Sunday, June 20, 2010

الدايرة


تعبت..من كل حاجة! تعبت من اني اعدل في المقلوب..وارتب في دنيا متدربكة من حواليا! تعبت من اني باحاول امشي فاردة ضهري وعاملة نفسي مش واخدة بالي..وباتعامل عادي، مع ان كل حاجة بتشدني لتحت واني اغرق! تعبت من النزول والطلوع...مش عايزة لا اروح ولا اجي! مش عايزة..! مش عايزة ابتسم وانا من جوايا مش حساها اصلا! مش عايزة ارد على كلام عادي..وانا اصلا الحياة عندي مورستان رسمي، الحياة عبارة عن قطر اكسبريس مجنون متسربع ومسربعني معاه! مش عايزة سلسلة الكفاح والنضال والمقاومة اليومية ! خالص يعني.. مفيهاش حاجة اني يوم واحد بس اقرر فيه اني مش ح اقاوم حاجة خالص.. وساعتها ح اكون عايزة حد ياخدني من ايدي ويوديني مشاويري البعيدة والقريبة ولو مرة واحدة من غير ما افكر في المكان والزمان والطريق والتاكسي..! يوم من غير ما اقول لنفسي "ح تبقي كويسة".. "ح اتلحقي".. "عادي كملي"! انا عايزة حد تاني يقولها.. حد يطمني اني كويسة..و حد يمسك ايدي او يديني حضن انه عادي انا لا جامدة ولا قوية ولا نيلة..بس اني قوية وجامدة برضه في نفس ذات الوقت! حد يقولي انه فاهم ازاي الدنيا متلعبكة وان ده مش طبيعي..وانه فاهم، بجد فاهم انه مش عادي..بس اهو ادينا بنحاول نخلي الدنيا عادي عشان نعيش!! وان مش انا اللي مجنونة.. كل حاجة تانية حواليا هي المجنونة.. وان كل حد بيتعامل بالطبيعية والهدوء ده من غير ما يعرفوا العبث اللي حاصل، او عارفين وبيستعبطوا..ان هما اللي مجانين ..مش انا! مش انا خالص على فكرة! عايزة حد يوصلني مرة واحدة بس..عشان ما اقعدش في التاكسي دماغي بتروح وتيجي، وتستفرد بيا، وتفكر وتخطط، وتخطط وتفكر، وتقعد تحسب في دنيا ما يتحسبش فيها اي حاجة اساسا! بدل ده ح اقعد مع حد بنضحك على حاجات هايفة وبس، حد برغيه الكتير ح ينتشلني الشوية دول من دماغي! وساعة ما ح اسكت ح يبقى بجد، بجد فاهم اللي جوايا من غير ما اوصفه!ولو اتكلمت بهلوسة.. ح يجمع الخيوط من غير شرح مني! انا مبقتش اشرح ولا اعيد وازيد! مبقاش عندي الطاقة دي خالص! ح نرغي ونضحك وبعدها نطلع نشتري شيكولاتة كتير ونشرب قصب مثلا..ونروح مبسوطين..ووعد من تاني يوم ح ارجع اقاوم من جديد! بجد وعد! ما انا عارفة اني قادرة اعمل كل حاجة لوحدي..باروح وباجي لوحدي، وباخطط وافكر لوحدي، واني كويسة الحمد لله، ولو مش كويسة دلوقتي ح ابقى بكرة او بعد بكرة او بعده حتى ح ابقى كويسة ان شاء الله، وباطمن نفسي لوحدي .. ومفيش مشكلة... بس مفيهاش حاجة مرة واحدة بس.. اني اقع! ا
...

And She fights for her life
As she puts on her coat
And she fights for her life on the train
She looks at the rain
As it pours
And she fights for her life
As she goes in a store
With a thought she has caught
By a thread
She pays for the bread
And She goes...Nobody knows!!

10 comments:

شريف said...

طب ما اغرقي !!
اصحي يوم الصبح, و قرري ان ممكن أوي الحياة تقفلك و تستناكي .. عارف ان كل واحد وراه ألف مليون مشغولية في أم العك اللي احنا عايشين فيها, بس و ايه يعني, فيه 20 مليون بيصحوا يصدعوا الدنيا في القاهرة, لو واحدة بس منهم قررت انها مش قادرة و انها النهاردة حتنكسر, الدنيا مش حتركز قوي ..
مش الصح دايمًا اننا نعند و نقف بطولنا و نقول " هاااع, ولا يهمني " .. لأنه ساعات كتير بيهمنا .. و ساعات كتير الصح بس بيبقى اننا نكسر, و نكلم أي حد بنحبه أو عارفين انهم بيخافوا علينا و نقولهم اننا انكسرنا .. تعالوا انقذونا ..
الصح ساعات اننا ننكسر علشان نعرف نقوم

و صحيح, الدنيا في الأخر حتظبط .. مسيرها يوم من كتر ما بتتشقلب .. تظبط :)

hend anwar said...

تدوينة روعة بالتوفيق

Queen of Shiba said...

Take a break girl..from everything!!! We all need it sometimes..
Just go with the flow even for a day and stop this whirlwind in ur head

Epitaph1987 said...

شريف
عارف لما يبقى
breaking down is a luxury, you cannot afford !!
للاسف هي دي المشكلة
:)
بس صح
لازم نقع لاجل ما نقوم تاني
:)
شكرا ليك..اوي


Sun of Freedom
اشكرك
:)

Queen of Shiba,
I need a massive break indeed.. and find sanity!
I hope I can find serenity...somewhere away from all chaos!
Thank you, indeed :))

شريف said...

فاكس تمامًا ..
انت أكتر حاجة مهمة في حياتك, مهما كان في حاجات تانية مهمة و طارئة, ولا واحدة منهم حتمشي صح طول ما انت مش عارفة تقفي على رجليكي تاني

لول, حتلاقيني بتكلم بحماس شويتين, علشان قررت اني مش حأقوم أمشي تاني الا لما أبقى قادر أمشي, و يتحرق العالم عللي فيه, لو العالم مش ناوي يستناني, يبقى هو الخسران :)

يا مراكبي said...

كتير الواحد بيبقى نفسه يقف شوية من الجري اللي هو فيه ويطبطب على روحه .. لكن للاسف الأيام دي بتبقى نادرة قوي وطول السنة الواحد بيجري ويجري ويقول بكره هستريح ان شاء الله

هو صحيح بكره ده ما بيجيش .. وهو صحيح ايام الأجازات قليلة قوي .. بس برضه خلي عندنا أمل في بكره ده .. اللي ما بيجيش
:-))

youssef said...

باتصور في دماغي ساعات لوحة ضخمة للدنيا كأنها صحراء شاسعة .. شاسعة جدا .. كل واحد ماشي فيها مع نفسه تعبان وعطشان و طهقان و الشمس حارقة نافوخه و الحمل فوق ضهره بيهده .. العرق مغرقه و الهوا السخن بيحرق صدره .. و برده ماشي .. و شايف بعيد واحة بديعة مخضرة .. ما يعرفش ابدا انها سراب لانها دايما قدامه .. كل ما يمشي يشوفها أبعد .. و ما يوصلش ابدا .. يتعذب اكتر و برده يعافر و يكمل .. ساعات يتغلب و يقع و يفهم .. فيصارح نفسه بان مفيش حاجة تستحق كل ده .. لكن غصب عنه شئ جواه بيخليه يقوم يرفع عينيه و يكمل


معجزة و لا مهزلة ان احنا من غير سرابات مش هنعيش..
حتي لو مفيش واحات حقيقية في الدنيا
حتي لو مش هنقدر نبنيها ..
و حتي لو اتقاطعت الطرق و اتقابلنا
مش بنوصل لواحة
بس عشان نشوف
.. نفس السراب

Noha Mahmoud said...

هو أنا بس عجبتنى جداااا الأغنية
ده اللى عاوزه أقوله
سلامات

Noha Mahmoud said...

بقولك...ايه رأيك فى "Day Use" فى حته نطلع كلنا و نتفسح ... انا نفسى جدا...ياللا شجعى الأخوات العزيزات و ياللا "of course this is irrelevant 2 the post, because it's so true I can't add/talk about it anymore"

Epitaph1987 said...

شريف
عندك حق
بأحاول..رغم كل شئ
:))

يا مراكبي
ما أضيق العيش لولا فسحة الأمل
- حسين البرغوثي-
:)

يوسف
كنت باغمض عينيا عشان اشوف صورة سما وصحرا وبس..الهدوء! عشان ما اشوفش زحمة ودوشة! ساعات الصورة دي بقت تتوه مني ومابعرفش اهرب جوا دماغي!
مش عارفة..انهي العبث..من المعجزة
:)

نهى
مسيرنا نتقابل يا عزيزتي
:)