلة التي اتحرر فيها من عباءة الحزن


لأجد الابتسامةالتي طالما غابت


لازالت تعرف الطريق الي قلبي


انه حلم


سرعان ما سينتهي


لاصحو علي كابوس الواقع


حيث الالم و الانين و الجراح


ولكن


لربما يدوم الحلم


ليجعل من بريق الغد


امل قريب


..


.


.


.


ملحوظة: مش تحس انك بتتنوم مغنطيسي مع الصورة و الاغنية دي؟؟


:))


.


.


..


تحديث


To Download- لتحميل الاغنية


What a Wonderful World : Louis Armstrong

Friday, November 24, 2006

ساعدمي كي أرحل عنك



دائرتك


تسحرني


تأسرني


تخنقني


تقتلني


و تتركني رمادا


..


.


..

Thursday, November 23, 2006

Still Loving You...



Time, it needs time


To win back your love again.


I will be there, I will be there.


...


Love, only love


Can bring back your love someday.


I will be there, I will be there.


...


Fight, babe, I'll fight


To win back your love again.


I will be there, I will be there.


...


Love, only love


Can break down the walls someday.


I will be there, I will be there.


...


If we'd go again


All the way from the start,


I would try to change


The things that killed our love.


...


Your pride has built a wall, so strong


That I can't get through.


Is there really no chance


To start once again?


I'm loving you.


...


Try, baby try


To trust in my love again.


I will be there, I will be there.


...


Love, your love


Just shouldn't be thrown away.


I will be there, I will be there.


....


Yes I've hurt your pride, and I know


What you've been through.


You should give me a chance


This can't be the end.


I'm still loving you.


...


I'm still loving you,


I need your love.


I'm still loving you.


Still loving you, baby...


________


Scorpions: Still Loving You

Monday, November 20, 2006

هشكنا وبشكنا يا ريس

سأواصل معكم مسيرة العبور الي المستقبل متحملا المسئولية و أمانتها ما دام في الصدر قلب ينبض و نفس يتردد لا اهتز و لا اتزعزع لا افرط في مصالح الوطن أو سيادته و استقلال ارادته, و لا اقبل اي ضغوط و لا انحني الا لله . يزداد ايماني يوما بعد يوم بقدرات هذا الشعب العظيم و تتضاعف ثقتي في مستقبل الوطن
من خطاب الرئيس و يا ريت تمسك اعصابك للاخر عشان انت صاحب عيّا و عندك ولاد برضه محتاجينك..و انا قصدي انت انت..ايوم انت..القارئ...مش الريس اكيييييييد

...

......

..
من شرفة الصحافة- الاهرام- عبد الجواد علي
مشاعر الحب للرئيس

استقبل النواب الرئيس في القاعة بالتصفيق الطويل و الحار , و الرئيس يبادل النواب التحية بالتلويح بيديه و هو يقول : شكرا .. شكرا, و يهتف احد النواب في الصف الاول بالقاعة : و الله من القلب فعلا يا ريس , و قد بلغت مرات التصفيق منذ وصول الرئيس حتي مغادرة القاعة نحو ثلاثين مرة

ثلاثين مرة؟؟؟ بس؟؟ و عدتهم كمان

كانت المرات التي صفق فيها النواب بحرارة خلال خطاب الرئيس. عندما اعلن ان مصر تتجه الي الاستخدام السلمي للطاقة النووية و لا ننتظر اذنا من احد, و هنا يعلق احد النواب قائلا : ربنا يخليك لينا يا ريس, و ايضا عندما قال الرئيس مؤكدا اننا نواصل مسيرة للعبور الي المستقبل مادام في الصدر قلب ينبض و نفس يتردد و لا اهتز و لا اتزعزع و لا اقبل ضغوطا و لا انحني الا لله, و قد استجاب الرئيس لطب النواب باعادة قراءة هذه الفقرة من الخطاب, و خلال التصفيق الحار, علت اصوات تهتف بحياة الرئيس مبارك تقول : تعيش لمصر يا ريس.., الرئيس مبارك يرد قائلا : شكرا..شكرا.. شكرا

طبعا هو بيقول "شكرا" ثلاتة مرات علي اساس انها سنّة..و بعدين ايه حكاية "مسيرة العبور الي المستقبل" الا لو كان قصده ان الاهلي يوصل في "المستقبل" القريب ان شاء الله لليابان و بطول العالم للاندية..كدة نبقي مبلوعة..و ابقي سلم لي علي خالته نووية

بعد ان القي الرئيس مبارك خطابه و عند خروجه من القاعة, التف حوله النواب لتحيته و السلام عليه بالمصافحة و هو بيادلهم المشاعر الصادقة بالحب و التقدير

علي رأي محمد صبحي: اذا شققت صدري بسكين وجدت بطين ايمن و بطين ايسر و اورطة...انا الدمعة فرت من عيني..خاصة و انا بافتكر يوم القاء الريس الخطاب الصبح و شارع صلاح سالم و العبور اتقفلوا..و العساكر و هي وقفة في الشارع..و ع الكوبري.. و في نفس الوقت الريس بكل "حب و تقدير" كان بيحيي نواب الشعب..و العسكري ده مش ابن الشعب برضه

صفق نواب الصعيد بحرارة عندما اكد الرئيس مبارك الاهتمام بتنمية الصعيد و الدلتا, و ضحك الرئيس وهو يقول: انا قلت الصعيد اولا, و قال احد النواب: ربنا يخليك لينا يا ريس و لمصر كلها

حد يقول "للنايب"ده يخليه في حاله و يدعي لنفسه..ماهياش نقصاه.,.واضحك كركركررررر

بمجرد دخول الرئيس مبارك قاعة الاجتماع المشترك لمجلسي الشعب و الشوري, و قف النائب محمد عبد العليم داود قائلا: نناشدك يا سيدادة الرئيس اصدار عفو عن طلعت السادات و ايمن نور, ثم جلس النائب في هدوء , و كل العيون تنظر اليه
!
و الله الراجل الصحفي ده هو اللي حط علامة التعجب (!) مش انا.. يعني كل الكلام اللي فات من تصفيق و تهليل...وثلاثين مرة و اللي يحب النبي يصقف..مش محتاج علامة تعجب..لكن لما الراجل جاب سيرة ايمن نور و طلعت السادات.. يبقي يستاهل اللي يجراله.. قصدي يعني علامة التعجب

....

....

..

تصدق بالله

علي رأي فيروز

عندي ثقة فيك

و بيتكفي

و عشان كدة احنا اخترناااااااااااااااااااااااك

Friday, November 17, 2006

كلام أغاني..بس كدة



عندي ثقة فيك
عندي امل فيك
بيكفي
شو بدك يعني اكتر بعد فيك


..
عندي حلم فيك
عندي ولع فيك
بيكفي
شو بدك انه يعني موت فيك


..
والله راح موت فيك
صدق اذا فيك
بيكفي
شو بدك مني اذا مت فيك


..
معقول فيه اكتر
انا ما عندي اكتر
كل الجمل يعني عم تنتهي فيك


..
عندي ثقة فيك
وبيكفي
..
حبيتك
مثل ما حدا حب
واليوم (اللي) راح تحب


..
وانت شايفها عادية
مش بها الاهمية
جرب ما تفهم شو علقني بس فيك


..
باكتب شعر فيك
باكتب نثر فيك
و بيكفي
شو ممكن يعني اكتب بعد فيك


..
معقول فيه اكتر
انا ما عندي اكتر
ما كل الجمل يعني عم تنتهي فيك
..
تحكيني مثل طفل صغير
وهاملني كتير


..
لو شي مرة صبحية
تفكر تتصل فيا
قل شو ياللي بيعلقني بس...فيك

....
..
.
عندي ثقة فيك
.
..
....
كل الجمل و الحكي و الكلام فيك

_____________


اغنية للرائعة فيروز :عندي ثقة فيك

Thursday, November 16, 2006

I'm Alive!!



Tried to comment and describe how I feel! but couldn't! Just this picture speaks of my whole state these days... ya rab dayman bas :D!!


SMILE

Friday, November 10, 2006

اتحاد الطلبة بالحبر الفسفوري: قصة واقعية

شهادتي عن انتخابات اتحاد الطلبة في جامعات مصر المحروسة

ملحوظة من اولها كدة : الموضوع طويل حبتين يعني هاتوا كباية شاي و اقراه بتمعن..و القصة دي واقعية احداثها لم يمر عليها غير الاسبوع بالتمام و الكمال.. بالظبط كدة الخميس اللي فات..و توابعها لازالت مستمرة..و لمقدمة منطقية و استهلال لابد منه تفضل بقراءة البوست السابق.. استمتع بالشاي بقي

_____________

شاءت الاقدار و لا بتوع السينما كدة..اني اسمي يترشح انزل مندوبة عن سنة رابعة في كليتي (تم ترشيح اسمي من قبل رئيس القسم و استاذتي)..لاشهد انتخابات اتحاد الطلبة... مندوبة عن الفرقة الرابعة..شفتها كنوع من الثقة الحمد لله و المسئولية ....و بما اني لا ليا لا في انتخابات و لا الاتحاد و لا اعرف عنهم حاجة... فكانت تجربة جديدة بالنسبة لي.. امتي يا جماعة طيب الانتخابات دي اللي لازم احضرها؟؟ بكرة الخميس..ماشي..بكرة!!!..ده و لا فيه حس و لا خبر في الكلية.. يعني لا يافطة و لا لوحة و لا ترقبوا و لا انتظرونا و لا حتي تنتخبوا مين..ماشي ما علينا..هي بدايتها كدة..مش جديدة يعني

الخميس الساعة تسعة الا ربع كدة...كنت وصلت كليتي و رحت اسأل عند رعاية الشباب عن موضوع الانتخابات..يا جماعة انا فلانة نازلة للفرقة الرابعة بالترشيح من الدكتورة الفلانية.. ايوة اهلا وسهلا اتفضلي.لسة مفيش حاجة.. طيب ممكن اعرف من حضرتك ايه دوري..؟
مفيش انتي ح تكوني في لجنة الاشراف ع التصويت بتاعة سنة رابعة.. ايوة يعني مطلوب مني؟؟ .. ح تعرفي كل حاجة..استريحي بس..طيب المفروض الفترة قد ايه يعني اللي انتوا عايزيني فيها ؟
من الساعة تسعة لحد الساعة تلاتة!!!!! لو حبيتي تحضري محاضرات ابقي استـاذني من الدكتور اللي معاكي..و ابقي انزلي تاني...و سابتني الست الموظفة..و كانت بتلقي تعليماتها علي باقي الموظفين و العملة.. تعالي شيل معاه المكتب

قعدت في ركن من الاوضة دي...كانوا بينقلوا مكاتب الموظفين..عشان يخدوها للقاعة اللي ح يجري فيها الانتخابات...ايه ده مكتبي فين؟ دخل القاعة... امال انا اقعد علي ايه؟ علي اي حاجة..الصندوق اهم.. الصندوق هو اللي ح يقعد ع المكتب..و ايه ده كمان جيبين لهم صناديق شفافة؟؟ امال... عشان "الشفافية"...هما واخدين الموضوع جد اوي كدة ليه...!!!!! انا عايزة صندوق من دول اعمله حوض سمك...لا ده كمان ينفع عندنا اوي في اللجنة الفنية !!! الحوار ده دار و غيره من التعليقات الساخرة و الضحكات وانا قاعدة مع جماعة الموظفين اللي عمالين ينقلوا مكاتبهم للقاعة التانية ..و عادي خالص و لا كأن فيه غريب في الدار..انا يعني

يا دادة...تعالي لمي المزبلة اللي جوة دي... الزبالة في القاعة كتير..و امسحي الترابيزة..خلاص خلي العميد تيجي
تشوف القاعة بالمنظر ده..انا ماليش دعوي..و بعدين نادت عليا الست الموظفة من ع الباب . تعالي يا انسة...ايوة...اتفضلي اقعدي جوا بقي...يا فلان الطالبة دي جاية مندوبة سنة رابعة... سنة رابعة ..ايوة اتفضلي خديلك كرسي و استريحي اهو صندوق سنة رابعة و المكتب..طب حضرتك مش ح تحتاج كرنيه او اثبات شخصية ليا اني حضرت هنا؟؟...اه حاضر..ح اقولك كل حاجة بس اما نخلص تجهيز القاعة بس..استريحي..!!! ومشي و سابني و لا شاف وصل النور حتي

.تعالوا بقي نبص ع القاعة..في الاربع الاركان ..الاربع مكاتب..و صندوق اقتراع لكل فرقة.. و الدادة لسة بتكنس..و ترابيزة اللي جنبي مردومة تراب..و الدادة بتمسحها..مالت عليها احد الموظفات..يعني قعدنا نهاتي عشان الترابيزة دي تتمسح ..دلوقتي بس بتنضفوها!!! هو لازم يكون فيه حاجة عشان تتمسح!!

ابتدا الدكاترة المشرفة توصل... الاستمارات الترشيح الملونة لكل فرقة... الطلبة المندوبين عن الفرق الاخري.... و لا حد كلف خاطره يشرح او يقول اي حاجة للطلبة... ولا حد سأل في اثبات شخصية و لا امضاء حتي لينا كطلبة (هما فاكرين انهم جايبين كيس جوافة و لا ايهّ!!!).. عمليات التنضيف انتهت.. الدكاترة وصلت.. الطلبة المندوبين. ناقص طالب لسنة اولي..اجري هاتلي طالب لسنة اولي بسرعة!! (تحس بيطلب حلبسة و اتوصي بالشطة بسرعة) !!دكاترة المراقبين .. كله تمام

الاجراءات
كل لجنة مشرفة مكونة من دكتور..موظفة من شئون الطلبة و الطالب المندوب عن فرقته..كله معاه عدد واحد صندوق شفاف.. رزمة من الاستمارات الترشيح..و حبر فسفوري يا معلم..ايوووووة..الحبر اللي يخلي صباعك ينور في الضلمة ده.. بنقول شفافية ..شفااااااااافييييييييييية!

تعالي بقي نتفرج علي استمارة التصويت دي... جداول كتير و اللجان مكتوبة..لكن كلها مشطوب عليها انها خلاص نزلت "تزكية"..و فضل لجنتين بس..الطالب يرشح من كل واحدة اسمين.. يعلم جنبهم علامة صح.. يحط الورقة زي الشاطر في الصندوق الشفاف.. يحط صباعه في الحبر الفسفوري و يتكل علي الله.. وفي النص بتكون الموظفة اتأكدت من بطاقته او اي اثبات شخصية ليه و ان اسمه مذكور في قوائم القسم و السنة بتاعته..و دمتم..ماشي الكلام؟؟ ماشي الكلام...اه بالنسبة للستارة زي ما بتشوفه في التلفزيون ..مفيش طبعا...انت مش بتنتخب الريس..و لا هو سر من اسرار الدولة..و كمان بيدخلوا مجموعات مع بعض..عشان "العملية مش مستاهلة" علي حد ذكر البعض و ان الناس عايزة "تخلص"!!! و كان نفسي اصور و الله الطالب و هو سعيد و بيحط الورقة و انزل صورته في الاهرام..و صورة طالبة بتورينا صباعها بالحبر الفسفوري و تنزل في الجمهورية..و الابتسامة من الود للودن...انما محصلش نصيب

عن الدكاترة المراقبين:

الحقيقة..اختلفت ردود افعالهم... الاغلب شايفين ان نزولهم هذا اليوم جه"تدبيسة" بطريقة او بأخري و اهو ضاع يوم كامل من التاسعة صباحا الا ما شاء الله من غير محاضرات..اذا فلله الامر من قبل و من بعد.. الدكتور المراقب شايف ان طلبة الكلية مش متعودين علي جو الانتخابات و لا كان ابدا عندهم علم بالاتحاد و دوره...و ده اوافقه عليه...و انعدام الدعاية في اليوم ده ح يتسبب في قلة عدد الاصوات..و لو موصلناش لعدد الاصوات المطلوب عند الفرز.. الانتخابات ح تنزل اعادة..و ده اللي كانت الدكاترة مقلقة منه...اصل تاني الدكتور شايف انه "ولا ح تفرق"..و "مش مستاهالة كل ده" ان يضيع يوم تاني في الاعادة.."و يا ريت نقفل النتخابات النهاردة و نخلص" ده رأي الدكتور المراقب اللي معايا..و مش بيقولي انا اللي الكلام ده بس..انما كمان لوكيل الكلية: قولوا للطلبة اللي واقفة ع السلالم دي و بره تيجي تنتخب عايزين نخلص النهارده

الحقيقة..مع بدء توافد الطلبة..من موقعي الاستراتيجي.. شفت الاربع دكاترة في اماكنهم... نوع مركز اوي مع الطلبة و بيساعدهم و مركز فعلا مع المندوب و الموظفة و هما بيشتغلوا و متحركش من مكانه.. و فيه الدكتور اللي قاعد و مش قاعد ..يعني بيشغلوا في اي حاجة تانية ..ورق بتاعهم.. يشوفوا مصلاحتهم يعني بدل القعدة و الموظفة و الطالب المندوب قايمين بالواجب و زيادة..و اهو لو فيه حاجة ح يسيب للي في ايده و يشوف عايزين ايه

موظفة الشئون الطلبة
دورها في كل لجنة..انها معاها القوائم بجميع اسماء طلبة السنة ...يجي الطالب من دول يديها اثبات لشخصية ..تعلم جنب اسمه.. تديله استمارة ..تفهمه المطلوب منه في الورقة.. يرشح حد ازاي يعني.. و تقوله ع الحبر الفسفوري.. و تديله بطاقته ..يعني من الاخر هي اللي القايمة بالعملية كلها..لكن الحقيقة هنا بقي ظهر تطوع الطلبة المندوبين لكل فرقة.,..فكفايه ع الست انها تتأكد من شخصية الطالب..و المندوب بيساعد في عملية الحبر و الشرح او الاستمارة يعني... يعني اللي شايلين الليلة الطالب موظفة و الدكتور موجود لو لا قدر الله حصل مشكلة

الطلبة المندوبين
عشان الرجل كانت خفيفة علي سنة رابعة شوية..علي عكس سنة تالتة و اولي مثلا و تانية شوية.. فبرضه من موقعي الاستراتيجي هذا كان عندي متسع من الوقت اني بدل ما اهش دبان..اشوف الطلبة الاخري..و لاحظت نشاط الطالب المندوب لكل سنة..ازاي واقف علي رجله علي طول يستقبل الطلبة الوافدة للتصويت..و يفهمهم..و يساعدهم في موضوع الحبر الفسفوري ده...و اختكم الحقيقة اتبهدلت حبر فسفوري و اتدلق عليا هههههه كله في سيبل الشفافية برضه..بس الحق يقال حماستهم و حماسة الطلبة اللي جاية ترشح و تصوت اصلا تشجع و تحمس جدا..و تحزن ان في نفس الوقت نقص الدعاية و اغلبها جايين يرشحوا جماعة الاصدقاء و ان صحبتها قالت لصاحبتها التانية ترشح زميلهم اللي في القسم..طب انا مش من نفس القسم و لا اعرف اخد انهي اسم..مش مشكلة.. زميلك ح يميل عليك و يقولك تنتخب مين من اصحابه..كلها منفعة و مصالح

اول صوت
الحقيقة كم الاستخفاف من قبل المسئولين بالعملية الانتخابية كلها كان من الاشياء المحزنة...اول بنت جت في لجنة سنة رابعة... الموظفة ارتبكت..ناديت الدكتور اللي كان من اولها كدة قام اصلا.. عشان يحضر الشغل بقي...المهم..الدكتور قال لها علّمي هنا و هنا و خلاص.. و نسي يقولها ع الحبر الفسفوري.. اللي كان لسة قصادهم ع المكتب.. قلت ح يفتكروا..ابدا.. البنت مشيت و مافيش.. باستعباط سألت مش المفروض بعد ما يخلصوا يعملوا الحبر الفسفوري..؟؟؟
ايوة... سألت تاني باستهبال و غيظ برضه: ايه ده ..ده البنت معملتش الحبر الفسفوري ده؟ قلت يمكن ينزعجوا و لا حاجة... اه لا مفيش مشكلة... بكل هدوء للموظفة قال الدكتور لها... بعد كدة بعد ما الطالب يخلص و يحط صوته..خليه يحط صباعه في الحبر الفسفوري..و لم تهتز لهم شعرة..و من هنا و انا قررت ح اخد الحبر ده قصادي..عشان نخف الزحمة علي الموظفة الغلبانة..و اتأكد ان كل طالب مر بجميع الاجراءات

الحقيقة بجملة الاستخفاف و انعدام الدعاية...و ان الاعداد قليلة اللي صوتت فعلا.. وان لازم الصناديق تقفل علي الاف الاصوات و ليست المئات... رأي الدكتور ان الطلبة ينادوا علي زملاؤهم ان يجوا يرشحوا... حتي و لو مش عارفين حد من اللي في القوائم... بس علي حد قوله " ع الاقل ليك صوت .. استخدمه " (يا سلام ع الايجابية) .. باقول انا للدكتور.. فيه طلبة مش ح تيجي عشان متعرفش حد من القايمة.. زيي كدة و لا اعرف اي حد من الاسماء دي... فرأيهم انهم مش ح يدوا صوتهم لحد ميعرفهوش اصلا و لا حتي شكلا.. قاللي فعلا.. !! قلت في سري الحمد لله فيه حد لسة بيفهم في البلد دي و لكن يخيب الله ظني و في الثانية اللي بعديها.. اصطاد الدكتور المراقب بنت واقفة مصوتتش.. قالها انتي سنة رابعة.؟ ايوة؟!! انتخبتي؟؟ لا!! مش ح تدي صوتك ليه؟ اصلي معرفش حد منهم!! ازاي بس.. و كان قام لها بكل هدوء و ابوة.. بصي انتي ليكي صوت.. يعني اختاري اي اسماء.. بس متسبيش صوتك!!!!!!! (صوتها برضه و لا ورقة زيادة في الصندوق الشفاف عشان نخلص؟؟؟!!) و تدخل زميلها اللي كان بيرشح اصدقاءه..تعالي ح اقولك تدي صوتك لمين!!!

و قبل وقت الذروة ..و مفيش زباين علي سنة رابعة..و انشغال الدكتور.. كانت الموظفة اللي معايا بترغي شوية.. هي سيدة لطيفة ..قالت : انا اول مرة اشوف انتخابات..لا عمري رحت لا انتخابات رياسة و لا مجلس شعب.. سألتها: هو اول مرة تحضري انتخابات اتحاد الطلبة؟؟
لا مش اول مرة..بس اول مرة اتحاد الطلبة تكون كدة..و بعدين محدش قالنا يعني..انا عارفة بس اني يوم الخميس ح اتأخر في الكلية عشان الانتخابات.. و عرفت قبليها بيوم.. بس ماكنتش اعرف انها ح تكون كدة.. صناديق و حبر...و بالحديث عن قلة القبول ع الترشيح . قالت : اصل النهاردة الخميس..و الكلية قايمة ع المغتربين.. اللي بيسافروا..و معروف ان اغلبهم بيسافر من يوم الخميس...ده غير ان الفترة من بعد العيد كانت قصيرة ما سمحتش بأي دعاية للانتخابات...وافقتها علي موضوع المغتربين اللي اعدادهم كبيرة جدا في الكلية..و ان يوم الخميس في كليتنا "يوم ميت" مفيش عدد حضور اصلا كبير في الكلية..و ان محدش دخل اصلا يقول انتوا فين فيه انتخابات و انزلوا رشحوني حتي...غير ان طلبة سنة رابعة علي حد قولها : مش فارقة معاهم كدة و لا كدة ح يتخرجوا فمش لازم اتحاد و بتاع.. قلت لها: انا قسمي فيه بتاع ستميت طالب و طالبة ..اراهنك ان اغلبهم ما عدا قلة قليلة جدا يعرفوا حد او حاجة اصلا عن الانتخابات... و ثبت كلامي فعلا علي مدار اليوم ماجاش من قسمي العزيز ما يزيد عن الخمستاشر واحد!!

الاقبال الحقيقة كان علي طلبة نفس القسم من اللي الطلبة مترشحين منه..و توصيات الاصدقاء و اصدقاء الاصدقاء.. الامن واقف ع الباب.. بيّدخل هو الناس.. و بعلو صوته بيقول عمك الظابط..لا بجد شفتوا نظام كدة.؟!!! و طبعا ماحدش اعترض..اجدع سلام و تحية للنظام..هو فعلا مفيش هرجلة و لا حاجة.. بس انا السؤال اللي بيدور في بالي هي فين الانتخابات؟

الصوت الاسلامي- الاخوان المسلمين حاليا
الحقيقة انا معزولة عن العالم الخارجي و معفرشي ايه بيحصل برة القاعة غير ان فيه زحمة.. بس ايه موقف الصوت الاسلامي و هل ح يعملوا مشكلة زي كل سنة...ّّ معرفش الا اني قلت اكيد ح يحصل حاجة..و حدسي لم يكدبني
دخلت بنت منتقبة .. الموظفة عادي خالص علمت جنب اسمها زي اي حد تاني .. خدي يا بنتي استمارة.. البنت قالت لها : فين الاسماء ؟ انا مش لاقية الاسماء اللي عايزة ارشحها..ازاي يعني.. يا دكتور من فضلك ثانية واحدة.. كان ساعتها الدكتور المراقب كان معاه موظفة من المسئولين ع الانتخابات.. قاموا وقفوا :ايه يا بنتي؟ بحدة: اسماء طلبة كويسين جدا " اتشطبوا" مش موجودين...اتشطبوا يعني ايه.؟
يعني انا مش لاقية الاسماء اللي انا جاية ارشحها مع انهم ممتازين!!
هما في لجنة ايه طيب؟
معرفش!!
طيب اتشطبوا ليه؟
ما هو ده اللي انا عايزة اعرفوا..انا "اعترض" ع الانتخابات دي..( كان فيه فاصل من المسئولة ع الانتخابات بتهب فيها و تزعق لها و الدكتور بيهديها و يهدي البنت و يتكلم معاها بكل عقلانية) طيب دلوقتي انتي اسمك اتعلم جنبه..و مينفعش يتمسح... ممكن ترشحي اسماء تانية من القايمة؟؟
لا.. شيلوا اسمي..انا لازم يكون لي "موقف ايجابي" و انا معترضة علي الانتخابات دي.. ّ!!
ماينفعش نشيل اسمك..طيب انتي ليك صوت انتخبي زمايلك!!!
معرفش حد من الاسماء دي!!
طيب خلاص.. حطي الاستمارة فاضية..و يعتبر صوت لاغي..!!! ردت البنت : لاّ!! ( طبعا المسئولة سالفة الذكر كان بلغ بيها من العصبية مداها و بتشوح و تشخط و تنطر المهم مشيت و جه موظف تاني..عشان يتعاملوا مع البنت بهدوء)فين و فين.. حطوا الصوت فاضي.و البنت ماشية علي مضض

بعد كدة عرفت ان طلبة الصوت الاسلامي عملوا احتجاج بسيط... و مكانوش مصدر خطر او قلق.. بل بالعكس الامن و خلافه كانوا مهولين من موقفهم اكتر

الصحافين فييييييييين!

شويةو قال احد الموظفين للدكتور اللي معايا.. يستأذنه (تحس انه كبير القعدة يعني) ان فيه صحفيين بره عايزيين يدخلوا... شوفهم هما منين؟؟ رجع و قاله: من المصري اليوم.. استأذن من مكتب العميد طيب الاول.. رجع و قال: واخدين اذن من الامن: دخلت بنت و زميلها المصور و قالوا للدكتور انهم واخدين اذن من الامن قبل ما يجوا..و انهم من المصري اليوم.. عقبال ما البنت الصحفية كانت بتسأل الدكتور علي اقبال الطلبة و كام سؤال ع الماشي..كان المصور بياخد كام صورة للجان .. وعقبال ما البنت وصلت للدكتور التاني..كانوا يبنادوا عليهم..امسك دول ماخدوش اذن اصلا...تعالي هنا...خدوهم بره.اتفضلوا... جه واحد يشرح الموقف للدكتور..دول طلعوا ماخدوش اذن و لا حاجة من امن الكلية و لا حاجة

الاقبال مازال ضعيفا..ده تأكيد العديد ان الانتخابات بالمنظر ده ح تنزل اعادة ( معني انها تنزل اعادة ان نسبة الاصوات المطلوبة بتكون اقل بكتير يعني كفاية 750 صوت لانجاح المرشح و دول يجيبوهم في ساعة زمن في يوم في وسط الاسبوع ..و اللي معروف انهم ح ينجحوا ح ينجحوا في الاعادة بالتأكيد ) و متخدش في بالك

بعض اللي جايين من بره اشاروا ان فيه ناس ممنوعة من الدخول.. و مش من الصوت الاسلامي... عشان الاصوات تقل يعني..و اسهاما في تأكيد موضوع الاعادة... نسيت اقول ان مفيش حد عبر الناس اللي قاعدة دي من صباحية ربنا بشوية مياه.. الساعة قربت علي تلاتة... مفيش..كل مدي الاصوات بتقل..و الدكانة ح تقفل.. الي الان مفيش امضاء واحد يوحد ربنا اني شهدت هذا الحدث.. يعني تأكيد ان وجود الطالب المندوب عن فرقته كان صوري من وجهة نظرهم...الساعة تلاتة.. اقفل الباب..فرز الاصوات ح يبدأ..الطلبة المندوبين شكرا..

خرجت.. معرفش مش شايفة قدامي من تسعة الي تلاتة ,,,دماغي بتعيد احداث اليوم كله... ليه الاستخفاف بالانتخابات و كأن مفيش ثقة ان شباب الجامعة ممكن يتحمس للعملية الانتخابية؟ و ليه ع الاساس ده يتم التعتيم علي الاتحاد و نشاطاته و ميعاد الانتخابات بتاعته..و بالتالي انعدام الدعاية بأي صورة ليها؟؟ ليه التدابير دي كلها عشان تنزل الانتخابات اصلا اعادة؟ فين الستين الف جنيه ميزانية الاتحاد؟؟ ليه اللي عايز يرشح نفسه في الاتحاد يكون من المرحب بيهم عند الادارة و بمباركة الامن؟ ليه عايزين تظهر الاخبار في الجرايد القومية ان جامعة عين شمس و جامعات مصر ليها السبق في تقديم الانتخابات بهذه الصورة النزيهة و هي كانت صورية و الناس القائمين عليها مستخفين بيها؟؟ ليه بذرة الاصلاح اللي كانت ممكن تكون صح و تكون نواة المشاركة في الحياة السياسية بوجه عام ماتت قبل ما تتطرح؟ ليه حتي لما الطالب من دول رشح نفسه موقفش في كل مدرج لكل سنة ما بين المحاضرات و ّعرف نفسه و نشاطه عشان الفايدة تعم؟؟..مش ده اللي بيقولوا عليه "البرنامج الانتخابي " و لا ده زي غيره؟؟ ليه العملية الانتخابية و الاصوات جاية من شوية معارف و من تحت لتحت و بالسمع مش بطريق مشروع؟؟ مع ان مفيش تزوير و لا اصوات مضروبة و لا حاجة... ليه مش قادرة اقول انها انتخابات "حرة نزيهة"؟؟؟ ليه اكتر من حد شافني في اللجنة و قت الانتخابات جم يكملوا لي الصورة و يقولولي اللي بيدور بعيد عن الطالب العادي..و عارفين اني اكيد شفت اكتر من الكواليس؟؟

قريت في الجرنال الاعادة بالجامعة... السبت عرفت موضوع الاعادة خلاص "المفروض " ح يتم ف نص الاسبوع ... و لسة مفيش ورقة واحدة حتي توحد ربنا تقول ان فيه اعادة لانتخابات اتحاد الطلاب تخلي باقي الطلبة تنزل... اللهم الا جدول بخط اليد ..صعب انه يلفت نظر حد..كاتبين اسماء المرشحين في اللجان للاربع سنين

توابع

تم شطب اسماء طلبة الاخوان المسلمين من قوائم الترشيح و تم احال بعضهم الي التحقيق
امتنع طلبة الاخوان المسلمين عن التصويت في الانتخابات و قاموا بوقفة في الكلية
لم تجر اي اعادة للانتخابات و احتفل الطلبة "المعينين" بالفوز و النجاح
تبدأ حملة لعمل انتخابات حرة موازية من و الي الطلبة..لكن الي الان دون اي شرعية و ميزانية و دون اشراف دكاترة جامعيين

اشتبك الامن و اتحاد الطلبة بالطلبة القائميين علي الانتخابات الحرة امس الاول

الي الان لا يعرف الطلبة العاديين من امثالي ماهية اتحاد الطلبة و مازال البحث مستمرا عنهم
ممكن نبقي نعرفهم مع اول رحلة ح يطلعوها ان شاء الله لدريم بارك و لا الماجيك لاند حتي

كان معكم..مراسلتك الصحفية: شاهد ما شفش حاجة



و يجعله عاااااااااااااااااااااااااااااااااااامر

________

شكرا لكل من قرأ شهادتي لاخرها