يعني ما شاء الله النزعة الدينية طلعت ونقحت ع الشعب كله بيدعي (مع ان الدين بيبقى كخة في أوقات كتير) وكله يا رب والاستاد بيتهز قرآن..مفيش مانع! بس يا ريت دايما رافعين ايدينا بندعي كلنا في نفس واحد يكفينا الوباء والفساد والحرق والغرق..( هو احنا بايدينا حاجة غير الدعا؟؟) ونجرب في يوم نوحد الدعاء برضه بالثانية والدقيقة في يوم..وندعي لتحرير فلسطين.. بما ان المصريين كلهم بيتوضوا قبل ما يدعوا ودعاهم مستجاب ولله الحمد
بما اثبت مع التجربة اكتشفنا ان الاخوة الجزائريين عندهم ميول لمقاطعة المصريين والبضائع المصريين.. طب نستفيد بقى من الموضوع ده.. بس نوجه الحملة والفيديهوهات ونقاطع المنتجات الامريكية ...اصل لسة محلناش قضايانا الاساسية
بما تحقق من اهمية اليوتيوب وكل يوم اغنية وشتيمة.. يا ريت نستخدم العناصر البناءة الغنائية الانترنتية اللي ظهرت ع الساحة من كلا الطرفين.. لخدمة قضايا الوطن العربي..بدل وصلات الردح على كورة بتجري ع البساط الاخضر
وبما ان المصريين اكتشفوا اذ فجأة انهم كلهم بجد بجد بجد بيحبوا البلد دي..بيحبوا مصر! يا ريت ميشتموش مصر في غير اوقات الماتشات! ويفتكر ان اللي اصاب مصر هو من عمايلنا احنا السودا وسلبيتنا وسماعنا الاغاني الوطنية في وقت الماتشات وكان الله بالسر عليم!ا
بمناسبة الاغاني! الاغاني الوطنية الجميلة دي.. اللي بتضرب في النافوخ اول ما تسمعها.. دي كانت معمولة مش عشان انجازات مصر الكروية!! لا والله كانت معمولة عشان تفتكر مصريتك كل يوم وكل ثانية وان مصر دي بجد متبهدلة معانا..ومحتاجة الهمة في كل وقت وكل لحظة ومش في التسعين دقيقة بتوع الماتش بس ومش في تحليل المباراة! دي اغاني عشان تفكرك تحلل لقمتك اللي بتاكلها من البلد دي.. حتى لو بتأكلك عيش حاف ان لقيته!ه
من فضلك العلم المصري اللي اشتريته وقت الماتش مترميهوش! جرب تفتكره من وقت للتاني قد ايه هو مش رمز عادي لماتش مدته تسعين دقيقة.. فيه عمر كامل بيعدي ليك ولولادك... لازم تعمل حاجة غير انك تركن العلم على جنب، وماتقولش ح اعمل ايه...وانا بايدي ايه! الله!ما طلعنا اهو بنعرف ندعي ونحقق اللي نفسنا فيه! ولا الدعا وقت الماتشات حلو.. وغير وقت الماتشات غير مستجاب مثلا! ماهو مادام الانتخة واخدة حقها ومفيش غير الدعا وعرق الدين يطلع.. اهو ندعي ..اي حاجة شغالة برضه!ا
يا ريت احمد مكي بأغنيته "فوقوا" عن مصر والجزائر.. يا ريت نعمل اغنية اسمها "فوقوا" لمرحلة ما بعد الكورة! المونديال واهو طار!! ممكن نتجمع عشان حاجات عايشينها من قبل الماتش ولسة مستمرة معانا لأمد غير مسمى بقى؟!!!!ا
الاعلانات طلعت امورة اهيه وبتنفع برضه! تخيل كدة ان كوكاكولا بتقول ان في سنة 1973 قدرنا نهزم اسرائيل! نفس العدو.. نفس الخصم...!ونجيب لك كام واحد من اللي شهدوا عصر الحرب ويحكيلك ويخلي جسمك يقشعر! كوكاكولا بتشجع مصر! واحنا معاها! وننزل بتتر يااااا رب ياااا رب اللي قعدنا نسمعه ده كل دقيقة على نجوم اف ام! معلهش الدعاء اضعف الايمان ..ما اصلنا مش ح نشيل سلاح يعني ونطلع ع الجبهة نهاجم! مش بتقولوا ان الدعا بيجيب فايدة بس نتوحد ونتضوى الاول قبل ما ندعي
ملحوظة: انا اتفجرت ع الماتشين وانبسطت اننا كسبنا وزعلت اننا خسرنا! وسمعت اغاني وطنية.. بس برضه ده ماتش! وفيه حياة بعد التسعين دقيقة دول!!مصر هي لسة مصر بالمونديال ومن غيره!!!ا
مصرمستنية المصرين!! واحنا يا ترى معاها؟؟؟؟؟؟؟؟
5 comments:
اكيد مصر محتاجانا
بس لما نفوق ونعرف نحبها بجد ونوصل حبنا دا ليها ونغيرها للأحسن
خالص تحياتى وإحترامى
شاب فقرى
بصي أنا من ساعت الماتش الأولاني عمالة أتفرج ع المهزلة اللي بتحصل و بسأل سؤال واحد " أليس منكم رجل رشيـد" دلوقتي بس لقيت حد رشيد
روحي يا بنتي لا فض فوكِ
so true epi , but u know why bcoz we became so negative and i'm talking about myself too , nat7ams bas lama tekoun 7ga sahla mesh me7taga mena maghoud we law da3et menena tany yom hanes7a nerou7 sho3'lna 3ady we belil netgam3 fe ay a3da we neloum el la3eeba we el modareb we 7'lst 3la keda ,,, e7na mesh 7'sraneen ay 7ga we mesh handa7y be 7ga ,,, el etegah el 3am enena neb2a sha3b negative we f3lan ba2na ... sorry for that long comment
سؤال مهم جدا
حدث ما حدث ورأينا ما رأينا من توحد غريب وحب للبلد غير مسبوق وأمور أخرى جعلتنا فجأة كالملائكة .. والسؤال: ماذا بعد ذلك؟
هل سيتم إستثمار كل ذلك في الإتجاه الصحيح؟ في إتجاه التكاتف لحل مشكلاتنا الحقيقية؟ أم ستحدث إنتكاسة؟
أعتقد .. حدثت الإنتكاسة بالفعل
الله عليكى ياجوجو مش هضيف حاجة لانى زهقت م الكلام بس موافقة كل كلمة قولتيها
Post a Comment