Monday, January 26, 2009

رسالة شكر الى...ربنا



ولأني مؤمنة ان ربنا بيبعت اشارات وملايكة للواحد عشان يعرف قد ايه ان الحياة حلوة وان فيه نقطة نور مستنياه, فـ دي رسالة شكر لربنا علي نعمة الابتسام..والحياة

:(من يومياتي)

تفاصيل صغيرة مسكرة ملفوفة زي غزل البنات - عن 26 يناير 2009


شكرا لـعلي الحجار اللي متأكدة انه بيجي يوشوشني مخصوص ويوعدني بالليل قبل ما انام ان "بكرة جي اخضر وانتي بتتبسمي" ه



شكرا لاني عديت ع النيل وصبّحت عليه واخدت نفس كبــــيــــــر وانتعشت


شكرا علي رسالة "صباح الفل" اللي جت لي وانا راجعة في التاكسي وخايفة اتأخر علي ميعاد الندوة..فابتسمت


شكرا لاني سرحت في التاكسي وانا باقرا "سراج" لرضوى عاشور, وانا شامة ريحة اليود بتاع بحر اسكندرية, وحسيت باللؤلؤ في ايدي, تخيلت الغواص وقصر السلطان, فطبعا سرحت ونسيت انا نازلة فين


شكرا لاني ضحكت اوي مع منى ونوران


شكرا علي كوفية بينك ف موف من عمايل ايد رزان, خيوطها كلها حب ودفا ووشوشة


شكرا علي الجواب الملون اللي هي كتبتهولي كمان...بقلبها اللي زي الفراشة ده


شكرا على دار الهلال اللي لقيت فيها "نقطة النور" وجبت منها نسخة تانية لـ "رأيت رام الله" فاستبشرت خير


شكرا للموظف اللي في دار الهلال اللي وقع سكر مرشوش علي الفاتورة بتاعتي..وبقت "فاتورة مسكرة" وضحكنا اوي


شكرا لان امنيتي اللي قلتها هنا.. نفسي في العشر سنين الجايين اكون شفته وشكرته..انها تتحقق النهاردة واقوله "استاذ بهاء, شكراً, شكراً علي ابناء رفاعة"ومضى ليا كمان علي "واحة الغروب" وانه وقف يتصور معانا, وان يمضي علي ه"نقطة النور" عشان تبقي بدايتها كلها نور


شكرا علي طبطبة رضوي عاشور علي ايدي .. وشكرا علي الدفا بتاعها..وتواضعها, وشكرا لانها هي

وشكرا للست لانها بتغني ليا دلوقتي

وكمان شكرا علي صوابعي الملزقة بغزل البنات البينك اللي كان بقالي زمن مش لاقيته..والنهاردة قابلني راجل سمح بيه علي باب المعرض عشان يختم اليوم المسكر ده :)ه

الحمد لله

:)

____

الصورة لسوزان عليوان

12 comments:

انا حره said...

لما بيكون المود تمام بنفرح اوى بالتفاصيل البسيطه ونترجمها لرسايل حب ونعمل منها ابتسامات تنعش قلبنا وتسعد ايامنا

لكن لما المود بيقلب اعوذ بالله بتبقى الدنيا اسود فى اسود

يارب دايما فرحانه كدا وبتعلمينى الاحساس بالتفاصيل الصغيره

Ola said...

Ya3ni a3mel fiki eah!! teftekeri el iodine beta3 Alex w mateftekerneash?!! yah 3al bani2adam yah:)

Anonymous said...

و شكرا بحجم الشمس لالك
كتير انبسطت بكلماتك

كوني بخير يا نقية
صديقتك من غزة
:)

مـحـمـد مـفـيـد said...

شكرا لقلمك المتفائل

خيرالدين said...

تهانينا

Ma 3lina said...

Love it ;))

thx for the optimistic dose of today

تــسنيـم said...

الله عليكي يا بنتي ايوة كده
حبة ضـي

:)

Hassnaa said...

جميله اوي بجد
تسلم ايديكي :)

سها السباعي said...

شكرا لله اولا

شكرا لكي على كل المنمنمات التي تسعدنا من القلب

واختلف مع انا حرة

حتى في وسك الكآبة

لابد ان نبحث عن مخرج

khaled said...

السلام عليكم
Epitaph_1987
أكيد بُكرة أجمل وأحلى
إستمرى وإطرحى أفكارك
دومتى بكل خير

Ahmad Hegab said...

sa3eeed enk sa3eeeda :)

Epitaph1987 said...

lol...
الواحد افتقد تعليقات ديفيد سانتوس والله :D

_____

انا حرة
ولما الموود بيقلب لازم ندور علي نقطة النور
دمتي سعيدة :))

frustrated,
ya basha awel maygy esm Alex nefteker 7adretek 3ala toooool tab3an :)))


anonymous, صديقتي من غزة
وشكرا بلون القمر الفضي لاحساسك الجميل
وزيارتك الاجمل :)

محمد مفيد
:) شكرا لتشجعيك

احنا
الله يهنيك :)

ما علينا
العفو...زورونا تجدوا ما يسركم :D


تسنيم
الضي موجود
بس احنا نشوفه :)

حسناء
ويسلم لي مرورك
:)


سها السباعي
اتفق معاكي
وشكرا لمرورك
ودمتي مبتهجة :)


خالد
وعليكم السلام ورحمة الله وبركاته
انا مع وعد علي الحجار ان
"بكرة جي اخضر "
واحنا بنسبق بالابتسام
دمت سعيد وراضي :)


أحمد
ومبسوطة انك مبسوط :)