Monday, August 2, 2010

!نقطة..ومن غير سطر



كل يوم بأقعد مع نفسي أحاول أعيد لها فكرة انك مشيت. بأحاول أفهمها انك مش موجود واحدة.. واحدة. انت عارف العيال بقى، متعرفش تقولهم حاجة كبيرة كدة خبط لزق! لازم توصلهم المعلومة حتة حتة... يعني لما سمكتها الصغيرة الدهبي ماتت - السمكة دي اللي انت جبتهالي- معرفتش اقولها انها ماتت. صحيت مخضوضة لما لقيت السمكة نايمة على ضهرها. قلت لها يمكن نايمة حبة! أنا طبعا كنت عارفة انها ماتت. قعدت اشرح لها انها رايحة عند مامتها في البحر الواسع! اسئلتها كتيرة.. البحر فين؟ طب ح تروح ازاي؟ طب مامتها متجيش ليها ليه؟ كل ده عشان سمكة صغيرة دهبي عبيطة..ماتت!! ما صدقتش غير واحنا بنرميها في النيل!! تخيل؟! خلتني ارمي سمكة دهبي صغيرة ميتة في النيل .. عشان تصدق انها رايحة لمامتها!! فاكر لما تيتة اتوفت؟ ماعرفتش تستوعب الموضوع برضه على بعضه.. عرفت ان تيتة مش موجودة.. واننا مش ح نزورها..وانها مش ح تاكل عندها المكرونة اللي بتحبها.. وان يمكن ما تكلش مكرونة تاني لان مفيش حد بيعملها زي تيتة .. وبعدين وصلت لفكرة ان تيتة عند ربنا.. قامت معيطة! فضلت اسبوع بتعيط مابتبطلش .. كأن الموضوع حصل امبارح مش حصل من كام شهر .. وبقيت تعيط بزيادة لما عدت سنة! كأن استيعابها للأمور بيمشي بالعكس، بالمشقلب..مش بيبدأ كبير ويخلص بالوقت .. لأ، بيبدأ صغنـــون .. ويكبر أول ما تفهم كل اللي حصل، كأنها بتجمع صورة.. زي ما بتعمل بالبازل! فإزاي عايزني أقولها دلوقتي انك مش موجود!!أنا سايباها لسة بتبص على صورك معاها، انك ح تيجي تخرجها فعلا زي ما وعدتها، سايباها تتقمص منك انك متأخر عليها.. يمكن على بكرة اقولها انك مش ح تيجي النهاردة كمان.. الاسبوع الجاي اقولها انك مسافر شوية بعيد! ح تزعل منك شوية بشوية.. ح تبطل تبص على صورك لأنها كرهتك انك متأخر عليها كدة، ح أقولها انك مش ح تيجي وساعتها ح تعيط من جديد، ح تعيط بالأوي! معلهش.. نصبر عليها شوية.. انت اكتر حد عارف انها بتوه في زحمة الدنيا والكلام الكبير اللي مش بتفهمه مرة واحدة.. مرادفات الظروف وانه لازم والحياة والفلوس.. كلام اكبر من انها تفهمه انه يكون سبب انك متكونش هنا تديها حضن وتحكيلها حدوتة! الصبر..شوية بشوية وح تعرف انك مشيت. ويمكن ساعتها.. أصدق أنا كمان انك مش هنا ومفيش حدوتة للنهاردة!ه

_________

تمت

2 comments:

انا حرة said...

اعرف واحدة حصلها بالظبط اول عشر سطور دول
بس هى بعد ما اقنعت نفسها انها نايمة شوية و اكتشفت ان نومها دا طول اوى..و عرفت اخيرا انها لازم تقنع نفسها بانها مش بس ماتت..لكن كمان بان حاجات كتير اوى هتموت معاها
حاجات كلها بتبدأ حلوة و بعدين بتروح اول ما بتتعودى عليها

بحب اوى الطريقة اللى بتكتبى بيها احساسك :)

جارة القمر said...

لا تعليق

كلامك جه على الجرح فعلا

طريقتك فى الكتابة جميلة جدا وحبتها اوى

هستخدم نفس المحاولات اللى فى الحكاية يمكن اصدق كمان انه مش هنا