هي لطشة صراحة و تسييح واحدة بقي .. بعد توزيع شهادات الاستثمار ام ربع جنيه ع الناس اللي عرفت اسمي في التاج السابق... ادي اخر تاج في ذمتي..حاليا بالاسواق
...
حلم و علا ..توجوني بالتاج الجميل ده..المهم.. انا كتبت اول خمس حاجات خطرت علي بالي..و اليكم البيان التالي
..
اذكرى خمس أشياء لا يعرفها عنك أحد
...
اولا: لو انا كنت اخر حد صاحي,, باروح اتأكد ان اللي نايمين دول لسة بيتنفسوا و عايشين.. ايوة.. اطمن انهم نايميين فعلا, وده بيكشف عن الجانب السوداوي القلوق اللي في شخصيتي, غير اني كل يوم لا اراديا باشوف وفاتي, مرض, مستشفي, حادثة, اثناء النوم...غير بقي ان لو قريت في الجرنال و لا مجلة و لا حتي برنامج عن احد الامراض..اقعد اطبق اعراضه عليا., ليلة تكون عن امراض القلب,مرة تانية الرئة, حتي عند ذيوع السارس كنت خايفة جدا منه, ده جزء من وسوستي.. نوع من التدريب الذهني اللارادي... انا باتخيل اني ح اموت صغيرة, فاحلامي المستقبلية لا تتعدي السنوات القليلة جدا..عشان كدة انا فعلا محتفظة بوصيتي, نوتة صغيرة علي طول في شنطتي او تحت المخدة لما بانام فيها كل حاجاتي تتقسم ازاي و ارقام اصحابي و الباسوورد, و صندوق التذكارات يتقسم علي مين من اصحابي و اخواتي
...
ثانيا:من ذكريات الطفولة : في خروجة عائلية جدا مع عيلتنا و خالي و مراته و عليتها في بداية حياتهم و اثناء فترة الخطوبة, كان عازمهم في مكان ما ع النيل, و بما اني الطفلة الوحيدة ساعتها, و اللي معروفة بهدوئها , يعني حطها في اي حتة ح تقعد ساكتة, رحت عند السور, و منه ع النيل, و قعدت افكر ايه يا تري اللي ح يحصل للشوز (و لا مؤاخدة الجزمة) بتاعتي لو وقعت في المياه؟؟؟!! و ببرائة الاطفال في عينيها قمت قلعتها شوية و مرجحتها, لحد ما هوووب وقع المحذور ووقعت في النيل, و انا سرينة عياط اتفتحت... القرش ح ياكل الشووووووز.!ّ مفيش قرش في النيل!! لا القرش ح ياكل الشوووز انا عايزاها!! المهم هما افتكروها طبعا وقعت غصبا عني و في ثانية القعدة باظت عشان خاطري ( كنت دلوعتهم و بالذات خاله اللي زعلت انه اتجوز واحدة غيري ساعتها) المهم بابا شاورلي ع المراكبي و قالي سمكة القرش مش ح تعرف تبلع الشوز ف ح ترجعها, و عمو المراكبي ده ح يجيبها و يوصلها البيت. (كنت خمس سنين ساعتها اعتقد )...و عمري ما ح انسي منظر المراكبي بيبص لي و يهز راسه انه ايوة..و كلهم ميعرفوش اني انا اللي رميت الجزمة اصلا عشان اعرف ايه اللي ح يحصلها واديني عرفت ....القرش اكلها
... :)
ثالثا: احنا ثلاثة بنات..و انا اكبرهم... هبة اصغر مني بعشر سنين..و الحقيقة الجميع يعرف قد ايه علاقتي بهبة قوية جدا الحمد لله..و اني باعتبرها بنتي اكتر من اختي...و هي كمان.. و يقعدوا يتحاكوا في العيلة ازاي كنت باسكتها و اشيلها و لاعبها ووووو... بس اللي محدش يعرفه اني ساعة ماما ما كانت حامل فيها و انا ما كنتش طايقاها... مضايقة من فكرة ان ح يبقي ليا اخ او اخت تاني غير هدير و انا..و لسة طفل جديد دوشة و زحمة و اهتمام..و فعلا لما اتولدت انا مش شفتها غير بعد مدة,, و كنت مضايقة انها السبب في تعب ماما ساعتها ( عملت بعديها عملية حياة او موت) و بعدين عشان الشكل للبيع.. قعدت اغلس علي اسمها.. يا بابا اسم هبة مش حلو. سميها اي حاجة تانية. سميها هاميس (اسم كان بابا عايز يسميهولي لكن ربنا ستر).. سميها هديل.. سميها اي حاجة.. لما قالي هبة.. قلت له سميها هبة الله طيب.. هو كان اي اعتراض و السلام... بس لازم اعترف ان مفيش شهر و التاني..و انا اللي اتبنيتها و بقت هي قلبي كله.. وعلاقتنا مختلفة تمام وهي عندي بالدنيا كلها..حبيبتي هبة دي :)
...
رابعا: اني موسوسة..يعني لازم اتأكد من نضافة الكوباية و الطبق اوي..و اتأكد من رحيتهم , باشمهم اصلا عشان اتأكد انها من غير اي ريحة ونظيفة تماما ,و اغسلهم بعد ما يطلعوا من غسالة الاطباق ,اصلا المواعين بتتغسل مرتين بسببي, و مشربش مياه من عند حد بره, لازم مياه معندية بتاعتي وحدي,و مشربش من ازازة في التلاجة, لازم من كولمن او ازازة مقفولة خالص بتاعتي بس, ومكولش عند اي حد,مهما كان الحد ده نضيف اوي, اكل ماما وجدتي هو اللي اتعودت عليه , و طبيعي جدا انهم في البيت عندي يتعودوا ع الجملة الشهيرة بتاعتي غسلتوا ايديكوا قبل ما تحضرولي الاكل؟!!, جملة لا ارادية سخيفة لازم تتقال رغم اني شايفاها بعيني انها فعلا غسلت ايدها, و لازم اتأكد من الدوا اللي بيدوهولي, و باقرا نشرة الدوا وراهم, و اكلم الصيدلي علي طول للتأكيد, ماما لما تيجي تديني دوا لازم تجيبلي نشرته عشان تطمني اصلا ,كأنهم ح يسمموني :),علي النقيض تماما انا باكل من اكل المطاعم برة عادي ,طالما مش باشوف بيتعمل ازاي,و ممكن تلاقيني وقفة في محل قصب في الشارع, و اقوله ممكن شاليموه!؟ و برضه ببراءة الاطفال في عينيها
..
خامسا:ornithophobia
انا فعلا عندي فوبيا من جميع انواع الطيور الصاحية .. باخاف منهم, وكنت باصاب بحالة بكاء هستيري لما اشوفهم حتي ع التلفزيون, والي الان - رغم تماسكي- الا اني باكره اشوف العصافير و الحمام و الفراخ ع التلفزيون او حتي صور في جرنال,و اسود ايام حياتي لما كان في البيت كتاكيت عشان هبة تتسلي بيهم, كنت باعتكف في الاوضة و اعيط لو شفت واحد هرب او هدير و لا هبة -اخواتي- مسكينه يقربوه مني, اسوأ مكان هو بلكونة جدتي اللي مليانة عصافير, باقفل عليها لما باكون عندها, ومع اني مش باحلم كتير الا اني عندي كابوس واحد متكرر.,حد ماسك طائر و بيقربه مني و انا لا قادرة اصرخ و لا اهرب و عاجزة تماما قصاد الطائر ده و خايفة, ده كابوسي المتكرر اللي باشوفه علي طول, و للي ح يسأل عن السبب, لا مش حصل حاجة وانا صغيرة عشان اخاف منهم, يعني ماحصلش حادث معين, انا فعلا باكره الطيور,,و للمفارقة انا لا امانع في اكلهم بتاتا.. طالما انا عقلي ما ربطتش بين الكائن الطائر عند دبحه و الكائن اللي في الصينية
...
.
...
ادبس مين معايا
اني راحلة
مختار
العزيزي
ادم المصري
سيجارة
زبادي في الخلاط
ابا ريشة
شادي
فايد
السدغ
عربي و منجي
جدو اسكندر
جدو
هاني-انتوك
شيماء -مدونة الصراحة خنقة
SaSo
زنجولا الطبيب الطنطاوي
...
تحديث: اودي برضه دبسني في نفس التاج...اهو..تاج من غير عروستي يا اودي..وعادي بقي
يا رب يكون موسم التاج خلص :)
