الجامعة .. زي ما كنا عيال لسة و بنشوفها في التلفزيون.. هذا الصرح العظيم.. الطلبة الكتيير.. المدرجات العملاقة.. الملازم.. البنت اللي شايلة اكلسير عليه تيتانيك و ليوناردو دي كابريو (دي علامة الرومانسية ).. شجرة الحبيبة..و كل الاحبة اتنين اتنين في كافتيريا الجامعة.. و يفط و لوح و تنتخبوا مين.. ايووووووووة قصدي علي اتحاد الطلبة..و الناجح يرفع ايده... صورة طفولية حالمة عن الجامعة.. لكل حاجة بيصوره لنا الاعلام ليل نهار
نيجي بقي للواقع..و الجامعة.. اللي علي الباب الامن المركزي.. كليتي الحبيبة معزولة تماما عن باقي مباني الجامعة فلا تسمع لها حس و لا خبر عن اي مظاهرة طلابية يشترك فيها جميع فئات الشعب ..قصدي الاقسام و الفرق.. الكافتيريا جابت ضرفها.. اصل مفيش حد عنده وقت ينزل الكافتيريا ..و الطلبة تلاقيهم دايما ع السلالم ما بين المحاضرات.. مفيش احبة و لا نيلة.. غير قلة قليلة مندسة..و لا فيه شجرة.. غير اللهم شجرة بره عند الكلية الوحيدة المجاورة.. هما شجرتين الصراحة ليهم اسطورة عظيمة ان اللي بيعدي ما بينهم – الله اكبر و الشر برة و بعيد و بعيد عنكم و عن السامعين قولوا امين- بيسقط او يشيل مادة ع الاقل ..و اسطورة عظيمة و حلقة رعب كمان ... المهم ملاقتش الحقيقة و لا بنت شايلة اكلاسير عليه ليوناردو دي كابريو و لا شعبولا حتي...اما بقي عن اتحاد الطلبة و هو ده بقي موضوعنا في حلقة اليوم اعزائي المشاهدين ...فلنااااااااااا هنااااااااااااااااااااا وقفة و اتنين و تلاتة
اول يوم عرفت تعاملت فيه مع اتحاد الطلبة – و تقريبا كانت اخر مرة- هي اول ما استلمت بطاقة الترشيح و اني دخلت الكلية..و قبل ما حتي الدراسة تبدأ كنت واخدة بعضي ع الكلية عشان اسأل علي اجراءات التنسيق الداخلي اللي بيبدأ من اول سنة لاختيار القسم..و هناك قابلوني بتوع اتحاد الطلبة..و قاموا بالواجب الصراحة و زيادة: يعرفك بنفسه و الكلية و الاقسام الكتيرة اللي عندنا,,,و درجات القبول للسنة اللي فاتت ..و يبدأ مرحلة اغراء الطالب بأقسام معينة...حسب هما عايزين يجذبوا الطلبة لانهي قسم السنة دي.. علي السنة بتاعتي كان لسة فيه قسم جديد مفتوح.. و ابتدا غسيل المخ اني ادخله..برغم استقراري علي قسم معين (هو قسمي العزيز الان).و الحقيقة نفس الحكاية حصلت مع ناس كتير و اصدقاء كتير ..نجحوا مع البعض و فشلوا في احيان اخري.. لكن بشهادة احد موظفي شئون الطلبة بالكلية ان اتحاد الطلبة في فترة ما قبل التنسيق الداخلي بيساهموا في زيادة عدد القبول لبعض الاقسام حسب العرض و الطلب لكل عام دراسي جديد..و الخطة دي بتتطلب بعض من مهارات الخطابة و غسيل المخ و الهدوم كمان..و الاغراءات و الترغيب (من ناحية التقديرات المرتفعة في القسم ده علي وجه الخصوص.. فرص العمل الكتييير كأن مفيش غيره يعني..امكانيات السفر ..الداكترة ..الخ الخ) ..و احيانا بعض المعلومات المغلوطة عن اقسام اخري بيكون عدد طلابها كبير فعلا فاكتفت..ايوة بيحصل و الله.. يعني مثلا انا سألت طالب الاتحاد ده (الله يسامحه البعيد) عن قسم هو اصلا فيه علي شروط الدخول (لانها بتفرق من قسم لقسم) اداني و الله معلومة غلط... لان القسم ده كبير فعلا..و و مش ناقص زحمة ( يعني ح يشيلني فوق دماغه ) و عشان متقولوش بتاع و هوا اللي غلطان و لا مفهمش السؤال و لا حاجة.. مش انا لوحدي اللي حصل معاها كدة.. و الحكاية دي شغالة علي مدار سنوات.و حسب الموضة السنة دي انهي قسم
المهم ..دخلت القسم اللي انا عايزاها رغم كيد المعتدي و دخلته بسبق الاصرار و الترصد بكامل قواي العقلية..و و جه تاني مرة الفرصة
الجميلة و اشوف الاتحاد و الامين و كلهم ... دخل حد في المدرجات و يقول احنا اتحاد الطلبة...و الحقيقة بعد السلامات و التحيات كان بيقولوا علي الرحلة اللي طالعة ..و الافطار الرمضاني ابو دي جي في رمضان..و السلام ختام..طب يا بني انتوا ايه نشاطكم مترشحين ازاي.. نلاقيكم فين.. احنا بنقف دايما تحت السلم.. اه و الله نلاقيهم تحت السلم..و الحقيقة تلاقيهم ليل نهار تحت السلم ...مندمجين مع "الطالبات" و الطلبة زمايلهم طبعا
لا اذكر علي مدار ثلاثة سنوات الي الان ان سمعت حاجة عليها القيمة من اتحاد الطلبة ده..زي نشاط ..حفلة محترمة..ندوة ثقافية.. مساعدة الطلبة بتوفير كتب و المراجع باسعار مخفضة.. خاصة ان اللي اعرفه ان ميزانيتهم كبيرة... اقامة معارض من اي نوع..او ع الاقل دعاية ليهم.. يا مؤمن مافيش و لا لوحة توحد ربنا تعلن في الاقسام مين اعضاء الاتحاد عشان الواحد يلجأ ليهم... و لا مثلا مثلوا اي قسم عند العميد و الادارة في مشكلة ليهم..لو شكوي لتغيير جدول الامتحانات .. المهم.. لا ليهم حس و لا خبر..من فضلك انسي و جودهم طالما انت مش صديقو لا معرفة ليهم من اي نوع لكن ما بين الحين و الاخر.. كنا نيجي كدة الصبح.. يدخل شاب من بتوع الصوت الاسلامي ( طلبة الاخوان المسلمين حاليا) يدخل بحماسة و يتكلم عن " الموقف الايجابي" و ان هما رشحوا نفسهم في الانتخابات.. لكن ان مفيش انتخابات ..و ان اسماءهم اتشطبوا..و تلاقي يا سيدي تاني يوم ع السبورة سطر مكتوب ان "لم تجر اي انتخابات لاتحاد الطلاب و تم شطب اسماء المرشحين من طلبة الصوت الاسلامي"..و يجي شريط الاخبار لليوم التاني ان "تم احالة ستة من طلبة الصوت الاسلامي للتحقيق"..و تحديث " تم فصل ثلاثةمن طلبة الاخوان المسلمين"..و اخيرا" شاركونا في الوقفة السلمية لطلبة الصوت الاسلامي عند مبني ..."و غالبا في نفس الوقت بيكون فيه شوية عيال مزأططة انها فازت في الاتحاد ..معروف هما مين.."هما هما بتوع كل سنة"..قالتها موظفة بشئون الطلبة اللي بيتعامل معاهم بعض اعضاء اتحاد الطلبة وقت التنسيق الداخلي قبل بدء كل عام دراسي جديد
غير بقي بعض الملاحظات العابرة ان هما جماعة بينجحوا و يتم اختيارهم كل سنة.. شعبيتهم بتكون من القسم بتاعهم.. مع العلم ان كليتي فيها بتاع اتناشر قسم..و اغلب بتوع الاتحاد دول متركزين في قسم واحد.. وهما عبارة عن شلة بتسلم لبعض..و بيعتمدوا علي الصداقات و المعارف و يعرفوا مين في الشؤون و مين في رعاية الشباب..ومين حليوة راضي عنه امن الجامعة
المهم.. مرت السنون (زي الافلام كدة) و و لا الحوجة ليهم ..لكن الحقيقة ماكنش ينفع تمر سنة جديدة من غير ذكري جديدة ليا مع اتحاد الطلبة.. لكن ذكري من العيار التقيل!! انتظرونا
