Monday, November 10, 2008

هلاوس


عارف لما تدور علي الحتة اللي بتوجعك جواك عشان تدوس عليها وتطلع كل الألم وتصرخ وتعيط..لغاية ما تبطل توجع...بس المشكلة انك مش بتلاقيها؟!!ه
.
.

طب عارف الكلام لما مرة واحدة كدة يقع يتكسر؟! كلام بيبقي من جواه فاضي..مع ان من شوية بس كان ليه معني؟
.
.

عارف لما تدور ع المعني؟ جوا الكلام؟ جوا العيون؟ جوا الحياة؟ وتسأل نفسك ان كان من الاول ليه معني فعلا؟
.
.
عارف لما تسمع حد بيعيط...بس المشكلة انك مش عارف تحضنه؟ عارف ده بيموت من جوا قد ايه؟!ه
.
.
ولما تحس انه كله بيتعاد..عارف بالظبط كل اللي بيحصل..وح يحصل.. بس الفرق ان المرادي مش بتتوجع؟
.
.
عارف لما يترمي كلام زي الدبش..والمفروض انك تبتسم..لان من جواك بقي فاضي مش بتتعور خلاص؟
.
.
ولما تصحي وتقول صح هو ده اللي المفروض انه يحصل..طب نزعل ليه؟
.
.
عارف لما تبطل تصدق..وكمان تبطل تتفاجئ؟
.
.
عارف لما بتبقي ساكت..بتتفرج..وكل حاجة تانية بتجبرك علي الانسحاب؟
.
.
عارف لما حد بينسي؟ بينسي الوعد؟ بينسي الكلام؟ بينسي المعني؟ بينســ...اك؟
.
.
عارف لما حد يفتكر انه فاهمك اوي..ويعرف نقاط ضعفك..بس برضه بيدوس ع الزراير الغلط؟
.
.
الأهم بس...عارف لما السخونية والبرد يخلوك تهلوس؟

9 comments:

Ma 3lina said...

عارف لما يترمي كلام زي الدبش..والمفروض انك تبتسم..لان من جواك بقي فاضي مش بتتعور خلاص؟



Yea I know that very well:), u wrote everything i wanted to say

love the post and love ur hallucinations

hope u get better soon isa :))

Anonymous said...

المرة دي يا هاجر
وجعتيني اوي

ويمكن المرة دي
انا اللي موجوعة بجد

لا اله الا الله .. ردي في سرك
:)

Unknown said...

):

سلامتك ياجميله ألف سلامة

Ghafari said...

طب هو مفيش "عارفه" خالص؟

:P

عالمى ازرق said...

تعرفى انتى ان اللى انتى حساه دلوقتى حاله مؤقته - وللاسف - هتحسى بالوجع بعدها كأنك كنتى متخدره وبتراقبي حد تانى مش انتى
المهم فى الاخر كونى واثقه اوى مهما كان الوجع بيعدى ومهما كانت الحاجات التانيه مهمه وغاليه بتتنسي

سلامتك ويارب تخفى بسرعه من البرد بس حلوه هلاوسك بلاش تخفى منها

تــسنيـم said...

عارف وأيتها معرفة يا أختشييييييي


بس بختلف معاكي في بضع نقاط وان كانت لا تنفي المعرفة


عارف لما تدور علي الحتة اللي بتوجعك جواك عشان تدوس عليها وتطلع كل الألم وتصرخ وتعيط..لغاية ما تبطل توجع...بس المشكلة انك مش بتلاقيها؟!!ه..
طب عارف الكلام لما مرة واحدة كدة يقع يتكسر؟! كلام بيبقي من جواه فاضي..مع ان من شوية بس كان ليه معني؟


لأ ساعات كتير بلايقها بس المشكلة اني بفضل اضغط واضغط عليها بس الوجع مبيخلصش :(



ولما تحس انه كله بيتعاد..عارف بالظبط كل اللي بيحصل..وح يحصل.. بس الفرق ان المرادي مش بتتوجع؟ ..


مشكلتي اني لسه بتوجع عادي خالص وكأنها أول مرة ..نفس الحكايات بنفس التفاصيل ونفس الوجع بعد كل مرة :(

تقريبا ده نوع متقدم من العبط :) متاخديش في بالك

مـحـمـد مـفـيـد said...

هنصدقك ونقول هلاوس

Epitaph1987 said...

ما علينا
:) سلامتك من الهلاوس يا ست الدكتورة

وحدي
:(
مش قصدي اوجعك
سلامتك من الوجع
:)

اسراء
الله يسلمك :)

غفاري
عارفة دي..يغنيها علي الحجار
:P

عالمي الازرق
ساعات لما بتمري بالالم
مش بتحسي بيه تاني
مراحل متقدمة من الالم
الله يسلمك :))

تسنيم
سلامتك من الوجع..والعبط
صدقيني..في نقطة بيخلص فيها الالم اصلا
:)

محمد مفيد
وما هي الهلاوس
سوي حقائق
:)؟

روز said...

تعرفي؟ أحيانا باحس إن مش البرد ولا السخونية ولا التهاب الحلق بيعمل كل ده، بالعكس .. هو ده اللي بيخلي البرد ييجي والحرارة ترتفع والحلق يلتهب .. هو ده السبب !
بييجي يقوم جايب المرض معاه.. عيا وسخونة وإحساس إنك لوحدك تماما تماما .. وحيد زي عمود نور أصفر في شارع فاضي !
..
وكالعادة .. بتكتبي من القلب أوي
قلبي أنا !