الفكرة في حد ذاتها مرعبة
الصورة بالروب والكاب ..هو ازاي وامتي ده حصل؟
يعني دي اخر مراحل التعليم الرئيسية؟
دي اخر مرة حد يقولك ذاكر عشان تجيب مجموع
ذاكري عشان تجيبي تقدير
ذاكر عشان تلاقي شغل
الامتحان ع الابواب
*
يعني دي اخر مرة نسمع وحياة قلبي وافراحه؟
ونحط ايدينا علي قلبنا عشان النتيجة؟
انا عارفة اننا عارفين اننا نجحنا واتخرجنا من سنة
بس لا...النهاردة الفكرة كانت مرعبة
الصورة لما تحطها كدة تحس انك كبرت ومش لابس قميص المدرسة او بتجري عشان محاضرة..
وان كل اللي وراكي دلوقتي يا بداية اسرة جدية, يا شغلك..يا عيالك كمان
*
شفتوا الفكرة مرعبة ازاي؟
*
يعني طفولة اننا رايحن نشتري من عند الدادا
وفين قميص ودريل المدرسة
والباص
والرحلة
كل ده راح وانتهي
اصل..النهاردة لبسنا الروب..وكنا في حفلة التخرج
يعني مش فيه معيلة..ولا مصاصة, ولا غزل بنات, ولا مستر وميس
بقينا احنا "الميس"ه
*
يعني مفيش مصروف؟
فيه مرتب
يعني مفيش باص؟
فيه عربية او مشروع عربيه
فيه خطيب او جوز...او حتي مشروع خطيب او جوز
مفيش كتب دراسة سئيلة
فيه تقارير وورق شغل..وقراءة حرة لو حبيت
مفيش عندي عشر سنين..عندي اربعتشار سنة
بقينا نعد من بعد العشرين
*
مفيش صورة تخرج
النهاردة كانت اخر صورة تخرج
*
عرفتوا قد ايه ان الفكرة مرعبة,,,مرعبة جدا كمان؟
*
*
الفكرة المرعبة..هو ان بابا يروح يسلم علي دكاترة بتوعه ويقوله حضرتك درستلي وانا في سنة اولي من تلاتة وتلاتين سنة ودي بنتي لسة متخرجة !ه
*
الفكرة المرعبة اني من كام يوم حلمت اني متأخرة علي حفلة تخرجي..وادور علي لبسي..ولقيت دريل (فستان ) المدرسة الكحلي بتاع ابتدائي مكوي ومحطوط ع السرير ..ابتسمت بس اكتشفت اني قد ايه "طولت" وكبرت
*
عرفتوا قد ايه بقي هي فكرة مرعبة...؟
تحية الي أبينا
*كن فخوراً يا رفاعة*
______
الثالث عشر من مايو 2008
