Friday, December 15, 2006

من مذكرات عتريس وفؤادة




سارة بنت جميلة و ظريفة.. ادبا و خلقا. متدينة باعتدال و ملتزمة..مرحة...مسئولة جدا و يعتمد عليها.. لها شخصية مستقلة و عقل راجح..من اصل و عيلة طيبين.. يعني من الاخر..تتحب.. واعرفها من اول يوم دخلت فيه الكلية..و اتوطدت صداقتنا.. يوم ما اتخطبت.. فرحت لها اوي.. لانها فعلا تستاهل كل خير.. و من كلامها عن خطيبها كان باين عليه ( عشرين خط تحت باين دي واخدين بالكو) شاب كويس: علي.. بيشتغل شغلانة محترمة.. عنده بعض المشاكل العائلية.. الا انه اتخطي المشاكل دي و استقل بحياته و نجح..و جه الوقت انه يتجوز..و عن طريق المعارف...و ان سارة تعرف ابن عم بنت اخت ابن خالة العريس.... فتم التعارف.. فاللقاء.. فالقبول.. فكيوبيد.. فقراءة الفاتحة... فكيوبيد مرة اخري باسهم زيادة... فالخطوبة...و لولولولييييي


بعد شهر من الخطوبة...سارة جت في يوم مكلضمة و وشها شراب مقلوب... مالك.. مفيش.. حصل حاجة؟ في البيت كويسين؟ انتي و علي ؟
انفصلنا
ايه؟ ليه؟ في ايه؟

علي طلع شاب غيور... بيغيير عليا من كل حاجة و اي حاجة... رايحة هنا و لا هنا كلميني قبلها... ( ليه هو كتب عليا؟)... هاتي جدولك.. عشان ابقي عارف مواعييدك بالظبط و بترجعي امتي... انت بتشك فيا؟ لا مش باشك فيكي لا سمح الله بس احب اعرف تحركاتك ( تحركات ايه هو احنا في المخابرات؟).. مش ح تلبسي النقاب ان شاء الله بعد ما نتجوز؟.. لا.. نقاب ليه؟ ما انا محتشمة و محجبة و راضية ربنا.. ح تفرض عليا النقاب ليه؟.عشان ماحبش حد تاني يشوفك غيري..باحس جوايا بنار لما حد بيبصلك .(!!!!!)..ما نكتب كتابنا في نص السنة؟ لا..متفقناش علي كدة .. ليه؟مش بتحبيني؟ ليه نستني؟ .. عشان احنا لسة بنعرف بعض ..الخطوبة معمولة عشان كدة..هو احنا لسة معرفناش بعض ؟( لا لسة..انت بتهرج و لا ايه).. متروحيش عند عمك.. ليه ان شاء الله..؟ عنده ولد؟ اه محمد ماله؟ ده ولد و لا مش ولد ؟و مش محرم كمان؟ (نععععععععععععععم)... دول اهلي ح اقاطع اهلي كمان..و بعدين ده اصغر مني باربع سنين..غير ان كلنا قاعدين بحدود و و احنا اهل في بعضينا .و متربيين سوا انا و لاد عمامي و ولاد عماتي و ولاد خالي ..و بعدين اهلي ربوني كويس.. معلهش انا باحب اطبق الشرع و الدين و انا ماحبش ان اللي ح تبقي مراتي تقعد مع رجاله غريبة.. مش كفاية يوم حفلة الخطوبة مسك ايدك قصاادي!!!! (مسك ايدي فين و نيلة ايه.. هو انت فاكر اكلت ايه امبارح؟؟) يا هانم مسك ايدك و رقص معانا لما كنا عاملين دايرةكبيرة في القاعة..!! انت بتتكلم جد و لا بتهزر ( علي فكرة هو هزأ محمد ابن عمي ع الحركة دي اللي هي انه مسك ايدي. شوفتيش الخيبة اللي انا فيها ..قاعد ع السقطة و اللقطة)و بعدين يا ريت لما تكوني عندنا تاني مع اهلك مش تقعدي تتكلمي مع اخويا الصغير كدة..كدة اللي هو ايه؟ علي.. جرالك ايه؟. ده اخوك اللي اصغر مني بسنيين..و اعرفه من قبل ما اعرفك..و انت و اهلك و اهلي قاعدين.. انت شارب حاجة؟ الدين مافيهوش الكلام ده.. انا باطبق حدود الشرع..و علي فكرة مترديش ع التليفون..و انا ايش عرفني اللي ع الخط ده راجل و لا ست؟؟ ما هو بصي بقي .. عجبك علي كدة عجبك..مش عجبك

علي



ايوة؟
دبلتك اهيه

اموت و اعرف انهي دين و انهي شرع اجاز له انه يحلل و يحرم علي مزاجه... و كأن انا اللي معرفش الدين و لا اهلي ربوني....طب اللي جي يتكلم ع الدين ده مفكرش مثلا ان لما بنقعد لوحدنا في الصالون من غير "محرم" انه لا يجوز.. و انه بقي ما دام بيقول الدين و حرام و حلال..اننا منخرجش مع بعض من غير محرم ان شاء الله حتي اخوه الصغير..و لا بلاش حكاية اخوه الصغير دي لا يقول باخرجه معانا عشان اسبّل لاخوه و لاحاجة... يا شيخة بلا هم





___



وده من ايه لا مؤاخذة ؟حساسية يعني و لا زعل؟؟



جواز صالونات؟



و لا احنا فاهمين الدين غلط؟



و لا هما اللي غلط؟



و لا تربيتنا؟



حد فاهم حاجة