في الحلقة السابقة من كلام نواعم اتكلمت البنات عن الحجاب و الالتزام
و النهاردة كانت مواقفهن من الزواج و خاصة جواز الصالونات
اليكم بث حي من جلسات النميمة و قعدات الانسات في الشغل و تلقين الامهات و زميلات الكلية و احاديث التليفونات و عند الكوافير و في الكافيه و النادي
كلام نواعم
...
الو.. ازيك يا عروسة؟ مين العروسة؟ انتي يا جميلةطبعا.. ايه رأيك في عريس حليوة و ابن ناس..و عنده 26 سنة و بيشتغل محاسب..و عنده شقة و عربيةو نفسه في واحدة حلوة زيك تعرف ربنا و بنت ناس محترمين..هه ايه رأيك؟ هو يبقي ابن بنت عمتي..زي ابني بالظبط..قولتي ايه يا عروسة؟
...
بصي تعالي نعمل قعدة و شوفيه.. يمكن يعجبك.. فيها ايه يعني..و بعديها ابقي قولي رأيك اهو تشوفيه..ح تقولي لا من قبل ما تشوفيه؟
...
يعني ايه عايز واحدة متربية و ملتزمة و محجبة؟ لو خبط علي باب الجيران غلط ح يلاقي واحدة متربية و ملتزمة و محجبة!!
...
بصي.. ما هو يا بنتي الكلية ده سوقكم.. لو ماطلعتيش من الكلية و انتي الدبلة في ايدك فرصك ح تقل بعد التخرج و الشغل..و مين بقي ح يرضي يتجوز بواحدة عندها خمسة و عشرين و هو قصادة بنت تسعتاشر اللي في الجامعة لسة
...
اهي البت رحاب اهيه قعدت ترفض ده وده و تقول الدراسة و الشغل و الدراسات و البتنجان و اهي قاعدة بطولها و عندها تلاتين سنة.. عايزة تبقي زيها كدة؟؟
...
عارفة انا كنت عاملة زيك كدة... ماما قعدت تقول لي العرسان دول زي النعمة اللي بترفسيها لما ترفضي المبدأ من الاول.. حد يرفض النعمة؟؟ بتتبطري؟ ده حتي يبقي اسمه حرام
...
طيب..ح خليني معاكي.. انتي مش عايزة واحد يجي من الباب.و بتسميه جواز صالونات فاشل..و في نفس الوقت مش عايزة واحد ييجي من الشباك و يقولك بحبك اعبدك اموت في هواكي و مقطع السمكة وديلها..مش ده كلامك؟ طيب عايزة تتجوزي ازاي بقي..؟
...
معندوش مانع انك تشتغلي و لا اي حاجة... اهو شايف اخواته البنات قصاده..قعدي معاه في قعدة عائلية وخدي اسألي عنه..و لو ارتحتي يبقي اتوكلي علي الله..و في الخطوبة يا ستي ابقي اعرفي طباعه اكتر
...
هو مينفعش اللي جي يتنيل يتقدم ده يكون عارفني..و عايزني؟..مش لازم يعني اكون ساحراه و مدوباه يعني من اول نظرة.. بس يحسسني انه جي عشاني... مخصوص ليا.. و لا ايه؟ فرق ايه عن غيره..و فرقت ايه عن بنات غيري بالنسبة ليه؟
...
بصي.. هو بيشتغل في السعودية...و مش نازل اجازة الا بعد شهرين.. اهو اسألي عنه..و فكري و ادي نمرته اتكلمي معاه..لو حصل في الامور امور.. يبقي في فبراير الجاي اعملوا الخطوبة.. انتي مش شفتي صورته؟ خلاص..عايزة ايه بقي؟
...
شوفتي يختي كميلة عليه...ابني اسم النبي حارسه لسة قصادة سنة جيش.. تكون هي خلصت..و ابوه مجهزه من مجاميعه..احنا بانيين و الحال ميسور الحمد لله..وربنا يوفق..هه نيجي نشوف العروسة امتي؟ و بعدين انتي امها برضه وعيها ..و لا هي من بتوع اليومين دول مش عاوزة اتجوز يا ماما!؟
...
لا ماكنش ينعز... بيقولك عايز واحدة ما تشتغلش.. وعارف اني لسة في الكلية في سنة تانية.. ومعندوش مانع..يبقي من الاخر عايز واحدة يشكلها علي كيفه.. تقعد له جارية في البيت..من بيت ابوها لبيته..ودمتم
...
ياختي بنت خالي اللي قدنا اتخطبت ماشاء الله..و بنت عمتي اللي اصغر مننا اتخطبت راخرة..واحنا اهو ح نتخرج و لا شفنا قراية فاتحة حتي!! كدة خطر علي عقلي الباطن
...
يا ماما هي لسة نصيبها ماجاش.. ليه كلكوا عملينها ازمة و معقدينها.. ح تم 28 الشهر الجاي؟ وايه يعني؟ هي كويسة و بنت حلال و تستاهل كل خير.. بس كفاية ضغط عليها كدة..مش بايدها
...
جايبين لي واحد مطلق و معاه عيال عشان انا عندي 32 و لسة متجوزتش؟؟؟؟ يبقي قلته احسن..و ايوة اعيش بطولي من غير راجل و من غير ظل الحيطة كمان
...
اديكي شايفة طنط سعاد.. اهي عدت الخمسة و اربعين..و ماتجوزتش..و والله كانت احلي بنات دفعتنا..و مؤدبة و محترمة..و كانت متجهزة من الابرة للصاروخ..لكن ربنا ماارضش..و جهازها اهو يا وزعته يا باعته يا استعملته.. ربنا ما يكتب علي حد
...
يا بنتي متكونيش عبيطة...عايزة تبقي زيي تتجوزي وعندك اربعين سنة.. و تخلفي و حياتك في خطر و مش عارفة ح تعيشي ليعيالك دي قد ايه..ماهو اللي فات مش قد اللي رايح..انا قعدت في وش امي وهي تندب حظها و تتحسر عليا...وكاني عملت جريمة... بس اهو ربنا كرمني في الاخر
...
شعرك طويل و لا قصير؟؟ وده من ضمن الشروط اللي نازلة في لايحة جنابه في العروسة المطلوبة؟؟ انا اعرف يسأل محجبة؟ مش محجبة؟ بتعرف تطبخ؟ بتشتغل؟ مش شعرها
...
يا جماعة هو ايه بيعة و شروة يييجي يتفرج عليا لو عجبته يقوم مكمل اللعبة لو لا.. يبقي مخسرناش غير علبة الجاتوه..انتو بتفكروا ازاي؟؟ واحساسي و كرامتي؟
...
طيب..ماشي.. انا بقي عايزة عريس يتحدث الانجليزية بطلاقة فشر توني بلير.. و عريض المنكبين طويل القامة مشرئب الفلنكات...شلولخ.. و عايزاه عين خضرا و عين زرقا..و بيلعب رياضة.. و بيحب يقرا كتب غير ميكي جيب.. و اهلاوي.. و عنده ميكروباص..و بيحب الممبار..اه و لما ييجي اعجبه و اهوسه..و هوة بعد كل ده ميعجبنيش و انا قوله مع السلامة السكة اللي تودي...جتكم القرف هو احنا كمان مش من نفسنا ننقي و نتشرط و نختار؟
...
مينفعش..يعني ايه بنت تسافر تتدرس..هو انتي ولد؟ لما تبقي تتجوزي ابقي سافري مع جوزك و اعملي اللي انتي عايزاهّ!! اه و عشان برضه متحلميش.. مفيش راجل ح يسافر ورا طموح و احلام مراته.. يعني موضوع الدراسة برة ده انسيه تماما
....
بصي جيبالك عريس عنده 23 سنة و تاني 33 سنة..متقوليش علي حد لا..شوفي ده و ده و اقعدي معاهم و صلي صلاة استخارة..و شوفي اللي ترتاحي له اكتر
...
يا عبيطة.. اديكي شايفة انا و عمك اهو متجوزين اتناشر سنة و قعدت اقول عايزاه يا بابا و باحبه يا بابا و عايزة من ده يا حوزونبل و اديني اهو متنيلة علي عيني قصادك.. قطع الحب و سنينه.. لا من نفس مستوانا و لا تربيتنا و لا اي حاجة..و بيطلع عقده عليا.. و في الاخر طلع لايف علي واحدة اصلا...لكن اللي ماما جايباهولك ده عارفين اصله و فصله.... عملنا ايه بالحب بلا وكسة
....
ماما في الرايحة و الجاية تقولي بلا نيلة انا و انا قدك كنت فاتحة بيت..ده انا اتشبكت و انا بنت تسعتاشر.. وانا اهو ح اتم 23 و حاسة اني بتخنق..و اختي الاصغر مني اتجوزت..هو بايدي؟؟؟
..
.
.
.
ده اللي بعض من اللي بيدور في جلسات النواعم من مختلف الاعمار... ده واقع بنعيشه قايمين نايمين عليه
اكييد في حاجة غلط.. فيه موروثات..فيه تطبيق خاطئ للدين.. عادات..و تقاليد..
.
.
طب ده مش بيؤدي الي الخطوبة المتسرعة و قرارات الارتباط السريعة؟
مش ده بيؤدي الي شعور البنت انها عنست بدري رغم انها ما رتكبتش جريمة ؟
.
.
ولا انتوا ايه رأيكوا
