* أنا مش بحبك.. بس بأتبخر

عارف؟ لميت كل حاجتك، كل حاجة.. كل كتبك اللي استلفتها منك ومرجعتهاش، قلمك الفاضي اللي خليته معايا لانه بتاعك، التلات اجندات اللي جبتهوملي وكاتبة فيهم "عنا"، مسحت كل صورنا.. كلها.. حتى صوري اللي لوحدي بس انت اللي مصورها.. مسحتها.. روحك فيها!! الدلاية الفضة اللي مبقلعهاش ابدا.. علبة بلالين الصابون اللي خلصت.. وكل العرايس الصغيرة اللي جبتهالي من كل سفرية روحتها.. شيلتهم!! مسحت كل ارقامك من ع التليفون - البيت، المكتب، الموبايل- مسحت يجي 456 رسالة : خمسين صباح الخير، سبعين تصبح على خير، 100 وحشتيني، وايام كتير حبسناهم في رسايل موبايل عشان ما تضعش مننا...مسحتهم! قلتلك اني اقدر!! كل ورقة صغيرة من كل كافيه روحناه وكتبتلي عليها "كنا هنا سوا" لميتهم وشيلتهم.. مسحت كل تواريخ النتيجة اللي اتقابلنا فيها! بصيت على الاوضة واتأكدت انها فضيت تماما من كل حاجتك اللي منتورة هنا وهناك! شيلت اسمك من تحت مخدتي عشان ما احلمش بيك بالليل تاني، واحلامك من على رف مكتبتي، كوفيتك من دولابي، شيلت كله! كدة تمام.. مافضلش غير اني امسح الضحك من ع الرصيف في الكوربة مكان ما وقع عليك الايس كريم آخر مرة، وماعديش ع النيل تاني ابدا ابدا! وماكلش بليلة، ولا حتى في عاشورا، ولا اشرب قهوة مظبوط، ولا اسمع منير ولا فيروز وانا باسوق ، واشيلك تماما من كل نسمة هوا حلوة لما ابص ع البدر! انا اصلا ح ابطل ابص ع القمر! شفت..؟ مش معضلة!! ممكن اشيلك تماما من الحياة!! عملت ليستة بكل مكان روحناه.. عشان ما اروحوهوش تاني ابدا! انت فيهم كلهم! ح اتعود ما اكلمكش اول ما اصحى، ولا ارفع سماعة التليفون واعيطلك، ولا حتى نتكلم الفجر عشان انا عايزة اكلمك الفجر..واضحك! ح اتعود! عندي خمسميت نمرة تانية ع التليفون! سهلة..ح اكلمهم! كل حاجة حطتها في شنطة كبيرة..و ح انسى.. ! لا، أنا نسيت! ح اصحى الصبح وابقى كويسة!! كأنك مكنتش هنا! صدقني.. عادي..مش مشكلة! ح اطلع كلامك من بين كلامي واضحك زيي مش زيك..! وح ابص في المرايا..ومش ح الاقيك!ه

.

عارف بس ايه اللي عيطتني النهاردة؟ لقيت مركب ورق صغيرة ، اصغر من عقلة الصباع، محشورة في قلم ازرق طلعته من شنطتي صدفة، كنت انت اللي عملتهالي من سنة! ساعتها بس... عيطت اوي!ه

.

عارف..لما بصيت في المرايا؟ ما شفتنيش... ه

____________

تمت

العنوان*: بهاء جاهين، قصيدة"الارض زهرية فاضية"ه

الرسمة: لسوزان عليوان