الحرية من الشهداء

ليلة 25 يناير 2012: الهلال كان ابتسامة عريضة في السما

بجد والله

:)

شكرا للخارجية المصرية!!

قصة حقيقية..ده تقريبا اللي حصلي..فشلت اتعامل مع البريد السريع..لأنهم قالولي ح يوصل يوم الاربعاء..! السفارة تبعد عني 4 ساعات سفر..احنا في أجازة ..مش بسهولة عرفت أوصل لمكتب البريد

لو كنتوا مش عايزينا نصوت..بتسمحوا بالتصويت ليه بقى؟

وهل حتكرروا السيناريو بنفس العته في الانتخابات الرئاسية؟؟

Belongs to Tahrir..

I only sleep..when things get calmer in Tahrir.

When twitter is no longer showering hundreds of tweets with all news

And when Facebook is calmer and people are just calm and asleep..

Then, I can be pacified and sleep.

I wish I can be there..

....

وتعيشي يا ضحكة مصر

صوّر يا زمان...

كان نفسي دايما اعيش في زمن ام كلثوم وعبد الحليم..واحضر لهم حفلة

الزمن ده..الابيض واسود

اللي الناس فيه بتحب البلد

وتصحى رايقة ومتمزجة

وتتشيك وتروح حفلة لعبد الحليم

ويقولوا كلمة مصر بكل فخر وعزة

والاهم حاسينها

وبيناموا من غير هموم وفساد وخراب ونفاق

كان الناس بتحب بجد

وتفرح بجد

وكان لسة كلمة الثورة قريبة ليهم

النهاردة

اللي نفسي فيه حصل

حضرت لك حفلة يا حليم

وسط الناس

كبار وصغيرين وشباب

غنينا كلنا بصوت عالي

صورة للشعب الفرحان تحت الراية المنصورة

وبالأحضان يا حبيبتي يا أمي

والعلم المصري كان في ايد الصغير والكبير

غنينا ودمعنا وانتصرنا

وكنا برضه

أبناء الثورة

بس ثورة 2011

شكرا..لساقية الصاوي، انها بعثت عبد الحليم لينا ولو لنص ساعة

يخلي ساعة النصر..تتم فرحتها بيك يا حليم

وكنا مصريين فرحانيين رايقين بنحلم ببكرة

كل عيد ثورة..وانت طيب

ثورة 52..وثورة 2011

كنت معانا في الميدان ومعانا بعد النصر

...

خضرة وميه وشمس عافية وقبة سما زرقا مصفية

ونسايم سِلم وحرية.. ومعالم فن ومدنية

:)

..

ده انتي كنتي وحشانا يا مصر بشكل!ا

حمد لله ع السلامة

:)

..

Reminder to me: Fireworks were in the sky of Tahrir Sq. tonight!

مصر الحرة

وإذا الشعب يومًا أراد الحياة
فلابد أن يستجيب القدر
....

الشعب خلاص أسقط النظام

*
أبكي
أنزف
أموت
وتعيشي يا ضحكة مصر
تعيشي
*
:)

لمستقبل أفضل لأولادنا

لما طلبة هذا الجيل تسألهم لو ممكن يغيروا اي حدث تاريخي حصل يكون ايه..وتكون الاجابة ان هما مش بيحبوا التاريخ ولا عارفين فيه او انهم مش عارفين حصل ايه عشان يغيروه ...وترسى الاجابة على ان الحدث التاريخي اللي ممكن يتغير هو نتيجة ماتش مصر الجزائر...وواحدة مختلفة عن الاخرين تقرر ان الحدث التاريخي كانت حفلة انريك اجلاسيس وانها لو تقدر ترجع بالزمن وتلحق تجيب تذكرة الصفوف الامامية بدل التذكرة اللي رميتها في اخر صف...وان مفيش ولا حرب ولا قتل ولا فساد ولا احتلال خالص جه على بالهم ومش مهتمين اساسا ومش شايفين ان فيه حاجة في العالم ده كله يستحق التغيير ... يبقى إطمن على مستقبل ولادنا

ما بعد 180 دقيقة في حياتنا

يعني ما شاء الله النزعة الدينية طلعت ونقحت ع الشعب كله بيدعي (مع ان الدين بيبقى كخة في أوقات كتير) وكله يا رب والاستاد بيتهز قرآن..مفيش مانع! بس يا ريت دايما رافعين ايدينا بندعي كلنا في نفس واحد يكفينا الوباء والفساد والحرق والغرق..( هو احنا بايدينا حاجة غير الدعا؟؟) ونجرب في يوم نوحد الدعاء برضه بالثانية والدقيقة في يوم..وندعي لتحرير فلسطين.. بما ان المصريين كلهم بيتوضوا قبل ما يدعوا ودعاهم مستجاب ولله الحمد

بما اثبت مع التجربة اكتشفنا ان الاخوة الجزائريين عندهم ميول لمقاطعة المصريين والبضائع المصريين.. طب نستفيد بقى من الموضوع ده.. بس نوجه الحملة والفيديهوهات ونقاطع المنتجات الامريكية ...اصل لسة محلناش قضايانا الاساسية

بما تحقق من اهمية اليوتيوب وكل يوم اغنية وشتيمة.. يا ريت نستخدم العناصر البناءة الغنائية الانترنتية اللي ظهرت ع الساحة من كلا الطرفين.. لخدمة قضايا الوطن العربي..بدل وصلات الردح على كورة بتجري ع البساط الاخضر

وبما ان المصريين اكتشفوا اذ فجأة انهم كلهم بجد بجد بجد بيحبوا البلد دي..بيحبوا مصر! يا ريت ميشتموش مصر في غير اوقات الماتشات! ويفتكر ان اللي اصاب مصر هو من عمايلنا احنا السودا وسلبيتنا وسماعنا الاغاني الوطنية في وقت الماتشات وكان الله بالسر عليم!ا

بمناسبة الاغاني! الاغاني الوطنية الجميلة دي.. اللي بتضرب في النافوخ اول ما تسمعها.. دي كانت معمولة مش عشان انجازات مصر الكروية!! لا والله كانت معمولة عشان تفتكر مصريتك كل يوم وكل ثانية وان مصر دي بجد متبهدلة معانا..ومحتاجة الهمة في كل وقت وكل لحظة ومش في التسعين دقيقة بتوع الماتش بس ومش في تحليل المباراة! دي اغاني عشان تفكرك تحلل لقمتك اللي بتاكلها من البلد دي.. حتى لو بتأكلك عيش حاف ان لقيته!ه

من فضلك العلم المصري اللي اشتريته وقت الماتش مترميهوش! جرب تفتكره من وقت للتاني قد ايه هو مش رمز عادي لماتش مدته تسعين دقيقة.. فيه عمر كامل بيعدي ليك ولولادك... لازم تعمل حاجة غير انك تركن العلم على جنب، وماتقولش ح اعمل ايه...وانا بايدي ايه! الله!ما طلعنا اهو بنعرف ندعي ونحقق اللي نفسنا فيه! ولا الدعا وقت الماتشات حلو.. وغير وقت الماتشات غير مستجاب مثلا! ماهو مادام الانتخة واخدة حقها ومفيش غير الدعا وعرق الدين يطلع.. اهو ندعي ..اي حاجة شغالة برضه!ا

يا ريت احمد مكي بأغنيته "فوقوا" عن مصر والجزائر.. يا ريت نعمل اغنية اسمها "فوقوا" لمرحلة ما بعد الكورة! المونديال واهو طار!! ممكن نتجمع عشان حاجات عايشينها من قبل الماتش ولسة مستمرة معانا لأمد غير مسمى بقى؟!!!!ا

الاعلانات طلعت امورة اهيه وبتنفع برضه! تخيل كدة ان كوكاكولا بتقول ان في سنة 1973 قدرنا نهزم اسرائيل! نفس العدو.. نفس الخصم...!ونجيب لك كام واحد من اللي شهدوا عصر الحرب ويحكيلك ويخلي جسمك يقشعر! كوكاكولا بتشجع مصر! واحنا معاها! وننزل بتتر يااااا رب ياااا رب اللي قعدنا نسمعه ده كل دقيقة على نجوم اف ام! معلهش الدعاء اضعف الايمان ..ما اصلنا مش ح نشيل سلاح يعني ونطلع ع الجبهة نهاجم! مش بتقولوا ان الدعا بيجيب فايدة بس نتوحد ونتضوى الاول قبل ما ندعي

ملحوظة: انا اتفجرت ع الماتشين وانبسطت اننا كسبنا وزعلت اننا خسرنا! وسمعت اغاني وطنية.. بس برضه ده ماتش! وفيه حياة بعد التسعين دقيقة دول!!مصر هي لسة مصر بالمونديال ومن غيره!!!ا

مصرمستنية المصرين!! واحنا يا ترى معاها؟؟؟؟؟؟؟؟

The Grandson...

Ok..let's first of all agree..that God may rest his soul in peace..! He's a child after all..and "la shamata fi al mawt"! Especially this 12-year-old child is quite harmless, whatever the income or the sources of his parents and "grandparents" (the royal family)...He has no punishment for it (if God wills)..according to the doctrines of religion and this is quite understood!

Now, everyone is mad at the exaggeration of the media! Most channels are mourning (3ala ra2y Morsi el zanaty marshat 3askrya w Quraan)! But I mean..what do you expect...!! It's the PRESIDENT'S GRANDSON...would they ignore him?????! C'mon..it's nothing new that if the president sneezed they'd all run offering him a klinex!! if you can see the analogy! so it's quite expected! They want to LIVE AND SURVIVE..on the way of "Momtaz el 2ott"!! (btw, I cannot wait to read what Mr. Excellent will write!!)

The problem is..that we feel that injustice! I mean, if we have seen that when el Messiri died, Mostageer, those of the burnt theatre, trains, crashed planes, starving children, homeless raped girls, cancer people bedridden ...or the drowned ones..if we have seen they had their due and there was a mourning for them too...and their deliberate death and suffering were respected...! We wouldn't have been holding any grudge now against all the fuss about the Grandchild who died!

The military funeral, the coffin wrapped in a flag, won't bring back that child...nor the humble Egyptians who die everyday..and will still die if the corrupt system still goes on the way it already is!

But afterall, it's a child who died..we cannot mix our feelings and curse the family still...! and we won't love them either...! we just need to differentiate between matters! Or at least...if you cannot show your compassion for a child .. and the morale out of the whole issue of death! Then, it's better to be silent!

We should not be so judgemental..we're not God after all!

More marginal notes:

Though the news of the boy's death is reported since yesterday, Al Ahram did not issue any headline about it...and no obituary was published YET!

The President did not attent the funeral!!!

Rotana channels (Prince Waleed Ibn Telal) did not even pause his channels for a moment of one Quraanic verse or paying any public condolences as his fellows on other channels! (I wonder why he did not join the carnival...?)

Naguib Sawiriss's OTV : One was for Quraan and the other was for Entertainment and songs still! (that's the benefit of having two channels lol)

Online comments of people: I've came across a number of online articles about declaring the news..the comments some of them were hilarious indeed!! They were still praying for the child for recovery (before the declaration of death)...some would sincerely ask the president or anyone of the family to have ablution and do this and that and read this prayer or certain Suraa..as if the presidential family are opening the webpage waiting for instruction of how to save the child!! Either those who commented that way..were naively sincere, driven by their passion as parents, or either they're kidding! Other than that the simple condolences went on..which is Ok I suppose!

Programs on TV. of course were all about interviewing a Sheikh or so..to speak about Death, visitation, families losing a child, and such topics! Intervals of phonecalls from viewers were all condolences to the family... however some still sounded comic! and again I ask are they naive or are these a set up or what?!

Till now, nothing is certain about how that boy died! It's again this concealing and camouflage and no transparency whatsoever! What's the big deal if they'd say he died because this of that! why are they always afraid of directness and being straight-forward! C'mon, grow up! We're not asking about the health status of the President (God forbid, we cannot dream ever to know!!!) why won't you declare the cause..you may even gain more compassion!!

Finally...for my own stance...well he's a young boy..who did nothing and cannot be blamed for whatever his family had done...! I'm not whining and crying..and I'm not gloating and happy either ! It's death after all..and may you reside in Paradise isA!

Dear Little Boy... I'm sorry for any word that could be said about your death from anyone who is so pained from any wrong they had because of sins you never committed against them! I'm sorry that you are such a public figure and such propaganda has to go on around your death! I'm sorry that some people would say that it's unfair while their children suffered and died in silence as well because of the harm done from the ruler you only knew him as "grandpa"! May you rest in peace, find your place in heaven, console the hearts of your family..and find serenity in a better world than ours!

شكسبير ح يروح النار

تفاجئنى هبة (اختى الصغيرة -6 ابتدائي) ان مدرسة اللغة الانجليزية (بمدرسة اللغات الخاصة الكبيرة) تتهم الكاتب الانجليزي الاشهر، ويليام شكسبير بكتابة " حاجات حرام"..وانه بيكتب "حاجات غلط.".. وبسؤالها بارتياب عن نوع تلك الحاجات الغلط التى يكتبها الاخ شكسبير(ربما تعرض لاحد الامور باباحة ولا حاجة) ، فكانت جملة في قصة "تاجر البندقية" المختصرة بين يدي التلاميذ الصغار بالمدرسة..والجملة تقول " اننا بتمسكنا بالرحمة نشبه الالهة"ه

by mercy we become like gods

وكان رد فعل المدرسة انها طلبت من التلميذات "شطب" وحذف تلك الجملة من متن الكتاب!ا

صدمت! تلك المدرسة والتى لابد لها انها تعرضت لدراسة الادب بمختلف فنونه وفروعه في كليتها، (وانا عارفة شكسبير واخواته كفاية انه مجال دراستى وشغلى )ونتعرض في مجالنا الى شتى انواع "الشطحات" في الادب عموما، "واللى جنبها يبقى شكسبير رحمة!" لكن لم نرفض ابدا قراءة كاتب معين او نحذف اشياء معينة من قصيدة او رواية او مسرحية او مقال لانه بلغته الجمالية يتعرض من قريب او بعيد للذات العليا!(لان القراءة تتعدى ما بين السطور اصلا، زائد فهمنا ووعينا وتفريقنا لما نقرأه ومعتقدنا)ه

وموقف المدرسة في الحقيقة فكرني بقناة ام بي سي او القنوات العربية السعودية التى تترجم الفيلم الاجنبي على هواها، فتحول لفظة الاله او الرب، الى القدر ، او العكس على حسب، ولا تترجم اسرائيل ولا اليهود، وتسقط من الترجمة اي شى قد يسبب اي حساسية من قريب او من بعيد! موقف استسهال، تستسهل الحكم والحذف والشطب والقراءة السطحية، بدل الفهم والشرح والتفرقة!ا

وبهذا المفهوم، يبقى كدة نزار قبانى وحش، وجبران خليل جبران ميتقريش، ونقرا الادب الاجنبي بكل ألوانه وصنوفه قراءة وهابية بقى، ونقطع منه ونشيل، لأننا مش شايفين ابعد من السطور المكتوبة!!ويبقى المثال بتاع فيلم "مواطن ومخبر وحرامي" وان شعبولا عايز يكتب كتاب من منظور ديني عن الحلال والحرام، واى نوع من الكتابات الخارجة مصيرها الحرق! وبمناسبة الحرق، اتذكر ايضا فيلم "المصير" ومشهد حرق كتب ابن رشد!ا كلها نفس الدايرة المغلقة!ا

من المضحك ان احد التعليقات التى قرأتها مؤخرا على مقال فاطمة ناعوت هنا، وفي المقالة تعرض الكاتبة الحقيقة المفجعة ان القارئ العربي لا يقرأ، بينما الامم المتقدمة، معدل قرائتها مرتفعة، فاسرائيل على سبيل المثال معدل القراءة فيها 4 كتب في الشهر! (وهي معلومة ليست بالجديدة ولم تكن المرة الاولى التي اعرفها من الكاتبة) فيأتى المعلق مذبهلا : نقرا اربع كتب في الشهر ليه ان شاء الله؟وان قراءة اي شئ اخر غير كتاب الله القران الكريم هو مضيعة للوقت! وانه ده العلم الذي لا ينفع!! وان حسبنا والقران الكريم!طب بالله عليك، ايوة القران كافي وشامل، ويشرع لنا الدنيا والاخرة، لكننا "أمة اقرأ" والقراءة لم تكن قاصرة ابدا على الكتب السماوية، ألم يطلب منا الرسول الكريم(صلوات الله عليه) : اطلبوا العلم ولو في الصين! طب ح اروح الصين ليه بقى لو كان الموضوع القران وبس! ا

اين هي التوعية والفصل بين معتقداتنا وثقافتنا وبين تذوقنا الادبى والجمالى لاعمال الاخرين،وفهم الحياة عن طريق الادب، مما يسهل علينا الحكم والنقد البناء وفهم الاخر ...؟

لم اتعجب كثيرا حين قالت لى هبة بعد ذلك ان مدرستها أعلنت في الفصل ان "النكت حرام"..وان قول "مرة واحد كذا كذا الى اخر النكتة" ما هى الا تحسب كذبة على الراوي..والكداب بيروح النار طبعا!ا

فالسيدة المعلمة، صاحبة رسالة العلم، لم تقتل فقط دراسة وتذوق الادب، وفهم الاخر واللغة وما وراء السطور، بل ايضا تقتل روح ثقافة مصرية عتيدة من فن ساخر اشتهرنا به كمصريين من أمد بعيد! مثلما قلل المعلق الظريف من شأن القراءة! يعني من الاخر الاتنين مش فاهمين في الدين ولا في القراية الصحيحة لا كطريقة ولا كمنهج!ا

يا رب ارحم عقول الاجيال القادمة من هؤلاء!ا

حبيب الشعب

الجمعة الثاني من مايو

__

ماتستغربتش ان صفحة كاملة في الاهرام تشويه للفيس بوك وانهم بيؤيدوا قتلة الاطفال, واعداء الوطن.وانها عيال لسعة والكلام ده..وده توقيت في الصميم تمانية واربعين ساعة قبل الاضراب اللي دعا اليه ولازال شباب الفيس بوك

لكن استغرابي كان لما بصيت علي القناة الاولي وهي بتنقل شعائر صلاة الجمعة "المباركة" من المنوفية...وقلت حتي دي كمان بترتبوا فيها عشان عيد ميلاد أبا الحاج ابو جيمي..يعني عشان البركة تحل

*

السبت: الثالث من مايو

عشية عيد ميلاد فخامة الزعيم

___

صحيت بصيت علي الاهرام كدة حتي من غير غسيل وش لقيت بيقولك لنجعل يوم 4 مايو يوما للوطن.. قلت خير يبقوا مع الشعب يا ابن الشعب...وقال ايه الاهرام ناوية تقرفنا اقصد تثقفنا طوووووول شهر مايو بملحق " تحت عنوان عيد ميلاد وطني تفتح خلاله صفحات من ملحمة العمل الوطني في كل مجالات الحياة المصرية طوال رحلة عطاء مبارك لنا ورحلة عطائنا معه لمصر" فانا استغربت..هو احنا ناكري الجميل "عطينا" ايه يعني..ماتقولش ادتنا ايه مصر..قول ح ندي ايه لمصر..ومصر ما عزبة لابا الحاج يبقي بتدي ميييين. اسم الله عليك..ابا الحاج

*

المهم..فتحت صفحة اتنين سيد علي "ببساطة" بيقولك اول جملة..وبداية القصيدة عثل...: المصري الوحيد الذي اعطي لمصر 60 سنة من عمره اشغالا شاقة بارادته هو مبارك, وسوف يعرف الناس قيمته بعد سنوات طويلة" صح احنا كل ده معرفناش القيمة... لازم ناخد جرعة مكثفة يجي ثمانين سنة فوق الثمانين..عشان نعرف النعمة دي

*

اما بقي اللي مش ينسكت عليه كانت صفحة ثلاثة لعم عزت السعدني

"هذه قصة فتاة ولدت وعاشت وتربت وتعلمت وتثقفت وتوظفت في عصر مبارك"ماشي..اتوظفت ماله برضه, مقولناش حاجة كمل بس.." انها قصة اخر وجه مصري في رحلة النور والتنوير التي يمسك بأول خيط منها محمد علي باشا و يمسك اخر خيط الرئيس مبارك"

لا لا لا...كدة لا,لغاية التنوير..ولا. يمسك لمبة جاز ماشي,يمسك سلك كهربا عريان..اوكي

لكن خيط التنوير؟؟ التنوير اللي اتعلمنا علي ايدين الطهطاوي..ده الراجل حتي يتقلب في تربته

.

بص
الطهطاوي بيقولك ايه بقي من كتاب محمد عمارة

"فان الملوك يستحيون من اللوم العمومي, فالرأي العمومي سلطان قاهر علي قلوب الملوك والاكابر, لا يتساهل في حكمه, ولا يهزل في قضائه, فويل لمن نفرت منه القلوب, واشتهر بين العموم بما يفضحه من عيوب"

طيب يا شعب..يا انا يا انتم

وبيقول كمان ان الله قد اختار الحاكم "لرعاية الرعية, و جعله ملكا عليهم لا مالكا لهم, وراعيا لهم, يعني ضامنا لحسن غذائهم, حسا ومعني, لا آكلا لهم"

*

نرجع مرجوعنا قال تنوير قال, احنا قادرين نلاحق علي فواتير الكهربا, في صفحة تسعة عم عبد العظيم درويش بيقولك في اخر مقالته

ولان الحفاظ علي كرامة مصر نهجه, ولان تحقيق مصلحة الوطن مقدمة اولوياته, ولان السلام دوما هدفه, ولان دموع طفل تؤرقه, ولان هموم مواطن بسيط تشغل تفكيره, ولان ضمان مستقبل شاب يظل مهموما به, ولان معاش عجوز يبقي قضيته الاولي, ولان احباط مواطن يؤلمه, ولان رخاء بسطاء يظل حلمه, ولانه لم يصدر قرارا بأن يختفي مواطن وراء شمس زعيم او ان تسكن اشلاؤه مفرمة كبير العائلة ..اقول لمبارك غدا: كل سنة وانت طيب يا ريس

هنا بقي علامات التعجب اترسمت..هو ايه بقي موضوع المقارنات ده!!..يعني ليه عشان نبين ان اللي معانا دلوقتي ابيض وحليوة وان اللي قبليه كانوا كخة واحنا اللي مش مقدرين النعمة, يعني انا مثلا عشان عشت واتربيت واتعلمت واتوظت واتثقفت في عصر ابا الحاج ابو جيمي ومشفتش السحل اللي علي اصوله في العصور السالفة, اسجد صلاة شكر واقول ولا ما قصرت يا شيخ, وح ننهب يعني,ولما سواقين التاكسي يشتكوا من الغلا, و نلاقي طوابير العيش, والشوارع اللي فوق بعضها, والغلابة اللي جالهم سرطان, ازازة الزيت ام اتناشر جنيه,كلللللللللل ده مايجيش حاجة زي اللي قبل كدة, فنبوس ايدينا شعر ودقن, عشان الناس طول عمرها كانت مبسوطة..والمفروض مانطمعش في اكتر من كدة..وانت يا ولدي محسود محسود محسود؟؟ حد يفهمني

*

في
الاخبار اليوم عم ممتاز القط بيقولك

وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه

بيقول كمان

نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا

.

وبينهي القط مقاله اللوزعي, بيشحت

.
الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!كل سنة وأنت بكل خير ياريس.

__

اختم بقي وارد علي كل حد طبل وكتب النهاردة وعنده النية وانما الاعمال بالنيات انه يكتب يوم اربعة مايو لسة..ارد عليهم كلهم.. بتعليق من مسرحية محمد صبحي

شكراً اخي المواطن

فبالدصطور اعطيته الكلمة

وبالدصطور اكتفيت بهذه الكلمة

شكرا..روح لأمك

__

العنوان من قصيد لأحمد مطر

وماله مش عيب

فقرات مستفزة

صورة لمواطن مصري ما اكلشي السوشي

.
.
علي غير العادة فتحت التلفزيون و كان الظريف جدا تامر امين عمال يمدح في ربة الجمال شيرين ( اه يا ليل) و ازاي ان الاغنية الجديدة اللي عملاها عن مصر تخلي الواحد يقشعر ..الاغنية اسمها ماشربتش من نيلها.. اغنية يقشعر لها الابدان..و علي حسب قول تامر امين ان عينيه كانت ح تدمع من فرط التاثر.. مسكت اعصابي و قلت اتفرج ع الاغنية..و ماله مش عيب.. الاغنية حلوة.. شوارع وسط البلد الكحك...المطار الغربة...وماله مش عيب بنقول..نرجع بعد الاغنية الحلوة للعكننة ع المشاهد واننا نستحمل تامر وهو بيمدح شيرين في انها في الاغنية هي كل بنت مصرية.. (مع الاعتذار لكل بنت مصرية للي جي) الست شيرين قعدت تتشكر في كاست – فريق العمل- و الانتاج السخي " اللي كان بيجيبلي كل اللي انا عايزاه ..دول جابولي سوشي اللي طلبته...ههههه".. (السوشي لمن لا يعرف من الطبقات الكادحة من المصريين اللي الاغنية بتمثلهم و علي رأسهم شيرين بتاعة القلعة هي اكلة ياباني وليست صيني ) الحقيقة هي فعلا بتمثل كل بنت مصرية لان كل بنت مصرية و كل مصري بياكل علي غيار الريق سوشي.. نصيحة اخيرة.. اتفرج ع الاغنية دول مشاهدة شيرين في اي حوار تلفزيوني بتاتا..او انا انصح اننا نغير اسم الاغنية مااكلتش من السوشي بتاعها..وماله مش عيب

.

.
فاكرين الصيانة و الترميمات..و نذاكرها اي حاجة كدة و مادة مالهاش لزمة غير ضياع الوقت..و نرميها في الاخر..اهو هو ده بالظبط اللي حصل.. قال ايه المفروض اني فيه مادة كمبيوتر عملي و نظري للفرقة الرابعة بالكلية.. و قال ايه كمان ادفع خمسين جنيه..تاخد الكورس العملي عشان تدخل الللاب اي معمل الاجهزة الحديثة.. شوية اجهزة ما يعلم بيها الا ربنا كل اتنين او تلاتة علي جهاز..اللي بيدرسها بيكونوا معيدين بالاقسام اللي عندنا (وهو كله اوفر تايم).. و مشرف عام المادة دكتور كبير في احد اقسام اللغات عندنا..وهو اللي كان بيديني..اول يوم دخل.. قال لنا يا ولاد حافظوا ع الاجهزة لان الجامعة مش هي اللي جايبلكوا الاجهزة انما انتم من المصاريف..و ماله مش عيب..حاضر.. نقعد الساعتين بتوعنا..الراجل عامل زي الفرخة الدايخة يجيب ماوس للجهاز ده و كيبورد لده..و يقفل ده و يفتح ده.. الاجهزة ماعتقدش انها شافت فوطة ..اول يوم كان كوميدي اوي بيتكلم عن الميجابايت و البايت و المدخلات و البتاع.لقيته مرة واحدة طلع من جيب جاكيت البدلة اليمين ده ايه يا ولاد..ده فلوبي ديسك..شوية من جيبة.. يا ولاد ده سي دي بس صغير. شوية من جيبة اليمين دي فلاشة ..حاوي يا ربي..طبعا المحاضرات و لا بتاعة بيل جيتس.. ازاي تكبر الخط ..و تلونة..و اتعلمت اعمل سكرين سيفر اه والله.. و يا ويله يا سواد ليله اللي يسبق كلامه بخطوة..ده انا مرة كتبنا اسماينا زي ما قال.. و قال استنواو احنا تجرأنا و سبقناه خطوة و اختارنا الالوان جه قفلنا الشاشة..وماله مش عيب
.

ده صورة تذكارية لاحد الاجهزة العطلانة اصلا

.
الامتحان العملي.. يكفي الحضور الصوري اعملي المطلوب .. بنختار خمس طلبات من اصل تسعة.. و الحقيقة بيتم فرض اننا نضع اطار للصفحة... فيه اللي معرفش يحط اطار عملها هو اطار و قالها قومي.. فيه واحدة زيي عملت حاجات تانية اصر اني لازما و لا بد اعمل اطار لغاية ما صفحة شغلي طارت كلها من غير ما اكون سييفتها.. قال لي قومي برضه روحي...و السلام ختام..ماشي..الوكسة بقي في النظري.. اه والله استلمنا كتاب لا هو مش كتاب هو ما يقرب الي ورق اللحمة..نسميها ملزمة مجازا مكتوبة بخط 8 تقريبا عشان نعمي الطالب و نوفر في الورق..و مطلوب انه يمتحن فيها.. نوعيه كلام بقي من ايه هو الحاسب الالي.. و اجيال الحاسبات..و ايه فايدة البريد الالكتروني.. و يعني ايه بيانات..ده اللي شفته في اول صفحة و قفلتها.. و نسيت اقولكم انه مادة نجاح و سقوط..عشان اصلها ناقصة.. حد من المشاهدين ح يقولي ماهو فيه ناس لا تفقه في الكمبيوتر شئ و اكيد هي اللي استفادت من الكورس.. ارد بكل اباء و شمم..بلا خيبة..اللي بيعرف في الكمبيوتر استفاد انه وقته بيضيع اكتر مما هو ضايع..و اللي مش بيعرف اتعقد زيادة..و الفايدة الوحيدة ان جيب الوزارة دخل في خمسين جنيه من كل طالب..وماله مش عيب قلنا

سين سؤال:

البرامج

البرامج هي التي تشغل الاجهزة فالجهاز بدون برامج كالسايرة بدون بنزين و البرنامج هو الذي يوجه الحاسب لما يجب عمله و علي رأي البرامج الذي يتكون منه الحاسب نظام التشغيل- منقول من الكتاب نصا ناهيك عن تعريف الكيبورد و الفأرة و سطح المكتب اي الديسكتوب

.

.
كان يا ما كان كان فيه دكتور و دكتورة جامعيين.. بيدرسوا عربي.. كل واحد في قسم.. اشتركوا في وضع الكتاب..قووووم اييييييه؟ قوم الدكتورة متخانقة مع الدكتور ع المادة العلمية الموضوعة لصعوبتها الشديدة جدا و ان مش ده اللي متفق عليه.. قوم اييييه؟ قوم الدكتور سالف الذكر متوعد و مهدد طلبة قسمه انهم ح يسقطوا.. قوم اييييه؟ قوم الدكتورة الاخري مهددة طلبة اقسامها انها بتدافع عن حقوقهم.. و انهم ح يذاكروا ده يعني ح يذاكروا ..قوم ايييه؟ قوم الطلبة اقترحوا الغاء ( بجملة اللغي اللي هي لغيته فعلا من جزء الدكتور الزميل) الجزء بتاع الدكتور اياه و الاكتفاء بنص الكتاب التاني بتاعة الدكتورة بتاعتهم اللي هي فعلا شرحته و مالناش دعوي بالاقسام الاخري و خاصة ان كدة كدة الاسئلة في الامتحان بتيجي لكل قسم منفصلة.. قوم ايييييييه؟ ردت الدكتورة: لا كدة المادة العلمية تبقي قليلة (مع العلم ان الكتاب نصين مالهمش علاقة يعني)...وده لاننا يا شطار بنوزن المنهج بالكيلو مش بالفهم..فبقي معانا كتاب نصه مفهوم و مشروح و النص التاني طلاسم و مقرر علينا و خلاص.. لكن الدكتورة كتر خيرها و من امثالها سطرت معانا علي اجزاء منه..و تسب و تلعن في اللغة الموضوع بيها و تغيظنا و تقولنا مقرر ..و ينتهي الطالب و بين يديه كتاب يحمل الفاظ من نوعية " التأطر- الرجراجة – العلائقية-– وشائج –" و عبارات من عينة

ما به الشئ هو هو , هي من حيث هي هي"

و عبارة اخري :

و ان كانت دلالات المعجم تقصر المماهاة علي التأطير الظاهري او الشكل الخارجي للشيئين المتماهيين او

المتطابقيين. فالمحاذاة و اللزق و الموافقة او التوافق ووضع الفرس رجليه موضع يديه, كلها تؤكد وقوع الحافر علي الحافر من حيث حدود الفاصلة في الاطار الخارجي للشئ

.

ملحوظة تقريبا مقولة "ووضع الفرس رجليه موضع يديه" ان الطالب يحط راسه تحت و رجله فوق مش ح يفهم برضه والله اعلم .

.

مع العلم..ان الكتاب استلمناه في اخر الفصل الدراسي..وعلي الطالب انه يشرب من البحر..و ينجح و يحاول يفتكر كلمة من اللي ح يحفظه ده لو عرف يحفظه و يبقي يقابلني

كفاية كدة عشان اعصابي..دعواتكم

مش باقولكم..و ماله مش عيب

فاصل اعلاني: و متنساش العلامة

خلاص يا اخواننا مولد و انفض...و اقعدوا يا بنات بحسرتكم, زينة الشباب اتجوز, ربنا ينصره علي مين يعاديه هاي هييه!
.
.
ابا الحاج جاله تلافون صحاه من احلاها تعسيلة عصاري من عمكم اللي في روسيا و غنا له هابي بيرث تو يوووه (زي ما وليد توفيق بيغنيها كدة) في مكالمة دولية بعد الساعة واحدة عشان الدقيقة بتبقي بنص التمن..و فيه اقاويل انه اشتري (اي عمنا الروسي) كارت منزلي دولي عشان يجري المكالمة..مش خسارة في ابا الحاج العزيز...واحنا بدورنا ارسلنا ليه كارت معايدة و تهنئة في نفس ذات الوقت
.
.
طبعا ابا الحاج زعل حبتين ان زملاته في النجوع المجاورة ما عبرهوش بحتة شيكولاته حتي..بس نقول يمكن انه اعتبار ان اعياد الميلاد بدعة و كل بدعة ضلالة و كل ضلالة في...بالظبط!!
.
.
طلع فيه مدونات صيني و تايواني يا رجالة...وكل واحد ياخد باله بقي ..., مانجلكمش في حاجة وحشة, وانتم طبعا عارفين ان حقوق الطبع محفوظة في التلاجة.... واد يا دوق دوق ما تنساش العلامة
.
.
الثانوية عامة عاملة وششششششش في دماغ العيال ... والاهالي . .. الجدول يا مزنووووق يا مرحرح ع الاخر .. و المراجعات النهائية علي ودنه دلوقتي ..من يومين .. السنتر اللي اختي بتاخد فيه درس..عمال يقولي عروض المراجعات في التليفون...و يقولي "ده اوكازيون يعني نعمل ايه للطالب اكتر من كدة لازم تنتهزوا الفرصة"... والنبي يا شيخ ما انت مزعل نفسك..انا عارفة اختي مش عارفة مصلحتها في انهي درس... دي بتروح لمدرسين و دروس بعدد شعر راسها.... وقرررررررب قررررررررب خد درس تحصل علي مراجعته بفلوس الان..اغتنم الفرص!
.
.

عم باحكي مع حالي :اغنية اسمهان..معلقة معايا اوي..صوتها جميل.. فعلا فن الزمن الجميل .. المعني في بطن الشاعر

.

فتكم بعافية... فيه لجنة امتحانات ح تقفش فيها ..دعواتكم....البلوج بلوجكم..بس لو لقيتم حد طالع ع المواسير..عشان يسرق النملية ابقوا نشوه بالنبلة الله يكرمكم

و يجعله عامر

كارت معايدة

صورة تذكارية لاسرة العزبة المصونة

.

.

فراشة الحاج الكبير تهني اهالي العزبة الكرام بالافراح و ليالي الملاح..و تهدي اغنية :النهاردة فرحي يا جدعان " لزينة شباب العزبة..و بهذه المناسبة سيتم اطلاق 79 طلقة ناريه في الهواء لعلها تصيب افراد العزبة عشان يرتاحوا..و ينبسطوا
.

.
ايها الناس المجتمعين في هذا الصوان... اللية عيد..و ح ننصب النصبة في النجع الخاص بالحاج الكبير..اللي بيطل ع الترعة الشرقية ..و يتشرف الحاج بدعوة كل الاعيان و العمد النجوع المجاورة (جمع عمدة) لمباركة اليوم الحافل
.

.
يلزم الذكر ان الفرح تبرع به افراد العزبة من اجل ممثلهم و حبيب قلبهم زينة شباب العزبة.. فهو رمز المستقبل بكل اشكاله و الوانه...لم يكدر صفو الاحتفالات غير النميمة النسائية ان فستان العروس هو وارد الخارج من الكرداسة و اشاعات اخري تقول انه من ميدان الجامع... مما اثر علي نفسية العروس و بدات ترطن و تهلفت بلغة غريبة علي اهل العزبة...مما اضطر صديق العريس "ابو العز" ان يقدم "سيخ" محمي يتحط في صرصور ودن اجدع شنب في العزبة يلسن علي العرسان
.

.
تتفضل فراشة الحاج الكبير ان تتقدم بخالص الشكر لرئيس مركز الكفر الحبيب.. و الفلاح النجيب, و المقاول النظيف و الطويل في نفس ذات الوقت, و الغفير ذو الطلة و الكمال و كذلك الاعلام النافع الممتاز اللي كله انس علي الزيطة اللي عملينها لولد العزبة المصون, وكل من اشرف علي ليلة زينة شباب العزبة
.

.
و في الدوار تم خبز 79 فطيرة مشلتتة كبيرة بالسمن البلدي الفلاحي, و استوردنا الفاكهة و الخضار من جارتنا توشكي, و خرج فريق كشافة لاصطايد الاسماك من ترعة الغيط اللي ورانا لاقامة الولائم, تشرف ام العروسة و مرات الحاج علي دبح الزفر
.

.
الجدير بالذكر ان زينة شباب البلد هو حاجة طول بعرض بارتفاع شلولخ , افني سنوات عمره الماضية في خدمة اقرانه من شباب العزبة, ترعرع علي حكمة الوالد و هو قاعد علي حجر الحاج في دوار العمدة , اما صاحبة الصون و العفاف عروسته فهو سيتباهي بها في اوساط العزبة وامام اروبا و الدول المتقدمة
.

.
اقرا كارت معايدة اخرهنا ايضا
.

.
و يجعله عامر

امّا نعيمة..نعمين - الجزء الثاني

مشرف في اتحاد طلبة جامعة عين شمس.. بيطلب متطوعين من الطلبة....عشان ينتقلوا الي اللجان المتوزعة في العباسية : بالمدينة الجامعية و في كلية طب... الطلبة دورهم تعليق لافتات "حيادية" عن ضرورة المشاركة الايجابية (الصورة التالية)... اما عن دور الطلبة فهو تنظيمي ليس اكثر من حيث التشجيع ع المشاركة و التحدث عن الاستفتاء.. بحيادية..و استقطاب الناس انها تدخل تصوت علي خبيتها و خبيتنا..و يلزم التنويه ان موظفي الاتحاد من اعضاء الحزب الوطني..بس دع الخلق للخالق..حدش يقدر يمسك عليهم حاجة..لا اليفط عليها شعار الحزب الوطني الاخضر و لا حاجة.. بس بقي كانوا جايبين قمصان كدة عاملة زي البافتة بتاعة الاطفال كدة لونها اخضر و مكتوب عليها الاتحاد..تفتكروا اللون الاخضر مقصود منه حاجة لا سمح الله؟؟ عييييييب مافيش حاجة

.

.

احد لافتات اتحاد الجامعة: الادلاء بصوتك واجب وطني و ديني

يعني حضرتك..مش راضع من اغنية عفاف راضي مصر هي امي؟؟؟..يبقي اكيد بتخاف من عقاب ربنا و كلمة واجب ديني ديه يقشعر لها الابدان...ح تتحسبوا يا كفرة يعني

.
.

الساعة العاشرة صباحا: سألته باللجنة.. ينفع ادي صوتي هنا..مع ان ديه مش منطقتي..ولا مكان قيدي؟؟؟..لا..لازم تطلعي علي قسم الحي بتاعك عشان تعرفي انت مقيدة في انهي لجنة...عين العقل و الله و لا فض فوك... لجنته كانت لا بتهش و لا بتنش و فاااااااضية...و بيدللوا عليها- ملحوظة عاب الدكتور بطرس غالي علي ضعف الاقبال

.

.

لافتة طريفة من نكت مصطفي السلاب "نايب" مجلس الشعب في دائرة مدينة نصر : - اللافتة بتقول: ميزانية بلدك ميزانيتك تراقبها بمشاركتك

.

الله الله...شايفين الدرر... بقي ميزانية الدولة ميزانيتي..؟؟؟؟؟؟؟ يا حلاوة يا ولاد... كدة بقي انا عايزة حقي فكل مليم اتصرف يا ولااااااد -------تييييييييت

مش باقولوكوا قالها فيه رحلة دريم بارك..لو اديتي صوتك يا ابن الشعب

.
تحكي لي: لموا سواقين الميكروباصات و سحبوا منهم الرخص و قالوا لهم : بكرة (النهاردة الاثنين يعني) ح تعدي عليكم باصات تنقلكم للجان التصويت تدلوا بصوتكم و حنرجعكم مطرح ما جبناكم و نرجعلكم الرخص

.

.

يالا ان شاالله ما عن حد حوش... ايه الحلاوة ديه يا ولاد
اصلك ح تقول نعم يا حبيبي نعم يعني ح تقول نعم يا حبيبي نعم.......لكن احب اقول..اوعي يا قلبي برضه لأ لأ علي رأي الشحرورة

يا مهنينا..يا مدلعنا..يا مورينا كل يوم حلو...يا سبعي ..يا بعلي.. ياللي مااكيلنا الشهد.. ياللي ما في عهدك لا ولد مات و لا اتحرق و لا غرق.. ياللي مشرفنا و رافع راسنا..ياللي بتحوشلنا فلوسنا في بنوك اوروبا عشان احنا فقرين و بنصرفها...بنفرتكها..انت بتحوشلنا ..بتبص لبعيد... شدوا الحزام شدوا الحزام... البيت بيتك..اي و الله..البيت بيييييييييييتك

.

.

الساعة الواحدة: باكلم صديقتي في التنظيم عند احد لجان التصويت بطب, ردت عليا : ايوة تعالي انا اديت صوتي.. كوافدة.. يعني ايه؟ دي مش محتاجة بطاقة انتخابية؟؟؟ لا.. دلوقتي بيسمحوا بالتصويت لاي حد من اي حتة..المهم الورقة ..الصوت
.

.

يعني ادحدر بيهم الحال و قاعدين عايزين اي حد يصوت..معاك بطاقة انتخابية..مش معاك..من اللجنة ديه..مش منها..المهم تدي صوتك... صوتك امانة...صوتك واجب وطني و ديني..يا ابن الشعب

.

.
الساعة الواحدة و النصف: عند لجنة التصويت مشرف عام للجنة و ضابط بيكلمونا برفق و لييييين : يا ولاد اهم حاجة الاقبال.. هاتوا زمايلكم و تعالوا.. (بص لصحابتي اللي لسة ماديتش صوتها) انتي بتجيبي اصحابك و ماصوتيش ليه..مش ح تدي صوتك؟؟ لا ح اجي بس في الاخر لما اوصل بقيت اصحابي بس...و هربت منه و هو كمل كلام

:

يا
جماعة قولوا اللي تقولوه اه ,لا زي ما انتوا عايزين ماحدش ح يقولكم حاجة...سالته: ممكن اصور اللجنة و الصندوق الشفاف؟ ( بهلع) لااااااااا طبعاااااااا اوعي..لازم بتصريح!!
.
سألني و انا خارجة من اللجنة: قلتوا ايه بقي؟؟؟غير موافقة طبعا!!!!!!!! رد عليه الاخر: دول ناس واعية يا راجل!!

.

.

شفت ست عجوزة بطرحة و جلابية واضح انها علي قد حالها اوي...و كبيرة اوي.. شفتها بابتسامة كبيرة و رافعة ايديها في السما.. زي ما تكون كدا و الله اعلم..و عقبال عندكم و السامعين.. بتدعيلهم..اي و الله..ليهم مش عليهم (يمكن تكون ابواب السما مقفولة ساعتها)..و الست بصمة اصلا في الكشف... دفعولك كام يا شاااااابة؟؟؟

.

.

عملوا مشكلة كبيرة مع صديقة ليا في انها حاولت تصور صديقة اخري و هي في اللجنة.و سحبوا الكاميرا و هاتك يا زعيق و شخط و نطر.. فوبيا التصوير بتزيد..و كل اللي طالع عليهم عفريت اسمه: احنا مش بنجبركوا علي حاجة:, قولوا نعم او لا زي ما انتوا عايزين..احنا بلد ديموقراطية

.

وماله ديموقراطي ديموقراطي حد نطق بحاجة..و الدلييييييييييل قالولوووووووووه

الممتع بقي بجد..التلفزيون المصري العربي الشقيق..من القناة الاولي للتانية للثالثة لقناة النيل للخبار للنايل تي في..ماشاء الله كلهم ارسال واحد من صباحية ربنا..ازاي المسيييييييرات ماشية انها تروح تشارك في الاستفتاء...و تسمع خلفية صوت للمذيع تقولك ان الناس رايحة تدلي بصوتها بنعم او لا و ان الاجراءات ماشية يا حبة عيني بحيادية و مش بيجبروا حد..و تلاقي الناس ماشية في الشارع و الموظفين ماسكين صور سي النبي حرسه و صاينه الحاج ابو جيمي.. بابا حسني.. هوووب يقفز واحد ع الشاشة انا مع سيادة الرئيس انا شفت منه علي مدار السنيين اللي فاتت انجازات و دلوقتي انا معاه لما بيعدل الدستور لانه لمصلحتنا... يا حنييييييين.. و تطلع البنت من طول طالبة من جامعة الزقازيق الشقيقة: تقول لك انا لو شايفة انه صح ح اقول اه..و لو شايفة انه غلط ع البلد ح اقول لا..انا جيت ادلي بصوتي و انا باتمني ان صوتي يا ريت يتسمع (تصمت و اكيد المذيع هنا زغرلها و صاحبتها زغدتها فتضيف) بس انا متأكدة انه ح يتسمع اكيد ح يتسمع (هنا اكد علي كلامها البيه المذيع اه اه ايوه)و انا شايفة ان بتوجيه من السيد الرئيس التعديلات في صالح البلد

.

.

و طبعا لازم انوه عن دور النجوم و الافلاك و حظك اليوم في خلق اجواء الدعم.. فتتفرد الاخبار في بابها الثابت :انت و النجوم

فتقول في برج الثور : «غدا.. التجمع الشعبي الكبير فأنت مصباحه»
وعند برج الجدي تقول :كثيرا ما تبدع بأفكارك الجديدة خاصة ما يتعلق بالوطن».

اي و الله نقلا عن المصري اليوم .

و طبعا هذا الجدي من ذاك الثور اصلا

و مش لازم افكر حضراتكم ان الريس برج الثور

بس انا سعيدة اصلي انا كمان زي جيمي..برج الجدي

يا محاسن الصدف

وانا عارفة ان كل افكاري الجديدة لخدمة الوطن يا ابن الشعب.

.

و ختاما

و نشكر اما نعيمة لانها قالت

نعمييييييييييييييييييييين

و يجعله عامر

امّا نعيمة..نعمين

حكت لي صديقتي النهاردة و لولا اني اعرفها كويس جدا و احلف علي كلامها ما كنتش صدقت القصة ديه

.

هي بتحكيلي المكالمة التليفونية اللي تلقتها امبارح : الحزب الوطني معاكي ع التليفون مش حضرتك فلانة الفلانية (قال الاسم بالكامل) ساكنة في ستة شارع---- ايوة خير؟ حضرتك الاستفتاء علي تعديل الدستور يوم الاثنين و يا ريت حضرتك تشرفينا تدلي بصوتك و المقر لجنتك في مصر الجديدة.. و احب ابشرك ان الحزب الوطني مطلع رحلة مجانية لدريم بارك للي ح يدلوا بصوتهم... معلهش كنا عايزين رقم الموبايل لو فيه!!! ليه, لازم؟ اه لازم!!!

!!!!!!!!
.

.
سألتها :يا بنتي انتي عاملة البطاقة الانتخابية تبع الحزب الوطني؟؟؟؟؟؟؟؟؟
.
(هـي : المفاجأة بقي , اني معنديش اصلا بطاقة انتخابية.. انتي تعرفي اني ليا في الكلام ده؟!!!!!!
.
_____
تمت

.

.
جاب النمرة ازاي؟ و ده مش تعدي علي خصوصيات الاخرين؟ و عايز رقم الموبايل ليه؟ و رحلة ايه اللي طالعة مجانا ديه؟؟؟؟؟؟؟؟؟؟؟؟؟ و يتصل ليه..و بيدعوا لنفسهم كدة ليه..طب واحدة مالهاش لا انشطة و لا نيلة..جاب قرارها ازاااااااي..و كمان عايزها تقول نعم!!!!!!! نعم الله عليك يا حبيبي

.

.

ملحوظة: السلاب مغرق مدينة نصر يفط : نعم للتعديلات.. من اجل ان يقف النائب بجانبك..نعم من اجل رئيسنا...و ختاما اما نعيييييييييييييمة نعميييييييييييييييين
.

.

عمار يا مصر

تاكسي

لازم اعترف ان التاكسي ده الاختراع السحري و منقذي من جميع الاماكن و المواعيد, لا تقولي ميكروباص و لا باص اخضر و لا احمر و ميني باص اربعتاشر... انا اتبع مبدأ "هين قرشك و لا تهين نفسك".. واللي هو اركب تاكسي و انجز.. و خاصة ان مفيش في حيي السكني مواصلات عامة كتير..و عشان اوصل لمحطة و لا موقف ميكروباص لازم اركب تاكسي برضه لاخر الشارع يعني التاكسي لا مفر منه
.
السائق : انا عامل زي السمكة و التاكسي عامل زي حوض السمك.. السمكة عمالة :تروح و تيجي و حوض السمك سجن صغير. تخبط في قزاز العربية الناحية دي و بعد كدة تخبط في القزاز الناحية التانية

.

والحقيقة..نوادري مع التاكسي كتير.. رغم اني باقعد في حالي باسرح وانا باصة من الشباك.. هادية مش ح احكي مع السواق..الا ان طبعا السواق الغلبان قاعد طول النهار نفس القعدة نفسه يتكلم في اي حاجة..ف بسيبهم يحكوا و اقعد اسمع في صمت ,نادرة المشاركة و كل ردودي من نوعية :اه صح.. ربنا يكرم..ربنا يستر.. ربنا يسهلك طريقك وربنا يرزقك..فيه اللي حكي ازاي ربي ولاده لغاية ما بنته اهيه بتحضر دراسات عليا.. (ماشاء الله) و عم الحاج الكبير في السن اللي وصف لي طريقة طبيعية من ورق الجوافة و غلي الليمون بقشره للقضاء ع البرد و الانفلونزا..و من المفارقات اني مرة ركبت تاكسي و مع السواق العجوز وقت الانتخبات بتاعة مجلس الشعب قعد يسب و يلعن في دايرة امال عثمان اللي حصل فيها تزوير..و بعديها باكتر من اسبوعين ركبت مع نفس السواق تاني و اقتكرني و قعدنا برضه نتكلم علي ما بعد الانتخابات و اكتساح الاخوان
.
السائق: انت عارف انا عندي حلم كبير .. حلم انا عايش علشانه.. ما هو الواحد من غير حلم ما يقدرش يعيش .. يلاقي نفسه وخم عل طول, مش قادر يتحرك من علي السرير, يكتئب, يبقي عايز يموت. انما بالحلم تلاقي الواحد يتحرك رهوان, يبقي فريرة, نار قايدة ما تطفيش

.

وفيه السواق اللي علق علي نغمة ام كلثوم اللي علي موبايلي..و الله فيكم الخير انكم لسة فاكرين الست.. و بص للراجل اللي كان راكب قبلي..قليل لما لاقي حد يحط ام كلثوم.....و فيه السواق اللي مستعجل عشان الماتش..ان شاء الله ح نكسب.. احنا شعب غلبان كانت ام كلثوم و الكورة بس هي اللي تفرحنا..و فيه اللي اسأله (لو المشوار كبير) ح تاخد كام؟ اللي تجبيه مش ح اقطع رزقي! وفيه اللي كنت راكبة معاه راجعة من ايام ثانوية عامة من درس متأخر الساعة حداشر بالليل وفوجئت بالسواق استئذن من الراكب اللي كان معاه من قبلي انه يوصلني الاول (مع اني مش طلبت منه كدة) و لقيته هو والراكب ده بيتعازموا و يصروا انهم يوصلوني الاول و يشكروا بعض.. وانا اللي طلع عليا اقوله " انا بجد مش عارفة اشكركم ازاي" –جدعنة اهل بلد بجد من غير ماتطلب و لا تتكلم
.
السائق: ابويا الله يرحمه كان دايما يقول اعمل خير حيرجع لك خير.. عامل زي الصوت وصدي الصوت لو مطلعتش صوت عالي من قلبك مش ح تسمع صداه.. وكمان الخير لو ماعملتش خير من قلبك للناس عمر ما حيرجعلك خير..الله يرحمك يا ابويا
.
و برضه فيه السواق الجشع اللي المشوار ابو خمسة عايز فيه عشرة.. و فيه السواق المتهور اللي ماشي يشتم في خلق الله و هو ماشي و يلعن في الحكومة و اللي مركب الناس ديه عربيات بملايين ماشية ع الارض..فيه اللي قعد يتكلم عن الازواج و ازاي الست تحافظ ع الراجل و الراجل يحافظ ع الست و اول ما اتكلم علي علاقتهم الخاصة قلت له "ح انزل ع اليمين هنا يا اسطي"..فيه اللي يبص لك بقرف و يقولك هي الاجرة كدة... تقوله الدنيا مش غليت عليك لوحدك.. يقولك و انتوا بتفرق معاكم!!..لكن برضه قابلت السواق المسيحي العجوز اللي يودعني وانا نازلة بحنية ابوية عشان الوقت متأخر و ماتخلي بجد يا انسة بابتسامة لم تفارقه تنسي الواحد القرف اللي بيشوفه طول النهار!
.
السائق : كل حاجة في الدنيا دي ليها جمالها..يكفي انك تفتح قلبك عشان تشوف الجمال اللي حوالينا..لكن لو انت زي معظم الناس مقفل قلبك ح تشوف النور اللي بيضوي حواليك ازاي؟

.
فيه اللي حكي لي ازاي انه كان في العراق..و البلد الجميلة قبل الضرب و الحرب..فيه اللي حكي عن تركيب الغاز بدل البنزين وازاي انه بيوفر له ..فيه اللي يقعد يتكلم علي نواب القروض..و الشوارع المكسرة اللي بتبهدل العربية..و الراجل الرتبة اللي ركب و مدفعش ولا مليم...فيه اللي مارس عليا الخدعة الشهيرة ان ابنه في المستشفي و مراته عيانة و انه رايح يجيب دوا و الاشعة... و انتي و ضميرك يا انسة...فيه اللي بيسب و يلعن في البنات اللي بتسوق..وفيه اللي اديلوا العشرة جنيه و اقوله هات الباقي و يقولي لا هو كدة حلو و يخلع.و فيه اللي يسألني مسامحة يا ابلة؟ وفيه اللي قعد يحكي ازاي سحبوا منه الرخصة و اضطر يدفع رشوة للضابط عشان ترجع له..و فيه اللي قعد يقول ازاي ايام السادات كان يروح بورسعيد و يشتري جهاز بناته من حاجة مطبخ.. ماركات كبيرة و بسعر رخيص..و يحكي ع الوكالة وازاي انحدر حالها للاسوأ..و ايام ما كان التفاح الامريكاني كان بكام و ايام الجنيه الجبس..و بعدين يقول الحمد لله..و يتحسر ع الايام الغبرة اللي عيشينها
.
السائق: ضهري اتيبس عل وضع القعدة دي.. اما باجي افرد جسمي بالليل ما بعرفش..ضهري بيوجعني اما بافرده..و العربية قديمة و مخرمة من كل حتة و السخونية بتاعة الموتور بتطلع علي رجلي و علي جسمي في الصيف.. ببقي عامل زي الكبابجي قدام اسياخ الكفتة.. الفرق انه بيشم ريحة لحمة حلوة و اننا باشم ريحة بنزين محروق
.
ده غير التاكسي في المنصورة (رحتها مرة زيارة خاطفة مع انها مش بلدي اصلا لاني قاهرية صرف :)..و تجولت فيها ع الكورنيش بالتاكسي..وتلاقيه يركب امة لا اله الا الله...طول ما هو في الطريق يركب ناس.. وكأن الموضوع عادي و الناس مش متضررة زي القاهريين. عادي ولا كأنه ميكروباص..هو ملزم انه يوصلك في لمكان اللي انت عاوزه بدون تأخير بس من حقه يركب اخرين يسترزق..و بعد مشوار طويل لا يقل عن تلت ساعة...في القاهرة ياخد فيه 5 جنية بالميت و يتخانق معايا كمان.. اديت للسواق عشرة جنيه و قلت له هات انت الباقي معيش فكة معلهش.. والاقيه مرجعلي تمانية جنيه لوحده عن رضا!!
.
السائق: والله عمري ما حسبتها, كسبت جنيه بأصرف جنيه, كسبت عشرة بأصرف عشرة.ممشيها بالتكال و علي فكرة مفيش سواق في مصر يقدر يقولك بيكسب كام.كله بالتكال
.

لكن يجي كتاب خالد الخميسي "تاكسي" عشان يكمل لي الصورة..و الاقي ان كل اللي شفته موجود فعلا و اكتر كمان.. في كتابه اكثر من رائع المتوافر الي الان بطبعته الثالثة عن دار الشروق..باسلوب سلس و اكثر من رائع.. ياخدك خالد الخميسي في هذا التاكسي الاصيل جولة ما بين مدرسة اولاده.. الي المهندسين.. لمدينة نصر للمعادي.. بتنهج وراه ...عايز تعرف رحلته في تاكسي الحياة ح يقابل مين و ح يسمع ايه.. ناس بسيطة بتكشف الزيف او الجمال اللي في الحياة.. ناس بتتكلم عن توشكي , عن التعليم, عن الفساد, البورصة, الاقتصاد, الانتخابات, عن روعة الحياة احيانا, و عن كأبتها كثيرا...معاه بتسمع الكلاكسات.. الضحكات.. الزعيق.. الحكاوي.. النكت..شرايط الكاسيت الدينية,, ترانيم الكنائس.. نجوم اف ام..و ثومة.. خالد الخميسي صور الحياة من داخل صندوق ذي اربع عجلات,, يمشي مسرعا احيانا و متباطئا كثيرا ,مرتحلا في دوامة الحياة
.

.
دار كل ده بذهني وانا راجعة من الكلية و التاكسي اتعطل بيا بعض بضعة امتار .. بهدوء سبت السواق يربط معرفش سلك ايه اللي اتقطع..دخل السائق يعتذر مرارا و تكرارا.. بأدب شديد.. علي مهلك و لا يهمك.. عربية قديمة للغاية.. الاسلاك عارية و متلصمة.. لدرجة ان ابتديت اشم ريحة الحريق من جوا.. صلح المشكلة و العربية دارت اتأسف تاني.. يا سيدي رزقك علي الله و لا يهمك مش مستعجلة (مع ان الساعة ستة بس خلاص ده رزقه وده نصيبه) شوية و ينصحني : لازم تتعلمي السواقة يا ابلة؟..ولما قلت له اني مش باحبها مش امان و باخاف منها...و ع الاقل مش دلوقتي.. صدق علي كلامي و دعا لي.. بعدها حكي لي عن ابنه اللي نجح بالثانوية العامة و دخل تجارة حلوان انتساب بالعافية.. انما اجتهد و موت نفسه بالجامعة و جاب جيد جدا و حول جامعة القاهرة طبقا لتوزيع الجغرافي للمنطقة السكنية للطالب.. وازاي انه فضل ورا ابنه انه يتعلم..وصرف عليه و علي دروسه..اصر السواق الطيب انه يوصلني الي باب العمارة.. ولف الشارع مخصوص مع ان كنت نازلة اعدي.. قالي مش كفاية استنيتي لغاية ما العربية دارت.. مش ح اوصلك يا ابلة؟..كان يكفي دعائه..و ابتسامته..و ودعته ودعوت له
.
السائق : انا كل يوم باخلص وردية التاكسي و انا خايف..خايف علي ولادي و خايف من المستقبل و خايف من الدنيا و بعد ما اخلص وردية الصيد ببقي كلي امل. امل في بكرة و ثقة انه انه كل شئ ح يبقي تمام و ان ربنا مش ممكن ينسانا.. ده مصر مذكورة في القران واحنا جند الله..ازاي بقي ح ينسانا.. مش ممكن" و كان اسم السائق " شريف شنودة"






_____
المقتطفات اللي باللون
الاحمر
مأخوذة من كتاب خالد الخميسي الرائع :تاكسي -
حواديت المشاوير

مسيسيبي ..القاهرة...حرايق حرايق

Feb 28, 2007 1:35 AM

الراجل ابو ميكروفون في البلكونة
بميدان طلعت حرب

العمارة و البلكونة و اللافتات و في ضهري العساكر
..
.

Cairo Burning
القاهرة تحترق
____
انطلقنا من الكلية بالعباسية الساعة اتنين و نص علي امل اننا نوصل وسط البلد في وقت قياسي عشان الحق اشتري بعض الكتب اللي كنت عايزاها, و بعديها نطلع ع السفارة الامريكية بجاردن سيتي – لا مش ح اهاجر لسة- انما لحضور عرض فيلم هناك ..الساعة خمسة
..
طبعا خطة التوقيت الزمني فشلت فشل زريع و لقيت نفسنا متأخرين و يادوب جريت علي مكتبة الشروق عشان اجيب اهم كتاب عايزاه للكلية و طبعا مش نسيت و انا هناك اجيب ديوان جديد لفاروق جويدة.. بس المشكلة ما ان وصلت ميدان طلعت حرب و الدنيا مقلوبة و عساكر و ضباط,, و خير اللهم اجعله خير فيه صوت عالي ميكروفون جي من مكان ما, و زي ما اكون كدة سمعت شتيمة في النظام و كلام كدة من اللي ربنا يجعل كلامنا خفيف عليهم: فساد , سرقة.. سونة.. قصور.. تعذيب,, سجون..مش يهمنا... اما الصوت اللي جي من العلالي انا قلت دول جند الله اللي في السماء جايين ينقذونا.. بينما عفاريت الاسفلت ( الشرطة بتاعتنا يعني) هاتك يا لاسلكي و الو الو يا مركز... اتاري بقي فيه واحد ببدلة و حليوة واقف في البلكونة و معاه ميكروفون و بيهدد و يندد و بيعلن ان حزب الغد ح يعمل مناظرة ما بين مرشحيه لاختيار رئيس جديد للحزب مش مناظرات اي كلام بتاعتهم ( الحكومة يعني..هو اللي بيقول والله مش انا) .. ناس بتصور .ورايا عربية شرطة و ظباط و عساكر.و هووب طلعت الموبايل تك تك.. اصحابي بيحاولوا يوقفوا تاكسي للسفارة الامريكية..التاكسيات مش بتقف خايفة.. قالوا القيامة قامت خلاص..ما بالك تقولهم السفارة الامريكية كمان..!!!.. المهم انا بعدت عن اصحابي شوية و صورت الراجل ..و اخدت صورة للعساكر..و هوووووب لسة جاية اعمل فيديو عشان صوت و صورة.. لقيت لك عزرائيل..و حساب الملكين...( تف تف تف بسم الله الرحمن الرحيم.). فيه واحد علي ايدي اليمين و التاني ع الشمال.. و لزقين فيا بطريق غبية اوي.. انتي صورتينا... طلعي الصور..هاتي الموبايل.. ( بهدوء وانا قافشة ع الموبايل) لا انا صورت عادي الشارع و العمارة..لا طلعي الموبايل... لا ما هو عادي انا مش صحفية و لا نيلة.. هاتي الموبايل..خلاص خلاص استني.. ح اطلع الصور عشان تطمن.. دي كلها لقطات عادية ..اهيه الصورة ديه ( بيشاور علي صورة لعربية الشرطة و شوية عساكر و ضباط ) دي مفيهاش حاجة و بعيدة!!.. لا امسحيها.. بعد مداولات قصيرة..خلاص ح امسحها!! (محدش يقولي مسحتيها ليه عشان انا معرفش اتكلم مع ناس دماغهم متركبة شمال).. ماسبش الموبايل و لا انا الا لما شاف انها فعلا ديليت و ما هموش صور الرجل بتاع الميكروفون
..
مفيش تاكسي للسفارة و انا مشيت و حكيت لاصحابي في الطريق اللي جم وقفوا معايا لانهم اتخضوا من منظر الظابط وهو واقف معايا بالمنظر ده..مشينا للسفارة الامريكية.. عشان الميعاد.. حكيت لهم في الطريق اللي حصل و الحمد لله ان الموضوع خلص علي قد كدة..مع انها حتة صورة مش واضحة اوي.. بس بتقول انهم موجودين
و محاولتش افسر خوفهم و ذعرهم من حتة صورة زي ديه صغيرة.. و العسكري(ولا ايه كانت رتبته) بيستظرف بيقول لصاحبتي اللي جت جري تشوف فيه ايه واقف لي كدة ليه عشان مايتدخلوش و يبعدوها : معلهش..اصلي ماحبش مراتي تشوف صورتي منشورة!!!!!! اصل الصورة متصور فيها ببمبي مسخسخ باين
...
Missippi Burning
المسيسيبي يحترق
_____
المفروض ان فيه عرض لفيلم "المسيسيبي يحترق" في احد قاعات السفارة الامريكية (السفارة مش الجامعة..و للاسف بياخدوا الموبايل ع الباب من برة لذا ماصورتش حاجة من جوا)..بيدور حول العنصرية ضد السود في امريكاو واقعة سنة 1964 اللي قام فيها التطهير العرقي و التخلص من الزنوج و القيام بابشع التصرفات الوحشية ضدهم و حرق كنائسهم.. ناهيك عن انتشار الفساد.. حيث الظابط و عمدة البلد متواطئين مع الجماعة اللي بيقوموا بتلك الاساليب الوحشية.. فبمعني اصح بتلاقي الفساد اللي وصل للنظام و بقي يسمح انه قصاد عينه يهان المواطنين.. فقط لانهم سود او يهود او من اي جنس تاني غير الانجلو ساكسوني..مع انهم امريكان
...
فيه الظابط الشاذ جنسيا و اخلاقيا و سلوكيا و فاسد و يقوم باعنف الاعمال ..اللي مش ح احكيها ,لكن كله قصادك يا حكومة.. غير ان القضاء غير عادل..و بيضطر عملاء اف بي اي انهم يغيروا من طريقتهم بقيادة جين هاكمن عشان يوقعوا بهؤلاء المجرمين و بعض من الحق يرجع تاني لاصحابه
...
و في مشهد جميل في جنازة احد النشطاء الزنوج اللي قتل هو و اتنين بيض (بس يهود) علي ايدي الجماعة سابقة الذكر اللي بتناشد بتطهير العرق الانجلو ساكسوني و رفعته عن اي شئ اخر, بنلاقي الواعظ الزنجي واقف بيلقي كلمته. بيناشد بكل غضب.انه حان وقت الكلام و الافعال و الخروج عن الصمت..و الوقوف في وجه الظلم..حان الوقت للتعبير عن القهر و الظلم..و الدفاع عن النفس و عن حضارتهم و ماضيهم و كيانهم
...
Heart of Darkness

قلب الظلام
مش عارفة ليه وانا راجعة في السي تي ايه باستعيد احداث اليوم كله... لقيت ان من ميسيسبي لوسط البلد يا قلبي لا تحزن...ميسيسبي تحترق.. القاهرة تحترق.. بالفساد, بالظلم ,بالسكوت ,بالخنوع ,بالغضب ,بالقهر, بالقرف ..انها
"تحترق و تحترق.. بصيت للرواية الانجليزية اللي كنت اشتريتها " قلب الظلام
عن العنصرية برضه و نظرة عنصرية لابناء افريقيا و السواد مش باللون و العرق بس..انما الاخلاق و الشرور
...
الدبلوماسية اللي كانت بتعلق ع الفيلم ( امريكية سودا كوتة يعني و لا كونداليزا رايس) اسمها ناتاشا كانت لسة واصلة حالا بالا من اسكندرية نزلت من القطر علينا ومع ذلك التزمت بالميعاد و قدمت الفيلم و قامت بتحليله معانا..عرفت نفسها انها عملت في اسرائيل, جمايكا و الكاريبي (!!!).. و بقالها ست شهور في مصر.. و ح تكمل لمدة اربع سنين هنا.. و في سؤال خبيث عند نهاية العرض.. سألها احد الحضور.. شوفتي تفرقة عنصرية هنا قي مصر؟؟! ردت... ايوة... طبعا!! العنصرية مش ضد الالوان و الاعراق و بس..انما في كله!!
...
وبعد ان قررت اراحة عقلي بعض الوقت , تركت الظلام و القهر و الظلم..و بدأت بقراءة الابيات علي ظهر ديوان فاروق جويدة.. فوجدت تلك الكلمات
:

قدمت عمري للاحلام قربانا

لا خنت عهدا ..و لا خادعت انسانا

شاخ الزمان ..و احلامي تضللني

وسارق الحلم كم بالوهم اغوانا

شاخ الزمان و سجّاني يحاصرني

و كلما ازداد بطشا..زدت ايمانا

أسرفت في الحب.. في الاحلام.. في غضبي

كم عشت اسأل نفسي: أيّنا هانا؟

ها هان حلمي..ام هانت عزائمنا؟

أم انه القهر..كم بالعجز أشقانا؟

شاخ الزمان..وحلمي جامح أبدا

وكلما امتد عمري..زاد عصيانا

والان اجري وراء العمر منتظرا

ما لا يجيء..كأن العمر ما كانا

...
و يجعله عامر

احجز مقدماً

اخي المواطن,,اختي المواطنة,,,قال تعالي
"أينما تكونوا يدرككم الموت ولو كنتم في بروج مشيدة" ( النساء 78) صدق الله العظيم, اخي المواطن اختي المواطنة,المجتمعين في هذا الصوان, اذا امتنعت عن ركوب الطائرة خوفا من الوقوع في البحر و تكون طعاما لذيذا لاسماك القرش اللي مش معانا فلوش عشان نوكلها, و اذا امتنعت عن ركوب العبارات خوفا من الغرق عشان مامعكش فلوس تجيب عوامة تنقذك, و اذا امتنعت عن ركوب القطارات خوفا من انه يولع بيك و اهلك ميتعرفوش عليك في مشرحة زينهم, واذا امتنعت عن حضور المسارح القومية خوفا من الحريق عشان محلتناش حاجة نطفي بيها, واذا امتنعت عن الذهاب للمستشفيات خوفا من الدماء و المحاليل الملوثة و اهمال الاطباء و الموت بيد المشارط , واذا امتنعتي يا اختاه من المشي ليلا او حتي نهارا في الشوارع خوفا من السفاح او التحرشات, و اذا منعت ابنك من اللعب خوفا من التوربيني, فاعلم يا عزيزي المواطن و يا اختي المواطنة,, ان الحكومة الذكية – اذكي اخواتها- الان توفر لكم الحل الامثل للتخلص من حضراتكم حتي و انتم هانئين نائمين في بيوتكم,وذلك خدمة متوفرة في جميع خطوط انابيب البوتاجاز, فلا طائرات بعد اليوم و لا عبارات و لا مسارح و لا قطارات و لا حتي سفاح و لا توربيني, خدماتنا تصلك لحد البيت, كل ما عليك الا انك تدعي ربنا ان البوتجاز يفرقع في وشك بسرعة عشان تخلص من حياتك و تقابل ربك , وحتي من غير دعاء, ح ينفجر يعني ح ينفجر, وقد تكون من سعداء الحظ وانت بتدعي ربنا يفرجها و يبسطها عليك.. تكون ابواب السماء مفتوحة تنزل علي نفوخك انبوبة بوتاجاز مشتعلة من حيث لا تحتسبون, وننصح اخواننا المواطنين,ان يتلوا صلواتهم قبل النوم و في كل وقت و كل ادان, و ان تستقبل القبلة اينما كنت, و ان تكون طاهر علي وضوء, حتي تقابل وجه كريم علي اتم استعداد,الكمية محدودة.. احجز انبوبتك مقدما!! و نحب نفرح عملائنا الكرام عن خدمة جديدة ستكون متوفرة في الاسواق قريبا جدا بعد نفاذ الخطة الجهنمية لتفجيركم عن طريق انابيب البوتاجاز, ان القلة القليلة اللي ح تتبقي سيتم توفير لكم خيار موت اخر و هو اكثر رقيا و راحة : اي جهاز كهربائي يولع علي طول اول ما تدوس ع الريموت كنترول.. خدماتنا تصلك اينما كنت.,,,و هذا بعد ان فشلنا في ان نوفر لك "الاستقلال التام".. فنحن نلبي رغبتك في "الموت الزؤام" .. فنحن الحكومة الذكية,, التي تتبع كل اساليب النظافة" و "العدالة" و "الجمال" و "العز" و "الكمال" حتي تنعم بكل "سرور"..و الحياة بقي لونها بمبي

!!
...
ملحوظة: نستقبل العزاء في سلامترو كافيه.. مع توفير القهوة السادة للمعزيين و الكركدية لاصحاب الضغط المرتفع و مياه نار للحكومة الذكية
.

انتهي البيان
...


ويجعله عامر