Monday, February 14, 2011

صوّر يا زمان...


كان نفسي دايما اعيش في زمن ام كلثوم وعبد الحليم..واحضر لهم حفلة
الزمن ده..الابيض واسود
اللي الناس فيه بتحب البلد
وتصحى رايقة ومتمزجة
وتتشيك وتروح حفلة لعبد الحليم
ويقولوا كلمة مصر بكل فخر وعزة
والاهم حاسينها
وبيناموا من غير هموم وفساد وخراب ونفاق
كان الناس بتحب بجد
وتفرح بجد
وكان لسة كلمة الثورة قريبة ليهم
النهاردة
اللي نفسي فيه حصل
حضرت لك حفلة يا حليم
وسط الناس
كبار وصغيرين وشباب
غنينا كلنا بصوت عالي
صورة للشعب الفرحان تحت الراية المنصورة
وبالأحضان يا حبيبتي يا أمي
والعلم المصري كان في ايد الصغير والكبير
غنينا ودمعنا وانتصرنا
وكنا برضه
أبناء الثورة
بس ثورة 2011
شكرا..لساقية الصاوي، انها بعثت عبد الحليم لينا ولو لنص ساعة
يخلي ساعة النصر..تتم فرحتها بيك يا حليم
وكنا مصريين فرحانيين رايقين بنحلم ببكرة
كل عيد ثورة..وانت طيب
ثورة 52..وثورة 2011
كنت معانا في الميدان ومعانا بعد النصر
...
خضرة وميه وشمس عافية وقبة سما زرقا مصفية
ونسايم سِلم وحرية.. ومعالم فن ومدنية

:)

..

ده انتي كنتي وحشانا يا مصر بشكل!ا
حمد لله ع السلامة
:)

..

Reminder to me: Fireworks were in the sky of Tahrir Sq. tonight!

1 comment:

ManalS said...

والله يا جوجو أنا حسيت بكده فعلاً النهاردة.... ماما جاتلى الصبح كده تقولى ماتشغليلنا شوية أغانى وطنية
شغلتلها كل أغانى أم كلثوم الوطنية وعلتها عالاخر.... بجد الاحساس مكنش يتوصف
:)

ومش هنسى يوم من الأيام اللى نزلت فيها التحرير وغنيت فيها مع مليون مصرى "اللى هيبعد من الميدان عمره ما هيبان فى الصورة"
:)

أول مرة نحس بالأغانى دى كده