عشقك ندى

لما كلمتها في يوم كانت السما ضيقة فيه اوي، رزان بقلبها المسكر كان كلامها وضحكها الطفولى حضن كبير اوى للصمت بتاعى! طلعت عندها البيت، وكنا زي عيلتين فرحانين ! جريت تورينى المكتبة بتاعتها وانا شبطت في شوية كتب، واقفين ع السرير احنا الاتنين..كان نفسي اقولها تيجي نطنطط عليه؟! بس مش مشكلة..ساعتها قلبى كان عمال ينط على الترمبولين رغم انى كنت باين عليا انى هادية تماما ونيمانة كمان! عرفتنى على اصحابها الصغيرين،اتفرجت عليها وهي بتنفخ بلالبين الصابون، وريتنى رسوماتها الملونة بألوان قوس قزح اللي في قلبها، تديني منديل ورقى عليه فراشات وورد وعصفورة، تحط في ايدي حجرة بيضا اوى من الرخام وتقولى اتمنى امنية وح تتحقق!! شيلتها من يومها في جيب الشنطة وماضيعتهاش وكل شوية احضنها جوا كفي اوي ..يمكن! ساعتها حسيت اننا زي فيلم شركة المرعبين...لما اول ما بوو روحت البيت وفرحانة بس في نفس الوقت عمالة توري "قطتها" الحاجات اللي بتحبها! يومها نزلت مزقططة اوى من عند بوو بتاعتى ..رزان! وانا مروحة في التاكسى، كان على وشي ابتسامة رزان رسمتها ولونتها ورشت عليها سكر كمان! ومعرفتش اشكرك ساعتها ازاي انك كنتى عمود نور اصفر (مش وحيد) بينور عتمة القلب والسما كمان!ا
*
النهاردة،وسط نصبة الورق اللي انا عملاها عن كلام رخم غلس لازم اعرف فيه اي حاجة عن فوكو ودريدا ونيشتة وهباب ازرق، كلام مفيهوش اي ريحة فراشات وألوان ولا باحبه اصلا، رزان كلمتنى..بتقولى عارفة تدوينة فانتازيا لما سافر من اسكندرية عشان يروح يديها شيكولاتة؟! اقولها بعدم تركيز وبعض من السطل المعتاد: يمكن مش فاكرة..! قالت لي طب نزليلي السبت عشان اديكي شيكولاتك!(ملحوظة الحمد لله ان معنداش سبت عشان تطلعيلي يا انسة)! من البلوكنة، شيفاها! رزان واقفة ادام البيت..!! جت عند الباب وادتنى حضن كبير اوي دافى كنت محتاجاه من غير ما حتى اطلبه او اقولها! حضن مسكر احلى من الشيكولاتة اللى باحبها! فكرتيني برضه يا رزان في الفيلم لما عدا مدة وجمعوا الباب المتكسر في الشركة عشان "قطتى" يروح يزور بوو! واول ما فتح الباب وسمع صوتها بتقوله "قطتى" كان على وشه ابتسامه مريحة وجميلة اوي بتقول ان قلبه فرحان!!النهاردة فكرتيني انا انبسطت ازاي المرة اللي فاتت (اللي يمكن عدا عليها اكتر من شهر اهو) ونفس الابتسامة اترسمت من تانى!ا
*

معرفش مين فينا كان محتاج شوية الحضن والدفا دول اللي مكملوش خمس دقايق...بس الدفا كان متبادل!ا

*
إلى قطتى... وإلى بوو...وإلى قطعة الشيكولاتة...وإلى الحضن الكبير اوى اللي يساع السما...وإلى الدفا اللى دام للحظات في اليومين المتفرقين دول...لكن امتدادهم واثرهم يمدد رقعة الدفا في القلب....إليكي....ممتنة ليكي اوي

:)
مش باقولك.."يا زارعة ليلي وسط صمت الكون غنا"ه!ه

____

العنوان والاقتباس الاخير من أغنية منير اللى انتى اول حد بعتهالى :)