Thursday, December 17, 2009

ملعون ابو البرد


البرد اللي بينشع جوايا ده..لا بينفع معاه سلطانية شوربة عدس سخنة، ولا انك تتكلفت ببطانيتين ولحاف.ه

البرد اللي جوايا..ما بقاش ينفع فيه اني اقوم واقف اقطع الطماطم والفلفل الاخضر والاحمر واسلق المكرونة واصفي التونة وارش الزعتر والنعناع واعمل الصلصة وازود فيها الشطة..بعد ساعة من تحضير نص الليل...وانا مالياش نفس اكل اصلا..لكن باقوم اطبخ برضه

ولا نافع فيه ان بصوابعي البردانين امسك ابرتين تريكو معدن متلجين عشان نحكي! ح نحكي ايه والبرد جوانا كدة..!ا

ده البرد اللي بيخلي الروح بترتعش!(اي والله بترتعش) فحتى لو لبست شرابين فوق بعض وكوفية حوالين رقبتي ولبست طاقية على دماغي..مش ح اتدفى! ح ابرد زيادة!!ه

البرد اللي من جوا بيسمعك تكتكة القلب! اللي يخليك تدور على شوية لبن في التلاجة تغليهم وتحط عليهم الكاكاو..وتغليهم تاني زيادة "توكيد" الدفا! وتحضن ماج شيكولاتة باللبن عملاق... عشان الدفا يدخل ما بين صوابعك..لجوا الجوا...فيوّصل حضن "مشكلط" للقلب!ا

البرد اللي بينكد عليك عشان تفضل بردان من جواك! يا تلاقي اللبن خلص يا الكاكاو خلص.. ويسيب الماج وحداني ع الرف، فاضي من جواه..مفيش صوابع متلحوسة شيكولاتة حضناه !ا

البرد الملعون..اللي من جوا اوي اوي ده،اللي محتاج حضن كبير، تدفس جواه، وتخبي دمعتين مالهمش لازمة..وعايز حد يلعب في شعرك المنعكش، ويوشوشك لاجل ما روحك تدفى ..ان الشمس طالعة تاني، وألوان الدنيا الدافية ح تحِن عليك وتلون قلبك بالأحمر والبرتقاني وتبعدك عن علبة الألوان بدرجاتها الباردة الازرق والموف اللي كانوا مجمدينك دول!ه

يمكن!ا

_____________

الصورة لسوزان عليوان بعنوان هج الحمام!ا

9 comments:

تــسنيـم said...

أنا بحب البرد عشان الدفا.. الأغطية التقلية,, الكاكاو, البطاطا المشوية, الشرباات و الاكاليييك


لكن البرد اللي مايسيبش غير زرقان الضوافر و تكتكة السنـان و رعشة الروح

ملعووون أبوه ألف مرة

:\

شاب فقرى said...

لسعه البرد لها متعه

لا تضاهيها متعه فى الحياة كلها

والبرد ليه حل

سواء البرد الداخلى او الخارجى :)

ان شاء الله فترة وتمر

دمتى بخير

شاب فقرى

Spanish Eyes said...

First, WB! I have missed u wallah (F) ..
tany 7aga b2a 3andk 7a2 f kol kelmaaaaa .. bard elly by5alena n7s enna s23aneen 3'er el bard elly bn7so mn gwa da! malosh ay 7al 3'er 7odn dafy w ta3n el 7odn da mes hmawgod w ella makonash hanb2a keda :D
bas sebk, ur post r3'm eno s23an 7abteen 7assny b shwayt dafa (F)
Thanks ya agml gog =)

بسمة said...

البرد اللي جاي من جوة ده بخاف منه قوي

:(

مصطفى السيد سمير said...

البرد اللي بيتكلم مع روحنا بزعيق ويهزأها جامد قوي
البرد اللي بيخبي من قدامنا الكوفيات والورد الأبيض والكاكاو عشان نفضل نفتكر الناس اللي سابونا وخلونا محتاجين كل دة عشان نطلع حتت التلج اللي جوانا


مدهشة قوي يا ايبي

mohra said...

اظن البرد اللى بتتكلمى عليه ممكن يجيى فى عز الحر

خيرالدين said...

ده أنا فاتنى تدوينتين أجمل من بعض
عاجبنى قوى استمرارك فى الكتابه هنا يا هاجر ناس كتير سابت مدوناتها واكتفت بالفايس بوك
جميله جدا تدوينة الماتش وللاسف ناس قليلة قوى اللى فكرت بالمنطق ده واللى نجح فيه المعلنين وأنصاف المذيعين بانهم يحولوا الشعب المصرى الى دمى يحركوها فى اى اتجاه

Ola said...

Wallahi fakarteni bel bard!! There is no winter this year! Even in Alex:)
Miss you

Epitaph1987 said...

تسنيم
البرد مقدور عليه
برد الروح...لا!

شاب فقري
البرد اللي من جوا ده..حله ايه لما يصيب الواحد بلطشة برد مفاجأة؟

Spanish Eyes,
Missed your presence too :)
el 7odn! howa dah!
:)
Thanks to you, Howii ;)

بسمة
ومين مبيخفش
لا الكوفيات بتنفع
ولا الكاكاو بينفع
ملعون ده برد

مصطفى
المدهش بجد هو تعليقك وقد ايه وصلت لجوا الجوا
ربنا يدفي قلبك :)


مهرة
طبعاً! وقاسي اوي


خيرالدين
:)
ما انت عارف انا فاصلة الى حد ما الفيس بوك عن هنا! هنا برضه لسة ليه طعمه..حتى لو باغيب
لسة باحب اجي هنا
ولسة باحب اشوف تعليقاتك هنا
:)


علا
واحشني برد اسكندرية! اهو ده بيدفي
:)))
Miss you too :)