اتحاد الطلبة بالحبر الفسفوري: قصة واقعية

شهادتي عن انتخابات اتحاد الطلبة في جامعات مصر المحروسة

ملحوظة من اولها كدة : الموضوع طويل حبتين يعني هاتوا كباية شاي و اقراه بتمعن..و القصة دي واقعية احداثها لم يمر عليها غير الاسبوع بالتمام و الكمال.. بالظبط كدة الخميس اللي فات..و توابعها لازالت مستمرة..و لمقدمة منطقية و استهلال لابد منه تفضل بقراءة البوست السابق.. استمتع بالشاي بقي

_____________

شاءت الاقدار و لا بتوع السينما كدة..اني اسمي يترشح انزل مندوبة عن سنة رابعة في كليتي (تم ترشيح اسمي من قبل رئيس القسم و استاذتي)..لاشهد انتخابات اتحاد الطلبة... مندوبة عن الفرقة الرابعة..شفتها كنوع من الثقة الحمد لله و المسئولية ....و بما اني لا ليا لا في انتخابات و لا الاتحاد و لا اعرف عنهم حاجة... فكانت تجربة جديدة بالنسبة لي.. امتي يا جماعة طيب الانتخابات دي اللي لازم احضرها؟؟ بكرة الخميس..ماشي..بكرة!!!..ده و لا فيه حس و لا خبر في الكلية.. يعني لا يافطة و لا لوحة و لا ترقبوا و لا انتظرونا و لا حتي تنتخبوا مين..ماشي ما علينا..هي بدايتها كدة..مش جديدة يعني

الخميس الساعة تسعة الا ربع كدة...كنت وصلت كليتي و رحت اسأل عند رعاية الشباب عن موضوع الانتخابات..يا جماعة انا فلانة نازلة للفرقة الرابعة بالترشيح من الدكتورة الفلانية.. ايوة اهلا وسهلا اتفضلي.لسة مفيش حاجة.. طيب ممكن اعرف من حضرتك ايه دوري..؟
مفيش انتي ح تكوني في لجنة الاشراف ع التصويت بتاعة سنة رابعة.. ايوة يعني مطلوب مني؟؟ .. ح تعرفي كل حاجة..استريحي بس..طيب المفروض الفترة قد ايه يعني اللي انتوا عايزيني فيها ؟
من الساعة تسعة لحد الساعة تلاتة!!!!! لو حبيتي تحضري محاضرات ابقي استـاذني من الدكتور اللي معاكي..و ابقي انزلي تاني...و سابتني الست الموظفة..و كانت بتلقي تعليماتها علي باقي الموظفين و العملة.. تعالي شيل معاه المكتب

قعدت في ركن من الاوضة دي...كانوا بينقلوا مكاتب الموظفين..عشان يخدوها للقاعة اللي ح يجري فيها الانتخابات...ايه ده مكتبي فين؟ دخل القاعة... امال انا اقعد علي ايه؟ علي اي حاجة..الصندوق اهم.. الصندوق هو اللي ح يقعد ع المكتب..و ايه ده كمان جيبين لهم صناديق شفافة؟؟ امال... عشان "الشفافية"...هما واخدين الموضوع جد اوي كدة ليه...!!!!! انا عايزة صندوق من دول اعمله حوض سمك...لا ده كمان ينفع عندنا اوي في اللجنة الفنية !!! الحوار ده دار و غيره من التعليقات الساخرة و الضحكات وانا قاعدة مع جماعة الموظفين اللي عمالين ينقلوا مكاتبهم للقاعة التانية ..و عادي خالص و لا كأن فيه غريب في الدار..انا يعني

يا دادة...تعالي لمي المزبلة اللي جوة دي... الزبالة في القاعة كتير..و امسحي الترابيزة..خلاص خلي العميد تيجي
تشوف القاعة بالمنظر ده..انا ماليش دعوي..و بعدين نادت عليا الست الموظفة من ع الباب . تعالي يا انسة...ايوة...اتفضلي اقعدي جوا بقي...يا فلان الطالبة دي جاية مندوبة سنة رابعة... سنة رابعة ..ايوة اتفضلي خديلك كرسي و استريحي اهو صندوق سنة رابعة و المكتب..طب حضرتك مش ح تحتاج كرنيه او اثبات شخصية ليا اني حضرت هنا؟؟...اه حاضر..ح اقولك كل حاجة بس اما نخلص تجهيز القاعة بس..استريحي..!!! ومشي و سابني و لا شاف وصل النور حتي

.تعالوا بقي نبص ع القاعة..في الاربع الاركان ..الاربع مكاتب..و صندوق اقتراع لكل فرقة.. و الدادة لسة بتكنس..و ترابيزة اللي جنبي مردومة تراب..و الدادة بتمسحها..مالت عليها احد الموظفات..يعني قعدنا نهاتي عشان الترابيزة دي تتمسح ..دلوقتي بس بتنضفوها!!! هو لازم يكون فيه حاجة عشان تتمسح!!

ابتدا الدكاترة المشرفة توصل... الاستمارات الترشيح الملونة لكل فرقة... الطلبة المندوبين عن الفرق الاخري.... و لا حد كلف خاطره يشرح او يقول اي حاجة للطلبة... ولا حد سأل في اثبات شخصية و لا امضاء حتي لينا كطلبة (هما فاكرين انهم جايبين كيس جوافة و لا ايهّ!!!).. عمليات التنضيف انتهت.. الدكاترة وصلت.. الطلبة المندوبين. ناقص طالب لسنة اولي..اجري هاتلي طالب لسنة اولي بسرعة!! (تحس بيطلب حلبسة و اتوصي بالشطة بسرعة) !!دكاترة المراقبين .. كله تمام

الاجراءات
كل لجنة مشرفة مكونة من دكتور..موظفة من شئون الطلبة و الطالب المندوب عن فرقته..كله معاه عدد واحد صندوق شفاف.. رزمة من الاستمارات الترشيح..و حبر فسفوري يا معلم..ايوووووة..الحبر اللي يخلي صباعك ينور في الضلمة ده.. بنقول شفافية ..شفااااااااافييييييييييية!

تعالي بقي نتفرج علي استمارة التصويت دي... جداول كتير و اللجان مكتوبة..لكن كلها مشطوب عليها انها خلاص نزلت "تزكية"..و فضل لجنتين بس..الطالب يرشح من كل واحدة اسمين.. يعلم جنبهم علامة صح.. يحط الورقة زي الشاطر في الصندوق الشفاف.. يحط صباعه في الحبر الفسفوري و يتكل علي الله.. وفي النص بتكون الموظفة اتأكدت من بطاقته او اي اثبات شخصية ليه و ان اسمه مذكور في قوائم القسم و السنة بتاعته..و دمتم..ماشي الكلام؟؟ ماشي الكلام...اه بالنسبة للستارة زي ما بتشوفه في التلفزيون ..مفيش طبعا...انت مش بتنتخب الريس..و لا هو سر من اسرار الدولة..و كمان بيدخلوا مجموعات مع بعض..عشان "العملية مش مستاهلة" علي حد ذكر البعض و ان الناس عايزة "تخلص"!!! و كان نفسي اصور و الله الطالب و هو سعيد و بيحط الورقة و انزل صورته في الاهرام..و صورة طالبة بتورينا صباعها بالحبر الفسفوري و تنزل في الجمهورية..و الابتسامة من الود للودن...انما محصلش نصيب

عن الدكاترة المراقبين:

الحقيقة..اختلفت ردود افعالهم... الاغلب شايفين ان نزولهم هذا اليوم جه"تدبيسة" بطريقة او بأخري و اهو ضاع يوم كامل من التاسعة صباحا الا ما شاء الله من غير محاضرات..اذا فلله الامر من قبل و من بعد.. الدكتور المراقب شايف ان طلبة الكلية مش متعودين علي جو الانتخابات و لا كان ابدا عندهم علم بالاتحاد و دوره...و ده اوافقه عليه...و انعدام الدعاية في اليوم ده ح يتسبب في قلة عدد الاصوات..و لو موصلناش لعدد الاصوات المطلوب عند الفرز.. الانتخابات ح تنزل اعادة..و ده اللي كانت الدكاترة مقلقة منه...اصل تاني الدكتور شايف انه "ولا ح تفرق"..و "مش مستاهالة كل ده" ان يضيع يوم تاني في الاعادة.."و يا ريت نقفل النتخابات النهاردة و نخلص" ده رأي الدكتور المراقب اللي معايا..و مش بيقولي انا اللي الكلام ده بس..انما كمان لوكيل الكلية: قولوا للطلبة اللي واقفة ع السلالم دي و بره تيجي تنتخب عايزين نخلص النهارده

الحقيقة..مع بدء توافد الطلبة..من موقعي الاستراتيجي.. شفت الاربع دكاترة في اماكنهم... نوع مركز اوي مع الطلبة و بيساعدهم و مركز فعلا مع المندوب و الموظفة و هما بيشتغلوا و متحركش من مكانه.. و فيه الدكتور اللي قاعد و مش قاعد ..يعني بيشغلوا في اي حاجة تانية ..ورق بتاعهم.. يشوفوا مصلاحتهم يعني بدل القعدة و الموظفة و الطالب المندوب قايمين بالواجب و زيادة..و اهو لو فيه حاجة ح يسيب للي في ايده و يشوف عايزين ايه

موظفة الشئون الطلبة
دورها في كل لجنة..انها معاها القوائم بجميع اسماء طلبة السنة ...يجي الطالب من دول يديها اثبات لشخصية ..تعلم جنب اسمه.. تديله استمارة ..تفهمه المطلوب منه في الورقة.. يرشح حد ازاي يعني.. و تقوله ع الحبر الفسفوري.. و تديله بطاقته ..يعني من الاخر هي اللي القايمة بالعملية كلها..لكن الحقيقة هنا بقي ظهر تطوع الطلبة المندوبين لكل فرقة.,..فكفايه ع الست انها تتأكد من شخصية الطالب..و المندوب بيساعد في عملية الحبر و الشرح او الاستمارة يعني... يعني اللي شايلين الليلة الطالب موظفة و الدكتور موجود لو لا قدر الله حصل مشكلة

الطلبة المندوبين
عشان الرجل كانت خفيفة علي سنة رابعة شوية..علي عكس سنة تالتة و اولي مثلا و تانية شوية.. فبرضه من موقعي الاستراتيجي هذا كان عندي متسع من الوقت اني بدل ما اهش دبان..اشوف الطلبة الاخري..و لاحظت نشاط الطالب المندوب لكل سنة..ازاي واقف علي رجله علي طول يستقبل الطلبة الوافدة للتصويت..و يفهمهم..و يساعدهم في موضوع الحبر الفسفوري ده...و اختكم الحقيقة اتبهدلت حبر فسفوري و اتدلق عليا هههههه كله في سيبل الشفافية برضه..بس الحق يقال حماستهم و حماسة الطلبة اللي جاية ترشح و تصوت اصلا تشجع و تحمس جدا..و تحزن ان في نفس الوقت نقص الدعاية و اغلبها جايين يرشحوا جماعة الاصدقاء و ان صحبتها قالت لصاحبتها التانية ترشح زميلهم اللي في القسم..طب انا مش من نفس القسم و لا اعرف اخد انهي اسم..مش مشكلة.. زميلك ح يميل عليك و يقولك تنتخب مين من اصحابه..كلها منفعة و مصالح

اول صوت
الحقيقة كم الاستخفاف من قبل المسئولين بالعملية الانتخابية كلها كان من الاشياء المحزنة...اول بنت جت في لجنة سنة رابعة... الموظفة ارتبكت..ناديت الدكتور اللي كان من اولها كدة قام اصلا.. عشان يحضر الشغل بقي...المهم..الدكتور قال لها علّمي هنا و هنا و خلاص.. و نسي يقولها ع الحبر الفسفوري.. اللي كان لسة قصادهم ع المكتب.. قلت ح يفتكروا..ابدا.. البنت مشيت و مافيش.. باستعباط سألت مش المفروض بعد ما يخلصوا يعملوا الحبر الفسفوري..؟؟؟
ايوة... سألت تاني باستهبال و غيظ برضه: ايه ده ..ده البنت معملتش الحبر الفسفوري ده؟ قلت يمكن ينزعجوا و لا حاجة... اه لا مفيش مشكلة... بكل هدوء للموظفة قال الدكتور لها... بعد كدة بعد ما الطالب يخلص و يحط صوته..خليه يحط صباعه في الحبر الفسفوري..و لم تهتز لهم شعرة..و من هنا و انا قررت ح اخد الحبر ده قصادي..عشان نخف الزحمة علي الموظفة الغلبانة..و اتأكد ان كل طالب مر بجميع الاجراءات

الحقيقة بجملة الاستخفاف و انعدام الدعاية...و ان الاعداد قليلة اللي صوتت فعلا.. وان لازم الصناديق تقفل علي الاف الاصوات و ليست المئات... رأي الدكتور ان الطلبة ينادوا علي زملاؤهم ان يجوا يرشحوا... حتي و لو مش عارفين حد من اللي في القوائم... بس علي حد قوله " ع الاقل ليك صوت .. استخدمه " (يا سلام ع الايجابية) .. باقول انا للدكتور.. فيه طلبة مش ح تيجي عشان متعرفش حد من القايمة.. زيي كدة و لا اعرف اي حد من الاسماء دي... فرأيهم انهم مش ح يدوا صوتهم لحد ميعرفهوش اصلا و لا حتي شكلا.. قاللي فعلا.. !! قلت في سري الحمد لله فيه حد لسة بيفهم في البلد دي و لكن يخيب الله ظني و في الثانية اللي بعديها.. اصطاد الدكتور المراقب بنت واقفة مصوتتش.. قالها انتي سنة رابعة.؟ ايوة؟!! انتخبتي؟؟ لا!! مش ح تدي صوتك ليه؟ اصلي معرفش حد منهم!! ازاي بس.. و كان قام لها بكل هدوء و ابوة.. بصي انتي ليكي صوت.. يعني اختاري اي اسماء.. بس متسبيش صوتك!!!!!!! (صوتها برضه و لا ورقة زيادة في الصندوق الشفاف عشان نخلص؟؟؟!!) و تدخل زميلها اللي كان بيرشح اصدقاءه..تعالي ح اقولك تدي صوتك لمين!!!

و قبل وقت الذروة ..و مفيش زباين علي سنة رابعة..و انشغال الدكتور.. كانت الموظفة اللي معايا بترغي شوية.. هي سيدة لطيفة ..قالت : انا اول مرة اشوف انتخابات..لا عمري رحت لا انتخابات رياسة و لا مجلس شعب.. سألتها: هو اول مرة تحضري انتخابات اتحاد الطلبة؟؟
لا مش اول مرة..بس اول مرة اتحاد الطلبة تكون كدة..و بعدين محدش قالنا يعني..انا عارفة بس اني يوم الخميس ح اتأخر في الكلية عشان الانتخابات.. و عرفت قبليها بيوم.. بس ماكنتش اعرف انها ح تكون كدة.. صناديق و حبر...و بالحديث عن قلة القبول ع الترشيح . قالت : اصل النهاردة الخميس..و الكلية قايمة ع المغتربين.. اللي بيسافروا..و معروف ان اغلبهم بيسافر من يوم الخميس...ده غير ان الفترة من بعد العيد كانت قصيرة ما سمحتش بأي دعاية للانتخابات...وافقتها علي موضوع المغتربين اللي اعدادهم كبيرة جدا في الكلية..و ان يوم الخميس في كليتنا "يوم ميت" مفيش عدد حضور اصلا كبير في الكلية..و ان محدش دخل اصلا يقول انتوا فين فيه انتخابات و انزلوا رشحوني حتي...غير ان طلبة سنة رابعة علي حد قولها : مش فارقة معاهم كدة و لا كدة ح يتخرجوا فمش لازم اتحاد و بتاع.. قلت لها: انا قسمي فيه بتاع ستميت طالب و طالبة ..اراهنك ان اغلبهم ما عدا قلة قليلة جدا يعرفوا حد او حاجة اصلا عن الانتخابات... و ثبت كلامي فعلا علي مدار اليوم ماجاش من قسمي العزيز ما يزيد عن الخمستاشر واحد!!

الاقبال الحقيقة كان علي طلبة نفس القسم من اللي الطلبة مترشحين منه..و توصيات الاصدقاء و اصدقاء الاصدقاء.. الامن واقف ع الباب.. بيّدخل هو الناس.. و بعلو صوته بيقول عمك الظابط..لا بجد شفتوا نظام كدة.؟!!! و طبعا ماحدش اعترض..اجدع سلام و تحية للنظام..هو فعلا مفيش هرجلة و لا حاجة.. بس انا السؤال اللي بيدور في بالي هي فين الانتخابات؟

الصوت الاسلامي- الاخوان المسلمين حاليا
الحقيقة انا معزولة عن العالم الخارجي و معفرشي ايه بيحصل برة القاعة غير ان فيه زحمة.. بس ايه موقف الصوت الاسلامي و هل ح يعملوا مشكلة زي كل سنة...ّّ معرفش الا اني قلت اكيد ح يحصل حاجة..و حدسي لم يكدبني
دخلت بنت منتقبة .. الموظفة عادي خالص علمت جنب اسمها زي اي حد تاني .. خدي يا بنتي استمارة.. البنت قالت لها : فين الاسماء ؟ انا مش لاقية الاسماء اللي عايزة ارشحها..ازاي يعني.. يا دكتور من فضلك ثانية واحدة.. كان ساعتها الدكتور المراقب كان معاه موظفة من المسئولين ع الانتخابات.. قاموا وقفوا :ايه يا بنتي؟ بحدة: اسماء طلبة كويسين جدا " اتشطبوا" مش موجودين...اتشطبوا يعني ايه.؟
يعني انا مش لاقية الاسماء اللي انا جاية ارشحها مع انهم ممتازين!!
هما في لجنة ايه طيب؟
معرفش!!
طيب اتشطبوا ليه؟
ما هو ده اللي انا عايزة اعرفوا..انا "اعترض" ع الانتخابات دي..( كان فيه فاصل من المسئولة ع الانتخابات بتهب فيها و تزعق لها و الدكتور بيهديها و يهدي البنت و يتكلم معاها بكل عقلانية) طيب دلوقتي انتي اسمك اتعلم جنبه..و مينفعش يتمسح... ممكن ترشحي اسماء تانية من القايمة؟؟
لا.. شيلوا اسمي..انا لازم يكون لي "موقف ايجابي" و انا معترضة علي الانتخابات دي.. ّ!!
ماينفعش نشيل اسمك..طيب انتي ليك صوت انتخبي زمايلك!!!
معرفش حد من الاسماء دي!!
طيب خلاص.. حطي الاستمارة فاضية..و يعتبر صوت لاغي..!!! ردت البنت : لاّ!! ( طبعا المسئولة سالفة الذكر كان بلغ بيها من العصبية مداها و بتشوح و تشخط و تنطر المهم مشيت و جه موظف تاني..عشان يتعاملوا مع البنت بهدوء)فين و فين.. حطوا الصوت فاضي.و البنت ماشية علي مضض

بعد كدة عرفت ان طلبة الصوت الاسلامي عملوا احتجاج بسيط... و مكانوش مصدر خطر او قلق.. بل بالعكس الامن و خلافه كانوا مهولين من موقفهم اكتر

الصحافين فييييييييين!

شويةو قال احد الموظفين للدكتور اللي معايا.. يستأذنه (تحس انه كبير القعدة يعني) ان فيه صحفيين بره عايزيين يدخلوا... شوفهم هما منين؟؟ رجع و قاله: من المصري اليوم.. استأذن من مكتب العميد طيب الاول.. رجع و قال: واخدين اذن من الامن: دخلت بنت و زميلها المصور و قالوا للدكتور انهم واخدين اذن من الامن قبل ما يجوا..و انهم من المصري اليوم.. عقبال ما البنت الصحفية كانت بتسأل الدكتور علي اقبال الطلبة و كام سؤال ع الماشي..كان المصور بياخد كام صورة للجان .. وعقبال ما البنت وصلت للدكتور التاني..كانوا يبنادوا عليهم..امسك دول ماخدوش اذن اصلا...تعالي هنا...خدوهم بره.اتفضلوا... جه واحد يشرح الموقف للدكتور..دول طلعوا ماخدوش اذن و لا حاجة من امن الكلية و لا حاجة

الاقبال مازال ضعيفا..ده تأكيد العديد ان الانتخابات بالمنظر ده ح تنزل اعادة ( معني انها تنزل اعادة ان نسبة الاصوات المطلوبة بتكون اقل بكتير يعني كفاية 750 صوت لانجاح المرشح و دول يجيبوهم في ساعة زمن في يوم في وسط الاسبوع ..و اللي معروف انهم ح ينجحوا ح ينجحوا في الاعادة بالتأكيد ) و متخدش في بالك

بعض اللي جايين من بره اشاروا ان فيه ناس ممنوعة من الدخول.. و مش من الصوت الاسلامي... عشان الاصوات تقل يعني..و اسهاما في تأكيد موضوع الاعادة... نسيت اقول ان مفيش حد عبر الناس اللي قاعدة دي من صباحية ربنا بشوية مياه.. الساعة قربت علي تلاتة... مفيش..كل مدي الاصوات بتقل..و الدكانة ح تقفل.. الي الان مفيش امضاء واحد يوحد ربنا اني شهدت هذا الحدث.. يعني تأكيد ان وجود الطالب المندوب عن فرقته كان صوري من وجهة نظرهم...الساعة تلاتة.. اقفل الباب..فرز الاصوات ح يبدأ..الطلبة المندوبين شكرا..

خرجت.. معرفش مش شايفة قدامي من تسعة الي تلاتة ,,,دماغي بتعيد احداث اليوم كله... ليه الاستخفاف بالانتخابات و كأن مفيش ثقة ان شباب الجامعة ممكن يتحمس للعملية الانتخابية؟ و ليه ع الاساس ده يتم التعتيم علي الاتحاد و نشاطاته و ميعاد الانتخابات بتاعته..و بالتالي انعدام الدعاية بأي صورة ليها؟؟ ليه التدابير دي كلها عشان تنزل الانتخابات اصلا اعادة؟ فين الستين الف جنيه ميزانية الاتحاد؟؟ ليه اللي عايز يرشح نفسه في الاتحاد يكون من المرحب بيهم عند الادارة و بمباركة الامن؟ ليه عايزين تظهر الاخبار في الجرايد القومية ان جامعة عين شمس و جامعات مصر ليها السبق في تقديم الانتخابات بهذه الصورة النزيهة و هي كانت صورية و الناس القائمين عليها مستخفين بيها؟؟ ليه بذرة الاصلاح اللي كانت ممكن تكون صح و تكون نواة المشاركة في الحياة السياسية بوجه عام ماتت قبل ما تتطرح؟ ليه حتي لما الطالب من دول رشح نفسه موقفش في كل مدرج لكل سنة ما بين المحاضرات و ّعرف نفسه و نشاطه عشان الفايدة تعم؟؟..مش ده اللي بيقولوا عليه "البرنامج الانتخابي " و لا ده زي غيره؟؟ ليه العملية الانتخابية و الاصوات جاية من شوية معارف و من تحت لتحت و بالسمع مش بطريق مشروع؟؟ مع ان مفيش تزوير و لا اصوات مضروبة و لا حاجة... ليه مش قادرة اقول انها انتخابات "حرة نزيهة"؟؟؟ ليه اكتر من حد شافني في اللجنة و قت الانتخابات جم يكملوا لي الصورة و يقولولي اللي بيدور بعيد عن الطالب العادي..و عارفين اني اكيد شفت اكتر من الكواليس؟؟

قريت في الجرنال الاعادة بالجامعة... السبت عرفت موضوع الاعادة خلاص "المفروض " ح يتم ف نص الاسبوع ... و لسة مفيش ورقة واحدة حتي توحد ربنا تقول ان فيه اعادة لانتخابات اتحاد الطلاب تخلي باقي الطلبة تنزل... اللهم الا جدول بخط اليد ..صعب انه يلفت نظر حد..كاتبين اسماء المرشحين في اللجان للاربع سنين

توابع

تم شطب اسماء طلبة الاخوان المسلمين من قوائم الترشيح و تم احال بعضهم الي التحقيق
امتنع طلبة الاخوان المسلمين عن التصويت في الانتخابات و قاموا بوقفة في الكلية
لم تجر اي اعادة للانتخابات و احتفل الطلبة "المعينين" بالفوز و النجاح
تبدأ حملة لعمل انتخابات حرة موازية من و الي الطلبة..لكن الي الان دون اي شرعية و ميزانية و دون اشراف دكاترة جامعيين

اشتبك الامن و اتحاد الطلبة بالطلبة القائميين علي الانتخابات الحرة امس الاول

الي الان لا يعرف الطلبة العاديين من امثالي ماهية اتحاد الطلبة و مازال البحث مستمرا عنهم
ممكن نبقي نعرفهم مع اول رحلة ح يطلعوها ان شاء الله لدريم بارك و لا الماجيك لاند حتي

كان معكم..مراسلتك الصحفية: شاهد ما شفش حاجة

و يجعله عاااااااااااااااااااااااااااااااااااامر

________

شكرا لكل من قرأ شهادتي لاخرها