التاج اللي شيماء باعتاه و عليا غرامة تأخير 75 قرش
وانا مش معتبراه تاج قد ما هو نسيم جميل من فترة انا باحبها المدرسة طبعا
...
هل كنت طالبة شاطرة فى المدرسة ؟
من كام يوم معرفش ايه اللي خلي ماما تفرج هبة ( اختي الصغيرة) علي شهاداتي و انا صغيرة.. بس هبة جت توريهم لي بكل فخر .. قعدت اتفرج علي ترتيبي ع الفصل بتاع كل شهر و في نهاية السنة.. الستيكرز اللي المدرسة كانت بتحطه.. التعليقات القصيرة من كل مدرس او مدرسة..(ملتزمة... هادية. ..مبروك انتقالها لاعدادي) و هبة شافت علي وشي ابتسامة منورة.. اصلي لقيت توقيعات ميسز نعمت رحمها الله.. ميس ضحي ماث (رياضيات يعني) مستر اسامة ساينس (علوم) امضاء مديرة المدرسة ميسز نرمين وبعدين دينا اسماعيل.. بادج المدرسة.. افتكرت وانا مروحة مع ماما في مرة وانا في رابعة ابتدائي و قابلنا ميسز وفاء عربي و بيتكلموا ان خلاص ان احنا كبرنا و لازم نتعود نحل امتحان في ورق خارجي..يا لها من صدمة!!! :) خلاص مش ح نحل في نفس ورقة الاسئلة تاني..!! افتكرت صورة ليا مع اصحابي في مجلة المدرسة للمتفوقات لهذا لشهر..افتكرت ميس سوزي اللي كانت بتديني في ثانية ابتدائي ماث و شفتها و انا باجيب هدير صدفة من المدرسة و انا في ثانوي جريت وراها و مش لحقتها و من يومها مش شفتها تاني مع انها سألت عليا بالاسم وهي كانت وحشاني..و افتكرت ازاي كانت بتكتب ع السبورة بسرعة و تمسحها بسرعة و انا ارجع لماما بالكراسة الدرس ناقص عشان ملحقتش اكتب وراها..(كنت بطيئة اعمل ايه) و افتكرت عيد ميلادي في المدرسة..و حفلة تكريم الاوائل..و في ثانوية عامة ازاي واحنا بنسحب الملف شفنا لوحة عليها اسمائنا
ويا ريت الدعاء عشان النتيجة اللي قربت تطلع بتاعة الكلية ان شاء الله :(
..
ايه كانت احب مادة و اكره مادة ليكى فى المدرسة و الكلية؟
.
مادة
مش باحبها
العربي... عشان مش كره لغة القران و لا البلد و لا امتنا و لا ايه حاجة( قبل بس ما تخدكم الجلالة) .. عشان المدرسين اللي لازم يجيبوا اكتئاب و عشان العقد ..و عشان كتاب العربي اللي كان شكله يسد النفس..و عشان في الامتحان لازم اغلط في قطعة النحو..و في سؤال الاختيارات بتاع جمع نصيب :( نصب – انصبة- نصائب)و عشان كتاب الاضواء و عشان المادة الوحيدة اللي ماما كانت بتراجعها معايا بعد كل امتحان..و لازم تطلع الغلطات..وعشان موضوع التعبير اللي لازم كان عن توشكي و مصر السلام و انجازات الرئيس
.
في الكلية
احم.. العربي برضه..ماما لما دخلت كليتي..قالت لي انا فرحانة فيكي انك ح تفضلي تدرسي عربي ( اصلها بتعشق اللغة العربية و انا كمان بس مش من المدرسة) مش باحب عربي الكلية عشان لقيتهم بيعتمدوا ع الحفظ الشديد جدا.. صم و انقش..عشان الدكاترة عقد و قليل اللي اهتم انه يفهمنا و يعلمنا حاجة بجد..الله يسامحهم..و عشان لو صميت كويس تجيب امتياز و تذاكر العربي عشرة ايام قبل الامتحان..و تجيب تقدير امتياز او جيد جدا..عشان باقعد الترم استحمل دكتورة تقعد تتكلم عن انعدام الاخلاق و تشتم و تدعو لافكارها المتطرفة و انا مش عارفة اسم المنهج اللي بتدرسه ايه اصلا ( الكلام ده بيحصل الان هذا الترم يعني).. عشان بيبعلك كتاب قبل الامتحان بشهر عشان يجي قبل الامتجان يلغي تلات اربعه...و برضه غير مفهوم ..عشان قليل الا من رحم ربي..اللي حاول انه يعلمنا حاجة بجد - يعني مش باحب العربي لطريقة تدريسه ليس الا
.
.
احب مادة بقي
الانجليزي ..كل مدرسة من وانا في كي جي تو و بجد انا اتعلمت منها حاجة.. فاكره كتاب راينبو (قوس قزح يعني) بتاع ابتدائي والوانه المبهرة.. فاكرة القواميس الملونة للاطفال.. فكرة كراسة التعبير اللي كنا بنفنن اني ارسم رسمة مختلفة لكل موضوع و ازخرفه..فاكرة ميس رانيا و سامية و نسرين وبهية و ليليان و ايزيس و رحاب و سحر و هالة و نيفين و هدي العيوطي و مستر ناظم و ميس دعد و حنان بهجت وميس مني (دول مدرسيني من وانا في كي جي تو لغاية ثانوية عامة بجد)و فكرة مسابقة القاء الشعر في المدرسة و الاذاعة اللي كنت باكتبها..و فاكرة ملخصات قصص شكسبير و ديكنز اللي بنقراها من واحنا عيال..و فاكرة المشاهد اللي عملناها في تانية اعدادي مقتطفات من اعمال شكسبير و انا دوري كان منولوج هاملت (اكون او لا اكون)و تلك هي المسألة في طريقة تدريس المادة و انك تخلي الطفل يحب المادة من صغره
:)
.
وفي الكلية.. بما اني بادرس انجليزي فكله حلو :)
.
كنت عايزة تطلعى ايه وانتِ صغيرة ؟
تلاتة احلام كان نفسي اعملهم في نفس الوقت
الاولاني و اهمهم حققته الحمد لله..كليتي.. اني التحق بكليتي اللي فيها دلوقتي و ادرس انجليزي
الحلم التاني.. اني اطلع طبيبة نفسية...عشان باعشق دواخل النفس البشرية
الحلم الثالث.. اني اكون دكتورة طب شرعي..عشان اشتغل في المشرحة..وده لاثبات اني قوية و مش يهمني, و قلبي جامد ولا رامبو..و عشان كنت معجبة بالافلام الاجنبي لما الاقي بقي بعد الجريمة يجيبوا الجثة و يقعد يحلل فيها عشان يعرف مات امتي و ازاي و كدة. بس عند دخول ثانوية عامة.. قررت اني اتمسك بحلمي الاولاني و ابتعدت عن العلوم.. بس حققت حلمي بدخول المشرحة ..عن طريق صديقة ليا في كلية طب.. و شفت الجثث و قلت لها شيلوا الميتين اللي هنا :)
.
.
يلا التاج ده ابعته مع الحمام الزاجل الي
جدو
مبرمج حر
عمرو
احمد
اكتب
بالرصاص
مصري
.
تحديث: اهداء خاص لعم ايــــام
.
بالشفا
:)
