مش كل الأيام غلسة على فكرة. فيه أيام كده.. هادية. مش لازم تكون كلها عفرتة وتنطيط وأوفر دوز انشكاح. لأ، فيه أيام حلوة من غير أي أفورة. يوم هادي .. مفيهوش كلام كتير، ولا لخبطة. يوم حب رزين، اللي متسألنيش ده شكله ايه! حب ناضج؟ معرفش اسمه برضه، بس اللي هو كله جنان بس جنان حلو. جنان عاقل! وبرضه متقوليش ازاي دي كمان. بص، اللي هو ابقى أنا كده في كرسي بعيد شايفاك قاعد ع الكنبة وأنا ارفع عيني من ع الكتاب وابصلك وابتسم وبس، وأكمل قراية وأنا قلبي كله مزيكا أمورة .. زي صوت الكمانجة وهي فرحانة. لحظة اكتمال . سكون. اللي هو قلبك مُستيكن، متدفي في حضن دائم ومستمر. حالة كده لونها بلون السما لما تكون صافية تماما.. تماما، ومفيش دوشة ولا صوت كلاكسات ولا أي حاجة. مفيش غير إنك تبص للسما وتبتسم وقلبك بيوشوشها ويقول "شكرا"! عارف احساس ان مفيش أي حاجة، بس في نفس الوقت فيه كل حاجة؟ فاهمني، مش كده؟! مش مشكلة، بحبك بلون الضي، وبالضحكة اللي بتطلعنا من وسط الزعل والخناق ونكتشف قد ايه احنا عُبط اننا أصلا نزعل من بعض، وبالنوم اللي من غير كوابيس، وبالصبح اللي من غير وجع، وبصوت الموسيقى اللي بتزورنا من غير ميعاد، وكلمة "حبيبي" اللي بتطلع من جوا أوي عشان تقولك كل حاجة، وبالست وهي بتأكد جدا إنه فعلا "كفاية أصحى على ابتسامتك بتقولي أعيش ..."ه
تمت
