وعدت سنة علي ليلي, و السنة دي...ليلي جاية و معاها سين سؤال..فأهلا بالصراحة
.
.
هل انتِ سعيدة كفتاة وبدورك فى الحياة؟
ايوة الحمد لله, و سعيدة بأن اخواتي بنات, فالبنات مش بس "الطف الكائنات" بس مش يقل دورهم في الحياة عن الرجل,فهي علاقة بتكمل بعضها البعض, مش الند بالند ولا هي الاقوي و الاضعف
.
.
ما الذى لا يعجبك فى المجتمع اتجاه نظرته لليلى ؟؟
انها مجرد "الطف الكائنات" و انكد السيدات, والمفهوم الخاطئ انهن "ناقصات عقل ودين"
.
.
-ما رايك فى دور الاعلام فى ترسيخ صورة نمطية عن المرأة؟ ومعالجات قضايا المرأة؟ وتأثيره؟
انهي اعلام ده؟ الاعلام اللي بيطلع البنت موديل رخيص في اعلانات, او فيلم كل اللي شاغلها انها تحب و انها اتصدمت و انها انضحك عليها, الاعلام اللي مهتم بلون البشرة من غير بقع و لا بثور, وانهي قضايا مرأة اللي اتعالجت., لا عمره اتكلم علي مشكلة عنوسة ولا التحرش, ده كفاية ان نادرا ما بتلاقي ادوار نسائية حتي كويسة في الافلام الموجهة الي الجماهير العريضة, بتطلع مجرد وجه حلو في ظل بطل العمل, لا قالت جملة مفيدة ولا عرضت مشكلة ولا اي حاجة
.
.
-ما رايك فى يوم ليلى ؟؟
فرصه لاسقاط الضوء علي "ليلي" اللي الظل طفاها
.
.
- أول خطوة.. اقتراح للتغيير مشاكل معينة ؟؟
البداية تكون من البيت في اسلوب التربية,فمفيش داعي لتكرار الاكلشيهات بتاعة انتي بنت و مش ينفع و معرفش ايه...يكون التبرير المقدم منطقي مش شماعة انتي بنت و السلام! نفسيا و في العقل الباطن بتتكون الفكرة عند البنت انها حاجة عيب..عشان كل ما تطلب تخرج و لا تسافر رحلة و لا تسوق انها بنت!! لانها اسهل ما يقال من قبل الاهل! لو اب او ام ح يتناقشوا في حاجة يكون اسباب الرفض او النقاش مش فيها شماعة انتي بنت عشان يخلصوا و السلام!
.
.
هل تحبين نفسك أم تتظاهرين بالقوة؟
الحمد لله بحبها..وعشان احافظ عليها...باتظاهر بالقوة
.
.
هل تعرفين دورك في الحياة أم تتسابقين وتلعبين أدوارا مرسومة وفقط؟
لا الحمد لله..عندي اهدافي اللي هي بتشكل دوري في الحياة, فالانسان مالوش لازمة في الحياة من غير ما يكون عارف ايه دوره, مش بيحركوه زي قطع الشطرنج
.
.
هل مستعدة أن تدافعي عن وجهة نظرك عموما أم تجبنين عند المواجهة؟ وهل ترين جبنك سمة شخصية أم يغذيها من حولك؟
لا باحاول اني ادافع عنها,وحتي لو مش ربحت الجولة دي...كفاية اني حاولت
.
.
ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟
موضوع التحرشات, وده زايد اوي..والتحرش مش بس بحركة او ملامسة جسدية, كفاية الكلام البذئ او انك تكوني واقفة الساعة تمانية الصبح في امانة الله في الشارع و تلاقي اب بيوصل ولاده المدرسة ولا يتورع انه يسمعك كلام وهو معدي..او اشارات .اوانك ترجعي من كورس الساعة تمانية, وواقفة علي محطة زحمة فيها ناس,وتلاقي عربية بتقف لك..كفاية انك انثي عشان يتحرش بيكي مش مهم بقي محجبة ولا محتشمة, قالعة ولا لابسة, انتي في الاخر انثي هشة و فريسة في نظره
مصدرها, انه فاكر البنت كائن لطيف ضعيف, ح تخاف من الفضيحة وانه متخيل ان تفكيره اسرع عقبال ما يسمعك كلمتين ح تكوني انتي من الخضة ماحططتيش منطق ف حيسيبك مصدومة و يجري! مصدرها الاعلام والاغاني و الفيديو كليب, مصدرها, قلة الوازع الديني و الانعدام الاخلاقي المترتب عليه
*
موضوع الجواز والعنوسة, الموضوع في تزايد خطر, وبقت كلمة "عانس" دي اسهل ما يقال علي بنت في اواخر العشرينات,كأنها مصيبة في البيت
مصدرها. انها بنت. يعني فرصتها في الجواز تقل كل ما تعدي الواحد و عشرين وتتخرج من الجامعة
حلها, انها انسان.ووالرضاء بقضاء الله و التخفيف من الضغوط عليها, وانه مش دور مرسوم ليها انها تتجوز و السلام او ان ده يكون اولويتها فتوقف حياتها عشان تفتح الصالون و مستنيه العدل, ان البنات كمان تهتم بهوايات وانشطة ثقافية و اجتماعية و تنشغل بالحياة, مش ان الحياة تساوي بيت العدل
شخصيا , كفاية اوي الجملة دي اللي سمعتها اكتر من مرة "يا بنتي لما تكملي دراسات عليا فرصك في الجواز تقل, حتلاقي فين حد يوافق ان مراته درجتها العلمية اعلي منه, معني كدة انك لازم تتجوزي حد برضه بيدرس, ودول قليلين وبرضه مش بيتجوز غير واحدة اصغر منه و اقل في الدماغ منه"- اي والله ده سمعته
.
.
هل ترى المرأة أقل من الرجل في أي مستوى من المستويات؟ و إن كان فعلا، فما هي هذه المستويات؟
لا مش اقل, مش معني ان الرجال قوامون علي النساء, وانه هو اللي بيشتغل والمجهود البدني والعملي والذهني كبير عليه, انه بيتفوق علي المراة ! فاحتياجتها النفسية و الذهنية و برضه البدنية (في الشغل او الاعمال المنزلية) بتخليهم متساويين.بمعني مش عشان الراجل بيشتغل وهي في البيت, انه هي اقل منه, عشان بس همهما بينحصر في العيال و ابوهم و مصروف الشهر و المطبخ!! و مش معني ان المرأة بتكون في حاجة نفسيه ان الرجل يحتويها و يشعرها بالامان , انها كدة اضعف منه,لانها بالمثل بتوفر له السعادة و الاستقرار اللي بيخليه يقدر يقوم بواجباته ناحية اسرته و مجتمعه! فيه مقولة قالها ممثل اجنبي بعد زواج ناجح سمعتها مرة : اذا كانت الملكة (الزوجة) سعيدة, فسيسعد الشعب باكمله (اي الاسرة)ه
.
.
بعد مرور سنة من يوم ليلى الأول ماذا تغير في وضع ليلى؟
أولا ماذا تغير حولها في الشارع، كالظروف و المشاكل في مصر بالنسبة للبنات والسيدات صارت أحسن أم أسوأ؟
ثانيا هل تغير شيء شخصيا بالنسبة لك أو بداخلك؟ هل أصبحت شخصية أكثر انفتاحا أم انغلاقا؟ ثقة أم عدم ثقة؟ ولماذا؟
.
.
الظروف في الشارع من انيل الي اسوأ, وانا مش شايفة اي تغيير,وان كان فيه ناس بتحاول انها تكون واعية للي بيحصل وتراعي تعاملها مع الاخرين
.
.
بالنسبة ليا, ع الاقل عرفت اننا "كلنا في الهم
ليلي"ه
.
.
اتعرف علي ليلي هنا
.
.
تحديث: امرره تاج الي كلمات و ريموو و حنين و لمياء محمود
و سمراء النيل والي كل من لديه الرغبة في المشاركة
