Wednesday, January 2, 2013

وَنَس..

الكوفيات بتدفي، بتدفي الروح أوي. وعشان كده دايما بنعمل الكوفيات ملونة جدا عشان دي أقرب حاجة بتطبطب علينا واحنا متكلفتين بيها. وهي الحاجة اللي يمكن بتزق شوية في عتمة الروح وتنادي ع الضيّ. ودي اللي بتخلينا نقاوم.. وهي حوالين رقبتنا كده، كأنها حضن في الأيام اللي ملهاش تلاتين لازمة والوحدة بتبقى فيها متبتة. دي الحاجة اللي وسط الخوف بنتعلق بيها وبنفتكر ان حد عملنا الكوفية دي وايده لسة فيها، صوابعه طبطبت ع  الخيط، ودلوقتي الخيط بيتصاحب علينا، فمنزعلش..ومنخفش، ولو شوية صغيرين. الكوفيات أصلا ونس.. عشان كده بنعمل كوفيات كتير ونديها للي بنحبهم، عشان ريحتنا احنا كمان تبقى فيها فيطمنوا. وبنشتري صوف ملون، ملون أوي عشان الألوان بتنفع في أيام البرد الباهتة. الألوان بتنفع، والكوفيات بتخاف علينا وبتتشعلق في رقبتنا ومبتسبناش لو الكون كله سابنا. صدقني، الكوفيات بتنفع.ه

9 comments:

شيماء علي said...

الله..
نفسي أوي أتعلم أعمل كوفية :)
هاعمل واحدة لبابا ولأخويا
وهابقى اعمل لجوزي بقى لما يبقى ليا جوز
:)
تعرفي تعلميني؟؟
:)

Epitaph1987 said...

أهلا يا شيماء :)
يا ريت تعملي بجد
ح تنبسطي وتدفي
وهما كمان :)
وياريت ينفع أعلمك
بس كبداية
جربي ده

ادي غرزة البداية
http://www.youtube.com/watch?v=M2U0lkzP7gg

ده أول سطر اللي بيحدد عدد الغرز وعرض الكوفية
http://www.youtube.com/watch?v=dAeSIlEQaZU

وده ازاي بتكملي بأسهل غرزة
http://www.youtube.com/watch?v=Xu3aKWALV5A
اقعدي كملي كملي لغاية ما تطول معاكي جدا
أو لحد ما تزهقي

:)

شيماء علي said...

اتفقنا :)
هاشتري واجرب ان شاء الله

شاب فقرى said...

بقالي تقريبا من تاريخ انشاء المدونة معلقتش

فاكر البوست اللى قريته من سنتين تقريبا ومعلق فى ذاكرتي

كيفية صنع كوفية

وفاكر جملة : إحذري من الثقوب فيكفي ما فى القلب من ثقوب :(

ولذلك جيت اعلق تاني

لاني مقدرتش اعلق اول مرة لما كنت منبهر
:)

الكوفيات بتخنقنا لما اللى عملها بيفارقنا او بيخوننا او بيمشي

بس كدهون

شاب فقري

Epitaph1987 said...

شيماء
ربنا معاكي..وابقي قوليلي عملتي ايه




شاب فقري
فاكرة كويس..مجيتك يومها وتعليقك على فكرة :)
الكوفيات بتطبطب

شاب فقرى said...

بدور عالبوست من ساعة ما كتبت الكومنت فى مدونتك ومش لاقيه علي فكرة

لكن مجرد ذكري البوست حلوة

كل سنة وانتى طيبة وكل شتا وانتى بخير وفى كوفيات وصوف والوان

:)

تحياتي

شاب فقري

Epitaph1987 said...

http://epitaph1987.blogspot.com/2009/10/blog-post_337.html

وانت طيب وبالصحة والسلامة :)

هوندا said...

حلوة قوى قوى ياجوجو :)

يا مراكبي said...

الشتاء دايماً حزين مهما كانت ألوان الكوفيَّيات مُبهجة

مش لون الكوفيَّة هو اللي هيغيَّر من البرد

دفا الحُب والحنان هو اللي بيفرق مهما كانت الدُنيا برد