Tuesday, January 11, 2011

واحد وواحد... يبقوا واحد


بص يا سيدي، انا عندي سلطانيتين حلوين اخوات بعض..مستنين شوية كورن فليكس يدفوهم، وايدينا تحضنهم في يوم شتا. وعندي ماجين.. عايزين شوية قرفة باللبن تدوب في قلبهم. وعندي فراشتين واحدة لبني والتانية بينك. وعندي مكان في المكتبة لكتبك الكتير تملى الرفوف الفاضية من الحكايات. وعندي افلام مستنية اللي يشغلها وهو بيشرب نسكافيه وحاضنني في نفس ذات اللحظة. وعندي بلكونة فيها كرسي فاضي، وزرعة دبلانة عايزة اللي يفتكرها لما يصحى الصبح يسقيها. ودولاب مترتب عايز اللي ينعكشه. ومسدس ميه جاهز انه يضرب في المليان، وضحك كتير ناوي يرن في الدنيا. وعندي مخدات كتير ع السرير مستعدين يوسعوا لدراعك تنيمني عليه بدلهم. وعندي نجوم من اللي بتنور في الضلمة فتسرح معاها..بس عايزة اللي يلزقها ع السقف. وعندي شوية نعناع ناشف عايزين كباية الشاي بتاعتك. غير الألوان الكتيرة اللي لسة عايزة ترسم قلب وفراشات وورد..بس عايزة اللي يصدق حلمها. وعندي دموع عايزة تقع بين ايديك. وفيه مونيكير عايزة اخد رأيك فيه. وعندي أرق مش بيروح غير بحواديت عن الجنيات، والقمر، والأميرة والشاطر حسن. وعندي طيارة ورق مبعرفش أطيرها. وبرد بيضرب في روحي بيحتاج حضن والجاكت بتاعك. بس لسة عندي فرحة عايزة أقسمها معاك زي ما بنقسم الشيكولاتة بالظبط .. مع ان عندي تعاوير في قلبي كتيرة، وزعل من الدنيا، وذاكرة ضعيفة، وخوف، وجنان، وشوية ضحك لسة بيطلعوا لما بأعيط.... ه

ها...استناك؟

:)

____

تمت

16 comments:

حروف said...

حلوة اوي اوي

انا كمان بسأل استني ولالا؟!!

Hu-man said...

واحد وواحد يبقى واحد
مش عايز اقلك ان هي من اجمل الحاجات اللي قرتها عن مشاعر الحب عشان ماتفكريش ان هيا مجامله ...بس انتي وصفتيه من خلال حاجات ماديو ملموسة بس هي عامله زي خندق بنقع فيه فجاءة عشان يوصلنا للمشاعر دي؟
:)

Ahmed said...

ت ح ف ة

إبتسام مختار said...

لو ماشيه بمبدأ السكوت علامة الرضا
-و هو المفضل فى هذه الحال:)-
يبقى الظاهر بيقولك استنى آه




أنعشتِ صباحى :)

Anonymous said...

وجعتنى اوى اوى اصلى بقالى سنين طوييييييييييله مستنيه ومابيجيش ومابيمشيش

صباحك احلى من السكر

Epitaph1987 said...

حروف
جربي كدة :)

Human,
:)
ينفع اقولك
خلتني ابتسم؟
:)

أحمد
:))

إبتسام
السكوت
علامة
الرضا
والطمأنينة
والابتسام
و
:)

انونيموس
مش قصدي ع الوجع
*طبطبة*
ايامك كلها احلى من السكر والشيكولاتة كمان
:)

يمامة شاردة said...

الله عليكي بجد

حلوة فوق الوصف


* وحشني أبتسم هنا

:)

Nouran said...

:)
استني طبعا :)
كل سنه و انت طيبه يا جوجو و عقبال 124 سنه
بقيتي كبيره اوي :P
كل سنه و انت طيبه يا جميل و يا رب حياتك كلها تبقي جميله و فيها الوان قوس قزج و فراشات جميله بتطير يا رب

ponpona said...

سؤال : هو انا ليه مابجيش هنا كتير
كل مرة آجي اقرأ حبة وامشي من سكات
و اقول هاجي تاني قريب
و لا القريب بيجي
و لا انا باجي

جارة القمر said...

مش عارفة اقولك انتى اللى رائعة ولا كلامك هو اللى رائع

اقولك

ربنا يسعد ايامك

Anonymous said...

ربنا يوفقك ..
تحياتي
إبن بهية
http://ibnbahya.blogspot.com/

Anonymous said...

epi, why have u hidden blogs' list? I am not able to follow any anymore!

Epitaph1987 said...

يمامة شاردة
وحشاني ابتسامتك هنا
:)

نوران
وانتي طيبة يا جميلة..:)))
كبرت اوي خالص مالص فعلا
:|

Ponpona,
ح انبسط اما تيجي تطلي هنا شوية كدة
:)

جارة القمر
آمين
ولك بالمثل :))

ابن بهية
شكرا
:)


Anonymous,
I didn't! :| I hid nothing and am not sure which exactly you mean! Just tell me yemken yekon feeh 7aga keda wala keda! bs ana f3lan mal3btesh fi 7aga :))

Anonymous said...

mmm,3'areeba! It used to be a list at the side of the page for your favourite blogs but it isn't there since a while so I thought u removed or hide it by mistake... Thanks a lot anyway!

يا مراكبي said...

الله
الله قوي كمان
والنهاية الساحرة دي بجد بتهز القلب هز

برافو

Great wishes said...

ياااااااااااااااااه ع القمر و جماله
والله يابنتى الكلام دا قمر
ووحشنى اوىىىىىىىىىى اجى عندك و أقرأ كلامك ,,طبعا طبعا طبعا تستنى بقوه و دايما تقولى يارب قربلى رزقى و يسرهولى وباركلى فيه و باذن الله تكون النتيجه اجمل واحده لأحلى واحده