Wednesday, January 24, 2007

فاصل اعلاني: دع الخلق للخالق






قاعدة مستمعة باذاكر – خير اللهم اجعله خير مش عوايدي- و باسمع الجميلة داليدا – باموت فيها الصراحة- بتغني حلوة يا بلدي, و يا سلااااااااااام و جون و جون و جووووووووون,,,اه و الله دي مصر دي ام الدنيا, مفيش اي مشاكل و الرغييييف كبيييييييييييير و المواصلات سهلللللللللللللللللللللللة..و قمر يا بلدي.. اديني كمان يا داليدا يا من شبرا- مصرية يعني بجد
...
دخلت الست الوالدة, معها لوكشة جرايد, اشي قومي علي معارضة علي مستقل و لبست النضارة – و تقمصت دور المحلل الاستراتيجي السياسي,, و ده انذار سئ من سبيله انه يعكر صفو القعدة الحلوة بتاعة داليدا و حلوة يا بلدي.., و الاحلام اللي بقي لونها بمبي..و ان ماما ح تشجيني بكام بيان سياسي من اللي هما.,.اول ما تيجلها الفرصة.. ربنا يستر
....


المشهد الاول : توت توت قطر صغنطوت


___
و النضارة علي طرف مناخيرها,,,,بدأت ماما : لا حول و لا قوة الا بالله
تؤتؤتؤتؤ
.
يا فتاح يا عليم يا رزاق يا كريم ( في سري طبعا) .. ايه يا ماما؟
.
ح يعملوا فينا ايه تاني بس؟- تقول بتأسف شديد
.
مالك يا ست الكل؟؟؟
.
التوربيني اللي قش العيال ديا, و لا الداخلية حست بيه الا فين و فين,, دلوقتي بس بيتكلموا علي اولاد الشوارع... يجيوا يشوفوا الناس المرمية في الشارع مش لاقية اللضا و العيال اللي بتشم و وو
.
بس اهدي يا ماما...دع الخلق للخالق... هما كانوا بس ماكونوش فاهمين التوربيني ده اسم و لا صفة... عقبال ما لاقوه... عشان خاطري . اقري حاجة تانية... صحتك


...


مشهد الثاني بعد الاول بخمس دقائق:ساعتها بتنور في الضلمة
___
لا لا لا,,, حسبي الله و نعم الوكيل
.
ايه يا ماما تاني؟
.
شفتي الراجل وزير الثقافة؟
.
عمل ايه تاني المنيل؟ حجاب تاني؟
.
لااااا.. قال ايه شيرين رضا كانت بتشرب قهوة عند الامير بندر و لا بنجر الساعة تلاتة الصبح!!!!! ازااااي و ازاااااي يمسكها بوليس الاداب و يعملولها محضر... قام ادخل المنيل عشان يقطعوا المحضر !!! ده امبارح مسحوا بيها الارض في البيت بيتك
.
يا ماما... دع الخلق للخالق... اكيد كان بيقولها ساعتي بتنور في الضالمة...اقري في صفحة الفن مش الحوادث..و ترجعي تقولي البلد و مش البلد
.
طيب..زاكري انتي بس


...


المشهد الثالث بعد الاول بعشر دقائق: واوا يح
__
استغفر الله العظيم.. اوووووووووووف
.
ايه يا ماما.. تاني؟ شيرين لقت الساعة مش بتنور؟؟
.
لااااااا كاتبين في "عين" عن حفلة راس السنة بتاعة هيفا في لبنان.. و بيقولوا علي فستان اللي كانت مش لابساه ... مش حرام ده..و لا مش حرام؟
.
حرام؟ هيفا؟؟؟و لاحرام علي "عين"؟ دع الخلق للخالق...و بعدين انتي بتشتري "عين" ديه ليه اصلا؟


.


اختك اللي جبتها!!


.


في سري: (تسلم ايدها)- وريني كدة؟


.


مش جايبين الصور!! بيقولوا غير صالحة للنشر.. ناقص ينشورها كمان اياك


.


في سري: (يا خسارة)- طب خلاص بلاش منها الاخبار اللي تحرق الدم دي
.
طيب شفتي الموضوع اللي في صوت الامة عن سعد الصغير و المسجد اللي بناه؟؟ بيحلل الفلوس يعني ده و لا ايه... اهم بيقولوا الجامع محدش بيعتبه.. الناس مستحرمة
.

دع الخلق للخالق... ربنا اعلم بالنوايا.. مش يمكن بعد ما الحمار سابوه قال يكفر عن خطاياه


___


مشهد رابع بعد الاول بخمسة عشر دقيقة: هايدلينا بهدلتينا
___
ماما؟؟ مفيش حاجة فرايجي تقريها؟؟ تخدي تسمعي داليدا؟؟
.
خليكي في حالك
.
لا حول ولا قوة الا بالله
شوفتي هاني سرور؟


.
اه شفته في فرح كريم عبد العزيز ماله؟


.
كريم مين و فرح ايه
عايزين يموتونا بأي طريقة و السلام


.


كريم عبد العزيز عايز يموتنا ليه؟
.
كريم مين يا بنتي
اكياس الدم الملوثة... عايزين يخلصوا منا.. صحيح دي مش هايدلينا دي بهدلتينا... ماهو لا قطر نافع و لا توربيني نافع و لا سفاح معادي و لا عبارة و لا طيارة... قالوا نص البلد عيان نموتهم كدة بقي.. ننقلهم دم كله فيروسات و كبد و ايدز و قرف علي دماغهم
.
معلهش..دع الخلق للخالق..و بعدين زي اعلان بيوكلينا كدة بتاع الغسيل : شعار الحكومة الجديد ح يبقي : هايديلنا و فرت كتير علينا
.
طب ذاكري ذاكري... اما نشوف اخرتها
.
اذاكر ايه بقي مادام ح نموت ح نموت؟

ذاكري باقولك
...


المشهد الاخير: بعد معرفش كام من المشهد الاول: اضحك كركركركرررر


___
ههههههههههههههههههههه
.
الله اكبر...ماما ضحكت
.
فيه ايه يا حاجة؟ قبضوا علي شيرين؟ الساعة طلعت بتنور؟ سعد الصغير طلع بيحب الحمار فعلا؟ هاني سرور مسكوه؟ وزير الداخلية استقال؟ بتاع العبارة رجعوه؟ اكياس الدم طلعت كركديه؟
.
لا لا
.
امال؟
.
بيفكروا يعملوا اعدادي اربع سنين مش تلاتة ههههههههههههه


..


صمت رهيب


..
و الله العظيم حلوة يا بلدي

.
و عمار يا مصر


و يجعله عامر


.


_______


اسدل الستار في ساعته و تاريخه


و البلوج بلوجكم


فاصل اعلاني


بعد انتهاء المتحانات الحمد لله


و كسر ستين قلة و راها


سنعود بعد قليل ان شاء الله


اجااااااااازة من اي حاجة ليها علاقة بشكل الحروف

Friday, January 19, 2007

كش ملك



الـخـوف و الـحــب


يلعبان الان لعبة شطرنج مصيرية


فقط شاهد المباراة في صمت


و لن يكن الضحايا


الا


انا و انت



Tuesday, January 16, 2007

Dedicated to: DoN & ZoZ ..وشركاه







اللقا عمره ما بيطول
لكن
ايامنا الحلوة في القلوب
يمكن
نتفارق لسنين
لكن نتقابل
بعدين
لكن علي
طول
ناجحين علي طول


....
فاكرينها؟,,و ايوة طبعا عمري ما نسيتها .. فاكريني انا كدة بأولها؟ ... كنا بنغنيها في المدرسة.. ايوة انا فاكرة اللحن,,,حاسة انها بتتكلم عننا اوي..ما هي حياتنا كانت هناك.... وهو ده الحنين - هو ده كانت بداية حوارنا


...


Once upon a time, there
was a tavern


Where we used to raise a
glass or two


Remember how we laughed away the
hours,


Think of all the great things we would do
...
الحنين... اجمل حاجة شكلتني... و جزء كبير مني.. الكلمة نطقها اللغوي بيحمل معناها .. "الحاء" تنهيدة من القلب ع الاايام الجميلة اللي راحت.. توصل لحرف "النون"... نمسكه جوانا لاتهرب مننا الذكريات.."مد الياء"... جوانا و عايشة معانا...و نخاف لتهرب مننا.. فنمكسها بايدينا و اسناننا "حرف النون الاخير"... ايوة هو ده الحنيييييين بعينه



...


Those were the days, my friend


We thought they'd
never end


We'd sing and dance forever and a day


We'd live the life
we'd choose


We'd fight and never lose


For we were
young and

sure to

have our way


....


The Trio


DoN- Z0Z- GoG


...


و
الحنين.. يعني حاجة جميلة ترجعني للمدرسة... و ميسز نعمت الله يرحمها المديرة في اعدادي..و تحية العلم..و المربع...( شخصية حقيقة المربع ده) .و معمل الكيميا و يوم ما كسرنا التييووب ..و حفلة المدرسة..و عيد الطفولة..و سندوتش البطاطس و الفول..و اللوليتا...و ميس يسر..و العسلية لمستر اسامة و نقوم هووب مصورينه متلبس ... و مستر علي ..و اول حصة في تالتة اعدادي : يا محيط يا هادي انت مساحتك كام؟" و احنا واقعين ع الارض من الضحك..و نبيأ و نجيب قصب..و تدخل ميسز نعمت مصعوقة من المصايب اللي عملناها..و يوم ما دينا كسبت الرسمة بتاعتها ..و استاذنا ايمن (مستر الرسم) و نغني اغنية الكرتون بتاعة (عضمة و بيانو و مزروع... لايقة علينا الاسماء) .. و يوم الفن داي و اتصورنا مع مستر عصام (ماث) و مع ابنه و مراته..و فاكرين بووووووووووووسطاااااااااااااة" ... و شنطة البوسطجي و ماتشات الكورة الطايرة اللي عمري مالعبتها مش كنت باحبها.. بس كنت باحب اتفرج عليكي يا دينا يا لعيب مع مستر رضا و باقي العيال و المدرسين... و مستر رضا و و يمضي ع الفلوس ..و ميس عليا العيوطي.. و لما شروق رشينا علي شعرها بودرة تلك عشان تبان انها عجوزة عشان تمثل الملك لير في تانية اعدادي..و سالي عملت دور بنتها ..و انا عملت مونولوج هاملت... و لما في الاذاعة قلت "قناة في الودن" بدل في الاذن و كانت فضيحة ... و لما عملنا في الاولي ثانوي الشو بتاع الحضارة المصرية بالعربي و هو المفروض يكون بالانجليزي..و طلعنا قصاد المديرة بكل براءة نترجم فوري.. لا و الانقح انها اختارتنا احسن فصل عشان عرفنا نتصرف اصلا.. و الفراشات اللي بالابيض و الاسود اللي رسمتيها ..و"طارت" مع الايام دي..و معرفتيش تجيبيها تاني .. رحلة معرض الكتاب..و هند ايمن و عبد العزيز..و انجي و سارة , صورة المدرسة العاهات..و سالي معرفش عملت ايه في شعرها..و يمني ..و مدام جيهان... و نسألها انتي عاملة شعرك بيرمننت فين؟ و اول مرة كنا عيال نشوف مستر شوقي بتاع الفيزيا ز معاه المساعدين بتوعه شايلين الشنطة.. و لما كنا نقعد نلعب كوتشينة و غمزة و قاعدين ع الارض و يوم ما نقلنا من المبني ده.. للمبني التاني.. في ثانوية عامة..و هدي وقفت جنب الشباك تقول ح توحشنا المدرسة.. و محضرات علاء الفقي و احمد شمس ..و احمد عبد الفتاح..و انا اجي احضر غلاسة..و التاريخ ميس هدي... و حفلة الترابيزة المقلوبة..و يومها اتأخرنا اصلا ع الحفلة..و ميس دعد و بنتها..و اقول لعمو " اي حتة حضرتك ع اليمين هنا".و رحلة متحف احمد شوقي و طلعنا بعديها علي سيتي سنتر..طب بلاش..فاكرين الديش بارتي؟ و فاكرين "المربع" و البطريق"..و ال سيييل" ههههههههه... و الصور مكتوب عليها!!!
Wanted elMoraba3


و الصور الكاريكاتير اللي رسمتيها يا عزة ووزعناها منشورات سرية و الاغنية اللي كتبتوها..طب فاكرين لما لقينها بعد سنين كتييييييير الاغنية دي وسط حاجتنا..انا لقيتها محطوطة في قاموس لونج مان.. مكتوبة بخطك يا دينا


...
Then, the busy years went rushing by us


We lost our starry
notions on the way


If, by chance, I'd see you in
the tavern,


We'd smile at one another and we'd say
...
و لما غرقنا الفصل و الدنيا بالمياه..و انجي تمسح الديسك... و طبعا فاكرين: ايه و رنا و ريهام و ميس احلام (بتاعة العربي)...و ميس رحاب (انجليزي) ..و اول مرة اكلت بطاطا من الشارع بسببك يا عزة... و انا قرفانة اوي .. بس يخربيت كدة كانت احلي حاجة اكلناها سوا.. و لما عييطت بعد امتحان الجيولوجيا... كنتي اول حد اقابله بعد الامتحان..و انهرت..و ميس ايمان مكتبة. .و مدام مديحة الوكيلة..و تقولنا دول "ولادنا" ... و مستر الطريقة الحضارية: اتكلموا بطريقة حضارية ... ارفعوا ايديكوا بطريقة حضارية ...نزلوا ايديكوا بطريقة حضارية هههههه .. و ميس مها دراسات اجتماعية .. و ميس ميرفت لما نديناها من فوق ... عشان نقولها انها سايبة نور عربيتها منور.. كان يوم مطرة جامد في اولي ثانوي..والله انا لسة فاكرة.. حفلة عيد الام في المدرسة و الورد و الهدايا.. و لما كنا بنزين الفصل و نعمل مسابقة انهي احلي فصل ..و السلحفاة اللي كانت في المعمل و مستر خالد عمران و قعها من ايده لغاية ما ماتت.. و ميس نرمين جيولوجيا و اناقتها...و المصاصات في اي رحلة مهما كنا كبار شحطة..والله عندي صورة ليكوا بالمصاصات .. و حصة الالعاب ... و ماتش كرة قدم .. و مستر مدحت.. و جيجي و البيسين ههههههه... و مستر اسامة عربي و الموبيلات ...و انتي و سالي تروحوا مشي..و انا ودينا نطلع عند مدرسة الابتدائي عشان اجيب هدير اختي..و استني عم يحيي..و ايس كريم دولسيكا مانجة في الصيف علي طول .. متعة ... و يوم ما دينا وصلتني عشان لقيت السواق مشي..افتكرته نسيني...وانا صعبت عليها يومها ... و الشربات اللي بالنملة يا دينا..( الله يسامحك ).. و بعد الامتحان..طلعنا كلنا في هجوم تتاري علي وصاية ..و سندويتش الزعتر (معرفش كنتي بتحبيه علي ايه يا عزة)...و في امتحانات تالتة اعدادي..و اخر يوم نتخانق مع ميس نعمت عايزين نلبس لبس خارجي..و كنا في مدرسة البويز( الصبيان يعني) ساعتها...و كانوا بيفرقعوا صواريخ كل يوم عشان الغلاسة ...و يوم ما دينا اتحجبت...و رحنا نضحك عليكي و نقولك الحقي دينا ايدها اتكسرت.. و ربطة ايشارب البدو بتاعتها هههههه...ح تاخد الناقة اصلها... و مستر نبيل موسيقي..و حصة الرسم و الموسيقي في البدروم ..و يوم ما ميس سعاد الله يمسيها بالخير حكت حكاية رجل المعزة بتاعة المقابر ههههه و انا اعيييييط ... الخرز بتاع الفن داي..و نعمل العقد و السلاسل و الغواييش..و تنزلي انتي و سالي النمرسي و كل شئ ..و مستر طهطاوي .... فاكرة ميس هدي صالح؟..مش فاكرة ذنبتك ليه واخدت المقلمة!!...وكانت فيها سندوتش اصلا ههههههه مش فاكرة كان ايه اللي حصل !! مصايبنا كانت كتير..و ميس احسان ..و محاضرات اشرف حمزة تحت في القاعة الكبيرة.. و سندوتشين الطعمية ليه.. و هما اللي قالولي..و اشاور عليكوا و انتم مبتسمين ابتسامه بلهاء . ودريم بارك...و انا باصرخ ع التوب سبين..و انتي و انجي تحت بتضحكوا اصلا ... و يوم النتيجة.. و قاعدين ع السلم مستنيين يعلقوها وكنا خلاص عرفينها من ع النت بس عايزين نتأكد ... ودينا كانت حلمت لي بنتيجتي ..و نجحنا يا اوغاد :) بيوم رحنا نسحب الملف من المدرسة...و مستر احمد عزمنا علي سفن اب..و مفيش غير ازازتين في المدرسة و قاموا مقسمينها علينا...كنت انا و انتي و دينا و سالي و هند و يمني هههههههههه...و سحبنا ملف المدرسة..و كانت اخر مرة نكون فيها كلنا هنا
...


Through the door, there came familiar laughter


I saw your face
and heard you call my
name


Oh, my friend, we're older
but no wiser


For in our hearts, the dreams are still the same
....
التدوينة دي تبان شخصية لكثرة تفاصيلها و الشفرة اللي فيها...لكن اكيد كل واحد فينا مكان بينتمي ليه مع ناس بتعيد له حياة مش بس ذكريات....وعشان كدة التدوينة ديه انا باهديها لاتنين انا عارفة انهم لما بيفتكروا الايام دي فيه ابتسامة عريضة ببترسم علي وشهم..و دمعة بتلمع في عينيهم..و تنهيدة من القلب بجد و تأثير الحنين بيظهر ...و ضحكة صافية ع الايام دي.. ايام هي اللي خلتنا احنا دلوقتي بشخصيتنا و طريقتنا..لان المكان مكنش مدرسة عادية و لا شوية زمايل و ذكريات هبلة... كان حاجة معناها كبير ليها فضل علينا كبير للتلاتة اللي موجودين النهاردة في مجالات مختلفة... الي الاتنين دول اهدي لهم شريط الذكريات ده.. و اقولهم ماتزعلوش ع الايام دي... لسة مارحتش زي ما انتم فاكرين.. طول ما احنا عايشين.. ح تفضل عايشة ويانا.. و ح تفضل نقطة النور اللي دايما بتديني جرعة الشحن عشان نكمل..,و يا ريت زي ما كنا بنغني في المدرسة .. يا رب نكون "ناجحين علي طول" و بعدين هو الانسان ايه غير شوية ذكريات فوق بعضها


:)


...


Those were
the days, my friend


We thought they'd
never end


We'd sing and dance
forever and a day


We'd live the life
we'd choose


We'd fight and never lose


Those were the days, oh yes,
those were the days


____



الاغنية العربي اللي فوق: هي تعريب الاغنية الانجليزي زي ما كنا بنقولها في المدرسة و زي ما فكروني بيها


الاغنية الانجليزي: Those were days my friend



Monday, January 15, 2007

So True..!



" Like as the waves make towards the pebbled shore


So do our minutes hasten to their end,"


___


Shakespeare: Sonnet LX

Thursday, January 4, 2007

ياللا حالا بالا حيوا أم الفصاد






حصاد سنة 2006 بيبدأ عندي يوم اربعة يناير عشان عيد
ميلادي (و اربعة من واحد ينايرمتفرقش كتير!!) والحقيقة بما ان السنة دي عيد ميلادي مميز ..مميز جدا كمان.. عشان الامتحانات طبعا...و ايام العذاب...و عشان علي مدار العشرين سنة اللي فاتوا عيد ميلادي يجي في الامتحانات.. بذمتكم ده مش افترا!!!.. .لكن الميزة التانية لدواعي الاكتئاب هي اني بقي عندي 20
سنة... دلوقتي واحد من الجمهور ح يسأل ليه تكتئبي؟ والله معرفش هما قالولي (هما مين؟) ان اللي بتم 20
سنة يجيلها اكتئاب علي طول..سلو بلدنا كدة.... ما علينا ..فعشرين سنة كدة جريت و راحت الحمد لله من ايام العيلة الصغيرة اللي في الصورة (انظر الشكل ص 7) للبنت اللي بتحب المدرسة..و من الثانوية للكلية لحلم بيت الزوجية مستنية (مع الاعتذار للاغنية و الاعتذار لبيت الزوجية هو كمان) للاخت اللي بتكلمكوا دلوقتي من هذا المزنق... بالنسبة لتقييم سنة 2006 فهي راحت بحلوها و مرها...و لو نظرنا للامر من الموقع الاستراتيجي ده( انظر الرسم البياني الغير موجود) ح نلاقي السنة انقسمت بقدرة قادر الي 6
شهور حلويين وولاد حلال..ثم الي النصف الاخر – اللي هما برضه يا سبحان الله طلعوا بعد الحسابات و الخصومات 6
شهور برضه- المهم النصف التاني ده من السنة كان اي كلام و مش راضية عنه من الاخر كدة... كان مليئ بالانتكاسات و الخزعبلات و الاكتئاب و المضايقات و الحبشتكنات..و لو ح اتكلم عن 2006 في سطور - هذا العام الغير مأسوف عليه بالمرة ... حنلاقي 300 حالة انفلونزا و برد و عيا و سخونية..و 56 اشتباه بس انه دور برد... ودخلت برجلي اليمين عالم التدوين و ادينا هنا اهو مع بعضينا .. اما احلي حاجة (وهنا الدموع في عينيا بقي) هي اصحابي و صحباتي هنا و محلك سر (علي رأي المبجلة صفاء ابو السعود-اللي فضلوا معايا علي طول الخط...( ممكن كلينكس؟) و عرفت ناس جديدة (ودي تاني حسنة ل 2006)... اما عني.. فحدث و لا حرج.. فقد اكتشفت بلاوي عني... حاجات فيا كتير اتغيرت...بس يللا..حسن الختام بقي :) وها انا الان مولودة برج الجدي العنيدة المتشائمة المرحة الرغاية الباردة الكسولة الصبورة تمت العشرين سنة .. يا حالولي .. بس الفكرة بقي.. يا تري يا هل تري السنة الجاية ح اكون فين؟ اسمع منكم الاجابة بعد هذا الفاصل..ابقوا معنا


.....


ملحوظة: اللي عايز يجيب هدية - انا باقول اهو- انا لا عايزة حلة تيفال و لا طقم كوبايات اشيله لجهازي ..و لا عايزة برواز صور عشان بتغاظ منهم.. و انت عارفين اني مش بالبس ساعة فبلاش منها مش باحبها برضه .. فمش زي كل سنة الاقي ساعة الله يكرمكوا..اه و مش عايزة دباديب و ارنوب و بتاع انت مش بتدي هدية لكاظم الساهر .. اللي عايز يديني هدية .. ممكن لكلوك عشان البرد ... او غزل بنات (نفسي فيه محدش يعترض) يا اما تيسيرا علي الاخوة ممكن ارضي نــكــتـــــــــة (بقالي مدة ماسمعتش نكتة و الله حاجة نكد) يا اما دعـــاء (ليا مش عليا)عشان الامتحانات..و يجوز الاثنان لدي بعض الفقهاء...او ممكن يخلص من الورطة دي و يسيب 75 قرش و يخلع


......


ملحوظة تانية غير الاولانية : احب من هذا المزنق اهني كل اللي عيدم ميلادهم معايا و لسة جاي علي مدار شهر يناير العزيز بطابيط و ادم المصري و احمد باشا شقير
و فارس الاخير
و لست ادري و سوسة المفروسة و ايـــام و كل حد معدي من هنا من مواليد برج الجدي .. و العاقبة عنكم في المسرات و ربنا ما يوقعكم في امتحان ابدا


....


انقطع الاتصال مع مراسلتنا


يبدو ان ورقة الامتحانات وقعت فوق نافوخها


و يشتبه احتجازها في لجنة الامتحانات


مع تلك الكائنات المخيفة من مراقبين و دكاترة


و استخدام ادوات التعذيب من استجوابات خارج المنهج


و سنوافيكم باهم الانباء


و سمعني اجدعها النهاردة بقي عمري عشرين مع الاعتذار لمنير


سنعود بعد .... كتـــــــير