Saturday, February 20, 2010

الحضور..والغياب


افهم بقى! انا باكره كل حاجة بريحة الفراق! كل حاجة..حتى الاغاني..حتى لو كلمة عبيطة معدية في وسط الكلام بتلمح اننا ممكن نفترق! بأكره اني بأنام كل يوم ووشي مش لازق في وشك بيتدفا بملامحك! بأكره اني لما باصحى ...الاقي مكانك في السرير بردان! افهم اني لما بأمسك التليفون وأنا عينيا لسة مغمضين عشان اكتبلك واسمع منك انت أول حاجة الصبح..كأنك هنا معاياأول حاجة الصبح! ولما بتروح عليا نومة وانا حاضنة موبايلي كاتبة رسالة ماتبعتتش .. عشان افضل حاسة اني باكلمك طول الليل لحد ما أنام! عايزة اتدفا بروحك!! مش عايزاك طيف في حلم ح يخليني مبسوطة يوم او ساعة او دقيقة لما افتكر انك جيتني في حلم.. عايزاك هنا..ويايا.. دايما!ومش عايزاك كلمتين في مكالمة ولا ورقة في كشكول قديم مخبياه تحت المخدة.. مسيرهم يضيعوا ويتنسوا! عايزاك حياة، وخصام، وحب، ودفا، وشوية شاي بالنعناع في العصرية، وسعادة واحنا قاعدين ع الارض في البلكونة بنسمع الست، وخناق على ريموت التلفزيون، وضحك، ودمعتين، وحضن! عايزة اعرف أنام وأنا حاضناك بالقوي، كأنك حلم مش راح يتسرسب من بين صوابعي ابدا.. ابدا! عايزة احضنك جامد كأن قلبي دخل جوا بيته في صدرك ومش راح يسيبك!افهم انا قد ايه ...بجد.. محتاجاك!ا

__________

تمت
الصورة "مكعبات السكر، قبل ان تذيبنا دموعنا" لسوزان عليوان

14 comments:

تــسنيـم said...

وجعتني أوي أوي أوي

عشان شوفتني فيها

Howie said...

it made me cry :s

يا مراكبي said...

مش مهم زمن الحب من بعيد لبعيد يطول أو يقصر

المهم انه في النهاية يتحول لحقيقة وعشرة

حلاوة الحب دايما بتكون في انتظار الخطوة العملية اللي بعدها .. والا يكون حب مؤلم جدا

shymaa said...

لعل هذا هو اول خطوي بمدونتك الجميلة
فاسمحى لى ان ابدى اعجابى بكلماتك وبجد الفراق دة كلمة لا تعبر نهائى عن الم الاحساس بها فى القلب
تحياتى

Epitaph1987 said...

تسنيم
سلامتك من الوجع!

Howii,
*hug*

يا مراكبي
صح :)

شيماء
اهلا بيكي :) وربنا يكفينا وجع الفراق

بتنفس حريه said...

قرأه تدويناتك تدفعنى فى كثير الاحيان الى رسم مجرد ابتسامه خفيفه على شفتى وفى عينى ...
ربنا يقرب البعيد :)

Anonymous said...

انتي مش عارفة الحدوتة دي أثرت فيا ازاي
انا مش حاجي هنا تاني
الا بعد ما الم اللي انتي بعترتيه دة

Ganna Adel said...

يا خراااااااااااااااابى

جبتى المفيد بجد

ارفعلك القبعه

Eman said...

أح ـتآجك ح ـتى
تقآطر الاح ـتيآج
من كل أج ـزآئي

باللهِ لآ تغ ـيب (:

عزيزتي
أنتي رآئع ـة <3

Epitaph1987 said...

بتنفس حرية
آمين
:)
شكرا انك خلتيني انا كمان ابتسم
:)

مصطفى
:(
أنا آسفة

Girl in the Mirror,
:)))


وحبي لك لن يموت
لا تغيب
:)

Sherif said...

ايه الجمال دة !
ايه الجمال دة !
ايه الجمال دة !


allah 3leky ya ....ya Hagar !

يمامة شاردة said...

أبدعتي
.
.
.
بس دمعتيني

dandana said...

يالهوى

Epitaph1987 said...

شريف
:)))

يمامة شاردة
لا لا لا
دموع لا!
:|

دندنة
آه والله!