Saturday, June 26, 2010

يا ريت بيتك كان منو بعيد..


عزيزي....،ه

حلوة "عزيزي" دي!! :)) ازيك؟؟ بص من غير رغي كتير.. انت من الآخر وحشتني! ح اخبي يعني!!! مش "وحشتني" بتاعة الكليشيهات دي اللي بتتقال في الأفلام..ولا اللي كنا بنقولها لما حتى نكون باصين في وش بعض! لأ.. وحشتني! إنت ازاي انسحبت من روحي كدة؟ يعني ينفع اتعود على غيابك كدة؟ ينفع؟؟ النهاردة لما حسيت بنسمة البرد اللي خليت روحي تتلج لثواني كدة.. عارف نوبات الرعب اللي كانت بتجيني دي؟ اللي كنت لما بأحسها بأرفع سماعة التليفون وأكلمك وتطبطب بصوتك عليا؟ النهاردة لثانية كدة كنت ح اموت واكلمك... ! هو انا ليه مينفعش اكلمك؟! بجد مش فاكرة.. !يعني اقعد كررلي الأسباب اللي بسببها انت مش ويايا! مش عايزاك تقنعني بالأسباب.. فكرني بس بيها! وأوعدك المرة الجاية ح اكتبهم في ورقة واخليها معايا عشان كل ما أنسى أقراها وافتكر احنا ليه مش مع بعض!! بجد مابهزرش، إنت عارف الزهايمر بقى! كل اللي اعرفه دلوقتي انه مينفعش اكلمك واقولك "محتاجاك"! انا اصلا مش ح اقولها لحد ابدا..بس كنت ح اقولهالك إنت... بس خلاص عادي! هو انا ماينفعش أصالحك، واعزمك على شيكولاتة باللبن وأكلمك طيب ؟ دي كمان لأ؟ هي مش المفروض الشيكولاتة باللبن بتصلح أي حاجة خربانة في الكون؟ برضه لأ؟ طيب..مش مشكلة! عادي يعني ! أنا مش عارفة انا كنت عايزة أكلمك ليه النهاردة..غير اني للحظة اترعبت، وافتكرت اني لما باترعب كدة كان اول حاجة بأعملها اني أكلمك! عندي امتحان..أكلمك، مش عارفة أنام.. أكلمك، متخانقة بأكلمك، زعلانة مني.. بأكلمك، ده أنا حتى لما كنت بأزعل منك كنت بأكلمك!! كنت بألاقيك.. كنت بأحكيلك.. كنت باتطمن واتدفى من تاني.. فألاقيني! النهاردة لا لقيتك ولا كلمتك ولا اي حاجة ابدا! مع اني كنت زعلانة مني ومنهم ومن حاجات كتير وقلقانة من حاجات اكتر...بس مالقتكش..مالقتش غير البرد عمال ياكل في روحي! تصدق.. أنا ح أزعل منك إنت كمان! انا مش فاكرة أي حاجة.. مش فاكراك..ومش فاكرة ملامحك.. ولا فاكرة نبرة صوتك.. ولا عارفة ألاقي ريحتك في الهوا .. ولا فاكرة كنا بنترعب من ايه ونقعد نضحك عليه! هو إنت ازاي توهت كدة في الزحمة؟ ولا أنا اللي عجزت وخرفت؟؟؟! مجنونة.. عارفة :)! أنا مش فاكرة غير الاحساس... البرد المفاجئ .. الخوف. ورد الفعل كان دايما اني أجري لحضنك! بس سيبك...المهم انك تكون كويس! وأنا لما اترعب تاني كدة - بسبب ومن غير- ح اقعد اكتبلك في جوابات كتير ..مش فكرة حلوة برضه؟ أحسن من التليفونات والست تقولنا رصيدك خلص اجروا من هنا :)) !ا

ملحوظة:انت طبعا عارف اني مش ح ابعتلك الجواب ده.ا

يلا..تصبح على خير
___________________
تمت
العنوان: من أغنية "شو بخاف" لفيروز
Amelie: الصورة من فيلم

13 comments:

يمامة شاردة said...

رهيبة..!!

تسلم إيدك..وأحاسيسك

ربنا قادر يدفّيكي من تاني

:)

شريف said...

سأموت و في نفسي شيء من تقديس البنات لفيلم Emilie !

بالنسبة للجواب ...
شوية :) مخلوطين بحبة :( .. و على فكرة, حكاية الشوكولاتة بتصلح كل حاجة ديه حقيقة علمية!

Dina said...

مصدقتش لما قريت
النوت كأنى انا اللى كتباها
انتى بنت جميلة اوى وعايزة اتعرف عليكى

لو ممكن تضيفينى على الفيس هتلاقى اللنك فى المدونة بتاعتى

Deena Fahmy said...

حسيت اني فرحانة لك

بوبو said...

بحب اقرالك اوي.. بحس ان كلامك طالع من جوايا لو كنت ف نفس الموقف.. حلوة اوي بجد

Om HAGAR said...

حلوة قوي فعلا وصفتي الفراغ و الشعور بالبرد اللي بنحس بيه لما نفقد حد بنحبه

Batool said...

حلوة فعلا و بحب احاسيسك جداو بتعرفي توصفي مشاعرك كويس

enjy said...

مش لازم هو يكون موجود عشان انتى تكونى موجودة

صعبة اوى بس دة اللى اتعلمته مؤخرا

متمكتبيش النوع دة من الجوابات تانى..انا فكرت اعمل كدة زيك فى يوم من الايام..بس هتتحول لعنة مش هتعرفى تتخلصى منها

بلاش تكتبى النوع دة من الجوابات تانى..ارجوكى

مُزمُز said...

الشوكولاتة باللبن متدلدقة في كل كلمة في النص ده :)

هو انا ليه مينفعش اكلمك؟! بجد مش فاكرة.. !يعني اقعد كررلي الأسباب اللي بسببها انت مش ويايا! مش عايزاك تقنعني بالأسباب.. فكرني بس بيها! وأوعدك المرة الجاية ح اكتبهم في ورقة واخليها معايا عشان كل ما أنسى أقراها وافتكر احنا ليه مش مع بعض!! بجد مابهزرش

الكلام ده ، ميطلعش ، والله العظيم ، غير من روح بريئة ونقية وشفافة وضعيفة

نوبات الرعب دي
وكل الحاجات اللي كانت بتكلمه بسببها
كل دول كان لازم يبقوا بتوعها هيا وهيا اللي تعرف ، ولوحدها تماما ، تتعامل معاهم بمعرفتها
كان لازم تلاقي البرد ياكل ف روحها عشان تعرف تبقى ملك نفسها
ده شئ قاسي بس ضروري

انا مش فاكرة أي حاجة.. مش فاكراك..ومش فاكرة ملامحك.. ولا فاكرة نبرة صوتك.. ولا عارفة ألاقي ريحتك في الهوا

انا حصللي بالحرف اللي قلتيه هنا
بس بتيجي لحظات إفاقة الواحد بيستعيد فيها كل تفصيلة كأنه جوه اللحظة
بتبقى إفاقة مرعبة ومنهكة أكتر من كل الرعب اللي فات
وفي النهاية برضه مهما اللحظات فاقت ونوّرت بيرجع الواحد تاني لضلمة روحه الحقيقية الملموسة ، مش فاكر غير:
الاحساس ، البرد المفاجئ ، الخوف
علشان يفضل يكتب جوابات وهمية
لحد ما فعلا يعرف يحرقها ف يوم وميكلمش غير نفسه ، ويمكن يكتبلها هيا الجوابات

النص رائع فعلا
عشان كده مش هاعتذر عن التطويل :)

ona said...

بجد احساس عالى جدا وده احساس معظم البنات لما بتفقد حبيبى بتحس ان جزء منها راح معاه وتحس انها تايهه

Ghafari said...

اجروا بعيد هههه. حلوة :P

ماشى الطريق said...

حلوة اوى

يا مراكبي said...

وجعتي قلبي