Sunday, March 28, 2010

لأن التعاسة قد طالتني في عظامي



كنتُ في أعماقي أبكي دونَ أن يلحظَ انكساري أحدٌ
-سوزان عليوان-

*

والبكاء "المكتوم" هو الشئ الوحيد الذي أجيده الآن

*

يا رب..لَصمني
___
الصورة والعنوان (بتصرف) أيضاً لسوزان عليوان

Thursday, March 25, 2010

أسكن بيوت الفرح..آه ممكن


آمنلي بيت مطرح منك ساكن
مش هَم يكون طابق منو آمن
مشتاقة اشوفك ...لكن
لكن... لكن!ا
*
معقولة يظل قلبي معلق بالمناطق
والأيام تمر وشارع منو رايق
موضوعي باقي عالق.. عالق
عااالق!ا
مشتاقة اشوفك!!ا
*
بيحكوا بيقولوا عنك سعد ومازن
محنك و ضليع و موصل.. ما بيحركلك ساكن
مختار الحارة وماكن.. لكن ، مشتاقة شوفك
مشتاقة اشوفك..مشتاقة اشوفك..مشتاقة اشوفك
*
آمنلي بيت مطرح منك ساكن
مش مهم يكون طابق منو آمن
مشتاقة أشوفك
مشتاقة أشوفك
مشتاقة أشوفك
مـشــتــاقــة أشـــوفـــــك
!!
______

(لطيفة)
pic. from movie "UP"
والعنوان أغنية لمنير

Tuesday, March 23, 2010

مقاومة

:رداً على كل حاجة بتوجعني

أنا مش عاشق ضلمة..ولا زعلت الضيّ

مسير الضي لوحده..ح يرجع

ومسير الضحك لوحده.. ح يطلع

مابيجرحش..ولا يئذيش

Saturday, March 13, 2010

عشر سنين.. إلا عُقلتين



ما تيجي نهرب؟؟ .. قالتهالي وهي بتلم شعرها ديل حصان قصير ورفعاه شوية لفوق. هي عينيها واسعة وبني كدة من امتى؟!نهرب...نهرب بعيـــد! عند البحر مثلا..نقعد ورا الكانتين ومحدش ح يشوفنا ولا دادا سميرة حتى فحنهرب !! -- رغم انها مجنونة قصيرة، وفكرتها مجنونة جدا..بس أنا عايز أهرب معاها ونروح نجيب قواقع من عند البحر! - بص، بعد المدرسة نكون مستخبين ورا الكانتين... المدرسة ح تنام وتقفل...واحنا نتسحب ، عم صلاح ح يروح يشرب شاي واحنا نهرب من الباب!! ونروح البحر! -- طب ويا فالحة ح نروح البحر ازاي لوحدينا؟! -- سكتت وتنحتلي كدة : هو انت متعرفش الطريق؟؟؟؟!ا

كسفتني...مبعرفش اسوق زي بابا عشان اوديكي هناك!!ا

ولا حتى بالعجلة؟

ولا حتى بالعجلة..الطريق طويل جدا يا عبيطة!!ا

بس متقولش عبيطة!!وعينيها دمعت...مش عارف عشان زعلتها ولا عشان مبعرفش اسوق فمش حوديها البحر!ا

خلاص بقى، متزعليش!! وطبعا خوفت اطبطب عليها لا تضربني زي ما ضربت حسن الغلس لما شد شعرها!ا

مسحت عينيها في كم قميص المدرسة اللي زراره دايما مفكوك معرفش ليه..طب انت ح تتعلم السواقة امتى؟

لما اكبر وابقى قد بابا طبعا!ا

ايه؟؟؟ هو انا لسة ح استنى تبقى قد بابا!! ما أيمن اخويا بيعرف يسوق وهو مش قد بابا وعنده... عنده ...عنده اكبر مني بعشر سنين! -- وسكتت كدة شوية..انت اكبر مني بكام سنة؟!ا

بشهرين! يبقى فاضلي عشر سنين الا شهرين ابقى قد أيمن واكون اتعلمت سواقة!!ا

طبعا بأعرف احسبها..أنا اصلا اللي أكبر منها وأشطر منها في حصة الحساب..ماهي لو بتركز مع "ميس سماح" كانت عرفت تحسبهم لوحدها ان عيد ميلادها في البرد في الامتحانات وانا عيد ميلادي في أجازة الصيف.. وبعدين هي بتنسى ليه عيد ميلادي..اشمعنى انا فاكر عيد ميلادها!ا

فقعدت تعد على صوابعها..بصراحة كنت عايز اضحك على منظرها..وهي محتاسة كدة..بصوابعها الكتير..ه

واحد..اتنين..خمسة..سبعة..تمانية..تسعة..عشرة ونشيل من العشرة عقلتين..يبقى ...كل دول!!!!! - هما فعلا عشر صوابع الا عقلتين كتير شوية بس صوابعها صغيرةاوي وبتضحك زي العسلية الرفيعة- طيب خلاص!! ح نهرب بعد عشر سنين الا عقلتين وح توديني البحر! باي باي بقى عشان أيمن جه هناك اهو..متنساش كراسة الرسم بكرة عشان الميس متزعقلكش وانا حأعلمك ازاي ترسم فراشة .. متخافش!ا


مجنونة.. بس عايز اروح معاها عند البحر!!ا

_________

تمت

Wednesday, March 10, 2010

توهة


كل اللي محتاجاه بجد..ان حد ينتشلني من كل ده ويوديني مكان هادي اعرف اتنفس فيه! انا حتى النفس مش عارفة اخده بجد! مكان بعيد عن كل تفكير وقلة نوم والشغل وزحمة الشارع والمواصلات و المذاكرة والكتب والتسجيل والمواعيد اللي عمالة تجرى ورايا، مكان بعيد عن كل اختبارات الصبر والقوة والتماسك اللي كل يوم بقيت قسم عليا! مكان فيه اعرف انام ..اعرف افكر ..اعرف اشوف الحاجات فيها بألوانها الطبيعية.. مكان ارجع لي فيه! ارجع ليا.. اعرف افرح واعرف افكر واعرف اخد قراراتي..واعرف اشوف من تاني! مكان يوريني النور والضي في اخر الطريق، لأن العتمة بتاكل في روحي دلوقتي! مكان محدش ح يقولي فيه اني شكلي مجهد واني مالي اليومين دول !! مكان ح اعيد فيه ترتيب كل الاوراق...ح ارجع اتعلم ازاي اعرف انام اول ما حط دماغي ع المخدة! مكان ح اشد فيه الفيشة واشوف لون الهدوء ايه! عايزة اشوف السما.... البراح! عايزة اشحن طاقتي من تاني عشان اقدر ارجع اقوى... واستنى! مكان ابقى ليا فيه..مكان محدش فيه بيعتمد على قوتي وتفكيري ووجودي لاني مش لقياها ولا لقياني دلوقتي!عايزة اعرف اركز تاني..مش التوهان اللي بقيت فيه! عايزة اطلع برة العتمة! عايزة اضحك! عايزاني!أنا بجد مش بأهرب.. بس تعبت... انا بجد نسيتني قبل كدة كنت ازاي.. قبل نوبة العياط المفاجئ، والأرق، والاجهاد، والاكتئاب، والخوف، والسكوت، والضلمة ..قبل الدوامات اللي عمالة تدخل في بعضها دي! ا

أنا بجد كنت بأفرح ازاي ؟؟

Getting Out of Control...

.
.
The number of times I think of giving up...is getting scary!
It consumes much of my soul to stick around!
It kills me...!
.
.

Monday, March 1, 2010

الرحمن الرحيم

يا رب...شكراً
(مش ممكن اتوه واضيع من النور وأنا في حِماك يا رب)