رغي..

حداشر عادة غبية بعملها- معرفش ليه حداشر، ومعرفش ح يكملوا ولا لأ:ه

أقعد أدور على حاجة عدلة في التلفزيون وبعد ما ألاقي برنامج ولا فيلم ولا حفلة لأم كلثوم..بأكتم صوت التلفزيون واشغل اغاني ع الكمبيوتر

مش بنام غير على صوت موسيقى أو فيلم - أو مؤخرا حلقة من جرايز اناتومي- تفتضل تشتغل وتتعاد لغاية ما اروح في النوم

مش بأفوق غير لما اكل شيكولاتة صباحا

بأقرأ الجرنان من آخر صفحة لأول صفحة

بحب اشرب حاجة مع الاكل...مش بيبسي وكدة..انما عصير (برتقان غالبا)...او كركديه!!!ا

مبعرفش انام على مخدات...بأنام على مخدة سفنج رقيقة جدا أو حاجة "فلافي" اوي..وغالبا بسيبها بعد شوية و راسي تبقى ع السرير على طول

مش بنام غير على بطني اساسا!..وعلى راسي مخدة

لما بكون متضايقة جدا جدا جدا...بأطبخ! ولو نص الليل! وحتى لو مش جعانة- زي ما بأقاوم رغبة شنيعة دلوقتي في اني اقوم احضر اكل

لما صفحة تعجبني في كتاب - أو أكون عايزة منها حاجة- بتني طرف الصفحة من فوق، وممكن اكتب ع الطرف ده تعليقي

مبقولش كل اللي عايزة أقوله لما بأعوز -بحتاج-أقوله

بتأثر بالأحلام بتاعتي..وتكدرني لفترة..وبقلق من تفسيري ليها أو رمزيتها

بأكدب تماما..لما بأقول "كويسة" .. "فاين" ... "مفيش" ... هادية"ه

لسة بأخد زولام- 3 علبة-على اساس انه بينيم..أو انه يبطل عياط

بأحط الموبايل تحت المخدة لما بأكون نايمة..وباسنده ع المخدة واحط راسي عليه واتكلم فيه كدة..ومن هنا غرق مني مرتين لما عيطت والدموع دخلت جواه- اي نعم

بأتوه كتير...وبأنسى وبحتاج اللي يفكرني انا ليه هنا - مجازًا وحرفيًا

بتفرج على إعادة مسلسل أو برنامج بحبه، حتى لو بيتعاد للمرة التالتة

بأهلوس بغباء - زي دلوقتي- لما بأكون مش متظبطة ومتوترة وفيا حاجة مش معروف مصدرها، وبكتب وبامسح كتير

____

عدوا الحداشر

بس كدة..

pic.: Agnes, from Despicable Me