Wednesday, October 8, 2008

بداية



معرفش ليه قررت النهاردة بالذات اني اعمل مدونة جديدة.. غير اللي ضاعت بكل بساطة! يمكن عشان النهاردة كان بيعلن بدايات جديدة لحاجات كتير في حياتي! وبالتالي..استحقيت فرصة تانية للتواصل معايا..بدل معاقبتها بالصمت والزعل!ه


طبعا..تاريخ المدونة التاني الطويل...واللحظات الكتيرة اللي كانت بتقاوم ذاكرتي الضعيفة عشان مش تتنسي..فكنت بسجل تفاصيلها المستخبية اللي محدش كان بيعرفها غيري..مهما حد حاول التفسير..ومهما حاولت انا التعتيم..كنت انا بس اللي عارفة حتي تفاصيل الصورة بتعني ليا ايه..يمكن كان مقدر للحظات دي انها تتنفك من سلسلتها وتضيع شوية..عشان البداية الجديدة بتخبط علي باب الحياة


طبعا انا ما بحبش التغيير..معرفتش اغير العنوان ولا اللون ولا يمكن التفاصيل التانية اللي رابطة المدونة "ابيتاف" القديمة..بدي..يمكن لانهم كلهم في الاخر واحد..بس كلهم ليهم فترتهم الزمنية..اللي لازم تنتهي..عشان تانية تبتدي


عارفين مدونتي لما اتمسحت فكرتني بايه؟ لما باجيب موبايل جديد..واقعد اقرا كل كل الرسايل اللي عندي واللي انا بعتهم..عشان افتكرهم مرة اخيرة قبل ما ادوس علي زرار "مسح جميع الرسايل"! بس في الاخر بيكون عندي موبايل جديد..وبيبقي عليه رسايل جديدة..وبافضل شيلاهم بكل تفاصيلهم دي..لغاية ما يجي وقت ويكون "مسح جميع الرسايل"...يمكن بيفضل اللي بيبعتلي هو هو يمكن يزيدوا يمكن ينقصوا... بس انا بافضل انا برضه


يمكن لما زعلت علي مدونتي القديمة..لان فرصة اني اقرا - او بمعني اصح اعيش لحظة- كل تدوينة تاني..واستدعي لحظات وتواريخ خاصة جدا حتي لو كانت مجرد تدونية باقول فيها "صباح الخير"...زعلت يمكن لاني مش لحقت اقراهم مرة اخيرة وافتكرهم..ولاخر مرة..وده معناه نسيان ابدي بالنسبة لي للحظات دي..لان مفيش مادي ملموس عليها..حتي ولو كان تاريخ وعنوان!ه


ممكن كتير مش ح يلاقوا مدونتي القديمة..فيه افتكر اني مسحتها..يمكن فيه اللي اهتم بيها وافتقد هناك ولو للحظة وفيه اللي عادي معاه كانت مدونة واختفت زي كل حاجة ما بتختفي..وفيه يمكن اللي ميعرفش عنوان المدونة الجديدة..وفيه يمكن اللي مش يحب هنا وحيفتقد تفاصيل هناك..وفيه اللي مش ح يعرفني غير هنا..وميعرفش ان كان ليا في يوم مدونة بقالها اكتر من السنتين, وجوجل مسحها بكل بساطة من غير اي حسبان!..مش عارفة بقي..اللي عارفاه بس ان فيه لحظات جديدة مش عيزاها تتنسي..ومش عايزة كمان انسي الرغي معايا


فمرحباً بمزيد من الهلاوس :)

39 comments:

Anonymous said...

:))
وانا بقة فرحان اني أول حد يعلق فى مدونتك الجديدة

مرحبا بعودتك للصفوف يا ايبتاف
:))

Beautiful Mind said...

يمكن من اكتر الناس اللى هتفتقد المدونه القديمه هيكون انا...تدوينات كتيره بجد جت فى اوقات ولمست اوتار خاصه جدا جوايا...بس لغاية دلوقت لسه مش مستسلم لفكرة انها اتحذفت...لسه شايف انها هترجع باى طريقه(ايبتاف) تراث وتاريخ...انا خايف بس يكونكلامى قاسى عالمدونه الجديده واحنا لسه فى مرحلة تعارف ...يمكن علشان "رغم كل شىء" لازلت لا احب التغيير...وبكره وبلعن التغيير اللى بيتفرض علينا ...
رغم كل شىء مرحبا بالبداية الجديده..مرحبا بساحة الابداع..بداية موفقه...وكان نفسى اجيب معايا بوكيه ورد بينك علشان اكون اول حد دخل هنا بورد وقال مبروك

Ghafari said...

LOL, ya GoG ans sa2alt 3aliky henak l2et wa7ed byrod ye2oly ana el 3afreeeeet besoot te5een keda, howa feeh eh? :P

Welcome again ya Epi. hanem, waiting all your new writings here in that new space..

*Dig your sorrows and write your Epitaph*

3ammo el 3afreeeeeeeet :P:P..

*aaaaah yaaaani*

Nour said...

Wallahi el 3azeem ya Hagar it's as if you are speaking up my own mind! I had the same feeling when "the infamous incident" happened to my pc, and I thought in this very same way, that may be this was to announce a new "white" beginning in my life!
I am even thinking of buying a new mobile so that everything would start together in harmony :))

"New white beginnings" is the keyword my dear :)))

Geddo Iskandar said...

الحمد لله إنك موجودة ... عمر العباقرة ما بيجمعوا تراثهم - لازم الأجيال اللي بعدهم يتعبوا شويه - ولا إيه (حبة قرع)...


:)))

مبروك المدونة الجديدة و ربنا يجعلها عتبة "مباركة" عليكى

----
وبرضه مليش لينك عندك فالمدونة الجديدة - شووف يا أخي الناس :))

----
one last thing - believe it or not ... the word verification for this comment is "hgar gc" :D

Anonymous said...

و أنا في مكاني المحجوز في مدونتك مستني الهلاوس كالعادة يا هاجر

:D

علا من غزة said...

يا مرحب يا مرحب

خليني بالبداية احييكي على شجاعتك .. البداية دايما بتكون مش سهلة وخاصة بعد فقدان شئ عزيز

كان باين اد ايه في بعض التدوينات .. انك بتكتبي علشان تفّكري نفسك بلحظة ما او بذكرى ما
لكن الي عمل الذكريات القديمة ممكن يرجع يعمل زيها واحلى كمان
كفاية ان روح ابيتاف القديمة مازالت موجودة هنا
وبكرة هاتتملي بالحاجات الحلوة على ايديك ان شاء الله

واحنا معاكي على طول الخط

تحياتي .. وتبريكاتي

hOby said...

ana msh hawaseeky ya Epi asl feh sa3at kteer 7agat bete7sal lel wa7ed fag2a mn '3er sabab wel nas ele gowaha 7agat 7elwa homma bas ele bey3addo el sa3at d homma ele bey2adaro 3la bedaya gededa w '3aleban beteb2a bedaya agmal w agmal :))
mabrouk 3al blog el gedeed ya gOg :))
rabena yeg3al 3atabto '7adra insha2 ALLAH :D

Ahmed Shokeir said...

برافو هاجر

تجربتك دي محتاجة بوست مطول عن هاجر ورحلة البحث عن هاجر في عالم تخيلي يتم القضاء فيه على تجربة إنسانية بضغطة زر

مبروك العودة

تــسنيـم said...

حاجة غريبة أنا يوميا يا جوج بفتح لينك مدونتك القديمة وأنا بتنى أني ألاقيها رجعت مش عارفة ليه مش قادرة أتخلص من فكرة انتظار اللي بيروح مع إن اللي بيروح مبيرجعش ودلوقتي حالا بفتح لينك مدونة أحمد مبرمج _ وإعلانه عن رجوعك_ في اللحظة اللي بفتح فيها لينك مدونتك القديمة في نيو ويندو :)

يا ترى دي صدفة


عموما حمد الله على رجعوك انتي كــ جووج للتدوين بالسلامة

ست المرتفعات said...

قد ايه انا فرحانة أنك رجعتى
كنت مفتقدة قوى مدونتك الأيام اللى فاتت
وكنت مش فاهمة هى راحت فين لحد ماجروب ليلى طمنى مؤقتا
ربنا يكرم مبرمج حر على خبر رجوعك الحلو دا
انا حاجزة مكان فى متابعة الهلاوس

كل حبى
علياء بسيونى

Lasto-adri *Blue* said...

انا مبسوطة كتير

Epitaph1987 said...

احمد
منور المدونة الجديدة
زي ما نورت التانية
وشكرا علي كل حاجة بجد :)

Beautiful MiNd,
صدقني انا لسة حاسة بشوية استغربا هنا.مفيش ارشيف طويل زي السابق..بس اهو..البداية الجديدة تمت مباركتها بوجودك وبوجود الناس الجميلة دي..واللي خلتها احلي واحلي كمان
ان شاء الله
الورد جميل جدا علي فكرة :D

Ghafari,
lol howa el 3afreet ely 3aml feena kol dah! :D thanks for remembering the tagline :) this means epitaph is still there somewhere on the horizon! :)

Nour,
Buy a new mobile..salute the sun..and start blogging again my dear! ;) and Horray for a new beginning then..along with many beginnings we're undergoing now! :)

جدو اسكندر
عيب عليك والله
من قبل ما تقول كنت لسة باكمل ليست المدونين..وطبعا طبعا لازم رفيق الكفاح يكون موجود وينور المدونة كدة..وبعدين شفت تعليقك يا باشا
منورها وباركتها بتشريف فخامتك :D
LOL@ Verification Code loool faal 7elw lol

يحيي المصري
طبعا حضرتك...لازما ولابد وجودك في الصفوف الاولانية كمان :)

علا
ان شاء الله :) طول ما هي منورة بيكم وبوجودك..ان شاء الله
:))

hOby,
7abeeeeeeeeeeby! :)) Allah ybark feeki, so happy that you're around here..with my new start,,.. in the new conclave :D hehee! thanks a lot, dearest :)

احمد شقير
:) الباشا الكبير
حضرتك كنت معايا من زمان من ايام البلوجسبيريت..ولما نقلت بلوجسبوت..وكمان دلوقتي
كنت من كام يوم مش عارفة شفت ليست المدونين عند حضرتك بادور علي مدونة ما
ولقيت
Epitaph_87
Epitaph_New
وقلت يا الله حتي "النيو" مش بيفضل نيو اوي..هههه ..وبقت النييو قديمة وممسوحة كمان..ولسة فيه ابيتاف اجدد..مش باقول لحضرتك بداية جديدة
شكرا لحضرتك علي كل شئ بجد :) وتشريفك يا باشا :))

تسنيم
سبحان الله :)
ميرسي ليكي يا تسنيم وعلي تشجيعك
:) والله يسلمك يا فندم

ست المرتفعات
صدقيني..انا كنت حاملة هم ان فيه ناس كتير ح افتقد وجودهم بجد..بس الحمد لله..مبرمج حر قسم دعايا واعلان..جمع الحبايب..:)
اسعدني وجودك يا علياء بشدة :)

لست ادري
:) وانا اكتر بيكي يا قطة
Just like the very old days :)

... said...

Happy for that new start
ur words ll always be my guide to the lovely fantasy dreams my dear little gog
i ll follow u wherever u r
kisses

Diyaa' said...

welcome back :)

Nouran said...

هييييييييييه
انا كنت عارفه انك هتعملي واحده تانيه لو التنية مرجعتش
عودا حميدا يا ابي
و يا رب تكون المدونة د كمان حلوة و اكيد هتبقى حلوة ان شاء الله علشان انت اللي كنتي بتكتبي هناك و اللي هتكتبي هنا كمان
ويلكم باك يا جوجي

Unknown said...

هييييييه

جوجي رجعت

حمدالله علي السلامه ياجميله

الحمدلله انك انتي هنا
وهو ده المهم

http://kasperb4.blogspot.com/ said...

الموضوع ده خلاني اروح اعمل باك اب لمدونتي مع اني لسة عامله من حوالي اسبوع
:))
بس فعلا شعور صعب لما حاجة زي كده تضييع م الواحد ومحبش ابدا انه يتكرر ليكي ولا لأي حد يارب
كنت اتمنى اني اشوف المدونة اللي اتمسحت دي .. من كلامك وكلام أحمد عليها حسيت انها كانت جامدة بجد
يللا ان شاء الله تعوضي كل ده هنا
:)
---------

insomniac said...

mabrouk ya epi :)

خيرالدين said...

ايوه كده
مستنيين الجديد

Ahmed Al-Sabbagh said...

مرحبا بعودتك يا هاجر
كانت فرصة جميلة للتقارب من بعض فى تلك اللحظات السيئة

تحياتى

مُزمُز said...

يعني هيا المدونة القديمة خلاص مفيش امل انها ترجع تاني ابدا وللا ايه؟؟

انا فكرت لقيت اني لو حصللي كده ممكن اموت من الصدمة ف لحظة
دي حياة كاملة يا بنتي
تتخطف كده بكل استفزاز
شئ مرعب

مع ان يمكن انتي معاكي حق ان فيه رسايل بتتمسح ويتحط رسايل تانية تتمسح في يوم

انا نفسي مسحت مدونتي القديمة كهف للنشوة تماما ومندمتش على كده ولما بدأت من جديد كنت اكتر خفة وفاهم اكتر انا عايز ايه

لان احيانا: لابد ما يموت شئ عشان يحيا شئ ، بس ده كان في حالة خاصة وبارادتي وكمان كنت مسيف كل البوستات عندي عشان ارجعلها بعدين ولسه فعلا بارجعلها احيانا واقرا وافتكر وابتسم وافكر كتير


وفعلا بيبقى هاجس مؤرق
يا ترى اللي بيقرا عارف تاريخ المدونة اللي اتمسحت ي واللي كانت عمر ولحظات كتير وللا بيتعامل بشكل مبتور؟
بس لما تيجي تفكري هتلاقي الفكرة دي بالذات بسيطة اوي لان انتي انتي في الحالتين بكل انسانيتك وزخمك وكتابتك وبصمتها الحساسة الجميلة

وعامة خلاصة متزعليش نفسك
وابدئي تاني بكل بساطة

وربنا يعوضك في المدونة دي خير بقى :)

حمدالله عالسلامة
واسف على التطويل :)

عالمى ازرق said...

صعب اقولك متزعليش لان كل كلمه بتكتبيها بتكون جزء منك ومن ذكرياتك زى ماقلتى
بس تعرفى اللى حصل يؤكدك قدرتك على البدايات الجديده ودى بحد ذاتها شيء يخليكى تكملى
انتى اللى كنتى بتكتبي هناك وانتى اللى هتفضلى تكتبي هنا
ومدونتك الجديده هتكون مساحه اخرى رائعه منكِ

Epitaph1987 said...

بثينة
your name is dream..dreamy girl! Always loved your hovering round my blog, blessing it with your vist.,.and still do! :)

Diyaa,
thanks :)

Nouran,
يا ريت يا نوران..ح تنور بيكوا زي ما كنتي انتي ودودي بتيجوا يا بنتي نشرب شاي سوا هناك كدة :))

اسراء
الله يسلمك يا اسو..ايوة كدة نوروا المدونة عشان تدب فيها الحياة كدة :)

الام وامال
لا بجد..لكم في موضوع عظة هههه كل واحد يعمل باك اب بجد..وزي ما قلت وح اقول تاني وتالت
الباك اب الابيض بينفع في اليوم الاسود
:) منورة المدونة الجديدة

insomniac,
heyyyy..really happy that you've found your way up here! :)

احنا
بجد..منورني :)

احمد الصباغ
فعلا..انا سعدت اوي بمعرفة ناس ومساندتهم وتجمعهم..ماكنتش اتخيله..مهما كان حكم بلوجر وجوجل
ميرسي علي كل حاجة :))

مزمز
مش عارفة :)
بس اللي عارفاه اني ورايا رجالة في عالم البلوجسفييير كزهقهم بالهلوسة في اي حتة :))
انت متطولتش ولا حاجة
هي في الاول..بتزعل وتقول قلبي قلبي
وبعدين..لما بتحس ان لسة عايز تستمر بالهلوسة وبتدور عليك كدة جواك..فبتلاقي انك لازم تكمل..بتكمل عشانك اصلا..اه انا لسة بافتقد تدوينات وتعليقات ولحظات بجد مش ح تتعوض وناس معرفش ح يحبوا هنا ولا ح يوصلوا هنا اصلا ولا لا... بس كان فيه حاجة جوايا بتقولي لسة كملي
:)
تحياتي ليك

عالمي الازرق
كلمات برائحة البحر المنعش وامواج الحياة المتجددة...اشكرك عليها..جددتني وياها :)
يا رب تنوري هنا

_____________

شكرا ليكم يا شباب
يا رب تعتبروا ابيتاف دي
زي بيتكم برضه
:DD

prince4ever said...

الحمد لله و مبروك عالمدونه الجديده
و متزعليش عالمدونه اللي راحت و ان شاء الله تعوضيها في دي
تحياتي

Eman Henaish said...

:)

انتي عارفة ان لمدونتك الجديد ميزة ، اني عرفتك

و ان شاء الله مش هتكون آخر زيارة

و يارب مدونتك القديمة ترجع علشان أعرفك أكتر ، أنا عارفة قد ايه صعب أن الواحد يتخلي عن جزء مهم من ماضيه لأن بجد المدونة بيكون محفور فيها ذكريات كتير

بس عموما (عسي أن تكرهوا شيئا فهو خير لكم )

تحياتي ليكي

Anonymous said...

موضوع حذف المدونات وحذف العضويات في يوتيوب الخ له علاقة بجوجل وصاحبها الملياردير اليهودي روبرت مردوخ
من يريد تفاصيل اكثر يذهب الي مدونتي سيناء حيث أنا
من الرابط
http://alanany.wordpress.com/2008/10/10/

Ahmad Hegab said...

تحياتى

أحمد جمال said...

هو الحقيقة إني بقرا لك من زمان , وعاجبني أوي كتاباتك , والحقيقة برضة ان دي أول مرة أكتب لك الكلام دا
السبب غريب شوية .. أكتشفت إني مقلتلكيش ولا مرة إني بحب تدويناتك في المدونة القديمة .. ودا كان شعور غريب اوي ..

مبروك المدونة الجديدة

Anonymous said...

انا سعيد جدا برجوعك ياايبي
وعلى قد مانا متضايق ع المدونة الرائعة بس المهم عندي ان هاجر لسة موجودة وعندها رغبة في الكتابة وحتفضل تسعدنا دايما
اتمنى ترجع المدونة عشان خاطرك

بالمناسبة انا مستنيكي في حفل التوقيع بتاعي يوم الجمعة
اوعي ماتجيش

Anonymous said...

bent ya epi, el awel tab3an mabrook 3al new blog :) but didnt you ever attempt to save your old posts? ya3ny ana ta2reban 3andy kol el posts el 2adeema from my old blog though i dont have access to the blog itself anymore!

*deep sigh*... ehhhh.. donia!

Good luck in your new space Epi ;)

كـــيــــــــارا said...

مش عارفه اقولك ايه احساس وحش اوي ان ايام وزكريات تتمسح كده

المهم اهلا بيكي وبجد سعيده اني عرفتك

تحياتي

Unknown said...

مبروك يا آبي .. و متزعليش صدقيني ساعات بتبقي خير كبير اننا نبدأ من جديد ف وقت مكناش متوقعين اننا ممكن نكون محتاجين ده

تحياتي

ياسمين

يا مراكبي said...

بالعكس

ده أحلى قرار أخدتيه هو إنشاء المدونة الجديدة

إوعي في عمرك كله توقفي الزمن أو تبكي على اللي فات .. مش هيرجع أبدا

We are all with u

فوكيره said...

انا كنت بتابع المدونه القديمه من
وقت للتانى ...

على قد ما ان الواحد يفقد جزء من تفاصيله اللي كان محتفظ بيها
صعب

الا انه عجبنى انتى ازاى عالجتى الموضوع
وبدأتى من جديد

وزي ما قولتى انتى لسه انتى
اللي بتكتبي الدوينات

كمان اللي حصل خلانا كلنا نجري نعمل باك اب

كتير اوى ستفادو من اللي حصل ده ...

تسجيل متابعه جديده

Epitaph1987 said...

prince4ever,
الحمد لله..حد يزعل ومعاه الناس الحلوة دي كلها :)

ايمان,
منورة..وميزة لاني اتعرفت عليكي اكيد..اشكرك :)

سيناء,
هو الموضوع فيه اضطهاد ولا ايه :D

Ahmed_H
صديقي العزيز..ح اعزمك علي فنجان قهوة
:D


احمد جمال
لو ضياع المدونة..ح يخليك (قارئي الصامت) انك تخرج من صمتك ..اذن ده شئ جميل جدا :))
شكرا ليك..ومنورني هنا وهناك برضه :)


مصطفي,
صديقي الشاعر الجميل..مبروك الديوان
انا برضه مفتقدة تعليقاتك هناك اوي
بس يلا بقي..ادينا هنا..:) الحمد لله


evaluna,
thanks dear..and sorry about your blog :( ! anyway..well I did not have a copy of my posts..(some drafts may be) but luckily..some of my friends..who are quite aware of technology lol..had got me a full file of my posts and links to the posts on google reader..so I have it all back..though I kept them untouched since then.. not sure what to do with them now.. you know they belonged to that place over there.. dunno if I have some room for them here.. if you get my point! :) Anyway, we'll see..and glad that you've found me here as well :)


كيارا
وانا سعيدة اكتر بمعرفتك :)

عاقلة علي أرض الجنون
يمكن برضه :))

يا مراكبي
قول للزمان ارجع يا زمان
:)) ان شاء الله..كلنا وراك يا ريس
:D ميرسي لحضرتك

فوكيرة
والله انا سعيدة ان في موقفي لكم يا مدونين عبرة وعظة هههههه ان الناس انتبهت لموضوع ضياع تدويناتها ده في لحظة غدر كدة من جووجل او بلوجر
المهم..ربنا ستر..والحمد لله ع الصحبة الجميلة دي
اشكرك :) ومنورة

Great wishes said...

عارفه يا ابى الموقف دا و تجمع الناس اللى بتحبك حواليكى مفكرنى بايه..

عارفه فيلم You've got email

فاكره لما ميج رايان كانت بتقفل المحل بتاعها و علقت ساين صغير على المحل بتقول لكل العملاء اللى بيحبو المحل ان المحل هيقفل بعد اكتر من 25 سنه و الناس بدأوا يسبلموا عليها و يودعوها
أنا حاسه انى شفت المشهد دا قدامى و كل أصحابك و الناس اللى بتقرأ مدونتك اتجمعت حواليكى من اول الفيس بوك و فى مدوناتهم كل واحد بيحاول يتضامن معاكى لحد ما عملتى مدونه جديده و جميعتيهم تانى فيها:)

حمدا الله على السلامه يا ابى ..بجد نورتى:)

Unknown said...

مبروك عليكى روحك السمحة الراضية الصابرة الرقيقة

ومبروك عليكى مدونتك الجديدة

ومبروك عليكى بدايتك الجديدة وحلمك الجديد وهلاوسك الجديدة

مش عارفة اقولك ايه فى اول بداية ليكى غير انى كنت بحب مدونتك القديمة اوى .. كانت من اوائل المدونات اللى شدتنى من اول ما دخلت التدوين ومن قبل التدوين كمان

قدر الله وما شاء فعل .. قولى اللهم اجرنى فى مصيبتى واخلف لى خيرا منها

يمكن عذائى الوحيد فى فقدتى لمدونتك الاولى هو انك انتى اللى حتكتبى فى مدونتك الجديدة بروح جديدة وحلم جديد

تعلقى عمره ماكان بالمدونة قد ماكان باللى بتكتب فيها

يمكن معرفكيش كويس اوى .. بس حبيتك بصدق من خلال كلماتك

إنى احبك فى الله

سلام عليكم

Epitaph1987 said...

great wishes,
دايما بتيجي بتسانديني
في اوقات باكون محتاجة كلامك
اشكرك جدا..اوي وجامد وكل حاجة :)

انسانة
ياسو..وانا يسعدني معرفتك يا جميلة
وانك ح تكوني هنا بتشاركيني هلاوس جديدة
:)