Friday, May 7, 2010

* أنا مش بحبك.. بس بأتبخر


عارف؟ لميت كل حاجتك، كل حاجة.. كل كتبك اللي استلفتها منك ومرجعتهاش، قلمك الفاضي اللي خليته معايا لانه بتاعك، التلات اجندات اللي جبتهوملي وكاتبة فيهم "عنا"، مسحت كل صورنا.. كلها.. حتى صوري اللي لوحدي بس انت اللي مصورها.. مسحتها.. روحك فيها!! الدلاية الفضة اللي مبقلعهاش ابدا.. علبة بلالين الصابون اللي خلصت.. وكل العرايس الصغيرة اللي جبتهالي من كل سفرية روحتها.. شيلتهم!! مسحت كل ارقامك من ع التليفون - البيت، المكتب، الموبايل- مسحت يجي 456 رسالة : خمسين صباح الخير، سبعين تصبح على خير، 100 وحشتيني، وايام كتير حبسناهم في رسايل موبايل عشان ما تضعش مننا...مسحتهم! قلتلك اني اقدر!! كل ورقة صغيرة من كل كافيه روحناه وكتبتلي عليها "كنا هنا سوا" لميتهم وشيلتهم.. مسحت كل تواريخ النتيجة اللي اتقابلنا فيها! بصيت على الاوضة واتأكدت انها فضيت تماما من كل حاجتك اللي منتورة هنا وهناك! شيلت اسمك من تحت مخدتي عشان ما احلمش بيك بالليل تاني، واحلامك من على رف مكتبتي، كوفيتك من دولابي، شيلت كله! كدة تمام.. مافضلش غير اني امسح الضحك من ع الرصيف في الكوربة مكان ما وقع عليك الايس كريم آخر مرة، وماعديش ع النيل تاني ابدا ابدا! وماكلش بليلة، ولا حتى في عاشورا، ولا اشرب قهوة مظبوط، ولا اسمع منير ولا فيروز وانا باسوق ، واشيلك تماما من كل نسمة هوا حلوة لما ابص ع البدر! انا اصلا ح ابطل ابص ع القمر! شفت..؟ مش معضلة!! ممكن اشيلك تماما من الحياة!! عملت ليستة بكل مكان روحناه.. عشان ما اروحوهوش تاني ابدا! انت فيهم كلهم! ح اتعود ما اكلمكش اول ما اصحى، ولا ارفع سماعة التليفون واعيطلك، ولا حتى نتكلم الفجر عشان انا عايزة اكلمك الفجر..واضحك! ح اتعود! عندي خمسميت نمرة تانية ع التليفون! سهلة..ح اكلمهم! كل حاجة حطتها في شنطة كبيرة..و ح انسى.. ! لا، أنا نسيت! ح اصحى الصبح وابقى كويسة!! كأنك مكنتش هنا! صدقني.. عادي..مش مشكلة! ح اطلع كلامك من بين كلامي واضحك زيي مش زيك..! وح ابص في المرايا..ومش ح الاقيك!ه
.
عارف بس ايه اللي عيطتني النهاردة؟ لقيت مركب ورق صغيرة ، اصغر من عقلة الصباع، محشورة في قلم ازرق طلعته من شنطتي صدفة، كنت انت اللي عملتهالي من سنة! ساعتها بس... عيطت اوي!ه
.
عارف..لما بصيت في المرايا؟ ما شفتنيش... ه

____________

تمت
العنوان*: بهاء جاهين، قصيدة"الارض زهرية فاضية"ه
الرسمة: لسوزان عليوان

12 comments:

تــسنيـم said...

أولا إنتي عارفة إن إنتي اللي عرفتيني ع القصيدة دي ,, و من يومها وأنا كبايات عصير قصب مليانة ع الآخر.


ثانيا: أنا كمان عملت زيها ,, و كنت شطوورة أوي أوي, ما سيبتش مسدج , و لا ذكرى , و لا هدية , و لا أي لازمة حتى كنت متعودة أقولها..

إمبارح بس.. و في لحظة حنين مخادعة .. فتحت الموبايل أفتش ف الأرشيف على مسدج أكون نسيتها من حملة التطهير الأخيرة/النهائية


و اتنهدت براحة, لما مالقيتش حاجة فلتت مني

:))


و أقدر أعيش أقدر.. لما تاخدني المراكب و إنت مش راكب


P.S: I Love U

شيمـــــاء said...

آه
:)

Bothayna said...

جامدة
احب الناس الجامدة
بس لما يبقى من برة و من جوة
حلوة اوي القصيدة

Nour said...

Empty my Heart, of Thee --
Its single Artery --
Begin, and leave Thee out --
Simply Extinction's Date --

Much Billow hath the Sea --
One Baltic -- They --
Subtract Thyself, in play,
And not enough of me
Is left -- to put away --
"Myself" meanth Thee --

Erase the Root -- no Tree --
Thee -- then -- no me --
The Heavens stripped --
Eternity's vast pocket, picked --

Emily Dickinson

شريف مصطفى عطية said...

wallahy bgd ana nafsy 7asset belwag3...ana 7asset en da my own pain ...mesh 3aref a2ool a ya Hagar...a2ool allah 3la el kalam w el ketaba walla a2ool a bs.....

dandana said...

انا متغاظة منها اوى

ومتغاظة لها برضو

يعنى...يعنى ماكنش لازم تحاوط نفسها بكل الحاجات اللى فيها روحه دى..دا كتير ...أوى


وآديها فى الأخر نسيت حاجة ..أصغر حاجة...وفى الآخر برضو عيطت ..وماطلعتش جامدة
ولا بتتبخر

محمد المصري said...

بيبهرني تَشَابُك الناس في تفاصيل الوَجَع وفي تَصَرّفاتهم حيالها .. ودايماً بيضايقني محاولة تجاوزهم أو نسيانهم لتفاصيل هَتِفضل جُزء من روحهم مهما حاولوا يتجاوزوها ، حَيْثُ "الإيترنال سان شاين" :
You can erase someone from your mind. Getting them out of your heart is another story

عموماً البوست بَدِيع جِداً ، كتابة وتفاصيل ، بس أتمنى إن الموضوع يكون مُجَرّد بوست بينتهي بكلمة "تَمّت" مش أكتر .. أَحِب إنك تكونِ كويّسَة

Sherif said...

here's a different thought .. what could he possibly have done, to deserve all of this ?
What if, half of the work done to get over him, was put into actually forgiving or trying to listen\understand him ? ..
what if :)

Epitaph1987 said...

تسنيم
"متشدنيش من شعري يا عصفور
انا مش ح اطير الحبيب من كل نور غايب
"
:)

شيماء
ناقص في القلب حتة
سلامتك من الآه :)

بثينة
المشكلة في الادعاء...انها جامدة
وحتة مركب ورق عيطتها!

Nour,
What can I say! She's Emily!!


شريف
سلامتك من الوجع :)

دندنة
هو حد بيختار التفاصيل اللي تحاوطه؟ التفاصيل اللي بيفتكر انها بتحميه وميعرفش انها في يوم ممكن تمنعه انه يتنفس؟ محدش بيعرف...محدش بيختار ده
او يمكن..بنختار

محمد المصري
الناس ممكن تشيل كل ذكرى مادية ملموسة موجودة.. ولكن لخداعات القلب والعقل قصة تانية ..وحسابات تانية
وانا كويسة الحمد لله :) شكرا ليك

Sherif,
your comment reminded me of this song..immediately
http://www.youtube.com/watch?v=_vId_4r925o
your "what ifs" are all justifiable! May be it's another phase to come ..May be it already came! before or after the claim of forgetting!! Let her claim what she claims..facts will remain sth. else..
:)

حـدوتـة said...

حلوة بجد.. قطعتي قلبي :(

shereen said...

جامدة جدااااااااااا
بس المهم ازاي نطلع
ازاي؟؟

Anonymous said...

اول مره اهتم ادخل مدونه مش دخلتها قبل كدا لا وكمان أقرا فيها وتشدنى

كلامك حسيته أوى وعيشته اوى وإتمنيت كان يبقى جوايا كلام أقدر أخفف بيه عن مدى ألم أى إنسان جواه الكلام الى مكتوب , لكن إكتشفت إن مفيش كلام يمحيه ولا إحساس يغيره... غير الأيام
وأهو أدينا بنعيشها لحد ما نشوف هتودينا لفين تانى

كلامك شدنى جداااا وأسلوبك لمس حاجات كتير جوايا وجوا ناس كتير جواهم دا من غير ما يترجم لحروف

أفتكر إنى هكون لاجئه فى مدونتك :)

Soha