حبيب الشعب

الجمعة الثاني من مايو

__

ماتستغربتش ان صفحة كاملة في الاهرام تشويه للفيس بوك وانهم بيؤيدوا قتلة الاطفال, واعداء الوطن.وانها عيال لسعة والكلام ده..وده توقيت في الصميم تمانية واربعين ساعة قبل الاضراب اللي دعا اليه ولازال شباب الفيس بوك

لكن استغرابي كان لما بصيت علي القناة الاولي وهي بتنقل شعائر صلاة الجمعة "المباركة" من المنوفية...وقلت حتي دي كمان بترتبوا فيها عشان عيد ميلاد أبا الحاج ابو جيمي..يعني عشان البركة تحل

*

السبت: الثالث من مايو

عشية عيد ميلاد فخامة الزعيم

___

صحيت بصيت علي الاهرام كدة حتي من غير غسيل وش لقيت بيقولك لنجعل يوم 4 مايو يوما للوطن.. قلت خير يبقوا مع الشعب يا ابن الشعب...وقال ايه الاهرام ناوية تقرفنا اقصد تثقفنا طوووووول شهر مايو بملحق " تحت عنوان عيد ميلاد وطني تفتح خلاله صفحات من ملحمة العمل الوطني في كل مجالات الحياة المصرية طوال رحلة عطاء مبارك لنا ورحلة عطائنا معه لمصر" فانا استغربت..هو احنا ناكري الجميل "عطينا" ايه يعني..ماتقولش ادتنا ايه مصر..قول ح ندي ايه لمصر..ومصر ما عزبة لابا الحاج يبقي بتدي ميييين. اسم الله عليك..ابا الحاج

*

المهم..فتحت صفحة اتنين سيد علي "ببساطة" بيقولك اول جملة..وبداية القصيدة عثل...: المصري الوحيد الذي اعطي لمصر 60 سنة من عمره اشغالا شاقة بارادته هو مبارك, وسوف يعرف الناس قيمته بعد سنوات طويلة" صح احنا كل ده معرفناش القيمة... لازم ناخد جرعة مكثفة يجي ثمانين سنة فوق الثمانين..عشان نعرف النعمة دي

*

اما بقي اللي مش ينسكت عليه كانت صفحة ثلاثة لعم عزت السعدني

"هذه قصة فتاة ولدت وعاشت وتربت وتعلمت وتثقفت وتوظفت في عصر مبارك"ماشي..اتوظفت ماله برضه, مقولناش حاجة كمل بس.." انها قصة اخر وجه مصري في رحلة النور والتنوير التي يمسك بأول خيط منها محمد علي باشا و يمسك اخر خيط الرئيس مبارك"

لا لا لا...كدة لا,لغاية التنوير..ولا. يمسك لمبة جاز ماشي,يمسك سلك كهربا عريان..اوكي

لكن خيط التنوير؟؟ التنوير اللي اتعلمنا علي ايدين الطهطاوي..ده الراجل حتي يتقلب في تربته

.

بص
الطهطاوي بيقولك ايه بقي من كتاب محمد عمارة

"فان الملوك يستحيون من اللوم العمومي, فالرأي العمومي سلطان قاهر علي قلوب الملوك والاكابر, لا يتساهل في حكمه, ولا يهزل في قضائه, فويل لمن نفرت منه القلوب, واشتهر بين العموم بما يفضحه من عيوب"

طيب يا شعب..يا انا يا انتم

وبيقول كمان ان الله قد اختار الحاكم "لرعاية الرعية, و جعله ملكا عليهم لا مالكا لهم, وراعيا لهم, يعني ضامنا لحسن غذائهم, حسا ومعني, لا آكلا لهم"

*

نرجع مرجوعنا قال تنوير قال, احنا قادرين نلاحق علي فواتير الكهربا, في صفحة تسعة عم عبد العظيم درويش بيقولك في اخر مقالته

ولان الحفاظ علي كرامة مصر نهجه, ولان تحقيق مصلحة الوطن مقدمة اولوياته, ولان السلام دوما هدفه, ولان دموع طفل تؤرقه, ولان هموم مواطن بسيط تشغل تفكيره, ولان ضمان مستقبل شاب يظل مهموما به, ولان معاش عجوز يبقي قضيته الاولي, ولان احباط مواطن يؤلمه, ولان رخاء بسطاء يظل حلمه, ولانه لم يصدر قرارا بأن يختفي مواطن وراء شمس زعيم او ان تسكن اشلاؤه مفرمة كبير العائلة ..اقول لمبارك غدا: كل سنة وانت طيب يا ريس

هنا بقي علامات التعجب اترسمت..هو ايه بقي موضوع المقارنات ده!!..يعني ليه عشان نبين ان اللي معانا دلوقتي ابيض وحليوة وان اللي قبليه كانوا كخة واحنا اللي مش مقدرين النعمة, يعني انا مثلا عشان عشت واتربيت واتعلمت واتوظت واتثقفت في عصر ابا الحاج ابو جيمي ومشفتش السحل اللي علي اصوله في العصور السالفة, اسجد صلاة شكر واقول ولا ما قصرت يا شيخ, وح ننهب يعني,ولما سواقين التاكسي يشتكوا من الغلا, و نلاقي طوابير العيش, والشوارع اللي فوق بعضها, والغلابة اللي جالهم سرطان, ازازة الزيت ام اتناشر جنيه,كلللللللللل ده مايجيش حاجة زي اللي قبل كدة, فنبوس ايدينا شعر ودقن, عشان الناس طول عمرها كانت مبسوطة..والمفروض مانطمعش في اكتر من كدة..وانت يا ولدي محسود محسود محسود؟؟ حد يفهمني

*

في
الاخبار اليوم عم ممتاز القط بيقولك

وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه

بيقول كمان

نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا

.

وبينهي القط مقاله اللوزعي, بيشحت

.
الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!كل سنة وأنت بكل خير ياريس.

__

اختم بقي وارد علي كل حد طبل وكتب النهاردة وعنده النية وانما الاعمال بالنيات انه يكتب يوم اربعة مايو لسة..ارد عليهم كلهم.. بتعليق من مسرحية محمد صبحي

شكراً اخي المواطن

فبالدصطور اعطيته الكلمة

وبالدصطور اكتفيت بهذه الكلمة

شكرا..روح لأمك

__

العنوان من قصيد لأحمد مطر

A Sweet Escape...!

Take me away

A secret place

A sweet escape

Take me away

To better days

Take me away

A hiding place

*

There's a place that I go

That nobody knows

Where the rivers flow

And I call it home

And there's no more lies

And darkness is light

And nobody cries

there's only butterflies

*

The sun's on my side

Take me for a ride

I smile up to the sky

I know I'll be alright

.

.

*parts from Natasha Bedingfield's song "Pocket full of Sunshine"

.

.

الوان الربيع

شم النسيم عندنا لا يعني الفسيخ والرنجا والبصل..انما..علبة الالوان

كانت ماما تغلي البصل, والكروكم,والنعناع.والكركدية...واحنا محضرين البيض و جاهزين بالالون...الوان مياه, خشب,فلوماستر حتي..المهم تكون الوان جديدة..! يتقسم البيض علينا احنا التلاتة و يا ويله اللي جت عنده بيضة مكسورة... يتنكد و يحاول يبدلها مع حد تاني.. لو حد بوظ رسمته, فرقة الانقاذ علي طووول بتعدل عليها...وغالبا بتكون اكتر بيضة حلوة.. وساعات بنلزق ستيكر كمان !! وبعدين ...اسوأ لحظة لما بتكون مصير البيضة الاكل او الكسر لاي سبب..! غير بقي هل يا تري ماما ح تختار البيض المتلونة بتاعتي... ولا بتاعة هدير...و طبعا هبة لازم يعني يكون لها نصيب في الموضوع ده! المهم..اللي عايزة اقوله يعني..

كل
سنة
وانتم
متلونين
بألوان
الربيع
والأمل:)ه

.

.

مقولتوليش..لونتوا البيض النهاردة؟؟

:)

نظرة متشقلبة

اغرب موقف: ه
اني اكون في مدرستي, وشايفة مستر مصطفي مدرس الموسيقي بتاعي في ابتدائي, ومديرة مدرستي ميسز مني, وميس هويدا عربي, وان دي حفلة المدرسة, والكورال واقف ع المسرح, و البنات واقفين عاملين شعرهم, و القميص الابيض و الجيب السودا, ...وانا واقفة وسط الجمهور والاولياء الامور... ماسكة الكاميرا وبأصور هبة...مش انا اللي باتصور-زي امبارح- وانا واقفة ع المسرح وسط زمايلي بتوع كورال المدرسة..وعاملة شعري, وباصة لمستر مصطفي بتاع الموسيقي, وشايفة ماما وهي بتصورني... من يجي اتناشر سنة كدة!ه
*

هي الدنيا...ماشية بالشقلوب؟

.

ا نـ ـشـ ـكـ ـا ح

البـحــــر بــيــضــحــك لــيــه....ه

.

.

.

in Flesh and Blood...!

ما أعجب أن يخرج بطلك من بين طيات الورق..ويبحر بك بعيداً..بعيداً في بحوره المستنيرة

____

السابع من ابريل 2008

The Ancient Mariner

.

أحلام ماكينة الخياطة

كنت هناك لاستلم ملابسي الجديدة.. نحيلة هي ...ازدادت ذبولاً منذ اخر مرة رأيتها الاسبوع مضي ... طفلتها الصغيرة التي لم تتعد بعد السنة..تملأ الحجرة صراخاً كعادتها..بل كعادة الأطفال ..و امها عاكفة علي ماكينة الخياطة! الدبابيس.. المقص.. القماش الملون ..المكواة...هو ما كل ما تقع عليه عيناي في هذه الحجرة....أما هي...فهي تتحدث بلا انقطاع!ه

.
اعتدت ان استمع لها صامتة..و هي منهمكة في عملها...من قص..و تحديد القياسات...و بيدها قطعة الطباشير الاحمر.. لترسم علي قطعة القماش الخطوط! تنطلق بالحديث.. ليستمع لها البعض باهتمام و يشاركنها الامها.. و اخريات تضجر من حديثها المطول..و ينشغلن بتصفح اعداد قديمة من البوردة" ...لكن طالما انت في بيتها..لا مفر من الاستماع لها.ه

.
"هي دي شغلتي اللي بحبها..الخياطة..اتعلمتها علي ايد اختي الكبيرة – الله يمسيها بالخير - و بتجيب قرش كويس .... ممكن خمسين و ممكن تلاتين . .وممكن مية.. ممكن اشتغل اسبوع..وممكن اقعد بالشهر ماشتغلش..دي اصلها ارزاق .. اربع عيال و ابوهم .. الماكنة بتصرف عليهم .. الشغلانة مش مضمونة ... و لسة فيه مصاريف العيال و ايجار الشقة اللي لازم انقل منها اخر الشهر..و دروس البنت الكبيرة..و مصاريف العيّلة اللي علي حجري دي..غير الاكل و الشرب و اللبس"
ه

.
تنحني لتبحث عن الخيط الرمادي ليناسب ما تحيكه.. تهدهد الصغيرة قليلاً.. و تعود.. منحنية علي ماكينتها.. و عيناها لا تفارق هذا الخيط الرفيع.. لا يقطع الصمت سوا صوت "موتور" الماكينة المتهالكة!ه

.
"اما النطع اللي جوة . .طويل عريض . .و سايبني اتبهدل .. فاكر نفسه لسة في بلدهم في المحلة .. ايام العز .. في دكانة ابوه .. متعودشي اصله ع الشقي . .وجه القاهرة .. يشتغل يوم و عشرة لا .. عارفة ديكي النهار .. راح اخد الفلوس اللي حيلتنا و قام اشتري فيسبا .. و اشتغل طيار.. .ومفيش اسبوع و ساب الشغلانة. . اصله بيقول ان عنده كرامة. .و اهي الفيسبا متلقحة تحت البيت .. عنده كرامة!!!!!!!.. انما انا و بهدلتي كل اسبوع و البت الصغيرة علي كتفي ..و اروح بيها الموسكي و الوكالة..و افاصل و اهاتي .. والزبونة دي تطلع عيني و دي تسم بدني.. ودي ما تدفعشي اللي عليها.. ده غير تمقيق العين... و لا شغل البيت و كوم الغسيل اللي هناك ده..و المطبخ...و محدش من العيال بيساعد.. و انا اللي اصرف و اشقي و اتعب.. ..و ادور علي شقة كمان..والبيه متلقح ياكل و يشرب وينام. ..ولما اقوله وصل ده ولا ده لزبونة وهات منها الفلوس... يضرب عليهم..و مدعوق ابو البيت و العيال و لا الطفح اللي ح يكلوا بيه حتي."ه

.
نظرت لي.. و كان الالم و الحسرة بادي علي وجهها الشاحب .. .و لاول مرة ألمح دموعها..تنهدت.. و اختنق صوتها بالدموع...ه

.
" انا مش طايقة اشوف وشه في البيت..و لا اسمعه ..صوته بينرفزني... عارفة..نفسي اركن الماكنة اللي قطمت ضهري...و ارمي هلاهيل القماش دي في وش الزباين..نفسي اروح البحر.. نفسي امسك مصروف البيت اول كل شهر ان شاء مية جنيه..بس تكون فلوس من جيبه مش من قطمة ضهري.. نفسي في مروحة كويسة بدل جهنم اللي قاعدة فيها و معذبة بيها الزباين في الاوضة دي.. نفسي في شقة بتاعتي..مش مطرودة منها كل اول شهر...نفسي اعيش مرة من نفسي"ه

.
سكتت...و انا لم اجد ما اهون به عليها ... ابتسمت لي من جديد و هي تسلمني ردائي.." ح ياكل منك حتة"... كان تعليقها المرح

.
كانت قد انتهت من ردائي الجديد..كما انتهت من جلسة الفضفضة الاسبوعية التي تهون من حالها.. تركتها لتحلم بالبحر والمروحة و "البيت الملك".. لعلها تجد بارقة الامل.ه