كنا اخر ليلة رمضان نفطر هناك..ونسهر نشوف التلفزيون وسهرة يا ليلة العيد..وصوت ام كلثوم في جميع الفقرات..والممثلين يتجمعوا ع القناة الاولي ويهنوا الناس ويهزروا مع بعض..نتسحب نروح بلكونة الصالون المقفولة ونلاقي الكحك والبتيفور متغطي..نبتدي ندوق عمايل نينة واقعد معاها نلزق البتيفور بالمربي..الصبح جدو بيحاول يصحيني عشان نلحق الصلاة في مصطفي محمود.. والتكبيرات في الشارع بتخليني اقشعر ..بس بانبساط..نرجع نفطر كلنا سوا..واقعد انفخ البلالين..ونحط جواها رز..عشان تعمل دوشة.. اتفرج علي صفاء ابو السعود.. بتخليني ازقطط وهي بتقول اهلا اهلا بالعيد مرحب مرحب بالعيد...ونختلف ان كنا ح نخرج اول يوم ولا نخلينا عشان الدنيا زحمة.نتفرج علي مسرحية الاولي..ونشوف فيلم العيد بتاع السهرة ايه
.
بقالي كام سنة..مفضلش من ده حاجة.. البيتفور والكحك بنشتريه..ومابقاش حد يبات ليلة العيد غيري عن جدو ونينة ..عشان الحق مصطفي محمود هناك... مع جدو!! بس كنت لسة باحس ان العيد هو العيد بتاعي بتاع زمان ..بتاع فرحة لبس العيد والبلالين وتلزيق البتيفور بالمربي
.
السنة دي..لاول مرة اكتشف اني مش لسة صغيرة بانفخ البلالين, والعب بالبمب ..واقف في البلكونة اتفرج ع الناس راجعة من الصلاة, احط مونيكير بينك و اسرح شعري والبس التوكة الجديدة..واحضر لبس العيد من بدري..واقعد منبهرة قصاد التلفزيون..واقعد ازن علي فسحة اول يوم العيد..... لان ببساطة كلنا السنة دي متجمعين ايوة..بس مش في بيت جدو ونينة..حتي مصطفي محمود مش السنة دي! ه
.
هو ليه انا حاسة ان تغيير المكان ..بيغير حاجات كتير معاها..رغم ان نفس اللمة موجودة الحمد لله؟
.
بس برضه...يا ليلة العيد انستينا..مادام حبايبي بخير ومتجمعين
