هي حكاية حرب و ثار:
من ساعة ما دخلت الجامعة و انا يرتبط في ذهني مفردات معينة..و اللي حكيت بعض منها زي البنات و الاكلسير , اتحاد الطلبة, كل الاحبة اتنين اتنين.,.. محاضرات و ملازم و سكاشن... المهم بالتجربة اكتشفت ان الجامعة مش كدة خاااااااالص... الا حاجة واحدة هي بقي حلمي هناك: رحلة الاقصر و اسواااااااااااااان, و لا اخفي علي احد ان من اول ما دخلت الكلية و انا باقول لماما: ممكن اطلع الرحلة دي؟,,,تقولي : لا, لما تبقي في سنة رابعة ان شاء الله..( كانت بتسكتني فاكراني عيلة), جت سنة تانية: يا ماما اطلعها بقي ما انا بقيت شحطة اهو!! تقولي: لا ,,انتي لسة صغيرة و بعدين لما تبقي في سنة رابعة...( امتي سنة رابعة دي تيجي بقي),,هوب تالتة: يا ماما اطلعها بقي؟ تقولي: لا... ( يعني تالتة فرقت عن رابعة؟) هوووووووب جت رابعة, مالهاش حجة بقي , اول ما طلعت نتيجة سنة تالتة و ابتديت استوعب ان انا فعلا بقيت في سنة رابعة , قمت نطة في الهوا وهيييييييييييييييييييه ح اروح الاقصر و اسوان.. تقولي: لا مفيش بيات برة.. يالهويييييييييييييييييي
و الله و عملوها الرجالة:
قبل امتحانات نص السنة عزة الانتيخ بتاعي بتقولي علي رحلة الاقصر و اسوان و نايل كروز و خمسة ايام و كلام كبير كدة و انها الفرصة الاخيرة, و هوباااااااااا محدش يسأل ماما وافقت ازاي لاني معرفش..لا و بابا كمان اداني الاوكي,,,.ربك يسرها و سهلها من عنده... انا حتي مش قلت لحد لغاية ما اتأكدت اني فعلا في القطر... انا + مسافرة+ لوحدي + الاقصر و اسوان + قطر = مش ممكن!! بس اي و الله ده اللي حصل.,..ناهيكم بقي اني اول مرة خالص اسافر لوحدي و ابات لوحدي. و اسافر مع عزة, و اول مرة اركب قطر (ايواااان) , لا و الادهي من ده و ده ان اول مرة اروح الاقصر و اسوان, المهم شديت الترحال , و سلامتها ام حسن
حلاوة شمسنا
بعد رحلة في القطار دامت المية و خمسين ساعة,.,, ( 12 ساعة بس) و الوسوسة اللي اشتغلت, يا تري ح يولع بينا القطر؟ يا تري وزارة المواصلات مش ح تعمل مصيبة لغاية اما اشوف نفحة و شلحة من اسوان حتي من غير الاقصر؟... المهم.,. عشان محدش يعيب في الوزارة,,, انا وصلت بالسلامة,,, هوووووووب نزلنا علي مزارات علي طول,, الجو راااااائع بجد, الهوا نقي فعلا.. و النيل اه ع النيل.. و المراكبي ..و يا سلام علي جزيرة فيلة,.,. جزيرة النباتات,, بس اللي بجد انا كنت متأثرة بيه اوي: السد العالي... لما اكون واقفة علي صرح عظيم زي ده , و بحيرة ناصر علي ايدي اليمين, و النيل علي ايدي الشمال,, بجد احساس جديد علي رأي الست نانسي عجرم, اما جزيرة النباتات , فعلا انا حسيت بالاكسجين النضيف , و انتهت رحلة الاسوان بجولة حرة و اهل بلدها اللي بجد حسيت قد ايه هما طيبين, و ناس بسيطة
الاقصر بلدنا بلد سوااااح
بعد معبد ادفو , و زعازيع القصب , اطلع ع الاقصر يا عم عزبي و غني ,دي بجد اللي حكاية, شارع كليوبترا , و الحناطير ( مش ركبته للاسف) و الصوت و الضوء , الكرنك, معبد الاقصر, غير بقي وادي الملوك و الناس اللي بيحبوك, الواحد لازم يكون بيعرف يتسلق جبال, و كله كوووووووم و مقبرة تحتمس التالت دي كووووم... انا كنت ح اروح فيها, العضمة كبرت و الواحد مش زي زمان مش بصحته ( ناسيين اني تمت عشرين سنة مرة واحدة), و مقبرة رمسيس , جوا ممنوع التصوير, بس عيب عليكوا لحقت لي صورتين ع الماشي كدة في الخباثة, بس الشئ المبهر جمال الرسومات و احتفاظها بألوانها و جمالها بالشكل الرائع ده, اما معبد حتشبسوت فانا فعلا كنت مبهورة بيه, رغم انه اتعرض لتلفيات كتير عشان مشاكل عائلية ما بينها و ما بين تحتمس التالت (مالناش دعوي كل واحد في حاله) انما معرفش ليه افتكرت الحادث الارهابي بتاع التسعينات (وهنا تبدأ الوسوسة: هل ح اروح فيها و ينزل اسمي من ضمن الشهداء حادث الارهاب الاثم في معبد حتشبسوت ؟ يا سلااام و يحنطوني معاها و يعملولي معبد انا كمان انا و الابطال الزملا اللي في الرحلة و العزبي يغني قفلوا عليكي يا حلوة تابوت...المهم ربك ستر), و تنتهي المزارات بمعبد هابو, و في اخر يوم معبد الاقصر ثم الكرنك اللي فيه واحد و عشرين معبد, غير المسلات, واخير و ليس اخرا , بجد بقي مش هزار و رغم كيد المعتدي ......عمار يا مصر
الصحبجية
مع الاعتذار لفرقة الصحبجية الشهيرة (كلمة و السدغ و حامد و شركاه) ,انا بجد اسمتعت بالصحبة اللي سافرت معاها و روح التعاون اللي ما بينهم من اول محطة مصر و القطر رايح, وطول الرحلة لغاية اخر لحظة الوصول فجر يوم 30 يناير, تحس كدة ان المصري معروف بجبروته و قوته (علي رأي هنيدي) , ده غير بيتر المرشد السياحي اسواني الاصل اللي رافقنا طول الرحلة لاخر يوم و مايحلالوش الكلام و الشرح الا في اكتر حتي فيها شمس, لذلك منحناه لقب بيتر رع , اما ع الباخرة ( ايوة قلت انا انها نايل كروز) في اخر ليلة لينا عليها كان فيه حفلة جميلة لا يعيبها شئ الا الرعاشة- قصدي الرقاصة- اللي جت عشر دقايق ترعش فيهم و تمشي و الغازية لازم تنزل و يا ريتها ما نزلت, حفلة جميلة خفيفة الظل احلي ما فيها الضحك اللي بجد ويا الصحبة, غير بقي الي تتعب تلاقي مين من الموجودين من طب و لا صيدلة و غرفة الطوارئ اشتغلت, غير المشرفين و الدكتور الجامعي المرافق ( الرحلة تابعة لاتحاد جامعة عين شمس) اللي بجد انا اتفاجئت بمستوي التنظيم و الاحترام و الالتزام , كانت اسرة جميلة بمعني الكلمة, هنا في قطر الرجوع بيلعبوا الدويمينو و هنا مع المشرف بنلعب ميسر.. قصدي بووكر.. يووووه قصدي كوتشينا يعني , ح تفضل الرحلة كلها عالقة بالذهن الصراحة, لانها بجد تجربة جديدة من كل النواحي....اااااااااااااااااااااااااه و شفت فاروق حسني وش كدة في جزيرة فيلة..اي و الله كان البعيد في خلقتي مرتين مع وفد عرب و اجانب, جيت اخدله صوره, كنت ح اتمسك من قفايا, بكل هدوء الحرس بتوعه قالي لي: ممنوع يا انسة,, ده حتي تحتمس احلي, قلتها في سري طبعا
اهي دي صفحة جديدة و اتكتبت و اتشالت في شنطة الذكريات الجميلة... بس بجد بعد اللي شفتوه من الناس و المصريين اللي بجد و اثارنا و تراثنا و حضارتنا, يبقي بجد حرام علينا مانحافظش ع البلد دي, و نستسلم للي عايزين يضيعوها
عمار يا مصر
____
ملحوظة: اشكر الست زيزي هانم الشهيرة ببنت مصرية علي فض النزاع الاقليمي بين البلوجر القديم و الجوجل و انهاء الاعتصام, و نشكر كل من اكتب بالرصاص و احمد باشا شقير ع الدعم المعنوي و المعلوماتي و التكنولوجي, و اخص بالشكر الرقيقة حلم لتشجيعها و انها شاهدة ع الصراع البلوجراوي و اعتصامي و تأييدي و التنديد بالظلم و العدوان بالاجبار ع التحويل الي جوجل..و كذلك هوبا التي شددت من ازرنا في مصيبتنا... لا اراكم الله بلوجر يدوخكم..انتهي البيان
____
ملحوظة 2:
من قبل الامتحانات و فيه تاج عمال يروح وييجي ووعد الحر دين عليه: كلمة و مصري و هوبا و حلم و علا و
همس الليل....علم و سينفذ قريبا ان شاء الله...ترقبواااااااا... اوعي تغير المحطة :)
