Friday, June 30, 2006

احكيلك أجمل حكاية



نحكيلك اجمل حكاية
عن قصة حب و قلبين
صارت بدنياهم اجمل


يا اغلي من ضي العين



اعتقد ان احنا لازم نقعد ونتكلم زي اتنين عاقلين كدة
من زمان متكلمناش
انا عارفة ان النهاردة ماهواش عيد ميلادك
و لا عيد الجلاء حتي
بس حاسة اني عايزة اكلمك




جيتي و صيرتي
انت الابدي
انت الدنيا و الايام
انت الحاضر


انت باكر
انت العذب من الاحلام



بقالي كتير ماشية في الطريق لوحدي
وانت مدياني كارت بلانش- ضوء اخضر يعني لحرية التصرف
اخترت كل حاجة من طأطأ لسلام عليكم
الكلية اللي كان نفسي فيها
الانجليزي اللي حياكل دماغي
مثلث الرعب- اصحابي
لحظاتي الجميلة التي طالما حاولت حبسها في صندوق الذكريات


من تذكرة سينما و امضاء


لوردة دبلانة


مع صور لطفلة صغيرة...بشبه عليها


رب يخلي هذه الضحكة
تملا عمرك فرحة و نور
رب يخلي
رب يسلم


ويحميكي من كل شرور


بنوتة صغيرة بتلعب مع العصافير الملونة في بيت جدتها


كبرت شوية و حفظت اغاني نيللي و شريهان


شبّت حّبة و دخلت مدرستها الجميلة


والفصول الدافية


واوضة الرسم اللي في البدروم



بكرة لما الحلوة تكبر
و القامة تطول شبرين
لما تمسك قلم و دفتر


و تدرس علم و عربي و دين



حاولت انجح..ولسة بحاول
لسة بحاول افتكر رقصة شريهان


لسة بدوّر علي رائحة البخورفي بلكونة جدتي


بس بخاف من العصافير اللي طايرة ف السما


و لما تكبر
اكثر و اكثر
و يتمم ربي بالخير
ولما نشوف الام الحلوة


تحكي حكاية عن قلبين


اوعي تيأسي مني بسرعة
استحملتيني كتير
بعنادي
ببرودي
بلا مبالاتي
بتسرعي
بغبائي
باخطائي
بقلبي اللي بيقولوا عليه قاسي




صارت دنياهم اجمل



خذلتك كتير...بس بحاول عشان خاطرك
عشان اشوف الابتسامة دي تاني
عشان اشوف عينيكي اللي بتلمع بالحب




يا اغلي من ضي العين



ممكن
تديني فرصة تانية
لأعيد اليك البراءة
الصفاء
الهدوء
راحة البال؟
ممكن؟




نحكيلك اجمل حكاية



اقولك علي سر
لمّا بشوف الصورة دي بأحس ان بقالي كتير اوي عايشة
واني لسة عايشة
وانه لسة ممكن
لسة ممكن اقلب صفحة جديدة
غير الشخبطة اللي مالية الكراس

تيجي تلوني معايا الصفحة الجديدة
؟
_____________


نحكيلك اجمل حكاية