Sunday, August 15, 2010

حاجة أمورة


كل ما اقوله.."كل سنة وانت طيب" بيضحك! هو لازم يكون عيد ميلاد ولا أول مرة قلتلي فيها "بحبك" عشان اقولك كدة؟ .. فيضحك! التفاصيل الصغيرة هي اللي بتفرِق. يعني أول مرة شربنا قهوة سوا.. أول مرة وصلتني..أول فراشة بيضا تعدي ما بينا.. وأول شتا دافي بكوفيتك حوالين رقبتي في يوم مطرة. كل دي تفاصيل تستحق تماما اننا نحتفل بيها كل سنة! مش دول بذمتك أهم من الفالانتين؟ يعني أول مرة اتأخرت برة بس الدنيا كانت أمان معاك ، أي نعم هي أول وآخر مرة، بس مش دي تستحق اننا نفتكرها وقلبنا يضحك؟ أول مرة اتقابلنا اصلا ..أول حفلة حضرناها سوا.. أول مسكة ايد دافية منك..أول مكالمة تليفون الفجر! حتى أول خناقة –اللي قلتلي فيها لأول مرة كلمة بحبك- لازم نفتكرها ونضحك! "ناقص تقوليلي أول مرة قلت لك صباح الخير" ..فأضحك! وايه يعني لما كمان دي نحتفل بيها؟ مش المهم الحاجات اللي في الحياة فرحتنا؟! وقد ايه بيعدي من عمرنا واحنا سوا وفاكرين؟! زي أول مرة تجيبلي عقد فل من الراجل الطيب في الاشارة بتاعة روكسي.. وأول مرة ناخد مركب في النيل سوا- وآخر مرة برضه أنا باترعب منهم! وأول مرة شفنا القمر بدر والنجمة الوحيدة وياه! وأول مرة مسكت ايدي وطيرنا طيارة ورق للسما الزرقا البعيدة! وأول مرة عيطت ولقيت في كلامك حضن دافي يضمني! مش دي كلها حاجات حلوة بريحة السكر جمعتنا.. وصدقني هي اللي ح تبقى من بعدنا! ويمكن كمان دي الحاجات اللي تزعل علينا لو في يوم ايدينا اتفرّقت وتوهنا من بعضنا، وهي اللي ح تفكّرنا لو نسينا، وهي اللي ساعتها ح تزعل وتضلم الشمس، وهي اللي ح تبهج الدنيا لما نفتكرها...! مش بأقولك، التفاصيل يا عزيزي..التفاصيل الصغيرة هي أهم حاجة في الحياة! كل اللي بينا ده تفاصيل صغيرة بيضا معقودة زي عقد الفل! وبعدين.. انت اللي علمتني احتفل بكل حاجة في الحياة.. اني اشوف الحاجات الصغيرة... وان عينيا تلمع وقلبي يتنطط فرح.. ! عرفت ليه اجندتي مليانة تواريخ كلهالحاجاتanniversaries طيبة، أمورة في الدنيا؟! حاجات يمكن خلت كل يوم عيد حياة، اني أصحى الصبح وأفرح، وأقول للسما شكرا انك عديت من هنا، واني دوقت طعم الحياة والفرح! عرفت ليه بقى.. كل سنة وانت طيب :)؟!

___________

تمت

6 comments:

Anonymous said...

مما لا شك فية
إن في حاجة أمورة
حولين المدونة دية
فين ؟
فين ؟
فين؟
مش عارف

علا من غزة said...

جوج

انتي بني ادمة ناعمة جدا من جوة :))

None said...

حلوه اوى

روز said...

وإنت طيب :)

يا مراكبي said...

عرفت ليه اجندتي مليانة تواريخ كلهالحاجاتanniversaries طيبة، أمورة في الدنيا؟

الله
بجد تعبير جميل
قد إيه التفاصيل الرقيقة دي هي فعلا اللي بتفضل في ذكرياتنا طول العمر وبيبقى ليها أحلى طعم .. مهما اتكررت بعد كده .. أول مرة هي دايما أحلى مرة

Anonymous said...

التفاصيل الصغيرة هي أهم حاجة في الحياة! كل اللي بينا ده تفاصيل صغيرة بيضا معقودة زي عقد الفل!

:)
الإبتسامه دي ردي ..

مش عارفه ليه لما قريت البوست افتكرتني !

اصل انا برضو بحتفل بالتفاصيل البسيطه دي ..
وبرضو بيكون الرد نفس الاستغراب والضحكه !


دايما بشوف التفاصيل البسيطه دي هي اللي بتدي نكهه وطعم جميل للحياه ، من غرها كل حاجه ماسخه !
هي اللي بتفرق جوانا اوي عن اي حاجه كبيره ..

قد ايه البوست عميق رغم بساطته :)

تسلم ايديكي :)