Wednesday, March 10, 2010

توهة


كل اللي محتاجاه بجد..ان حد ينتشلني من كل ده ويوديني مكان هادي اعرف اتنفس فيه! انا حتى النفس مش عارفة اخده بجد! مكان بعيد عن كل تفكير وقلة نوم والشغل وزحمة الشارع والمواصلات و المذاكرة والكتب والتسجيل والمواعيد اللي عمالة تجرى ورايا، مكان بعيد عن كل اختبارات الصبر والقوة والتماسك اللي كل يوم بقيت قسم عليا! مكان فيه اعرف انام ..اعرف افكر ..اعرف اشوف الحاجات فيها بألوانها الطبيعية.. مكان ارجع لي فيه! ارجع ليا.. اعرف افرح واعرف افكر واعرف اخد قراراتي..واعرف اشوف من تاني! مكان يوريني النور والضي في اخر الطريق، لأن العتمة بتاكل في روحي دلوقتي! مكان محدش ح يقولي فيه اني شكلي مجهد واني مالي اليومين دول !! مكان ح اعيد فيه ترتيب كل الاوراق...ح ارجع اتعلم ازاي اعرف انام اول ما حط دماغي ع المخدة! مكان ح اشد فيه الفيشة واشوف لون الهدوء ايه! عايزة اشوف السما.... البراح! عايزة اشحن طاقتي من تاني عشان اقدر ارجع اقوى... واستنى! مكان ابقى ليا فيه..مكان محدش فيه بيعتمد على قوتي وتفكيري ووجودي لاني مش لقياها ولا لقياني دلوقتي!عايزة اعرف اركز تاني..مش التوهان اللي بقيت فيه! عايزة اطلع برة العتمة! عايزة اضحك! عايزاني!أنا بجد مش بأهرب.. بس تعبت... انا بجد نسيتني قبل كدة كنت ازاي.. قبل نوبة العياط المفاجئ، والأرق، والاجهاد، والاكتئاب، والخوف، والسكوت، والضلمة ..قبل الدوامات اللي عمالة تدخل في بعضها دي! ا

أنا بجد كنت بأفرح ازاي ؟؟

4 comments:

® الأغانى للرأفتــــانى said...

عَنْ عَبْدِ اللَّهِ بن مسعودٍ رَضِيَ الله عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: "
مَا أَصَابَ أَحَدًا قَطُّ هَمٌّ وَلَا حَزَنٌ فَقَالَ اللَّهُمَّ إِنِّي عَبْدُكَ وَابْنُ عَبْدِكَ وَابْنُ أَمَتِكَ نَاصِيَتِي بِيَدِكَ مَاضٍ فِيَّ حُكْمُكَ عَدْلٌ فِيَّ قَضَاؤُكَ أَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ عَلَّمْتَهُ أَحَدًا مِنْ خَلْقِكَ أَوْ أَنْزَلْتَهُ فِي كِتَابِكَ أَوْ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ رَبِيعَ قَلْبِي وَنُورَ صَدْرِي وَجِلَاءَ حُزْنِي وَذَهَابَ هَمِّي إِلَّا أَذْهَبَ اللَّهُ هَمَّهُ وَحُزْنَهُ وَأَبْدَلَهُمَكَانَهُ فَرَجًا



ان شاء الله ربنا هيعدلها وان بعد العسر يسر
ربنا يسعد ايامك

حنين said...

طيب.. أحب أ قول لك: زيي، أو نفس كلامي..
...

ربنا يفرجها علينا :)

يا مراكبي said...

ابتسمت أول ما قريت البوست .. مش فرحان فيكي ولا لأن الموضوع يضحك ولا حاجة .. بس عشان فعلا الحياة كده بجد من بعد التخرج

بتتمني هنا حاجات عمرها ما هترجع لأنك خلاص دخلتي دوامة فيها كل حاجة بتجري وراكي ومش سايباكي تقعدي مع نفسك شوية .. لنل كده وكلنا كده

نفسي أقعد معايا شوية ومش قادر

الحل هو بعض تنظيم الوقت عشان على الأقل - وده أضعف الإيمان - تلاقي آخر اليوم بالليل ساعتين أو تلاتة تقدري تقعدي فيهم مع نفسك للقراءة او الهوايات .. هما مش هيبقوا كفاية طبعا لكن ده أضعف الإيمان زي ما قلتلك

أنا بقالي 17 سنة كده
:-(

Epitaph1987 said...

رأفت
آمين
:))
فرجه قريب
شكرا بجد ليك

حنين
يا رب يا روزا
:)

يا مراكبي
ربنا يديك الصحة
انا عارفة ان الدنيا بتتلعبك بعد التخرج
بس انا بقالي 3 سنين متخرجة
الفترة دي...من اكتر الفترات حيرة وتوتر وحاجات كتير في بعضها
انا مش معترضة ع الشغل
بس مجهدة
ومحتاجة الدنيا تترتب عشان اعرف استمر
واعرف اخد قرارتي بس صح شوية
ربنا يعين حضرتك
ويعينا جميعا
:)